Toshkent davlat sharqshunoslik universiteti Turizm ishchi guruhi Farg‘ona viloyati Rishton tumanining turistik salohiyatini o‘rganish va uni keng targ‘ib qilish maqsadida hududda amaliy faoliyat olib bormoqda.

Ishchi guruh tomonidan Rishton tumanidagi Xalqaro kulolchilik markaziga tashrif amalga oshirildi. Tashrif davomida talabalar markazning tashkil topish jarayoni, faoliyati, kulolchilik an’analari hamda hududdagi hunarmandchilik ustaxonalarining o‘ziga xos jihatlari bilan yaqindan tanishdilar.

Ayniqsa, talabalar kulolchilik ustaxonalarida olib borilayotgan amaliy jarayonlarni o‘rganib, ular haqidagi ma’lumotlarni o‘zlari tahsil olayotgan sharq tillarida yoritish ustida ish olib bormoqda.

Tayyorlanayotgan kontentlar ijtimoiy tarmoqlar orqali keng auditoriyaga taqdim etilib, Rishtonning boy madaniy merosi va turistik imkoniyatlarini xalqaro miqyosda targ‘ib qilishga xizmat qiladi.