Nahotki, kun kelib baxtli boʻlamiz?!
Nahotki, yuzlashar oʻsha nigohlar.
Sogʻinchdan chanqagan yuraklarimiz,
Nahot faqat shu kun kelishin xohlar

Boʻldimi? Boshqa hech uchrashmaymizmi?
Axir bir tom ostida yashaymiz abad..
Ortiq duolarda soʻramaymizmi,
Oʻsha orzularing roʻyob boʻlgan payt...

Yoʻq, baribir yaxshi senlikda hayot,
Yoningda borligim his qilish — zoʻr baxt!
Insonlarga dunyo kerakmish hayhot,
Bizga baxt kifoya, kerakmas toj- taxt.

Birgalikda alvon hislar-la joʻshib,
Yashaymiz, azizim, quvonchdan toshib,
Achchiq choy damlaysan, oʻtmishimizdek,
Beraman men unga shakarlar qoʻshib...

Butun umr havas qilar bor tanish-bilish,
Koʻzlarimdan artasan sevinch koʻzyoshni.
Oh qanday qiyin-a tasavvur qilish,
Boʻronlardan keyin chiqqan Quyoshni...)

🥥So'g'diyona

Bir kishini chin dildan sevgan, butun dunyoni sevadi...

🥥Erix Fromm

Bir marta ko'rishdayoq yurak-bag'ring o'rtanib sevib qolsang — mana shu haqiqiy muhabbat, qolgan hammasi bekor. Dunyoda olti milliard odam yashaydi. Lekin yulduzing yulduzingga to'g'ri keladigani bittagina. O'shani topsang — baxting, topmasang, o'zingniyam, o'zgalarniyam aldab, kun ko'rib o'tib ketaverasan bu hayotdan...

🥥Puankare

Mening ham ko‘p savdo boshimga tushdi
Yetib borolmadim sizga.
Iymandim.
Sizdan parvozlangan uzluksiz tushni —
Qo‘shiqli ruh etdim faqat —kuylandim.

Qismat — yo‘rig‘imga yurmagan olam.
Umr — siz tarafga taralgan ko‘nglim...
Baxtli bo‘lolmayman men sizsiz.
Hech ham.
Siz esa mensiz ham baxtiyor bo‘ling.

🥥Usmon Azim

Qara oy toʻlibdi… sen ham oyga qara men ham qarayman. Bir-birimizni koʻramiz shunda…)🌑

Masofalar ahamiyatsizligini yana qanday isbotlash kerak?!

Masalan, agarda Sen ummon boʻlsang,
men daryo — vasling deb toshganim toshgan.
Masalan, agarda Sen osmon boʻlsang,
men bulut — bagʻringda shoshganim shoshgan.

Masalan, Sen olov boʻlsang agarda,
parvona misoli senga gushnaman.
Masalan, Sen yogʻmur boʻlsang agarda,
qaqragan zaminday senga tashnaman.

Masalan, Sen bibi Havo boʻlsang gar,
men senga ergashgan hazrati Odam.
Sen-la ikkilanmay tanovul qilgan
Jannatdagi taqiq mevasini ham.

Masalan, Sen menga bir kalom bersang,
tilimdan tushmaydi ulugʻ kalimang.
Agarda sohilda intizor kutsang,
suv yuzidan borgan masrur valiyman.

Masalan, sen sukut saqlagin desang,
qoshingda million yil baliqday jimman.
Asli bitta ruhmiz ikki vujudda,
Sensiz men nimaman?
Sensiz men kimman?..

©️Orifjon Komil

Uchrashdik
yildirim umrimiz charchagan chog‘da
tonglardan gul so‘rab, yulduzlardan barg.

Uchrashdik
harorat sog‘ingan qo‘llarimizda
sog‘inchdan suv bo‘lgan bir hovuch yurak.

Uchrashdik
ishq o‘lgan tomirimizdan
jaranglab kelardi qadimiy saslar
va yillar aldagan ko‘zlarimizda
yig‘lab yurar edi gunohkor vaqtlar.

Uchrashdik
so‘zlarning rangini yellar
ulashib berganda soqov kunlarga.

Uchrashdik
xayolning serso‘qmoq sarhadlarida
adashgan ko‘p izlar och qolganida.

Uchrashdik
ishonmay bir-birimizga
jimgina tikildik dildirab, to‘nib.
Kulni titkiladik, erinmay, uzoq,
cho‘g‘ yo‘q,
cho‘g‘ yo‘q,
cho‘g‘ yo‘q.

Xayrlashdik
yolg‘onchi xotirning so‘ziga ko‘nib...

©️Aziz Said

men ko'p tashbeh izladim,
qiynaldim rosa
munosib so'z ila tasvirlamoqqa.
ammo ular ta'sirsiz va jo'n
mahkam quchib olmoq oldida.

©️Behzod Sherzod o‘g‘li

Men sensiz sochilib ketaman, ko'kka
Men sensiz butunni etolmasman kasb
Bir kam dunyosini hech mensimasdan
Ketyapman, bo'shlig'ing to'ldirmoq istab!

Vahola, men senga begona bo'lsam
Yod bo'lib ketganki, ismim, bilaman!
Va bir kun ruhimda pokdir ruhlanish?!
Demakki, men endi qalbing bilanman!

Yillar o'tgan sayin yaqinlashar dil
Ko'z yoshim ko'ksingga singib ketadi
Ruhimiz birlashsa, agar bir kuni
Ko'nglimiz ko'kdagi baxtga yetadi!

...va uchib ketamiz bu qaro yerdan
Ahdimiz qanotga aylansaki, bas!
Men Senga ishondim, endi hech kimsa
- bizni qaytarolmas!

🥥Ubaydullayeva Durdona

Ba'zi uchrashuvlarning takrori yo'q: yo yashaysan yoki armonga aylanasan...

©️N.N

Bir go‘zal so‘zlaring bor,
eshitsam,
dunyo ziyoga to‘lar.

bir yorug‘ ko‘zlaring bor,
qarasam,
dunyo
dunyoga to‘lar:

ufqlar yo‘qolar,
osmon osmonlardan narida...

Meni esa uchgim kelar,
bir qush kabi.

Yurakning tilida
nimanidir chug‘urlab —

osmonlardan narida.
Qanotlarim cheksizlikning
nafasiga tegib.

Garchi qo‘nishimga
sevgingdan
bir navda
qolmasa ham,
uchgim keladi.

Sehrgarim!

Meni yerga ishonmaydigan
sehrgarim!..

🥥Usmon Azim

O'zingni to'xtovsiz taftish qilishdan charchaganingda, qo'ng'iroq qil.
Raqsga tushamiz..!

©️Iosif Brodskiy

(Sening yo‘qliging)

Kulib turgan edim...
Birdan kimdan ayrilganim yodimga
tushdi.
Jilmayib yig‘layotgan odamni
ko‘rganmisan hech?
Yo, doim jilmayib turgan odamni
yig‘latishmi ishing?
Daf'atan yopirilib keldi xotiralar...
Xuddi sohilga yopirilib kelgan chag‘alay
qushlar yanglig‘...
Qanchalar go‘zaldir xotiralar, yashalgan
lahzalar...
Garchi jon berdi bugun, lekin baribir
hayotdir ruhimda ular...
Gulgun davrada, go‘zal Shahrisabzda,
marvarid shaharda kulib turgan edim...
Birdan bostirib keldi Sening
yo‘qliging va endi menda hech qachon bor
bo‘lmasliging...
Mayli, menda, mening hayotimda,
yonimda bo'lma.
Lekin, shu sayyorada, shu aylanib turgan
yer kurrasida bor bo‘l!
Qalbim, yuragim, ruhim sayyorasidan
ketma!
Tabassum qilib turgandim,
Favqulodda, daf'atan o‘n sakkiz ming
olam ichra yolg‘iz qolganimni his etdim.

Sensizlik kimsasizlikdir, azizim.

©️Guljamol Asqarova

Xotiralar sizni ichingizdan isitadi. Lekin ular sizni yondirib yuborishi ham mumkin.

©️Kafka

SIG‘INDI

O‘sha kun... ortiqchalik qildim
jannatga —
Lash-lushsiz uchdim-u,
Mashriqqa tushdim.
Qirq yillik firoqda jonim uvishdi —
Libosim yaproq edi.

Xudo behudaga bermas qirqta jon,
Ko‘nglimni kundaga qo‘yib chopdilar,
Chopqilar gulladi, chopqilar!
Sotdilar...
Qadrimga dunyo topdilar —
Dunyosi quroq edi.

Bir kun ostonadan haydaldi onam,
Vazifasin yanglish uqqani —
O‘g‘il emas meni tuqqani
uchun.
Vaholanki, ularga mehrim
O‘g‘ildan ko‘proq edi.

Boshqa hayotimda ochiq qabrga
Qo‘g‘irchog‘im bilan ko‘mdilar,
O‘yladim: "Haliyam men bilan birga
Berkinmachoq o‘ynayapti ular...
Nega haligacha topisholmadi?"
Qo‘rqardim, dildirab sovuqda tanim.
Oxirgi nafasda chaqirdim zo‘rg‘a...
So‘ngra
ho‘ngrab-ho‘ngrab qorishdim go‘rga...
Asosim tuproq edi.

Yashirin, — dedilar, — yugur, qopga kir,
Berkitgil, — dedilar, — ko‘zlaring go‘zal.
Quyosh olgani chun yuzimdan bo‘sa
Toshbo‘ron ostida chayqalib boqdim,
(go‘yo)
Ilma-teshik meshdan may kabi oqdim...
Kayf-u safosiga qon tomib turgan
Ko‘ylagim — bayroq edi.

O‘z uyi bo‘lmagan hech vaqt ayolning —
Otasi,
bolasi,
erining uyi...
A'vomning umrida eng oliy o‘yi —
Ayoldan qutilishday
jirkanch ozodlik!
Bu erk — chin qamoq edi.

Odamzot g‘ajir o‘z qovurg‘asini,
Ishlashga qo‘ymaydi,
Tishlashga qo‘ymas,
Minnatga yo‘yar-u,
Sunnatga yo‘ymas,
Men tuqqan olomon hurkdi o‘zimdan,
Naqadar qo‘rqoq edi.

Tomog‘imdan o‘tgan har tomchi suvda,
Raqamlar aks etar hisobin jamlab,
So‘ng qorishib ketar obi diydam-la
Shunchaki,
Malolim kelmasin hech kimga dedim,
Uvolim kelmasin hech kimga dedim,
Istagim top-toza avlod o‘stirish,
Umidim buroq edi.
Biroq endi...

Jannat oyog‘imning ostidaligi
Boshidan so‘roq edi.

©️Nozima Habibullayeva