"UDEAʼda MBA — Islom moliyasi yoʻnalishida oʻqisam, diplomim oʻtadimi?"
Eng koʻp keladigan savol shu. Bu savolga taxmin bilan emas, amaldagi normativ hujjat bilan javob beraman.
1. Diplom — davlat namunasidagi hujjat.
Magistratura diplomi Davlat attestatsiya komissiyasi qarori asosida, Oliy taʼlim, fan va innovatsiyalar vazirligi tomonidan beriladi, davlat reyestrida qayd etiladi va QR-kod orqali tekshiriladi.
2. Mutaxassislik klassifikatorda mavjud.
Diplomga 70410901 – "Biznesni boshqarish (Master of Business Administration – MBA)" deb yoziladi, kvalifikatsiya esa "Islomiy moliyachi-iqtisodchi, biznes boshqaruvi, tadqiqotchi". Yaʼni hujjatning oʻzi sohaviy tayyorgarlikni koʻrsatadi.
3. Eng muhimi — 20.07.2026 dan kuchga kirgan talab.
Markaziy bank Boshqaruvining 2026-yil 23-iyundagi 19/2-son qarori bilan "Bank faoliyatiga ruxsat berish tartibi va shartlari toʻgʻrisidagi nizom"ga oʻzgartirish va qoʻshimchalar kiritildi (Adliya vazirligida 17.07.2026, 3252-7-son; 20.07.2026 dan kuchga kirgan).
Nizomning 93-bandi 5-kichik bandiga koʻra, bankning islomiy bank faoliyatiga masʼul boʻlgan rahbar xodimi:
— moliya-iqtisod yoki islomiy moliya yoʻnalishida oliy maʼlumotga, va
— AAOIFI sertifikatlaridan biriga (CIPA, CSAA, CPSS, CPAAGE, CSE) ega boʻlishi shart,
— "bundan nomzodning islomiy moliya yoʻnalishida oliy maʼlumotga yoki ilmiy darajaga ega boʻlgan holatlari mustasno".
Diqqat qiling: qonunchilikning oʻzi sertifikat talabidan aynan islom moliyasi yoʻnalishidagi oliy maʼlumot yoki ilmiy daraja egalarini istisno qilmoqda. Bizning dasturimiz beradigan tayyorgarlik ana shu talabga kiradi.

4. Shariat kengashi — bu alohida yoʻl.
Kengashning kamida uch aʼzosi, jumladan raisi va oʻrinbosari islomshunoslik, islom huquqi (fiqh), usulul fiqh yoki fiqhul muomalat boʻyicha oliy maʼlumotga ega boʻlishi shart; qolgan aʼzolar moliya-iqtisod yoki yuridik yoʻnalishdan boʻlishi mumkin. Buni ochiq aytaman: MBA sizni shariat olimi qilmaydi, u sizni islom moliyasi boʻyicha boshqaruvchi va mutaxassis qiladi.
5. Dastur Markaziy bank tomonidan qoʻllab-quvvatlangan.
Markaziy bankning 2026-yil 9-iyuldagi 21-35/999-son xatida "Islomiy moliya (MBA in Islamic Finance)" taʼlim dasturi bank-moliya tizimi ehtiyojlariga mos kadrlar tayyorlashda muhim ahamiyat kasb etishi qayd etilib, dasturni tashkil etish tashabbusi maqsadga muvofiq deb topilgan.
Xulosa. "Diplomim oʻtadimi?" degan savolning javobi — ha. Bu davlat tan oladigan magistr diplomi boʻlib, islomiy bank faoliyatiga masʼul rahbar lavozimiga qoʻyilgan malaka talablarining taʼlim qismiga toʻgʻridan-toʻgʻri javob beradi.
@anvar_tursun0v