Toshkent davlat sharqshunoslik universiteti Turizm kafedrasi tomonidan hududlarda turizm sohasiga malakali kadrlar tayyorlash, yoshlarning sohaga oid bilim va amaliy ko‘nikmalarini oshirish, ularni turizm industriyasidagi zamonaviy kasblar bilan yaqindan tanishtirish hamda hududlarning turistik salohiyatini targ‘ib qilishga qaratilgan tadbirlar izchil davom ettirilmoqda.
Shu maqsadda TDSHU Turizm kafedrasi mudiri, iqtisod fanlari nomzodi, dotsent Ch. Xusanov tomonidan Surxondaryo viloyati Boysun tumanidagi 3-son texnikumning turizm ta’lim yo‘nalishi o‘quvchilari uchun “Turizm sohasi va turizmda zamonaviy kasblar” mavzusida ochiq dars o‘tkazildi.
Ochiq dars davomida o‘quvchilarga turizm sohasining bugungi kundagi rivojlanish tendensiyalari, uning hududlar iqtisodiyoti va aholi bandligini ta’minlashdagi o‘rni, turizm industriyasining asosiy yo‘nalishlari hamda sohada shakllanib borayotgan yangi va istiqbolli kasblar haqida batafsil ma’lumot berildi.
Xususan, gid-ekskursovod, turizm menejeri, turoperator va turagent, mehmonxona menejeri, turizm marketologi, SMM mutaxassisi, turistik kontent yaratuvchi, turistik destinatsiya menejeri, ekoturizm va gastronomik turizm bo‘yicha mutaxassis kabi zamonaviy kasblarning mazmuni, ularning asosiy vazifalari hamda ushbu kasblarni egallash uchun zarur bo‘lgan bilim, ko‘nikma va kompetensiyalar amaliy misollar asosida tushuntirildi.
Mashg‘ulotda turizm sohasida xorijiy tillarni bilish, raqamli texnologiyalardan samarali foydalanish, kommunikativ ko‘nikmalarga ega bo‘lish, mijozlar bilan ishlash madaniyati hamda hududning tarixiy-madaniy va tabiiy turistik resurslarini chuqur bilish zamonaviy turizm mutaxassisi uchun muhim ahamiyat kasb etishi alohida ta’kidlandi.
Shuningdek, Boysun tumanining boy tarixiy-madaniy merosi, betakror tabiiy landshaftlari, milliy urf-odat va an’analari, folklori, hunarmandchiligi hamda gastronomik salohiyatidan samarali foydalanish orqali hududda yangi turistik mahsulot va xizmatlarni shakllantirish imkoniyatlari haqida fikr almashildi. O‘quvchilarga kelgusida o‘z hududining turistik salohiyatini professional tarzda targ‘ib qila oladigan malakali gid, turizm tashkilotchisi va zamonaviy turizm xizmatlari mutaxassisi sifatida faoliyat yuritish imkoniyatlari tushuntirildi.
Ochiq dars interaktiv tarzda tashkil etilib, savol-javoblar, amaliy misollar va muhokamalar orqali o‘quvchilarning faol ishtiroki ta’minlandi. Mashg‘ulot yakunida o‘quvchilarni qiziqtirgan savollarga javob berilib, turizm sohasida kasbiy rivojlanish, xorijiy tillarni o‘rganish va zamonaviy raqamli ko‘nikmalarni egallash bo‘yicha tegishli tavsiyalar berildi.
“Dam olish kunlari Boysunda” shiori ostida targ‘ibot tadbiri
Ochiq dars yakunida TDSHU Turizm kafedrasi ishchi guruhi tomonidan texnikum o‘quvchilari uchun “Dam olish kunlari Boysunda” shiori ostida hududning turistik salohiyatini keng targ‘ib qilishga qaratilgan taqdimot va targ‘ibot tadbiri ham tashkil etildi.
Tadbir davomida Boysun tumanining noyob tabiiy maskanlari, tarixiy-madaniy obidalari, boy etnografik merosi, milliy urf-odat va an’analari, hunarmandchiligi, gastronomik imkoniyatlari hamda sayyohlik yo‘nalishlari haqida ma’lumotlar taqdim etildi.
Ayniqsa, TDSHU talabalarining Boysun tumanining turistik salohiyati haqida turli Sharq tillarida qilgan chiqishlari texnikum o‘quvchilarida katta qiziqish uyg‘otdi va ularda katta taassurot qoldirdi.