Tashrif davomida Boysun folklorining hudud turistik salohiyatini oshirish, uning o‘ziga xos etnomadaniy qiyofasini namoyon etish va turistlarda unutilmas taassurot shakllantirishdagi ahamiyatiga alohida e’tibor qaratildi.
Boysun folklori — bu nafaqat xalq qo‘shiqlari, raqslar va milliy marosimlar majmui, balki avloddan avlodga o‘tib kelayotgan jonli nomoddiy madaniy merosdir. Folklor jamoalarining chiqishlari orqali sayyohlar Boysun xalqining turmush tarzi, urf-odatlari, milliy liboslari, musiqa va ijro an’analari bilan bevosita tanishish imkoniyatiga ega bo‘ladilar.
Folklor dasturlarini turistik marshrutlar, festivallar, madaniy tadbirlar va etnoturizm dasturlari bilan uyg‘unlashtirish Boysun tumaniga tashrif buyuruvchi mahalliy va xorijiy turistlar uchun jozibador turistik mahsulotlarni shakllantirish imkonini beradi. Bu esa turistlarning hududda qolish muddatini uzaytirish, mahalliy xizmatlarga bo‘lgan talabni oshirish hamda Boysun turistik brendini yanada mustahkamlashga xizmat qiladi.
Shu jihatdan, Boysun folklor jamoasi milliy qadriyatlarni asrab-avaylash bilan bir qatorda, hududning madaniy va etnografik turizm salohiyatini rivojlantirish va Boysun nomini keng targ’ib etishda muhim o’rin tutadi.
Boysun folklori - ajdodlardan qolgan meros, bugungi turizmning jozibador mahsuloti va kelajak avlodlarga yetkaziladigan bebaho qadriyatdir.

Toshkent davlat sharqshunoslik universiteti Turizm ishchi guruhi Boysun tumanidagi Hunarmandlar uyiga tashrif buyurib, uning faoliyati, mahalliy hunarmandchilik an’analari hamda turizmni rivojlantirishdagi o‘rni bilan yaqindan tanishdi.
Tashrif davomida Boysun hunarmandchiligining hudud turistik jozibadorligini oshirish, milliy va madaniy merosni asrab-avaylash, mahalliy ustalar faoliyatini qo‘llab-quvvatlash hamda sayyohlar uchun o‘ziga xos turistik mahsulotlarni shakllantirishdagi ahamiyatiga alohida e’tibor qaratildi.
Hunarmandlar uyi nafaqat milliy an’analar va qadriyatlarni namoyish etuvchi maskan, balki turistlarga Boysun madaniyati bilan bevosita tanishish imkonini beruvchi “jonli muzey” sifatida ham muhim ahamiyat kasb etadi. Bu yerda sayyohlar hunarmandchilik buyumlari bilan tanishish, ularning yaratilish jarayonini kuzatish va mahalliy ustalar bilan muloqot qilish imkoniyatiga ega bo‘ladilar.
Hunarmandchilikni turistik yo‘nalishlar bilan uyg‘unlashtirish Boysun tumanining etnografik va madaniy turizm salohiyatini yanada oshirish, yangi turistik mahsulotlar yaratish, mahalliy aholi bandligi va daromadlarini ko‘paytirishga xizmat qiladi.