Ammo U kelmaydi…
Kelib-ketadi
Eshigimdan g‘arb-u sharq-u, ajamlik.
Dunyo boʻlmog‘i-chun butkul mukammal,
Faqat sening oʻrning qiladi kamlik!..

©️Zebo Mirzo

So‘ngra oramizga shaharlar, mamlakatlar, balki, dunyolar kiradi. Hech qachon uchrasholmaymiz. Hattoki tasodiflar ham bizni bir yerga keltirolmaydi. So‘ngra birimiz o‘lamiz, birimizning esa bundan xabarimiz ham bo‘lmaydi.

💙Nozim Hikmat

Sevgimiz o‘ldimi? — libosingiz ko‘k,
Ko‘nglingiz — begulxan, ko‘zingiz — becho‘g‘.
Bizdan borish yo‘qdir, sizdan — kelish yo‘q
Kelishsiz dunyoda beg‘am, azizim,
Nega ko‘zlaringiz benam, azizim.

O‘t yetdi — qaqshatdi band-bandlarimni,
Tuproqda sochdingiz balandlarimni,
Aqlimni, dilimni — bebaxtlarimni —
Borishsiz dunyoga otgan, azizim,
Olisda oy kabi botgan, azizim —

Chunki tunga aytar rost "oh"ingiz yo‘q,
Falakda kezgani sha'n rohingiz yo‘q,
Nechun kelmaysiz, gar gunohingiz yo‘q —
Boqaman: nigohim — gumon, azizim,
Yo‘llaring tumandir, tuman, azizim.

Qarang, ming bir bargda kuzak uchadir,
Qizil-sarig'ida — yurak uchadir,
So‘ngaklar uchadir, suyak uchadir —
Bu to‘fon — xazonlig‘ menman, azizim,
Sizsiz ming kuzakka tengman, azizim.

Ammo siz sarg‘aymang — gulli bog‘ bo‘ling,
Yam-yashil ko‘karing, mudom sog‘ bo‘ling,
Bahorning bag‘rida beadog‘ bo‘ling —
Axir, qarg‘aganim sizmas, azizim,
Ikki kuz dunyoga sig‘mas, azizim...

💙Usmon Azim

Sizsiz yogʻgan yomgʻir haqida

Tag‘in yomg‘ir yog‘di siz yo‘q shaharda,
Sezdim, maysalarning titroqlarini.
Va sizni o‘yladim kimni ko‘proq sevasiz
Menimi yoki yomg‘irni?

Tag‘in yomg‘ir yog‘di siz yo‘q shaharda,
Har neki begona,
har kimsa tanish.
Nigohimgiz qidiraman,
izlayman tovushingizni,
Yurak topsa deyman bir dam osoyish.

Tag‘in yomg‘ir yog‘di siz yo‘q shaharda,
Tomchilar labimda uchdi sirpanchiq.
Men sizdan uyaldim,
bu gunoh edi axir,
Mashinalar termulib o‘tdi
ko‘zlarin har damdan kattaroq ochib.

Tag‘in yomg‘ir yog‘di siz yo‘q shaharda,
Sog‘inchim yodimga soldi tomchilar.
Yig‘ladim!
Kechiring,
kulaman degandim faqat,
aytilmagan sirlar yog‘di tomchilab.

Tomchilab, tomchilab yog‘di yomg‘irlar,
Tomchilab, tomchilab yog‘di bor sirim.
Tag‘in yomg‘ir yog‘di siz yo‘q shaharda,
Men sizdan yomg‘irpo‘sh kutdim, hech kimim!
 
Tag‘in yomg‘ir yog‘di siz yo‘q shaharda...


💙Parizoda Ro'ziboyeva

Bedor tunlarimning yana qaysidadir senga maktub yozishni tanladim. Soʻnggi maktubim haqida eslolmayman, aslini olganda birinchisi ham esimda yo'q. Oxirgi paytlarda kurashyapman: gripp, ogʻriqlar, pessimistlik va xotiram bilan. Xotiramni boshqarishga harakat qilyapman. Faqatgina yoqimli xotiralarni qoldirib, menga ozor bera oladiganlarini unutishga butun vujudim bilan tirishyapman. Menimcha, xotiralarni yaxshi yomonga ajratmay, qizil tugmani bosish va barini birdaniga o'chirish kerakdir, balkim.

Sen ham aqlimdan, xayollarimdan va xotiralarimdan birdan chiqib ketasan, izsiz. Go'yoki hech qachon u yerda boʻlmagandek. Go'yoki koʻzlarimiz tasodifan toʻqnashmagandek. Go'yoki...

Bilmadim, so'nggi ikki hafta oralig'ida ruhiyatimda, nafaqat ruhiyatimda balki sogʻligʻimda ham kichik muammolar bor. Ruhshunosga chindan ham muhtojdirman, ehtimol. Balki men muhtoj bo'lgan ruhshunos sendirsan) Menimcha bir ruhni faqatgina o'zi yoqtirgan ruhi davolay oladi)

Yana qanchadir vaqtdan keyin qish keladi. Men bu safargi kuzni shunchaki o'tkazib yubordim. Oʻylashimcha, kuzni his qilishga kechikdim. Koʻcha aylanish, sayrlar, musiqa, kitoblar – barchasi unutildi. Menda qolgani zerikarli hayot tarzi) oldingi kuzda keyingi kuz boshqacha, tasavvurimga sig'maydigan darajada ajoyib bo'lishiga umid bogʻlaganim yodimda. Achinarlisi, endilikda keyingi kuz, ertangi kun uchun hattoki umid yo'q. Chunki hayotimga bu yaqin orada o'zgarish, yangilik kirmasligiga ishonchim komil. Tasodiflarchi deysanmi? Ertaklarga ishonmay qoʻyganimga ancha bo'lgan. Biz qaysidir romantik kitobda yoki allaqaysi kinoda yashamayapmizku, to'g'rimi? Achinarlisi yasholmaymiz ham)

Biri tog'dan, boshqasi bog'dan kelgan gaplarim uchun uzr. Aslini olganda, bularni o'qishingga ham ishonmayman. Shunchaki hozirgi vaziyatim yoqimsiz yomg'irda soyabonsiz qolishdek gap. Muammo soyabonsiz qolishda emas, hozir yoqtirmaydigan, menga ozor beradigan yomg'irni bir vaqtlar jonimdan ortiq sevganimda...

©️

Ishqsizlik

Men ko‘p quvonchlarni istadim Sizdan,
Mudom qalbingizga ozorlar berdim.
Siz meni kechiring, najot yo‘q kuzdan,
Balki ko‘nglingizga kechikib kirdim.

Balki bu tuyg‘ular o‘ldirar meni,
Balki xarob etar bu hayajonlar,
Sizsiz hayotimga baxt ham kirmadi,
Sizsiz sha’nsiz ekan bu sharaf, shonlar.

Sizga, yalinaman men bilan qoling,
Ketmang, uzoqlashmang hatto bir qadam.
Biling, har narsadan emas aslida,
O‘lsa — ishqsizlikdan o‘ladi odam.

💙Guljamol Asqarova

Endi senikiman!
O‘zingga ayon,
Ham ayon bo‘lmagan sirlarim bilan.
Endi senikiman, senga atalgan
Senga atalmagan she’rlarim bilan.

Endi senikiman demoqlik uchun
Qancha g‘urur hojat, qancha tavakkal.
Endi senikiman degan bir iqror,
Kamida taqdirni eta olar hal.

Kechmoq va kechirmoq oralig‘ida
Bir qizning kulgichi nurab borgan dam.
Kutilmagan payti kutganim bo‘lib
Sen qarshimdan chiqding, hazrati Odam!

Endi bu dunyoning dunyoligi chin,
Endi sen umrimda porlagan cho‘g‘san.
Endi yig‘lamayin, dardlarim arit,
Endi ko‘z yoshlarim tutib qol, yo‘qsa..

Yo‘qsa…
Seni suyanch deganim yolg‘on,
Yo‘qsa, muhabbatga bo‘lma da’vogar.
Adolatdan bo‘lmas, sevgidan bo‘lmas,
Sen yonimda turib, yig‘lasam agar..

Ko‘z yoshlarim tutib qol…
yo‘qsa…

💙Muattar Mamatkarimova

Oʻn yil oʻtib ketdi intizorlikda...
                      ©️A.A.Voznesenskiy

Siz kutasiz.
Menam boraman.
Uchib borodurman xuddi oʻq.
Faqat oldin xat yuboraman
Oʻsha xatni yozganimcha yoʻq.

Koʻngil ichra toʻkib borini,
Bir yil,  oʻn yil oʻtdi,  bu koʻpmi?
Ayriliqning alafzorini
Birgalashib oʻramiz, xoʻpmi?

Yigirma yil, oʻttiz yil  oʻtdi,
Koʻzingizga malol inmasmi?
Oʻttiz yillab  gʻovlagan oʻtni,
Oʻrar chogʻi chalgʻi sinmasmi?!

Qirq yil oʻtdi, men tez boraman,
Ranjimangiz, guvoh yeru koʻk!
Faqat...oldin xat yuboraman,
Xatni...hali yozolganim yoʻq.

Uchib borodurman xuddi oʻq,
Bu holatni qanday sharhlayman.
Borgan sari oʻrmonzor quyuq –
Men kuyinib chalgʻi charxlayman.

Siz kutasiz. Menam boraman.

💙Halima Xudoyberdiyeva

Menga maktublar yoz,
yubormasang ham...
Bilsayding, bu menga orom berishin.
Chunki xotiralar xuruj qilgan dam
Bilaman, xatlaring yetib kelishin.

Menga maktublar yoz, yubormasang ham.

🥥Nodira Nazar

Qarib boraverar asrim yilma-yil,
Milodiy muhabbat,
Hijriy muhabbat, –
Urganchda kun koʻrgan intizor koʻngil,
Bir seni izlagan, bir seni, faqat –
Faqat, ogʻir kelgan gʻamda pishmoq ham,
Oʻzini har kimga atab erta-kech,
Birdayin qulamoq, birday uchmoq ham.
Bir shaharda yashab uchrashmaslik hech,
Bir shaharda yashab ayro tushmoq ham.

Ruhidan qaygʻusin aylab badargʻa,
Masrurlik qidirgan, soʻngra topgan ranj.
Bir yoʻl koʻrsatmagan yorga ketarga,
Eskirgan boʻlsa ham es kirmas Urganch.

Nasib qilolmagan shodlik vaslini,
Minglagan lahzadan yop-yolgʻiz palla.
Ismimga qoʻshmagan yorning ismini,
Na Dishon qal’a-yu,
Na Ichon qal’a.

Men seni kashf etdim.
Yoʻq, undan avval,
Betoqat kunlarning sochi oqardi.
Umrimdan kunlarim uchdi-darbadar.
Endi anglayapman, balki, u mahal,
Hislarimni oʻqiy olmasdi shahar,
Oʻgʻuz lahjasida yomgʻir yogʻardi.

Sen unda bedor-u men bunda bedor,
Sen unda sokinsan va men bunda jim.
Bu yolgʻon umrimda bitta haqiqat bor –
Men seni izladim,
Men seni topdim…

©️Rahmat Bobojon

"Yonma-yonlik olis, yonma-yonlik oz,
Bizlar bir-birovda yashashimiz shart"...

©️

Yuragimga berkitdim bir soʻzni,
aqlim shoshib,
keyin...
keyin iymanibgina yoʻl soldim sogʻinish uchun.
Na sheʼrga aytdim men, na sizga.
Faqat dilni ayblab tinmay
ruhim choʻkaverdi yana va yana.
Kecha koʻrganingiz-chi
ruhi yoʻq,
ruhi yoʻq tana -
Ta'na
ta'na
ta'na..

⏺️Nodira Nazar