Akrom Malik qalamiga mansub yangi "Sirkachi" romanini o'qish uchun havola:
https://t.me/+cq9YxEH3Lm44Zjcy

... bir kuni xonamga bir musicha kirib qoldi. Bechora chiqib keta olmay och-nahor o‘tiribdi. Derazani ochsam, shundan ham chiqishga jur’at etmaydi. Kel, shu qushchani olay-da, tashqariga qo‘yib yuboray, mushukka yem bo‘lmasin deb sekin borib qo‘limni cho‘zsam, o‘zini har yoqqa urishini ko‘ring. Men uni ozodlikka chiqaray desam, mendan qochadi – o‘zini devorlarga uradi, hatto halok bo‘lishi ham mumkin. Inson johil ekan, aynan shu musichadan farqsizdir. O‘z xaloskorini tanimaydi. Ammo ustoz baribir uni tashlab ketmasligi kerak. Bola ekaningizda yerga yiqilar edingiz, ko‘chada loy kechar edingiz. Ust-boshingiz loy, balchiq bo‘lib ketar edi, ammo onaizoringiz avaylab cho‘miltirib, yana top-toza kiyimlarni kiydirar edi. To‘g‘ri, ba’zan g‘azabi kelar edi, lekin sizdan aslo yuz o‘girmagan. Ustoz ham onadek mehribon, otadek fidoyi bo‘ladi. Shogird har qancha isyon etsa-da, har qancha loy va balchiqqa botsa-da, urisha-urisha kiyimlarini yuvadi, o‘zini cho‘miltiradi va xuddi ona kabi bag‘riga bosib mehr ko‘rsatadi. Siz mustaqil fikr deysiz, mustaqil fikrli bo‘laman deya insonlar o‘z xudbinliklarini berkitishni o‘rgandilar. Mehrsizliklarini, toshga aylanganlarini, itoat istamaydigan nafslarini mustaqil fikr degan chiroyli rangli sintetik parda bilan berkitmoqdalar. Inson ustozga itoat qilmas ekan, nafsi uni turli gunohlarga boshlab ketadi. Mustaqil fikrli bo‘l degan chaqiriqlar yoshlarni o‘z millati, o‘z ota-bobolari yo‘lidan chalg‘itib, bosqinchilar xizmatkoriga aylantirish uchun to‘qib chiqarilgan shaytoniy bir tuzoqdir.

Akrom Malik, "SIRKACHI" romani, 8-bobdan (Ustoz nomli bob) iqtibos