Sevgimiz o‘ldimi? — libosingiz ko‘k,
Ko‘nglingiz — begulxan, ko‘zingiz — becho‘g‘.
Bizdan borish yo‘qdir, sizdan — kelish yo‘q
Kelishsiz dunyoda beg‘am, azizim,
Nega ko‘zlaringiz benam, azizim.

O‘t yetdi — qaqshatdi band-bandlarimni,
Tuproqda sochdingiz balandlarimni,
Aqlimni, dilimni — bebaxtlarimni —
Borishsiz dunyoga otgan, azizim,
Olisda oy kabi botgan, azizim —

Chunki tunga aytar rost "oh"ingiz yo‘q,
Falakda kezgani sha'n rohingiz yo‘q,
Nechun kelmaysiz, gar gunohingiz yo‘q —
Boqaman: nigohim — gumon, azizim,
Yo‘llaring tumandir, tuman, azizim.

Qarang, ming bir bargda kuzak uchadir,
Qizil-sarig'ida — yurak uchadir,
So‘ngaklar uchadir, suyak uchadir —
Bu to‘fon — xazonlig‘ menman, azizim,
Sizsiz ming kuzakka tengman, azizim.

Ammo siz sarg‘aymang — gulli bog‘ bo‘ling,
Yam-yashil ko‘karing, mudom sog‘ bo‘ling,
Bahorning bag‘rida beadog‘ bo‘ling —
Axir, qarg‘aganim sizmas, azizim,
Ikki kuz dunyoga sig‘mas, azizim...

💙Usmon Azim

Bir marta koʻzimiz boʻldi roʻbaroʻ –
Fasllar chalkashib, aqldan  ozdi.
Goʻyoki  hayitlik olgan boladek
Bulutlar oʻzini  yoʻqotayozdi.

Nogahon tiriklik isini tuydim,
Umrim – lahzalarning qoʻlida qarta.
Yulduzlar suyunchi oladi Arshdan,
Meni oʻylasangiz agar bir marta.

Togʻlar termuladi chordana qurib,
Ularning taqdiri bogʻliqdir sizga.
Ming  yilga uzaydi dunyoning umri,
Bir marta sevaman deganingizga.

Ummonlar chayqalib oʻqiydi takbir,
Ming yilda tangrining bir koʻngli toʻldi.
Oling, shu dunyoni men sizga berdim,
Labingiz bir marta entiksa boʻldi...

💙Shuhrat Orif

Umrining so‘ngini yashaydi avgust,
Xazon tovushiga mahtal dunyoda
Qanchalar og‘riqli ekanin bilgum
Kuzga yetmay jon bermoqlik
Va
Yomg‘irsiz kunlarda uyg‘onmoqlikning...

Tashqari yutadi issiq kunlarni,
Ovozing kelmaydi hech bir tomondan.
Yig‘lasam, ko‘rsatmay ko‘zim yoshini
Sezsang-u, indamay kelsang...

Ammo yoz kunidek eriydi orzu,
Mushtoq nihollarga rahm etmas asad.
Sening irodangni toblaydi sog’inch,
Mening g’ururimni g’ajigandek dard.

Taqdirga savolim qolmagan chindan,
Birga bo’lmoqlik ham sarobligi rost.
O’ylayman, azizim, faqat ne uchun
Ko’zlaring o’xshaydi mening ko’nglimga,
Ko’zlarim o’xshaydi sening umringga…

©️Feruza Xayrullayeva

Kuzak xonamgacha bostirib keldi.
Tashqariga chiqdim.
Xazondan qochib.
Umrim tugayapti.
Kelgin.
Kel endi.
Yov yenggan shaharday yuragim ochiq.

Kuz bog‘lar boshiga ne ish solmadi,
Ana, daraxtlarning so‘ngaklari - cho‘p…
Senga aytadigan so‘zim qolmadi,
Senga aytadigan jimliklarim – ko‘p…

©️Usmon Azim

Faqat chin dilingdan sogʻinib qolsang,
Meni tushlaringdan topishing mumkin.

🥥DI

Qaror

Yondim...
Ich-ichimdan oʻt ketgani rost!
Yongan yuragimda hislar kuyindi.
Sen hatto rangini bilmas qarogʻim
"Unutdim" deganing  qiziq tuyuldi.

Qiziq, koʻzlarimga termulmay turib
Ular haroratin his qilding qandoq?
Sen menga koʻp koʻrgan kaloming bilan
Nega oqshomlarni qilasan soʻroq?

Men axir yulduzmas tunda porlagan,
Yoki derazangga koʻz solgan hilol.
Men ilhom emasman sheʼrday quyilgan,
Senga xayol boʻlay yaxshisi... Xayol...

Yetolma, qancha koʻp oʻylagan sari
Oʻchib boraversin yodingdan ismim.
Va senga sezdirmay tark etaversin
Xotirangni mendan iborat qismi.

Maʼzur tut, qarorim shunday ogʻirroq,
Ammo zarracha yoʻq kudurat va kin.
Tushun, men chiroyli yozmasman, biroq
Men shunday chiroyli ketishim mumkin!

©️Shahlo Safarova

Musaffo ko‘zlarning derazasidan
Chiqsang-u ishq qolsa sendan arazlab.
Suhbatlashii-ib ketsang soyabon bilan
Odamlar tentak deb o‘ylashsa... mazza!

Hechkimni sevmasang,
O qandayin erk!
Sayr etsang xazonrang poyondozlarda.
Yo‘lingga ko‘z tikib, saqlagancha kek
Uzumlar yig‘lasa zardama - zarda.

O bu Kuz!
Bu yomg‘ir gurungidaman,
Osmon qizg‘onarkan meni tobora.
Tobora tomchilar va yaproqlar ham
Yuragim rangiga qilar ishora.

Qush edim, hech tutqich bermaydigan qush
Qafaslar yangradi ishqsizlik aro.
Kelding- u ey o‘ngga aylanguvchi tush
Sen menga bu erkni ko‘rmading ravo.

©️Nozima Habibullayeva