Deding: "Gunohingdan o'tdim azizim,
Tag'in o'z yo'lingdan ketaver shodon.
Endi faqatgina odamlar uchun
Do'st bo'lib qolamiz yoki qadrdon ".

So'ng o'sha noz bilan kokiling siltab
sarkashta epkinni etding baxtiyor.
Quchgim kelar edi, o'pgim kelardi,
Afsus, atrofimiz to'la do'st-u yor.

Dardlashgim kelardi, sayr etib bog'ni,
Aziz qo'llaringdan tutgim kelardi.
Aytgan so'zlaringni ko'zni chirt yumib
arzon sharob kabi yutgim kelardi.

Xullas, men juda ko'p qilardim orzu,
Har bir istagimning boshiga yetding.
Yig'laging keldi-yu... odamlar bor-ku,
Kulding-da ketding...

Ketding,
ko'z qiringda qoldim fig'onda,
Na yomg'ir yog'ardi, na turdi to'fon.
Oxir shivirladim: — "Sevmasman jondan,
biz faqat do'stlarmiz, ishon, Xudojon! ".

🥥Bek Ali

Kimsiz?
Ayting, kutganimmisiz
Yoki qismatimda adashgan kimsa?
Kimsiz, peshonamga bitilgan g‘ammi,
Va yo kiprigimga boylangan g‘ussa?
Alammisiz, ta’qib qilgan ming yildan beri,
Balki, sochlarimga tang‘ilgan baxt – siz?
Qachondir yo‘qotganim allaqaydadir,
Topinganim, eng so‘nggi ahd – siz?
Balki, oniy bir lahzada tug‘ilgan ertak,
Gunoh-u savobimga aylangan so‘z – siz.
Balki, bahorimdan qolgan xotira,
Hali hayotimga kelmagan kuz – siz.
Tobora yurakka singib borayotgan:
Anglanmas, o‘qilmas, buyuk sirim – siz.

©️Goʻzaloy Solih

Urinmang.
Menimcha behuda
Koʻngilga kirishga urinmoq.
Boʻyingiz yetmaydi ishqimga
Meniki balandroq
Balandroq...

Sizdagi fikrlar boshqacha,
Mendagi qarashlar oʻzgacha.
Aldanmay qoʻyganman, sizdaylar
Sevgisi yozgacha, kuzgacha...

Qosh-koʻzim chiroyli emas-ay,
Qalbingiz  tilmogʻim chiroyli.
Haddingiz bilsangiz yetarli,
Haddimni  bilmogʻim  chiroyli.

Hoʻp seving, baribir bir kuni
Sabringiz toʻladi, azizim.
Chiroyli qizlarning hammasi
Muzyurak boʻladi, azizim.

Urinmang...
Menimcha behuda
Koʻngilga kirishga urinmoq.
Boʻyingiz yetmaydi ishqimga
Meniki balandroq
Balandroq...

©️DI

Sizga yozganlarim hammasi yolg‘on,
Shunchaki ozgina ojizlik holos.
Nimalar deb qo‘ydim o‘zi men nodon,
Hech birin ko‘ngilga olmang, iltimos.

Yuribman...
Kunlarim, tunlarim sokin,
Hamma odam kabi oddiy bir odam.
Hech kim so‘tmayapti yaralar chokin,
Hech kim qo‘ymayapti yuzimga qadam.

Bahorni kuzatdim, yozda o‘lmadim,
Ko‘nglimni ko‘mmadi kuzda xazonlar,
Faqat yolg‘izligim yuzimga solib,
Tepib o‘tadilar ba’zan yomonlar.

Qayg‘urmang,
Men endi ko‘nikib ketdim,
Yig‘i ham kelmaydi nursiz ko‘zimga,
Sizku begonasiz endi yetti yot,
Achinmay qo‘yganman o‘zim o‘zimga.

Yuribman...
Tinch yashab,
Faqat har zamon,
Bir sanchib qo‘yadi bu xasta yurak.
Endi urishiyu, og‘rishining ham,
Hech farqi yo‘qligin bilmasa kerak.

🥥Malika Salimova

Men bilgan haqiqat shuki: siz sevuvchi odam bilan sizni sevuvchi odamning bitta inson bo'lishiga hayot hech qachon yo'l qo'ymaydi.

🥥Remark