​​Qoʻngʻiroq... Chinqirar ismingni aytib,
Eshikni ochaman... titrab bemador.
Sen uzoq kutganday ketasan qaytib,
Tashqarida esa yogʻayotir qor.
Qoʻllaringdan pastga tortar zinalar,
Kutmagan mezbonday turardim atay.
Yigʻlashga qoʻymaydi bizni ginalar, Men ado boʻlgandim... senga yigʻlamay.
Qarshingda... poyingga choʻkolmayman tiz,
Sogʻinchim boʻgʻzingda toshgani bilan.
Azizim, ketishing kerakligini
Hatto sezib turar oyoqlaring ham.
Ortingdan bormadim yoʻlaklar kabi,
Poyingga oʻzini tashlaganda qor.
Eshikka suyanib yigʻladim... Hali
Erta bahor kelar... keladi bahor...
Qoʻngʻiroq... Chinqirar ismingni aytib.

©️Xosiyat Rustamova

Uygʻonib ketaman bemahal,
Koʻzlaring tushadi yodimga,
Soʻzlaring tushadi yodimga,
Va nafrat kezadi darbadar.

Qotilim...
Johilim...
Koʻzlaring —
Allalar, allalar koʻzimni.
Oʻzingga buyursin oʻzlaring,
Sen menga qaytib ber oʻzimni!

Boʻgʻilib bugʻlanar derazam,
Uflayman, uh tortib uxlayman.
Uxlab ham bir seni oʻylayman,
Ming oʻlib tirildim...
Oʻlmayman!

Jon berib bormoqda kulgichim,
Voh, seni oʻylasam kul ichim,
Ista kir, ista yoʻq, ista qoch,
Ismingni bastalar — kuy ichim.

Men seni eslamas yodingman,
Uzoqqa haydagan yoningman,
Eng oniy lahzaga sovrilib
Sochilgan yuz boʻlak yo mingman...

Koʻzlaring, baribir koʻzlaring...

Dengizim, sohilga oqqanim,
Koʻzimas, koʻngliga boqqanim,
Jim qarab jim qadab koʻnglimga-
Muhabbat mixlarin qoqqanim.
Qalbimga ishqingdan oʻt qalab
Jonimni kuydiri-i-i-b yoqqanim.

Qaddim togʻ.
Qalbim toq.
Dil vulqon.
Oʻzimdan Oʻzingga ketyapman.
Nafratim egasi ey, Inson
Soʻzingdan Soʻzimga ketyapman

Oh, nega koʻzlaring oʻylasam...

©️Durdona Bobomurodova

Koʻrdingizmi, qayta koʻrishmoq
Azobining koʻzyoshi totligʻ.
Na tazarru, na-da urishmoq
Zavq bermaydi koʻngilga ortiq.

Koʻrdingizmi, parvozdan karaxt
Burgutlarning qismati shunday –
Qancha baland uchganin faqat
Qulayotgan vaqtda tushungay!

Koʻrdingizmi, Xudo mehribon,
Bizga berdi mayin ayriliq,
Sizdan sovib ketmadim hamon,
Isboti shu –
Soʻzlarim iliq…

Mendan oʻtdi. Iqrorman. Uzr.
Bilishimcha, yuragingiz gʻash.
Koʻrdingizmi, naqadar huzur
Kimnidir jim qizgʻonib yashash?

©️ Shahriyor Shavkat

"Ket — deysan (titraydi qo'llaring),
— Charchadim ko'nglingga qarashdan".
"Xo'p — deyman (ketishga yo'q imkon),
— Ketaman, ketaman, ketaman".

Baxt bizga bir qiyo boqmadi,
(Men axir baxtliman sen bilan).
Ketishdan boshqa yo'l qolmadi,
(Ketish bu — qaytishga ilk qadam).

Men sendan charchadim, inongin,
(Sensizlik — eng qo'rqinch tush, bilsang).
Biz keldik manzilning so'ngiga,
(Bir umr tirgakman yiqilsang).

Dilozor bo'ldik-da chunonan,
Bunchalar zo'r berdik kurashga.
Azizim, xo'sh, endi ne deysan,
Qavslar ichida yashashga?!

💙Ma'suma Obidjonova

Yo‘q, biz sevishmadik,
Dardlashdik, xolos…
Dardlashish – sevishish degani emas.
Axir o‘ylab ko‘rgin, azim Toshkanga
O‘qigani keldik, sevgani emas.

Men senga “sevaman” desam, bu – yolg‘on,
Sening ishonganing – eng og‘ir xato.
Chunki sof sevgiga bog‘langan inson,
Sevaman deyolmas yoriga aslo.

Sen menga ishonma,
Ko‘nglim – xiyobon…
Har kun yurib o‘tar undan qanchasi.
Har kecha tinmagan daydi shamolday
Kezar unda ishqning singan parchasi.

Ha, biz sevishmadik,
Ishq ko‘chasidan
Dardkash telbalardek yurib o‘tdik jim.
Taqdirimiz qanday xotima topar?
Aytib berolmaydi hech bir munajjim.

Dardimni yukladim dardingga qo‘shib,
Qalbingdan bosh olib, darbadar ketdim.
Yozgan xatlarimni burdalab tashla!
Senga arzimayman – tushunib yetdim…

©️Xurshid Abdurashid

Men senga osmonni keltirdim, sevgim,
Anov ikki to‘zg‘in buluti bilan,
Nimta oyi bilan,
Hududi bilan —
Men senga osmonni keltirdim, sevgim.

Men senga bahorni keltirdim, sevgim,
Yomg‘irlari bilan,
Sellari bilan,
Gullarni uyg‘otgan yellari bilan — Men senga bahorni keltirdim, sevgim.

Men senga saodat keltirdim, sevgim, Ko‘ngling ravshan bo‘lsin —
Chirog‘i bilan,
Bedorligi bilan,
Charchog‘i bilan —
Men senga saodat keltirdim, sevgim.

Senga bir tinch dunyo keltirdim, sevgim.
"Mana, olgin, dedim,
Hamma narsa taxt —
Mana bu mehrdir,
Mana bu-chi — baxt..."
Senga bir tinch dunyo keltirdim, sevgim.

Sevgilim, podshohlar senday saxiymas —
Menga bahori yo‘q kuz keltirding sen. Yana osmoni yo‘q ro‘z keltirding sen, Sevgilim, podshohlar senday
saxiymas.
Qatra iqboli yo‘q kuz keltirding sen.

Endi ikkimizda hamma narsa bor!
Qani, ketdik, jonim,
Bel bukilguncha,
Tomir uzulguncha,
Jon to‘kulguncha...
Yashashga iqrormiz, o‘limga iqror.

©️Usmon Azim

Sog‘inmayman deysiz ...
Aldamang!
Termulasiz suratimga jim!
Yig‘layapsiz???
Xijolat bo‘lmang,
Yo‘q ko‘rmadi,ko‘rmadi hech kim!

Quvmang bekor,
Rosti foydasiz,
Ismim kezar lablaringizda.
Qayga bormang, qaysi joydasiz,
Xayolingiz hamisha manda!
Badjahlsiz!
Asablar tarang,
Har narsadan topasiz ayb.
Siz ko‘zguga yaxshilab qarang,
Kimdir qarab turar mung‘ayib.

Unutganman deysiz...
Afsuski,
Bir lahzaga o‘chmadi yodim!
Qulog‘ingiz ostida mudom,
"Ketmang!" — degan so‘nggi faryodim!

Qaytmoqlikka qo‘ymaydi g‘urur,
Istak bilan qirpichoq har kun.
Bilaman-ku, sog‘inch neligin,
Bunga qanday chidamoq mumkin?!
O‘tayapti shunchaki umr,
Yuribsiz-da qismatga ko‘nib.
Bu dunyoda yetmasa sabr,
U dunyodan umidvor bo‘lib!

©️Malika Tavfiq

Men chiroyli edim seni sevgan payt,
Oynaga bir kunda yuz bor qarardim,
Tun kabi tim qora kokillarimni,
Sening barmoqlaring bilan tarardim.

Men chiroyli edim oshiqligimda,
Ko‘zing ko‘zgusidan uzolmasdim ko‘z.
Devona qilgandi sen bilib-bilmay,
Aytib qo‘ygan o‘sha bittagina so‘z.

Gerdayib yurardim malikalardek,
Necha shahzodalar izimda sarson.
Hammadan badavlat, hammadan baxtli,
Hammadan chiroyli edim men, ishon!

Endichi...
Kuz cho‘kdi bahorlarimga,
Kunlarim qorong‘u tunga aylandi.
Ishimda rivoj yo‘q, yo‘limda unum,
Oyog‘im boylandi, qo‘lim boylandi.

Yuzlarim qiyosi so‘liyotgan gul,
Bir-bir yaproqlarim to‘kilmoqdalar.
Umidlar eskirgan chuldir matodek,
Hamma choklaridan so‘tilmoqdalar.

Qorlar yog‘ib berdi kutilmaganda,
Qaro sochlarimga tashlab izlarin.
Asar ham qolmadi ohuligidan,
So‘nayotgan shamga o‘xshar ko‘zlarim.

Men chiroyli edim, seni sevgan payt,
Qashqirlar chang soldi ishqim baxtiga,
Sen meni munosib bilmadingmi,ayt.
Ko‘ngling mamlakatin taxtiga...

©️Malika Tavfiq

Mening senga umuman ehtiyojim yo'q. Tushunsang-chi axir, men yolg'iz o'zim ham baxtsiz bo'la olaman...

©️Sabohiddin Ali

Derazani chertib yomg'irlar o'tdi
Kechagina bizlar qoldirgan izdan.
Parishon bog'larni tumanlar yutdi,
Sevgilim, ne kechdi xayolingizdan?

Tashlab ketganida ma'yus turnalar,
Ichida yig'larkan hatto tog'lar ham.
Sevgilim, nechundir bag'rim tirnalar,
Ko'zingiz nogahon tortmadimi nam?

Daraxt shoxlariga qo'nadi bir qush,
Yomg'irlar tagida ivib, junjikkan.
Balki u mendirman, ko'rayotib tush
Yana olislardan sizga ko'z tikkan.

Bir go'zal ishq edi bizning sevgimiz,
Yorug' lahzalarning ovozi tindi.
Qo'shilib kelganda xazonlar seli,
Sevgilim, kim bilan yig'laysiz endi?

Men-ku, o'lib bo'ldim, shudir ishq rasmi,
Ammo siz g'amlarga chidaysiz qandoq?
Sevgilim, sevgilim, og'ir emasmi
Bir go'zal sevgini topib, yo'qotmoq?

....Sevgilim, kim bilan yig'laysiz endi?...

©️Zebo Mirzo

Endi tikanlimi bu erka yo‘llar,
Yo yo‘l tugadimi — endi qaytishmi?
Gullagan sevgidan qoldimi cho‘llar,
Endi begonaday "xayr" aytishmi?

Oh, qachon aldashga o‘rganasan sen,
Yuzingda kulgiyu labingda titroq.
Men uchun o‘rtanmay, o‘rtanasan sen...
Qo‘rqma! Tillarimda qolmadi so‘roq.

Ne qilay? Yurakdan bo‘shadi tanim,
Najot — ko‘nishdami, najot — o‘lishda?..
Azizim, azizim, azizim manim,
Ayt, qachon ulgurding jonim bo‘lishga!?

©️Usmon Azim