Masalan, agarda Sen ummon boʻlsang,
men daryo — vasling deb toshganim toshgan.
Masalan, agarda Sen osmon boʻlsang,
men bulut — bagʻringda shoshganim shoshgan.

Masalan, Sen olov boʻlsang agarda,
parvona misoli senga gushnaman.
Masalan, Sen yogʻmur boʻlsang agarda,
qaqragan zaminday senga tashnaman.

Masalan, Sen bibi Havo boʻlsang gar,
men senga ergashgan hazrati Odam.
Sen-la ikkilanmay tanovul qilgan
jannatdagi taqiq mevasini ham.

Masalan, Sen menga bir kalom bersang,
tilimdan tushmaydi ulugʻ kalimang.
Agarda sohilda intizor kutsang,
suv yuzidan borgan masrur valiyman.

Masalan, sen sukut saqlagin desang,
qoshingda million yil baliqday jimman.
Asli bitta ruhmiz ikki vujudda,
Sensiz men nimaman?
Sensiz men kimman?..

©️Orifjon Komil

Borolmayman, ishq qilingan oq,
Diydorlarda vido uxlaydi.
O'ksib-o'ksib har kecha uzoq
Tushlarimda bir qiz yig'laydi.

Idrokimda izg'ib yurar g'am,
O... qo'rqaman uxlab qolishdan.
Sho'rlik qizning ohlari har dam
Eshitilib turar bolishdan.

Kipriklarda qotadi orom,
Yuguraman zulmatlar aro.
Bilmam seni qanday haydasam
Tushlarimdan ey baxtiqaro?!

O... ko'nglimni kemirgan bu dard,
Birozgina olsa edi tin.
Olloh meni keyingi safar
Yuragimdan ayro yaratgin.

...Tushlarimda yashovchi qo'rqib
Men u qizga o'xshamaymanmi?
Ayt, taqdirga la'natlar o'qib
Tushlaringda yig'lamaymanmi?

⏺️Majnuna

U ketdi. Bogʼlarim shumshaydi gʼarib,
gʼunchalar tumtayib qaraydi menga.
“Ketmang”, deya oldim ayrilar chogʼi,
“Xayr!” deb boʼlmasdi hech qachon unga.

U ketdi, ketdi-yu, endi shum oʼylar
Sanchilaveradi misli qora oʼq:
Endi u hatto tushlarimga ham
Istasa kiradi, istamasa – yoʼq.🦋

©Аʼzam  Oʻktam

Go'zal bahona top, koʻrishaylik🦋

Men seni she'r kabi uzoooq sog'indim,
Mezon mehmon bo'ldi bog'larni sotib.
Uyquga ilindim — to'kilib ketding
Derazam ortida shivirlayotib...

Billur ohanglarning ifori keldi,
Tushimga oʻrnatib tomchilardan tug'.
Sharqirab yana so'z rangida kuldim,
Ruhim chanqog'ini bosganing qulluq.

Men seni she'r kabi uzoooq sog'indim...

©️Nozima Habibullayeva

O'laman.
Hammamiz o'lamiz axir.
Bir kun bu dunyoni tashlab ketgum jim.
Oppoq, nozik tanam  Yerga qorishib,
Boshqa ko'rolmaysan ko'zim,
Kulgichim.

Senga mayin kuylar chalgan  barmoqlar,
Sovib, endi soching silamas boshqa
Sen yutoqib o'pgan lablar, yanoqlar,
Qaynoq bo'salaring so'ramas boshqa

Keyin…
Ojiz ruhim  qutulmish g'amdan,
Boshqa arosatda yonmasmish jonim.
O'zing ayt, kim qochib bilgan ajaldan?
Kimni o'z holiga qo'yarkan o'lim?

Muzlab qatra yoshim gul yuzim uzra,
Men tashlab ketaman
Seni,  onamni.
O'n sakkizga to'lmay, quyoshim, qara,
O'zim payhon qildim ko'ngilxonamni.

O'laman.
O'limim shodiyona,
Kul.
Shudir bu holimga hurlik bayramim.
Sen qabrim boshida ko'z yosh to'kkan kun,
Ishon,
Yashnab ketar kulrang olamim.


©️O'ktamoy

Sevgi ⸺ odamlar orasida senga qarab turgan bir nigohning paydo bo‘lishi. Garchi olisda bo‘lsa-da, u seni kuzatayotganday tuyilaveradi. Shu nigohning oldida javobgarlik, mas’uliyat his etaverasan...

©️kinodan

Yasholmayman hamma singari,
Boshqachaman tushunyapsanmi?!
Mudom "nedir" yetishmas menga,
O‘sha nima… Sen bilasanmi?!…

Bilsang… o‘rgat o‘sha "nelar"ni,
Hovuchingda havo tut menga!
Yuragimni qo‘lingga ol-u,
Osmonlarga chiqib tush qayta…

Yulduzlardan yorug‘lik tilab,
Ko‘k bag‘riga ismim yoz o‘yib.
Men jonsarak zaminda kutay,
Sen tez qaytgin mujdalar olib…

Ko‘ksing uzra balqib tursin baxt,
Ko‘zlarimga joyla dunyoni!
Yuragimga gul ekib yashnat,
Hissizlardan avayla meni…

Balki shunda nafas olarman,
Yashayotgan hamma singari.
Sen osmonim bo‘lmaguningcha,
Boshqachaman tushunyapsanmi…

©️Allomaxon Xakimova

​​bugun xabar yozmading,
yaxshimisan?
bugun tabassum qildingmi…
qachon uyg'onding,
uyg'onib –
xabarimni ko'rdingmi,
kecha tunda yozgan
xabarimni.
menimcha,
ko'rgansan –
yarim tunda uyg'onib ketib
o'qigansan xabarimni.
tabassum qilgansan
uyqu aralash,
baxt aralash.
uyg'ondingmi,
qachon menga javob yozasan?
bugun xabar yoz menga…
maktubingni o'qigim kelmoqda –
baxt aralash,
orzu aralash…

©️Ahmad Ali

Ikkalamiz tanho, qo'l ushlashib yulduzlarga tikilsak, istiqbol haqida orzular qilsak🪐