Vaslingni sog‘inib entikar yurak,
Seni topgunimcha yashadim qanday?
Ko‘zlarimga doim jilmayib qara,
Mendan ranjimagin begonalarday.

Tilimda, dilimda aylanar isming,
Seni avaylayman durdonalarday.
Mayliga eng achchiq so‘zlaringni ayt,
Mendan arazlama begonalarday.

Qo‘lingni uzatgin tushamiz yo‘lga,
Umrimiz o‘tmoqda qo‘l tutmas yelday.
Dunyoning shundoq ham yolg‘onlari ko‘p,
Meni aldamagin begonalarday.

Ba’zida izzatni so‘raydi do‘stlar,
Dunyoga sig‘masman – yo‘q choralarday.
Seni ko‘rgim kelar o‘sha damlarda,
Meni qiynamagin begonalarday.

Bog‘lanib qolganman nigohlaringga,
Umrim mazmunisan bir donalarday.
Boshimga osmonlar qulasin, ammo,
Ayrilib ketmaylik begonalarday.

©️

Xo'sh 2025-yil nimalarga erishdim?

O'zi 2025-yil haqida post yozish niyatim yo'q edi, mayli nasib qilgan ekan.

1 yilni deyarli uxlash bilan oʻtkazdim deb oʻylagandim ammo nimalargadir erishganimdan va oʻtgan yilgi "men"imdan oldinda ekanligimdan xursandman.

Xo'sh nimalarga erishdim:

💙Avvalo, Iroda opa (@gullayotganyurak)ning Asmo ul-Husna kursida oʻqib anchagina narsani oʻrgandim va bundan minnatdorman. 2025-yildagi eng katta yutuqlarimdan biri shu bo'lsa kerak.

💙Yana organic kursda qatnashib, soch uchun spreylar, qosh, kiprik uchun serumlar va yuz uchun har xil turdagi tabiiy organic mahsulotlar tayyorlashni oʻrgandim.

💙"Ilm markazi"ning rus tilidan uch oylik kursida oʻqidim. Va "разговор"im anchagina yaxshilandi.

💙Shahlo (@quyoshtaraflarda) ning turk tili kursi orqali turk tiliga muhabbat qo'ydim. Va ko'proq turkcha seriallar ko'rib, kitoblar o'qishni boshladim va o'z o'zidan turk tilidagi darajam ham koʻtarildi. A2 bo'lsa kerak.

💙Arab tilidan kursda qatnashib, arab tili harflarini oʻrgandim. Ammo Qur'onga tushishga ulgurmadim, 2026-yilda nasib qilsin.

💙Va eng asosiysi o'zimning shaxsiy biznesim (@aestiverse)ni ochdim. Bu orqali moliyaviy jihatdan qaysidir ma'noda anchagina mustaqillikka erishdim

💙"Senga" auditoriyasi esa ushbu yilda 1.5K ga oshdi. Bu ham bir yutuq bo'lsa kerak.

💙nimalarnidir erishdim, nimalarnidir yoʻqotdim. Va hayotimda nimaiki bo'lgan bo'lsa baridan minnatdorman.

Nimagadir erishishni orzu, niyat qilmay turib shuncha narsaga erishganimdan va hammasi taqdir izmida ketayotganidan xursandman.

2025-yil senga tashakkur❤️
18 yoshimning eng katta qismi, eng goʻzal xotiralari sen bilan oʻtdi🌷

Men kutdim...
Oxirgi daqiqagacha,
Nima bo‘lganda ham yangi yil, axir.
Tabrik yo‘llashingga izn bermadi,
Bizni ikki yo‘lga yo‘llagan taqdir.

Men kutdim...
Umidga to‘lib vujudim,
Shodon chehralarga termulib hissiz.
Minglab chiroqlarin yoqib, ohista,
Yangi yil kelmoqda sensiz, sevgisiz.

Men esa kutishdan kecholmadim voz,
Xar kelgan xabardan yurak potirlab.
Bir og‘iz tabrikka arzitarsan deb,
Qo‘yarsan nomiga menga baxt tilab.

Bilardim, qachonlar yodingda yo‘qman,
Hatto raqamlarim bo‘lganlar unut.
Soat o‘n ikki bor urayapti bong,
Kut! Kut! Kut!

Sensiz kelgan bo‘lsa, kelsin, nachora,
Yo‘lingga to‘kilsa, to‘kilar ko‘zim.
Faqat sen baxtiyor bo‘lishga so‘z ber,
Yangi yil muborak bo‘lsin, azizim!

©️Malika Tavfiq

SEN

Sen sira ham avtobusda yurmaysan.
Odam zich joylarda yo‘qliging aniq.
Issiq nonga navbat kutib turmaysan,
Bozorga tushmaysan savat ko‘tarib.

Chetlanib o‘tasan xiyobonlardan,
Hayvoniy ehtiros sen uchun emas.
Va tag‘in bachkana riyokorlardan
Nafratni yashirish qo‘lingdan kelmas.

Qoningda mag‘rurlik azaliy, tug‘ma.
Garchi yursang hamki yupun, ochiqqan,
Arzon kafelarda yutmaysan luqma
Ming bir kas og‘ziga tiqqan qoshiqdan.

Ko‘nglingni behuzur qiladi dayus,
Behayo ko‘zlarning ta’qibi zimdan.
Sevgingga munosib yigit yo‘q, afsus,
Senga noloyiqman hatto o‘zim ham.

©️Jamoliddin Badalov

Axir nega anglamayapsiz?
Dunyolar ketsalar qaytadi bir kun
Daryolar ketsa ham qaytadi bir kun
Ammo manim koʻnglim qaytmaydi...

Ko'zlarimni yumsam, keta olmaysiz
Ko'zlarimni ochib, demasman "qayting"
Gʻurbatlar bezagan dunyolarinda
Meni ham sog‘inish mumkinmi ayting?

Ko‘zim qaro edi ayriliqdan ham,
Manglayday qarodir mening xorligim.
Xudoyimning keng bu olamlarida,
Sizga malolmasmi mening borligim?

Va yana hech qachon qaytmasligim ham.

©️Guljamol Asqarova

Sarhisob qildim
yilni
ma'nisiz kunlarimdan
qiymatga arzirli
hodisa izladim
harakatlarimdan
natija qidirdim
va ulkan bo'shliq aro
duch keldim yodingga.

Erishganlarim degan ustunga
yozdim ismingni.
Yo’qotganlarimga
bitdim tag’in
o’sha ismni,
barmoqlarim siladi uni
qog’ozga to’kildi tomchilar
quritmoq uchun
hislarim va qog’ozni
ildim qo’l yetmas
dorga.

©️Anif

Keting,
Sizga ehtiyojim yo'q,
Sevib bo'ldim Sizsiz o'limni.
Yana ming yil yashasangiz ham,
Tushunmaysiz mening ko'nglimni.

Kutmang,
Sizga bermayman ortiq,
Umrimning bir lahzasini ham,
Yuragimni yulib tashlayman,
Azoblarga topaman chidam!

Hechqisi yo'q,
Yashab ketaman!
Sizdan yorug', sizdan balandroq.
Nasib ekan so'ngsiz o'limni
Tirik murda bilan ko'tarmoq.

Qoldirmoqqa urinmang, illo,
Boqmang ilhaq, intiq, g'amangiz.
Menga behad yolg'on tuyular,
Ishqqa o'xshab ketgan ta'mangiz.

Nima qilay,
Shunday Ayolman,
Tabiatan va yoki dilan:
Sevsam juda qattiq sevaman,
Ruhim, jismim, hayotim bilan!

Nomingizga qo'shilib o'sdim,
Har kun,
har tun mahrum va badar.
Men sizniki bo'lib yashadim,
Bilsangiz, to shu kunga qadar!

Ammo bildim.
Siz butkul boshqa!
Buloqdirsiz — sokin va beg'am.
Anglamaysiz, bir kuni aytmay,
Poyingizda suvsab o'lsam ham.

Yo'q, bu ishqni ko'tarolmaysiz,
Sizni ezar tahqir va taqiq.
Bu dunyoda eng go'zal sevgi,
Hamisha xor, mahkum, mustahiq!

Keting,
Sizga ehtiyojim yo'q!
Sevsam endi sevgum O'limni.
Yana ming yil yashasangiz ham
Tushunmaysiz, afsus, ko'nglimni...

©️Zebo Mirzo

Bizlar afsus turfa edik, turli edik,
Ko'rolmadik baxtimizni birga-birga.
Taqdir dedik, hayot dedik, azal dedik,
Keyin esa yuz burishdik bir umrga..

Sog'inchlar o'rtaydi jismingni,
Ko'zlarim topolmay halaksan.
Sen yaxshi ko'rarding ismimni,
Aytarding:
" Men sening yomg'iring,
Sen esa osmon-u falaksan".

Bizning baxtning odimlari og'ir-og'ir,
Yozilmadim, bitilmadim peshonangga.
Sening isming o'zgasiga yozdi taqdir,
Men tugadim, men aylandim devonangga..

Xotirim qiynasa, og'rinsang yana,
Yakuniy bir chora, keldi bitta o'y,
Sen yaxshi ko'rarding ismimni,
Ismimni qizingga qo'yib qo'y..))

©️rayhon.

Azizim, dunyoning ro‘yi o‘zgardi,
Taxtga kel dedilar, poyingga qaytdim.
Ko‘zlarimga to‘ldi izlaring gardi,
Isming ne dedilar... ismingni aytdim!

Sen ketar ekansan ufqqa tomon,
Ishqning bog‘larida qiyomat qo‘pti.
Garchi bu janggohda qolmasman omon,
Toshni o‘p dedilar... Ko‘nglingni o‘pdim.

Azizim, kechirgil, senda hech ayb yo‘q,
Sevishga munosib emasman o‘zim.
Endi jim yashayman, yuragimda cho‘g‘,
Xo‘rlik yoshlariga to‘ladir ko‘zim.

Bormoq istagini otdim daryoga,
Do‘zax-u jannatning sayridan qaytdim.
Ism qo‘y dedilar ikki dunyoga,
Bosh egib, ikki bor ismingni aytdim!

Azizim, ko‘nglingning ko‘yi o‘zgardi..

🥥Guljamol Asqarova

sen oldin bormiding sayyoramda,ayt?
nega ko'rmaganman seni ilgari?
ko'zimiz ham to'qnash kelmadimi hech,
yurgan ekanmizda majruh singari..?

qachon paydo bo'lding qarshimda alpdek?
alif qomatingga men bo'ldim qurbon.
o'ylasam o'zimdan ko'p o'ylab seni,
qizg'onsam hammadan rashk qildim yomon!

quyuq tuman kabi kipriklaringni,
shaydosi bo'lganman men o'sha kecha.
qiyiq qoshlaringga o'zimni osib,
baxtsizlik kishanin kelyapman yecha...

bilmasam,negadir aftodaholman,
shu kunlar yurakda turar siyrating.
qalandar kabiman sening hajringda,
ayama sevgilim mendan himmating.

tobora unutib boryapman o'zni,
menda "men" qolmadi bir sendan ortiq.
kelsang gar yonimga borliging bilan,
sevgimni yo'lingga qilaman tortiq..

©️Ahmadjonova Zuhraxon