ERLAR DEGREDATSIYASI

Bundan 10 yil, ya'ni 2015-yil Eryigit degan sahifa ochgandim. Facebookda. Ziyolilar, ustozlar qo'llovi bilan tezda ommalashgan edi.

Chunki millatni, xalqni, Vatanni, Davlatni, yurtni faqat ERKAKLAR, ERLAR, ERYIGITLAR himoya qila olishini, oyoqqa qo'yishini, ulug'lashini juda ham chuqur anglagandim.

Alloh rahmat qilsin, Azim Suyun yozganidek:

Qaysi yurtda chinakam botir bo'lsa yigitlar,
O'shal yurtning ellari yovlarga qul bo'lmagay!

Bu haqiqatni oltin bilan ham yozsa kam. Bu so'zni yodlab, har kuni 1001 marta takrorlab yurish kerak. Takrorlangan so'z qalbga singadi. Qalbga singib, sizni harakatga keltiruvchi kuchga aylanadi.

Feminizm va gender tengligi shu kabi bir qancha gap-so'zlar bu bayt, baytdagi g'oya oldida mudhish bir tubanlikka qulaydi.

O'quvchi bolalarga atlas kiydirishgani rasmi tarqaldi.

Agar bolamni maktabda haydab yuborib, o'zimni jazolasalar ham, inshaaAlloh, bunday kiyimni kiydirmas edim dedim ichimda.

2000-yildan keyingilar, 2005-yildan keyingilarnining ahvolini bilasizlarmi?

Shu vaqtda tug'ilganlar haqida aytyapman.

Maktabda ustozini urgan, yigit talashib bir-birni vahshiylarcha yulgan qizlar haqida videolarni ko'rib turibsizlarmi?

Shu yoshdagi bolalar, o'smir o'g'illarning sezilarli darajada noziklashayotgani sezilyaptimi sizlarga ham?

Yigitman deganlarning pardozga vaqt ajratishi, tor kiyinib, o'zini oshkora ko'z-ko'zlashi ommalashib ketmayaptimi?

Turli vaynlardadagi hezimtabiat aktorlarning jilpanglashi-chi?

Azim Suyun bobo, siz nimalarni yozgan edingiz-a?

Qaysi yurtda chinakam botir bo'lsa yigitlar...

Botirlar qani? Tog'ni ursa talqon qiladigan o'g'lonlar qani? Sha'niga tekkanni g'ijimlab tashlaydigan eryigitlar qani, birodarlar?

Onasi, singlisi, opasining nomi, iffatini himoya qiladigan ERKAKLAR qayerda qoldi, do'stlar?..

50 - 60 kirgan yoshi katta erkak odamlarning ham yosh ko'ringisi qistab o'ziga oro berishlarini kuzatyapszilarmi? Kallari soch ektiryapti, basharasining g'ijimlarini yoydiryapti va hokazo...

Bu voqeliklar ortida mudhish va mudhish ma'naviy chirish turibdi, shubhasiz.

Ma'rifat, ilm, e'tiqod, din, insoniylik tarbiyasidan mahrum qolgan yoki qoldirilgan avlodning bo'm-bo'sh miyasi, bo'm-bo'sh qalbi...

Gap eryigitlar haqida ketyapti, taqsirlar.

Yana ko'ryapsizmi shuni - aksar o'g'illarda kesib gapirish yo'q, dag'allik, qattiqqo'llik, chidam yo'q.

Davralarni to'ldirib jilpanglash o'ta odatiy bo'lib qoldi. Nazarimda, normal erkak uchun bu jirkanch bir manzaradir. Ammo bu haqiqatni anglash uchun ham qalbda, aqlda ma'rifat, ilm, tarbiya bo'lmog'i kerak.

Butun xalqni raqqosga aylantirib, topgan pulini shilishga shay artislar lashkari ham javlon urib ishlamoqda, kundan-kun ko'paymoqda.

Yana Azim Suyun boboning gapiga qaytamiz:

Bosh kesilsa, yoronlar, sochga motam tutilmas!

Hazrat shoirim, boshimiz kesilib ketgan allaqachon, biz esa soch uchun motam tutib o'tiribmiz.

Qon qusilsa, yoronlar, ichga suvdek yutilmas!

Qon yutib yotibmiz, Azim Suyun bobo!

Ammo yutayotganimiz qon, berayotganimiz jon ekanligidan umuman xabarimiz yo'q.

Yana xorijga chiqib xalqqa qarab uliyotgan shoqollar bor. Bu peslarning gapiga quloq solib, shularning gapi bilan tutum topayotgan ayrimlarni ko'rib faqat va faqat hayratga cho'kamiz.

Yurtdan tashqari chiqib, demokrat atalmish "Tribule qalpog'ini" (yozuvchi Sherzod Ortiqovdan oldim bu gapni biroz o'zgartirib) , ya'ni bani isroil qavmi ishlab chiqargan rangdor masxaraboz qalpog'ini kiygan nojinslar odam o'rniga o'tadimi, axir?..

Hamma o'ylanishi kerak bo'lgan jiddiy masala - millatning o'g'il bolalari degredatsiyaga uchrash bosqichiga kiryapti.

Hamma aqli solim va aqli raso insonlar birgalashib masalani hal qilish kerak - bolalarimizni jismonan chiniqtirib, haqiqiy eryigit qanday bo'lishini o'rgataylik.

Eryigit tarbiyasi degan alohida fan joriy etaylik maktablarda.

Qizlar alohida masala, zotan, erlar tarbiya topsa, xotinlarning o'zi tuzalib qoladi.

Qo'rqmaslikni, qaytmaslikni, birso'zlilikni, shiddatni, hikmatni, mehnatni, kurashni o'rgataylik o'g'illarimizga!

Qutqaraylik ularni ijtimoiy qarmoqlardan!

Bu masalani davlat miqyosiga ko'tarish va tezda kechiktirmay hal qilib chiqmoq kerak.

Fizika, matematika, kimyo va shu kabilarni hamma ham o'qiy olmaydi (bu fan egalari hamisha topiladi va yerda qolmaydi bu ilmlar).

O'qiy olmasa ham inson hayotda yashayveradi, nasl-nasab davom etaveradi.

Ammo eryigitlar tarbiyasi bo'lmasa, nasl-nasab bo'lmaydi, hayot bo'lmaydi, biz yo'q bo'lib ketamiz, Xudo saqlasin.

Yuqoridagi maqolani yozdik.
Masala dolzarb.

Oʻzimiz ushbu kanalni ochishga qaror qildik.

Vazifamiz:

1) ota va bobolarimizning eryigitlar tarbiyasidagi tajribalarini oʻrganish;

2) bu tajribalarni yigʻib, yozib nasihat uslubida bayon qilish;

3) bu oʻgitlarga imkon qadar ixlos bilan amal qilish.

Maqsadimiz:

1) matonatli, qat’iyatli, yomon axloqdan xoli, yaxshi axloqqa ega er inson boʻlish, mard boʻlib yashash;

2) oʻgʻillarimizning yetuk xulqli, bir soʻzli, oriyatli, kuchli, iymonli qilib tarbiyalash, ya’ni Najmiddin Kubro, Jaloliddin Manguberdi, Amir Temur, Muhammad Shayboniy kabi ulugʻ zotlarning munosib avlodi qilib yetishtirish.

Mavzularimiz:

1) ichki olamga oid fazilatlar tarbiyasi va illatlar muolajasi;

2) jismoniy salomatlikka oid toʻgʻri ishlarga da’vat va tavsiyalar;

3) tarixiy voqealar va hikoyalardan ibratlar;

4) hayotiy misollar va ulardan kerakli xulosalar.

Aziz doʻstlar!

Duo qiling, qalbingizdan xayrixoh boʻling, Parvardigor bizga madad bersin!

Toʻgʻri soʻzlarni ayttir, Xudovando Karim!

Soʻzlarimizga ixlos ila amal qilishga madad ber, Robbim!

Bizni toʻgʻri yoʻlda yurganlar izidan yurgiz, bu yoʻldan chiqarib yuborma, Allohim!

Ijtimoiy tarmoq ijtimoiy qarmoq boʻlib qolmasligi uchun obunalarni keskin kamaytiring.

Faqat eng muhim, jiddiy, savodli odamlarni kuzating.

Eng zarur odamlar raqamlarini telefonda saqlang.

Kerakli odamlar bilan kerakli gaplarni gaplashing.

Hamma narsadan xabardor boʻlishga intilmang.

Hamma narsa haqida gapirishga urinmang.

Hammaga yoqaman deb maqsad qilmang.

Hamma bilan tanishishga, tanish boʻlishga tirishmang.

Shunda aqlingiz maydalanmaydi, telefon nomli qurol sizni oʻldirmaydi, ijtimoiy tarmoq ismli qarol sizni minib olmaydi, balki sizga xizmat qiladi, manfaat keltiradi.

1-qoida

Quloqni, koʻzni tiy eplasang agar,
Aql-u qalbing aslo koʻrmagay xatar!
Tilingni saqlasang omondir boshing,
Behuda soʻz sabab oqqaydir yoshing!

Sharh:

Inson vujudi bir qasr. Bu qasrning podshohi qalb, vaziri aql. Podshoh hamda vazir sotqin boʻlsa, qasr xarob, eli qul boʻladi.

Quloq va koʻz eshik kabidir.
Agar eshik ochiq qolsa, qasrga dushman kiradi. Podshoh va aqlni asir oladi va oʻz hukmiga yurgizadi.

Quloqdan kiradigan dushman — foydasiz soʻzlar, gʻiybat, safsata, qoʻshiq, kuy va shu kabilardir. Bularning hammasi qalbni oʻldirib, aqlni falaj qiladi.

Koʻzdan kiradigan bosqinchi — birovlarning mahramiyati, kinolar, turli tomoshalar va shu kabilardir.

Ikki eshikdan kirgan istilochilar Sizni teranlikdan mahrum qiladi. Gʻayrat va shijoatni oʻldiradi. Tushkunlik va qaygʻuga kishanlaydi. Ichingizdagi ma’naviy xastaliklarni uygʻotib, qurollantiradi.

Tilning ikki vazifasi bor:

1) maqsadni bayon qilish;
2) hikmat, ilmni yetkazish.

Boshqa ishni qilgan til mazlumdir. Chunki egasi uni boshqa ishga majburladi. Tilga u istamagan ishni qildirdi.

Endi til qasos oladi. Egasining boshiga yetadi.

Til gʻiybat qilsa, chaqimchi boʻlsa, nooʻrin gapirsa, shunchaki, valaqlab tursa, unga qilingan zulm shudir.

Demak, tilingni asrasang omondir boshing.
Inson oʻylamay gapirsa, gapi behuda chiqadi. Bu gap uni obroʻsiz qiladi. Hurmatini yerga tushiradi.

Albatta, behuda soʻz dushmanga asir tushgan aql va qalbdan keladi.

Doʻstim!

Bekorchi odamlardan qoch.

Facebook, instagram, tiktok, youtubeni telefondan oʻchir.

Koʻzingni asra. Qulogʻingni himoya qil.

Har narsani gapirma. Sukutni saqla. Ijtimoiy qarmoqlarga izoh qoldirma. Post yozma.

Aytganlarimga amal qilsang, bu katta yaxshilikning boshlanishidir, Xudo xohlasa!

Senga muhim qoidalarni eslatib boraman. Ularni yoz, qayta-qayta oʻqi, yodla va amal qil!

Ishon, hayoting, albatta, yaxshilikka oʻzgaradi! Zotan, bu mening shaxsiy gaplarim emas, ota-bobolardan qolgan hikmat gavharlaridir. Bu gavharlarni olganning qadri yuksak va yoʻli ochiq boʻlgay!

👉 Eryigit tarbiyiasi kanaliga obuna bo'ling

1-qoidani tinglang!

👉 Eryigit tarbiyiasi kanaliga obuna bo'ling

2-qoida

Eski zamonlardan beri ayollar
Qoshida oʻsma-yu, yuzida xollar!
Sen ersan, haqiqiy er kabi koʻrin!
Oʻzingda ziynatga bermagil oʻrin!

Sharh:

Er oʻz nomi bilan er. Xotin oʻz nomi bilan xotin.

Er aqlli, kuchli va boshqaruvchidir.

Ayol tuygʻuchan, zaif va ergashuvchidir.

Er oʻz nomiga muvofiq uzoqni koʻradi, shoshmaydi, sabr qiladi, kurashadi, gʻolib boʻladi.

Xotin oʻz nomiga koʻra kalta oʻylaydi, shoshadi, sabrsizlik qiladi, aksar vaqt yengiladi.

Erning ishlarini xotin aslo qila olmaydi.

Ayol uddalagan ishga erlar hech qodir emaslar.

Chunki olamda erning oʻz oʻrni va ishi; ayolning maqomi hamda vazifasi bor. Agar alohida-alohida ishlari boʻlmasa, er va ayolni farqlashga ehtiyoj boʻlmas edi.

Er erlik qilsa, xotin xotinligini bilsa, dunyo ishi joyida turadi.

Er ayollikka qiziqsa, ayolning odatlarini qilsa, ayolning sifatlari bilan sifatlansa, mislsiz fojia shudir.

Ayol erlikka moyil boʻlsa, erga oʻxshab oʻzini tutsa, er boʻlaman desa, erning ishlariga burun tiqsa, nazokat va latofatdan ayriladi, ayollik qiymatini boy beradi.

Eski zamonlarda ayollar eri uchun ziynatlangan.

Erkaklar ziynatni or va sharmandali ish deb bilishgan.

Bugun haddan tashqari sochlarga ishlov berish, yuzini tekislash, rango-rang kiyimlar kiyish, tanasiga igna bilan rasm solish, ya’ni oʻzini koʻz-koʻz qilish erlar orasidagi xastalikka aylandi.

Doʻstim!

Kimdir sochini boʻyasa, sen boʻyama.

Kimdir sochini oʻstirsa, unga taqlid qilma.

Kimdir tor kiysa, men ham tor kiyaman dema.

Kimdir soch ektirsa, ektirma.

Yuzining tukini tozalatsa, sen bu xotinchalishlikka aslo yaqin borma.

Bizga, oʻzbekka begona boʻlganlarning turish-turmushiga, qiyofa va qilmishiga oshiq boʻlma!

Lattaga oʻralashma.

Avratni berkitib, issiq-sovuqdan himoya etadigan yarashimli, sipo libos kiy.

Sochingni imkon qadar kalta tutsang yarashadi.

Qish-u yoz yengi uzun kiy.

Kalta koʻylak va kalta ishton kiyma.

Ichkoʻylakda yurma!

Tor kiyma, oʻz oʻlchamingdan biroz katta kiy.

Qiyofa — ichki dunyodan darak.

Qiyofangni jiddiy va kamtarona shaklga keltirsang, ichki olamingda ham tartib, jiddiyat paydo boʻla boshlaydi.

Unutma!

Tarbiyani eng avval oʻzing xohla.

Soʻng harakat qil.

Sekin-asta, qadam-baqadam chiroyli xulqni oʻzingga singdirib borasan.

Hech narsa tez bitmaydi.
Sabrsizlik qilma, umidsizlanma.

👉 Eryigit tarbiyiasi kanaliga obuna bo'ling

2-qoidani tinglang.

👉 Eryigit tarbiyiasi kanaliga obuna bo'ling

3-qoida

Yoʻqchilik haqida soʻz ketsa derlar:
“Yoʻqchilik yigitning zoʻrin sindirar!”
Bil, bu jumla erur eng katta xato,
Yoʻqchilik ortida bor erur ato!

Sharh:

Zehniyatimizga oʻrnashgan nuqsonlardan biri yoʻqchilik haqida.

Puling yoʻq, qarzing bor. Roʻzgʻorda taom pishirmoq uchun ham narsalar taqchil…

Bu bizning nazdimizda fojia.

Unday emas! Aslo!

Hashamatli uying, qimmatli uloving, obroʻ-e’tiboring yoʻqmi? Shular boʻlsa, insonlar orasida hurmat qozonaman, baxtli boʻlaman deysanmi?..

Boylik va sarvatni topish ham, undan bir zumda ayrilish ham mumkin.

Ammo eryigitda aslo yoʻqolmaydigan, zavol topmaydigan, hech kim tortib ololmaydigan boyliklar boʻlmogʻi lozim!

Bu halollik.

Bu rostgoʻylik.

Bu samimiyat.

Bu sadoqat.

Bu poklik.

Bu matonat.

Bu fahm-u farosat.

Bu kurashchanlik.

Bu jasorat.

Bu qoʻrqmaslik va hokazo.

Sanab oʻtganimiz fazilatlarning har biri bir boylikdir.

Koʻrganmisiz bozorda matonat sotilganini? Koʻrganmisiz fahm-u farosatni doʻkon peshtaxtalarida?! Yoki vafo va sadoqatni sovgʻa oʻlaroq oʻrab berish mumkinmi?

Yoʻq, albatta.

Doʻstim!

Sen ana shu fazilatlarni kasb qil. Ana shu xislatlarni oʻzingda kashf et. Shu yaxshi xulqlar bilan yasha.

Inson boy, puli koʻp, lekin insofsiz, yolgʻonchi, xiyonatkor, ikkiyuzlamachi, takabbur, farosatsiz, tulkidek ayyor boʻlishi mumkin.

Boyligi goʻyo goʻsht, atrofida pashshalar bisyor. Goʻsht gʻoyib boʻlsa, pashsha va arilar ham gʻoyib.

Ya’ni soxta oʻrtoqlar, pul va martabaga sotiladigan pastkashlar pashsha yoki chivindan farqsizdir.

Sen aytganimiz fazilatlarni hayoting qonuni deb bil. Aslo aldama. Aslo xiyonat etma. Aslo va’daga teskari ish qilma. Aslo ikki yuzli boʻlma. Aslo ahmoq va nodonga aylanma!..

Atrofingga jonfidolar keladi. Jonfido doʻstlar!

Ular seni aldamaydi. Ular boyligingga koʻz tikmaydi. Ular har qanday kunda yoningdadirlar. Ular yaxshiliklarini hech minnat qilmaslar, yuzingga solmaslar!

Shu haqiqiy boylikdir!

Bu boʻlmasa, sen qashshoqsan! Sen yoʻqsilsan! Sen yoʻqchilik changalidasan!

Dunyo atalgan fohishaga maftun boʻlmagan, uning hiylasiga laqqa ilinmagan eryigitlarga salomlar boʻlsin!

Bilki, moddiy yoʻqchilik ortidan toʻqchilik bordir.

Yoʻqchilikdan singan toʻqchilikda halok boʻladi.

Toʻqchilikda quturgan yoʻqchilikda xor boʻladi.

Doʻstim!

Kamolot yoʻli olis, hali juda koʻp ilm olishing kerak. Soʻzlarimizni eslab qol va matonat ila bu yoʻlda sobit tur!

👉 Eryigit tarbiyiasi kanaliga obuna bo'ling