💡💫💫💫💫💫💫💫

19–25 мамырға арналған қаржылай жұлдыз жорамал

♈️Бұл аптада қаржылық түйсігіңіз қасапшының пышағындай өткір болмақ. Тәуекелге барудан қорықпаңыз, бірақ тым артық кетпеңіз — ең өткір пышақ та кейде қолды кесуі мүмкін. Ақшаға қатысты шешім қабылдағанда қырағы болыңыз.

♉️Торпақтар, бұл аптада жиған-терген қаржыңыз ашытқы қосылған қамырдай көтерілмек. Дегенмен қамырды қараусыз қалдырсаңыз, тасыған көбігімен бүкіл пешті былғайтыны бар. Сол секілді, табыс артты екен деп арқаны кеңге салуға әлі ерте. Ысырапшылдыққа бой алдырмай, әр тиынды ретімен жұмсаңыз. Үнем мен есеп — сіздің басты серігіңіз.

♊️Бұл аптада алдыңыздан жарқ-жұрқ еткен қымбат ұсыныстар мен тың бастамалар көлбеңдеп өтуі мүмкін. Алайда абай болыңыз — жылтырағанның бәрі алтын емес. Кейбір ұсыныстар сырттай көз тартқанымен, шын мәнінде қуыс кеуде, құр идея ғана болуы ықтимал. Сол себепті ішкі түйсігіңізге құлақ түріп, көңіл сүзгіңізді қоса жүріңіз. Сөзге шешендігіңіз бен сезімтал зердеңіз сізге қалқан бола алады. Кекесін мен қалжыңды шебер қолдана білсеңіз, шындықтың бетін ашуға таптырмас құрал болмақ.

♋️Бұл аптада қаржы ағыстары теңіз толқынындай – бірде келеді, бірде кетеді. Қалтаны қағар орынсыз шығындардан сақтаныңыз. Су кеткен жерге бөгет қойғандай, енді кіріс пен шығысты тең ұстайтын, бюджеттегі “жырықты” жамайтын сәт туды. Ақшаны қолыңыздан сусып ағызбай, әр тиынды орнымен жұмсаңыз. Күндердің бірі тасқын тоқтап, тыныштық орнайтынына сеніңіз.

♌️Бұл аптада көңіл күйіңіз де, қаржылай ахуалыңыз да құбылып тұрмақ — бүгін өзіңізді байлықтың биігінде сезінсеңіз, ертең ойлы күйге түсіп, есеп-қисапқа үңілесіз. Есіңізде болсын: тақ пен даңқ — мәңгілік емес. Алтын тәжден бұрын, алтын мүмкіндік сыйлайтын тұрақты істерге ден қойыңыз. Құмнан салынған сарай емес, жел мен жауынға төтеп беретін мызғымас шаңырақ тұрғызатын уақыт келді.

♍️Бұл аптада сіз нағыз швейцар пышағындай – бәріне дайын боласыз. Есепке жүйрік, тәртіпке берік болу — сізге тән қасиет. Бірақ өмір тек есеп-қисаппен ғана емес, шабытпен де көрікті. Кейде жүрекке ерік беріп, сезімнің даусына құлақ асып көріңіз. “Бәрін бақылауда ұстау” деген қамытты бір сәтке шешіп, өмірдің ағысына еркін бойлаңыз. Өзіңізді де еркелетуді ұмытпаңыз — жанға да демалыс керек.

♎️Бұл аптада қабылдайтын қаржылай шешімдеріңіз арқан үстінде тепе-теңдікті сақтағанмен бірдей болады. Бір жағына тым ауып кетсеңіз, қарыз-құзға құлап түсуіңіз мүмкін. Сол себепті үнем мен шығын арасында алтын аралықты табуға тырысыңыз. Нағыз шеберлік — тепе-теңдікте.

♏️Сарышаяндар, бұл аптада қаржылай түйсігіңіз акуладай өткір болмақ. Бірақ әр олжаға шабуыл жасамай, кейде дельфиндей байыппен әрі мейіріммен әрекет еткен жөн. Қаржыдағы амбицияңызды өзгелерге қару емес, даналық ретінде көрсетіңіз.

♐️Бұл аптада сізді қаржылай саяхаттар мен жаңа мүмкіндіктер көкжиекте күтіп тұр. Бірақ ұмытпаңыз, ең көңілді демалыстың өзі күтпеген шығындарға ұрындыруы мүмкін. Бюджетіңізді бақылауда ұстаңыз, әйтпесе “туристік тұзаққа” түсіп қалуыңыз ғажап емес.

♑️Тауешкілер, сіз бұл аптада нағыз қамал сындысыз — қаржы дауылына берілмейсіз. Алайда әр қамалдың да осал тұсы болатынын ұмытпаңыз. Өзіңізге аз-маз еркіндік беріп, жанды қуантатын ұсақ қуаныштарға да орын қалдырған жөн.

♒️Суқұйғыштар, бұл аптада ойлап тапқан қаржылай идеяларыңыз бұрынғы кештеріңіздей ерекше болмақ. Бірақ жаңалықтың бәрі пайда әкеле бермейді. Кейде ақшаны жоғалтудың жаңа жолын іздегенше, тексерілген тәсілдерге жүгінген дұрыс.

♓️Балықтар, бұл аптада байлыққа деген армандарыңыз аквариум ішіндегі балықтай жүзіп жүрмек. Сол армандар су түбінде қалмасын десеңіз, қиялыңызды нақты мақсатқа айналдырыңыз. Армандау — жақсы, бірақ оны жүзеге асыру — одан да маңызды.

Аптаңыз сәтті өтсін! Есіңізде болсын: ақша — басты құндылық емес, бірақ өмірді жеңіл әрі көңілді ететіні рас!

Есіңізде болсын, жұлдыз жорамал ойын-сауық және кеңес беру мақсатында жасалады. Қаржылай шешімдерді ақылға салып, нақты жағдайларға байланысты қабылдағаныңыз жөн.

#Жұлдызжорамал #Апталықжұлдызжорамал #Қаржы #Болжамдар #қазақша

💡📆📆📆📆📆 19 мамыр

💰1995 жылы 19 мамырда Алматыда Банкнот фабрикасы ашылды. Бұл уақытқа дейін теңге Ұлыбританияда басылып келді. Қазір фабрикада банкноттардан бөлек, 100-ден астам түрлі өнім шығарылады: паспорттар, жеке куәліктер, дипломдар, аттестаттар, куәліктер мен акциздік маркалар. Заман талабына сай дамып келе жатқан фабрика іскерлік ортада сенімді беделге ие. Ал теңгенің дизайны мен қорғаныс жүйелері бірнеше мәрте халықаралық марапаттарға ие болды.

Сіздің ойыңызша, қай купюраның дизайны әдемі?


💪Бүгін Түркияда Ататүрікті еске алумен қатар, жастар және спорт күні аталып өтеді. 1919 жылы 19 мамырда Түркияның ұлттық-азаттық қозғалысының көшбасшысы Мустафа Кемал Ататүрік елді шетелдік интервенциядан қорғау үшін халықты жұмылдырып, күресті бастап кетті. Бұл күн Түркияның Тәуелсіздік соғысының басталуы ретінде ресми түрде танылды. Кейін Ататүрік аталған күнді өзінің туған күні деп жариялады. Ал 1938 жылдан бастап “жастар және спорт” күні болып белгіленді. Өйткені ұлт-азаттық қозғалыстың өзегін жастар құрады.

Түріктердің арасында таныстарыңыз болса, мерекесімен құттықтап қойыңыз!


👀Бүгін пазл әуесқойлары Рубик текшесінің пайда болған күнін тойлайды. 1975 жылы 19 мамырда венгр математигі Эрне Рубик осы интеллектуалды ойыншыққа патент алды. Содан бері әлемге әйгілі басқатырғыштың 450 миллионнан астам данасы сатылды. Статистикаға сүйенсек, жер бетіндегі әр үшінші адам өмірінде кем дегенде бір рет Рубик текшесін құрастыруға тырысқан. Ал 2018 жылы Қытайдан шыққан Ду Юшен есімді жасөспірім текшені небәрі 3,47 секундта құрастырған!

Сіз Рубик текшесінің барлық жағын сәйкестендіре алдыңыз ба?

👥19 мамыр — қос танымал әншінің туған күні. Бүгін қазақтың тұңғыш продюссерлерінің бірі Қыдырәлі Болманов 61 жасын атап өтеді. Оның жетекшілігімен елге танылған жобалар қатарында – “АБК” тобы, Рахат Тұрлыханов, Қарақат Әбілдина, “Ұлытау” тобы, “Баңғор” және Нұржан Қалжан бар. Бұлар өз уақытында тыңдарманның ыстық ықыласына бөленді. Қазір Қыдырәлі мырза әкімшілік және кәсіпкерлік салалармен айналысып жүр. Сонымен қатар бүгін британдық әнші әрі композитор Сэм Смит 33 жасқа толды. Ол – “Грэмми” жүлдесінің 4 мәрте иегері. Сонымен қатар “Оскар” әрі өзге де беделді марапаттарды олжалаған.

Қадырәлінің қай жобасын ұнатасыз?

#Күнтізбе, #Мереке, #ЕрекшеКүн, #БанкнотФабрикасы, #АтатүрікКүні, #РубикТекшесі, #ТуғанКүндер, #ТанымалТұлғалар, #ҚыдырәліБолманов, #СэмСмит

💡💡💡💡💡💡💡

Уақытты тиімді жоспарлауға арналған Trello қосымшасы: Тегін платформаның ТОП-5 артықшылығы

✍🏻 Қазіргі заман — технология дәуірі. Уақытты тиімді басқару, күнделікті істерді жүйелеу және ұзақ мерзімді мақсаттарға жету үшін цифрлық құралдарды қолдану табысты адамның басты дағдыларына айналды. Солардың бірі — Trello қосымшасы. Ол жобаларды басқаруға арналған интуитивті, ыңғайлы әрі тегін платформа ретінде кеңінен қолданылады.

📍Trello дегеніміз не?

Trello — бұл Kanban тақтасы негізінде жұмыс істейтін жобаларды және тапсырмаларды басқару құралы. Оны жеке тұлғалар да, шағын командалар да, ірі компаниялар да кеңінен қолданады. Пайдаланушы “тақта” (board), “тізім” (list) және “карточка” (card) форматында өз жұмыс жоспарын ұйымдастыра алады.

📍Жоспар жазудағы артықшылықтары

1️⃣ Көрнекілік және құрылымды болуы

Trello-да кез келген жоспар визуалды түрде көрсетіледі. Әр тапсырманы нақты категорияларға бөліп, қадам-қадаммен орындауға мүмкіндік береді. Бұл құрылым жұмысқа деген мотивацияны арттырады.

Мысалы:

• Тақта атауы: “Диплом жұмысын жазу жоспары”
• Тізімдер: “Зерттеу жоспары”, “Жинақталған материалдар”, “Жазу”, “Редакциялау”, “Тапсыру”

2️⃣ Уақытты тиімді басқару

Карточкаларға мерзім (дедлайн) орнатуға болады. Бұл тапсырманы уақытында орындауға итермелейді. Сонымен қатар “Calendar” функциясы арқылы барлық істі күнтізбе бойынша реттеп көруге болады.

3️⃣ Маңызды істерді анықтау

Trello карточкаларына түрлі түсті белгілер (labels) қою арқылы тапсырманың маңыздылығын айқындауға болады:

• Қызыл — шұғыл
• Сары — орташа
• Жасыл — аяқталған

4️⃣ Ынтымақтастық

Егер сіз бір жобаны басқа адамдармен бірге орындайтын болсаңыз, Trello-да командалық жұмыс өте оңай жүзеге асады. Әр адамға нақты тапсырма бекітіліп, оның орындалу барысы бақыланып отырады.

5️⃣ Икемділік

Trello-ны оқу, жеке даму, жұмыс және тұрмыстық жоспарлау сияқты кез келген салада қолдануға болады.

⁉️ Trello-ны қалай қолдануға болады?
(қысқаша нұсқаулық)

▪️ Тіркелу: Trello.com сайтына тіркеліңіз немесе мобильді қосымшасын жүктеп алыңыз.
▪️ Жаңа тақта құру: Мысалы, “Күнделікті жоспар”, “Жобаларым”, “Оқу жоспары” дегендей.
▪️ Тізімдер қосу: Мысалы, “Істелетін жұмыстар”, “Орындалу үстінде”, “Аяқталған”
▪️ Карточкалар жасау: Әрбір іс-шараға жеке карточка құрыңыз.
▪️ Мерзім, белгі, файл қосу: Әр карточкаға дедлайн қойып, керек болса құжат тіркеңіз.

🟢 Trello-ны қайда және қалай қолдануға болады?

🔺Trello — әмбебап құрал. Оны өмірдің түрлі саласында тиімді пайдалануға болады. Мәселен, білім саласында Trello оқу процесін ұйымдастыруда үлкен көмекші бола алады. Студенттер курстық немесе дипломдық жұмысын кезең-кезеңімен жоспарлап, қажет әдебиеттер тізімін, зерттеу бағыттарын және мерзімдерін бір жерде жинақтап жүргізе алады. Сондай-ақ күнделікті оқу жоспарын жасап, қай пәнге қанша уақыт бөлінетінін белгілеп отыруға болады.

🔺 Жеке даму бағытында да Trello таптырмас көмекші. Мысалы, бір айда қанша кітап оқитыныңызды, спортпен қанша күн айналысатыныңызды немесе жаңа дағдыларды үйрену жоспарын нақтылап, прогресті бақылап отыруға болады. Бұл мотивацияны арттырып, жоспарлы өмір салтын қалыптастырады.

🔺Жұмыста Trello-ны жобаларды басқаруға, тапсырмаларды бөлісуге және командалық жұмысты үйлестіруге пайдалануға болады. Әріптестерге тапсырма беру, дедлайн орнату, жұмыс барысын бақылау сияқты функциялар кез келген жобаны тиімді жүзеге асыруға мүмкіндік береді. Сонымен қатар, контент-жоспарлау, іс-шара ұйымдастыру, есеп тапсыру тәрізді міндеттер де бір жүйеге түседі.

🔺Ал күнделікті өмірде Trello үй шаруасын жоспарлауға, азық-түлік сатып алатын тізімді жазуға, отбасы істерін үйлестіруге немесе алдағы сапардың бүге-шүгесіне дейін жоспар жасауға көмектеседі. Яғни, Trello арқылы өзіңіздің уақытты тиімді жұмсайтын, тәртіпті әрі мақсатқа бағытталған адамға айналуыңызға болады.

✔️ Trello — бұл жоспар құралы ғана емес, ол уақытты үнемдеуге, тәртіпке келтіруге, шығармашылықты арттыруға сеп болатын сенімді көмекші.

#Trello #карта #жұмыс #оқу #жоспар #уақыт

💡📆📆📆📆📆 20 мамыр

🐝20 мамырда Біріккен Ұлттар Ұйымының бастамасымен Дүниежүзілік ара күні аталып өтеді. Бұл кішкентай жәндіктер – жер бетіндегі тіршіліктің ажырамас бөлігі. Олар әлемдегі азық-түліктің 90 пайызын өндіретін өсімдіктердің 75 пайызына тікелей әсер ететін негізгі тозаңдандырушылар. Аталмыш күннің басты мақсаты – адамзат үшін аралардың маңызын түсіндіру, олардың жойылып кетуінің алдын алып, мемлекеттерді тозаңдандырушы жәндіктерді қорғауға үндеу. Қазақстанда 2002 жылы осы қызметті реттеп, араларды қорғауды жүзеге асыратын “Омарта шаруашылығы туралы” заң қабылданды.

Сізге балдың қай түрі ұнайды?



🏥20 мамыр — Халықаралық травматологтар күні. Күнделікті өмірдегі бейқамдық, асығыстық пен түрлі жазатайым оқиғалар салдарынан адамдар әр минут сайын жарақат алып жатады. Сынық, буын шығу, бұлшықет пен сіңірдің созылуы сияқты жағдайларда көмекке келетін – травматология саласы. Бұл ғылымның негізі ежелгі замандарда қаланған. Гиппократтың “Сынықтар туралы” және “Буындар туралы” еңбектері бүгінге дейін травматологияда маңызын жоғалтқан жоқ.

Әрдайым сақ болыңыз және ауырмаңыз!


🐕‍🦺20 мамырда кинологтар халықаралық мопс күнін атап өтеді. Мыжылған тұмсығы мен сақинаға ұқсас құйрығы бар сүйкімді иттер әлем халқының жүрегін жаулап, сүйікті жануарына айналды. Олар “Қара киімді адамдар” фильмі шыққаннан кейін ерекше танымалдыққа ие болды. Мопс - ежелгі қытай тұқымдасы. Оларды ақсүйек адамдар асыраған. Иттің маңдайдағы әжімі иероглифтерге ұқсайды және бұл империялық белгі деп аталды.

Сізге иттердің қай тұқымы ұнайды?



🕺Бүгін джинсыдың пайда болғанына 152 жыл толды. 1873 жылы 20 мамырда Levi Strauss & Co патент алып, заманауи джинсылардың прототиптерін шығара бастады. Бұл шалбар Gold Rush шыңында пайда болды. Нақтырақ айтсақ, ағылшын кенепінен тігіп, алтын өндірушілерге сатылды. Олар жоғары сұранысқа ие болды. Өйткені шалбардың құны 1,46 долларды құрады. Ол жууға ыңғайлы әрі былғары шалбар сияқты берік болды. 1960 жылға дейін джинсы ерлер киімі болып есептелді. Бұл қағиданы алғаш рет Голливуд актрисасы Мэрилин Монро бұзып, 1970 жылдан бастап әйелдер мен ерлерге ортақ киім түрі ретінде қолданысқа енді.

Ал сізде неше джинсы бар?

#Күнтізбе #Мереке #ЕрекшеКүн #АраКүні #Сынық #ИтТұқымдары #АлғашқыДжинсы

💡🐴🐴🐴🐴🐴🐴🐴🐴🐴🐴

Түйе үстіндегі өркениет: Қазақтың керуен жолдары жайлы не білеміз?

Көшпелі өмір салтын ұстанған қазақ қоғамында сауда қатынастары — тек экономикалық қажеттілік емес, сонымен қатар өркениетпен байланыс орнатудың маңызды құралы болды. Қазақ даласы — Еуразияны көктей өтетін Ұлы Жібек жолының негізгі бағыттарының бірі ретінде ғасырлар бойы керуен саудасының күретамыры саналған.

📍Керуен саудасының маңызы

Қазақтардың керуен саудасы, негізінен, мал шаруашылығына негізделген өнімдер мен көршілес отырықшы елдердің қолөнер және тұрмыстық бұйымдары арасындағы айырбас арқылы жүрді. Ет, жүн, тері, мал – көшпелілер ұсынған басты тауарлар болса, олардың орнына қазақтар шай, қант, маталар, зергерлік бұйымдар, қару-жарақ пен астық сияқты заттарды сатып алатын.

Керуен саудасы тек экономикалық алмасумен шектелмей, саяси-дипломатиялық қатынастардың дамуына да ықпал етті. Қазақ хандары мен сұлтандары көршілес елдермен (Қытай, Ресей, Бұхар, Қоқан, Хиуа) бейбіт қарым-қатынас орнатып, керуендерге жол ашу арқылы өз биліктерін күшейтіп отырған.

✔️ Керуен жолдары мен бағыттары

Ұлы Жібек жолының бірнеше бағыты қазақ даласы арқылы өткен. Олардың ішінде ең танымал бағыттар:

• Оңтүстік бағыт: Тараз – Шымкент – Түркістан – Сайрам – Сарыағаш арқылы Бұхара мен Самарқанға жететін жол;
• Солтүстік бағыт: Отырар – Сарысу бойымен – Ұлытау арқылы Сарайшық пен Астраханьға, одан әрі Мәскеуге дейін жалғасатын жол;
• Шығыс бағыты: Жетісу арқылы Қытайға шығатын жолдар (қазіргі Жаркент, Қорғас маңы).

Бұл жолдармен тек тауар ғана емес, мәдениет, дін, тіл мен білім де алмасып отырды. Ұлы Жібек жолының бойындағы қалалар (Сауран, Отырар, Тараз, Баласағұн) тек сауда орталығы емес, білім мен ғылымның, өнер мен діннің де ордасы болды.

📍Керуендер, әдетте, ондаған немесе жүздеген түйеден құралған. Әр түйе 200 келіге дейін жүк артатын. Қауіпсіздік үшін қарулы күзетшілер мен жолды жақсы білетін жолсеріктер (бастаушы, шабарман) еріп жүрді. Саудагерлердің ішінде тек қазақтар емес, татар, өзбек, парсы, орыс көпестері де болды.

Керуендер апталап, айлап жол жүріп, жазда тау асуларымен, қыста жазықтармен жүріп отыратын. Олар жолай орналасқан құдықтар мен керуен-сарайларда тынығып, малды суарып, азық жинап отырған.

🔺Керуен саудасының тоқырауы

XIX ғасырдың екінші жартысынан бастап, Ресей империясының отарлау саясаты күшейіп, жаңа экономикалық жүйе енгізілген соң дәстүрлі керуен саудасы біртіндеп әлсіреді. Теміржолдардың салынуы, кедендік шектеулер мен шекаралық бақылаудың күшеюі керуен жолдарын тарылтты. Дегенмен, қазақтың көшпелі мәдениеті мен сауда-саттық дәстүрі ұзақ уақыт бойы аймақтық қатынастардың маңызды тетігі болып қала берді.

▪️Көшпелі қазақтың керуен саудасы — бұл тек экономикалық құбылыс емес, мәдени, тарихи және геосаяси мәні бар күрделі жүйе. Ол Қазақ даласын Еуразия кеңістігіндегі ірі өркениеттермен жалғап, елдің ішкі бірлігі мен сыртқы ықпалын нығайтқан маңызды дәуірлік кезеңдердің бірі ретінде бағаланады.

#көшпенділер #экономикасы

💡📆📆📆📆📆 21 мамыр

🌸21 мамыр – Қазақстанда Мәдениет және өнер қызметкерлері күні. Бұл сала — маңызды әрі жауапты жұмыс болуымен қатар, үлкен қабілетті де талап етеді. Аталған маман иелері ұлттық құндылықтарымызды сақтап, рухани мәдениетімізді байытуға зор үлес қосып жатыр. Сол себепті материалдық игіліктерден бөлек, жанды нәрлендіріп, өмірді үйлесімділік пен мағынаға толтыратын рухани құндылықтар бар екенін әрқашан есте ұстаған жөн. Айта кетейік, сонымен қатар бүгін БҰҰ-ның қамқорлығымен диалог орнатып әрі даму үшін Дүниежүзілік мәдени әртүрлілік күні де аталып өтеді.

Таныстарыңыздың арасында мәдениет және өнер қызметкерлері болса, кәсіби мерекесімен құттықтап қойыңыз!



💫Бүгін — Халықаралық шай күні. Оның отаны — Қытай мен Мьянма. Әлемдегі ең танымал сусын туралы ақпараттар алғаш рет 5000 жыл бұрын пайда болды. Көптеген елде, соның ішінде Қазақстанда шай ежелден мәдениеттің ажырамас бөлігіне айналды. Мұнда шай ішу мен дайындаудың өзіндік дәстүрлері қалыптасқан.

Сізге шайдың қай түрі ұнайды?



💫2012 жылы 21 мамырда Өзбекстанның Науаи облысы Нұрата ауданында Әйтеке би кесенесі ашылды. Әйтеке би Байбекұлы (Айтық) – елдің бірлігін нығайтуға зор үлес қосқан қазақтың ұлы биі. Бұл кесене — бауырлас қазақ пен өзбек халқы арасындағы туыстық, достық қарым-қатынастың жарқын бейнесі. Айта кету керек, Ташкенттің орталығында Өзбекстанда және Қазақстанның бірқатар облысында “Қарлығаш би” атанған атақты Төле бидің кесенесі де орналасқан.


⚽️1904 жылы 21 мамырда Парижде FIFA құрылды. Халықаралық футбол федерациясы 211 мемлекетті қамтиды. Бұл ұйым бүгінде футбол, шағын футбол және жағажай футболына жетекшілік ететін басты құрылым. Қазақстан 1994 жылдан бері ФИФА мүшесі болып келеді. Қазір рейтинг бойынша 113-ші орында тұр. Ал ұлттық құрамалар рейтингінің алғашқы үштігіне Аргентина, Франция және Испания кіреді.

Сіз қай команданың жанкүйерісіз?

#Күнтізбе #Мереке #Ерекшекүн #Мәдениеткүні #Қазақстандағыөнер #шайкүні #Айтекебикесенесі #футболфедерациясы

💡📰📰📰📰📰📰

Табыс & Шығыс айдары:

“Еңбекке ерте араласу – қаржылай сауаттың бастауы”. 23 жастағы бойжеткен бір айлық табысы мен шығынын айтты

📍“Табыс & Шығыс” айдарында біз жасы, жынысы, мамандығы, тұрғылықты жері әртүрлі Қазақстан азаматтарының бір айда тапқан табысы мен шығынын есептейміз. Кіріс пен шығынды жатқа білу қаржы сауатын арттырып, қарыздан құтылып, табысты болуға жетелейді.  

💁🏻‍♀️ Бүгінгі кейіпкеріміз – Ақтоты Қалмұрат. 23 жастағы ару маркетолог әрі smm болып жұмыс істейді. Жан-жақты табыс көзі бар бойжеткен қашықтан да қаражат табуға бейімделген. Алматы қаласында тұрады. Тұрмыс құрмаған. Жоғары білімі бар. Студент кезінен шәкіртақыдан бөлек, қосымша табыс табумен айналысқан.

💸 Бір айдағы табысы:

Жұмыстағы жалақы – 500 000-600 000 теңге
Қосымша табыс – 500 000 теңге
Жалпы табыс - 1 000 000 теңге
 
💸 Бір айдағы шығыны:

Азық-түлікке кететін шығын – 50 000 теңге
Пәтерақы - 75.000 теңге
Кредиттерді өтеу – жоқ
Түскі асқа – 5000 теңге
Дәрі-дәрмекке шамамен -  30 000 теңге
Жол шығыны – 5000 теңге
Күтім заттарына – 70 000-100 000 теңге
Коммуналды шығындар –  10 000 теңге
Жақындарыңа көмек ретінде беретін ақша –50 000теңге
Қыдырып демалуға –  70 000 теңге
Интернет төлемі – 6700 теңге
Киім-кешек  - 30 000-50 000 теңге
Кітап алу/курс оқу – 30 000-100 000 теңге
Фитнес залының төлемақысы – 50 000 теңге
Әлеуметтік желіге арналған жазылым ақысы- 4500 теңге
Ақылы ұялы телефон қосымшалары - ⁠10 000 теңге

💵 Жалпы шығын – 470 000 айына мың
Бір айдағы сальдо – плюс 500 000 теңге
 
📌 Ақтотының түсініктемесі:

Орталық Азия соның ішінде дамушы мемлекеттің азаматшасы болғандықтан, қатарыңнан қалмау, талпынып жан-жақты тірлік қылу біздерге тән. Яғни, аяқты аспанға көтеріп, алаңсыз күн кешу деген жоқ. Бір жағы дамыған елдердегідей бәсеке басым болмағандықтан, мүмкіндік те көп. Аллаға ниет етіп, қолдан келген амалдың барлығын жасасаң табыссыз қалмайсың деп ойлаймын. Өзім студент кезден жұмыстың ауыр жеңіліне қарамай, бос уақытымның барлығында еңбекке араластым. Ақшаны ерте жастан табудың пайдасы көп екенін нақты айта аламын. Себебі, қаржылай жауапкершілік пайда болады. Қаржы сауаты мезетінде қалыптасқан адамның кіріс-шығысқа есеп жүргізуі, өз ақшасын өзі басқара алуы оңай болады. Кризис, инфляция секілді т.б күтпеген соққылар кезінде жұтылып кетпеуге берісі ұтылып қалмауға алдын ала қалқан жасайсың. Түрлі жұмысты істеп көргенімнің арқасында, өзіме не керегін білдім. Ысылдым. Негізгі мамандығым педагогика бағыты. Дегенмен мен маркетинг саласын тәжірибеде жасап бастап, одан соң арнайы оқып та алдым. Есесіне, кәсіби түрде меңгергенімнің арқасында әрдайым жұмыс көзі маған дайын тұрады. Онлайн саудамен де ара-тұра айналысамын.

Уақытымның ауқымды бөлігін жұмыс істеуге арнайтындықтан, үйден сирек тамақтанамын. Яғни, толтырып азық-түлік сатып алмаймын. Оны әзірлеуге уақыт кетіргенше, табыс тапқан мен үшін абзалырақ. Салыстырсам сырттан тамақтанумен шығыны бірдей-ақ. Жұмыстан босаған уақытта нарықты зерттеуге немесе жаңа білім алуға  назар қоюға тырасамын. Қазір қыздармен бірлесіп пәтер жалдап тұрамын. Коммуналдық шығын және пәтерақыны бөліп төлейміз. Қазір жеке үйімнің болуына аса қажеттілік жоқ. Алайда болашақта өз қаржыммен үй ала аламын деп ойлаймын. Бастысы, басымда қарыз жоқ. Еркінмін. Ақша жетіспеушілігі, біреуге борышкер болу адамды ішкі мазасыздыққа алып келеді. Онымен алысып күрескенше, нәпсіңмен күрескен тиімдірек. Қыз баласы болсаң да, тұрақты жоғары табыс керек. Адамға сенімділік және ертеңгі күнге үміт сыйлайды. Сүйікті ісіңмен айналысу өмірдің мәні іспетті. Ол әрі жеткілікті қаражат әкеліп тұрса, адамның жаны толығымен тыныштықта болады деген пікірдемін. Әрі қайырымдылықпен айналыса алуға септігі бар. Өмірде алу мен беру заңдылығын сақтаған адамда орынсыз шығын алдынан шықпайды деп ойлаймын.
 
📞 Өз отбасыңыздың бір айдағы қаржылық картинасымен бөліскіңіз келсе, «Табыс & Шығыс» айдарының колумнисті Мөлдір Бегімбетке хабарласыңыздар: WhatsApp +7 775 609 75 45

#табыс #шығыс #финансы #қаржы

💡📆📆📆📆📆 22 мамыр

👀22 мамырда Біріккен ұлттар ұйымының бастамасымен халықаралық биологиялық әртүрлілік күні аталып өтеді. Биоәртүрлілік - жер бетіндегі тіршіліктің алуан түрлілігін көрсетеді. Өсімдіктер өліп жатыр, жануарлар мен ормандар жер бетінен жоғалып жатыр. Мұның көп бөлігі адам әрекетінен туындап жатыр. Қазір Қазақстанның Қызыл кітабына 400-ге жуық өсімдік пен 130 жануар енгізілген.

Болашақ ұрпақ үшін табиғатымызды қорғайық!


🦷Бүгін тіс пастасы салынған сықпаның пайда болған күні. Ежелгі заманда адамзат негізінен тіс ұнтағын пайдаланды. Ал 1892 жылы 22 мамырда америкалық тіс дәрігері Вашингтон Шеффилд металл қорап түріндегі ыңғайлы пакетті ойлап тауып, тіс ұнтағын қолданыстан жойды. Әлеуметтанушылардың сауалнамаларына сәйкес, көптеген елде тіс пастасы мен щетка адамзаттың ең маңызды өнертабыстарының бірі болып саналады. Алайда мына жағдайды да ескеру керек. Себебі ауыз қуысынан шығатын жағымсыз иіс асқазан-ішек жолдарының жағдайына байланысты болады.

Сіз тіс пастасының қай түрін қолданасыз?


👤Бүгін детектив әуесқойлары Шерлок Холмс күнін атап өтеді. 22 мамырда Ирландиядан шыққан ағылшын жазушысы, осы тамаша кейіпкерді жасаушы Артур Конан Дойл (1859-1930) дүниеге келді. Дойлдың Шерлок Холмс туралы алғашқы әңгімесі тұңғыш рет 1887 жылы баспада пайда болды. Кейінгі әңгімелері қырық жыл бойы, автор қайтыс болғанға дейін жариялана берді. Дойл Шерлок Холмс туралы 60 әңгіме жазды.

Ал сізге Шерлок Холмс жайлы қай әңгіме ұнады?



👥22 мамыр — қос тұлғаның туған күні. Бүгін британдық супермодель әрі кино актрисасы Наоми Кэмпбелл 55 жас мерейтойын атап өтеді. Ол 15 жасынан бастап подиумға шығып, өнер көрсетті. Сондай-ақ Vogue және Time журналдарының мұқабаларына шыққан алғашқы қара нәсілді қыз атанды. Өнер иесі 20-дан астам фильмде ойнады. Сонымен қатар бүгін сербиялық теннисші, әлемнің бірінші ракеткасы Новак Джокович 37 жасқа толды. Теннисші 24 мәрте “Үлкен дулығаны” және 38 рет “Шебер” марапатын жеңіп алған үздіктердің бірі. Ол теннис тарихында 181 миллион доллардан астам жүлделі қаражатқа ие болып, бірінші орында тұр.

Сіз кімнің жанкүйерісіз: Новак Джокович әлде Рафаэль Надаль?

#Күнтізбе #Мереке #Ерекшекүн #Биологиялықәртүрлілік #Тіспастасы #ШерлокХолмс #Туғанкүндер #Танымаладамдар #НаомиКэмпбелл #НовакДжокович