Sen — bo’g’zimga atalgan dorsan,
Peshonamga bitilgan qismat.
Men Xudodan maxfiy yo’llangan,
Qiyomatda ochilguvchi xat.
O’limiga tashna mahbusday,
O’limga zor ko’rdek zanjirband.
Intilaman, men senga, ammo
Sen balandsan,
Judayam baland!

Tiklanaman senga uzalib,
Suyalaman – yetmaydi qurbim.
O, boshimda tikilgan sirtmoq,
Talpinadi senga bor umrim!
Yo’q,
Lahzalik jazo yetmaydi,
Senga kerak ming yillik javob.
Sening qadar yuksalgunimcha –
Umrim mening buyuk iztirob!
Qurbonlikka atalgan baxtday
So’ramayman: “Nechun?”, “Nega man?”
Intilaman senga najotday,
Seni o’lim kabi sevaman!
Axir menga, bir menga zorsan,
Borlig’ing-da borlig’imga band.
Sen bo’g’zimga tortilgan dorsan,
Juda baland,
Judayam baland!

🥥Zebo Mirzo

Kipriklaring ogʻirlashdi jim,
Koʻtarmoqqa yetmadi kuching.
Yuzlaringga botdi nigohim,
Shunda paydo boʻldi kulgiching...

Shabnam kabi nurga toʻyingan,
Yurak zarbim bilan hamohang,
Bitta-bitta barmoqlaringdan
Tomchiladi yelkamga ohang!

Sharh-u shakli nimadir kuzning,
Noyabrda gulladi ochun?
Shivirladim, maʼsuma qizning
Ruhi boʻylab yugurdi afsun!

Ey, telbalik ichra topganim,
Ey, koʻnglida ojiza jurʼat,
Xudo bergan hisni totgani
Odamlardan soʻrama ruxsat.

Oʻz erkimni etgani tahqir,
Oʻzing ayt-chi, birov haqlimi?
Kulgichingdan olganman, axir,
Sening baxting boʻlish baxtini!

©️Shahriyor Shavkat

Bir-birimizdan bir necha qadamli masofada uzoqmiz aslida, ammo oramizda kilometrcha gʻurur bor.🌟

@aestiverse — shop kanal ochdim o'tgan safar oching deganlar bor edi.🤍

Narxlar hozircha arzon judayam.
Kelish muddati 15 kundan uzog'i 15 kungacha, kargosiz tovarlar.🌟

Nimadir yoqsa bemalol zakaz qivurasila❤️

P.s: bugun ochilgani uchun tovarlar kam. Hali endi koftalar, maktab kiyimlari tashlanadi

Ko'zlaring mahzun-u, kulasan mudom,
Qaysi baxtlar chizgan kulgichlaringni?

🥥Rayhon

Bu kecha oy o'zin osmondan otdi,
Qamishlar shivirlab chiqdi bu kecha.
Tushlarimda meni “Aya” deb aytdi,
Ko'zlari siznikiga o'xshagan qizcha.

Shu kecha shamollar o'zidan ketdi,
Daraxtlar sochlarin yoydilar so'zsiz.
Men yostiq ostidan ko'zguni otdim,
Yana siz... Nega siz?.. Nechun, yana siz?..

Men sizga sig'inib yasharman qayta,
Sog'inch ko'zlarimni kuydirganda vaqt,
Baribir men uchun hali bir marta,
Sizni tushlarimda ko'rish o'zi baxt!

🥥Zebo Mirzo

Baxtning suratini chizar xayolim,
Deraza ortidan moʻralaydi oy.
Yurak dukurlari buzar sukutni,
Men sendan bir maktub kutdim hoynahoy?

Ilkimda qaltirar moʻyqalam bir zum,
Banogoh, shoshadi boʻyoqlar tomon.
Chalkashib ketsa-da barcha-barchasi,
Baxtning borligiga qilmayman gumon.

Toʻxta shoshmay turgin, fursat-g’animat,
Hech yoʻqsa tasviring yodga mixlayman.
Har kun tushlarimga kirishing uchun,
Mayli, derazamni ochib uxlayman.

©️Shahlo Davronbekova

Huvillab qolmasmi keppa-keng osmon,
Shaharning ovozi keltirib gʻashni.
Sevgan koʻzlaringga qarab
rostin ayt
Eplay olasanmi mensiz yashashni?

Ogʻir botmaydimi koʻksingga havo,
Ketsam, yuragingda oʻrnim talashmi?
Ming baxtlar berilsa —
Men berilmasam,
Eplay olasanmi shunday
yashashni?

Rozi boʻlasanmi ketsam umrbod,
Bir chekkaga surib ahdni, qasamni...
Qaytib bogʻlaringga kelmasa bahor
Sogʻinmaysanmi?

Huvillab qolmasmi keppa-keng osmon?!

🥥DI

Sevgi o‘zi nima? Sevgi — bu U kulayotganda, sen uning yuzidan ko‘zingni uza olmasliging va doimo uni yana kuldirish uchun nimalarnidir qilishga intilishing. Shunda yana unga tikilib, ko‘zlaringni uzmay qarash imkoni tug‘iladi.

©️Maks Fray

Sevikli kishing bo'lganda shoshib qolasan, chunki uning visolini eslashning o'zi naqadar qiyin, naqadar qiyin...

©️Choliqushi

​​Inson ruhida ham qiyomatlar bor,
Og'ir sinovlar bor, sinoatlar bor.
Muhabbat sal chalg'ib turgan mahalda,
Sezilmasdan o'tgan xiyonatlar bor.

Mehr berolmasang, qiynoqqa ko'ndim,
Diydor berolmasang, firoqqa ko'ndim.
Sen meni boshqaga berma, iltimos
Boshqaning qo'lida kelmaydi o'lgim.
Ularda boshqacha itoatlar bor.

Menga o'xshamasin mehribonlaring,
O’rnimni bosmasin qadrdonlaring.
Chiqib ketamanku unda yodingdan,
Mensiz o'taverar ming bir oylaring,
Menda g'alat-g'alat shikoyatlar bor.

Men shirin sog'inchni Xudoga aytdim,
Sendan boshladim-da senda tugatdim.
Ko'nglini kul bosgan kimsalargamas,
Bog'dan yelib kelgan saboga aytdim,
Xudoga aytdim men, Xudoga aytdim,
Shu sabab duoda ijobatlar bor.

Inson ruhida ham qiyomatlar bor!!!

©️Rislig‘oy Hotamova

Sening yashnab turgan ko’ylaklaring bor,
Yodimga soladi xushbo’y kezlarni.
Hayotning torgina yo’laklari bor,
To’qnash keltiradi goho bizlarni.

Sen meni ko’rmaysan, payqamaysan hech,
O’tasan jimgina boshingni egib.
Sen meni sezmaysan, payqamaysan hech,
Qo’llarim qo’lingga ketsa ham tegib...

Tunlar jim kezaman tinch daraxtzorni,
Bir qasos sezaman tinch shamollarda.
Uzun sochlaringning hasrati bordir,
Jimjit yig’layotgan majnuntollarda.

Axir, yonayotgan yuraklaringni,
Qismatim yuziga qarab otsang-chi!
Boshingni xam qilgan gunohlarimni,
O’zimning bo’ynimga ossang-chi!

Nega jim yashaysan, sokin yashaysan?!
Sezmaysan, qo’llarim ketsa ham tegib.
Olamda men yo’qdek, hech payqamaysan,
Yashaysan jimgina boshingni egib.

Men esa tirikman hayot bag’rida,
Tirik o’kinchlardan yongan qalbim bor.
Lekin men bilaman, sening qalbingda,
O’zimning... qarovsiz qolgan... qabrim bor!

©️Mirzo Kenjabek

Sen balki uni har doim sevarsan, lekin, U bilan doim ham baxtli bo'lavermaysan.

©️"Aka-uka Karamazovlar"

Nogoh salqin keldi avgust so‘ngida,
Yomg‘ir yog‘ib o‘tdi bugun ertalab.
Ertalab —  sabrning ko‘zi o‘ngida –
Men sening ismingni aytdim erkalab.

Nogahon o‘zgarish etdimi ta’sir,
Yo salqin xotirang yetdi – bilmadim:
Ko‘nglimni ertalab etmadim tahrir —
Erkalab ismingni aytdim. Yig‘ladim.

Tushundim — taqdiring ishin yuritgan 
Beyurak royishlar haqlidir, haqli.
O‘yladim: - Albatta, meni unutgan! —
Albatta, baxtlidir! Albatta, baxtli!

Asli bu mung nechun? Taqdir hal bo‘lgan.
Umrdan necha kun qoldi? Bilmadim.
Sensiz o‘lmog‘imga qismatim ko‘ngan...       
Baribir yig‘ladim.

©️Usmon Azim

Uzoq-uzoqlardan termulaman jim,
Duolar qilaman umringiz tilab.
Har tun kuzataman sizni oromga,
Har tong uyg‘otaman suyib, erkalab!

Har kun qahvangizga qo‘shaman shakar,
Va o‘zim ichaman istamasam ham.
Bizni o‘rtamizda ikkita shahar,
Siz boshqa olamda, men boshqa olam!

Kun bo‘yi tiriklik, ro‘zg‘or, uy, tashvish,
Ammo xayolingiz hamisha hamroh.
Sizga imkoni yo‘q yonimga kelish,
Mening bormoqligim eng shirin gunoh!

Nega ko‘ylagingiz yoqalari kir,
Necha kun to‘kilmay yotibdi kuldon?
Ko‘ylagingiz yuvish kimgadir taqdir,
Kuldonni bo‘shatish kimgadir armon!

Har tun sog‘inchlarni yostiqqa to‘kib,
Tongda dunyosidan qilmayman gina.
O‘sha ho‘l yostiqning jiltini so‘tib
Yana jilt tikishdan toladi  igna!

Siz ishga jo‘naysiz,
Men ostonada,
Sizga o‘ptiraman o‘g‘lim, qizimni.
So‘ngra tushlarimda telbaxonada,
Yig‘layman devorga bosib yuzimni.

Ishdan qaytasiz-u, kutmaydi hech kim,
Sovigan ovqatga qaraysiz hissiz.
Bugun ulovingiz o‘rindig‘ida,
Qo‘lingizni quchib yig‘ladi bir  qiz!

©️Malika Tavfiq

Hozir ,"baxt" so‘zini eshitging yo‘qdir,
Shunchaki...
bir o‘zing yig‘lamoqchisan.
Tashqarida Ishqni
shivirlar yomg‘ir,
o‘z-o‘zingni she'rga chog‘lamoqchisan...
Qo‘lga qalam olding,
to‘lding g‘ussaga,
xonangga iymanib kiradi Afsus.
Kamiga dardlarin ortib jussangga
yuragingga kirib kelayotir Kuz.

©️Mirzohid Muzaffar