Senga oid hammasini bilaman, sochingdan tirnogʻingni uchigacha derdi.
Men bugun adashtirdim.
Uni qoʻllari juda tanish, tuta olmasdan ming marta termulganman, ammo, bugun bir koʻrishda bu qoʻlning egasi U deb oʻyladim.
Unutish shunday boshlanar ekanda...

⏺️kinodan

Seni sog‘inmayman. Qarorim qat'iy.
Sabrim hali yetar sensiz yashashga.
Senda ham zorlik yo‘q, ko‘zingdan sezdim
Men tomon bir bora kulib qarashga.

O‘rtada sevgi yo‘q.
Yuraklar bo‘m-bo‘sh.
Ko‘zlarim sendan ham boshqani ko‘rar.
Yurakmi...
Yurak ham emas bezovta,
Ismingni aytmay ham tinchgina urar.

Sening ham qalbingda menga o‘rin yo‘q
Yuragingdan o‘zga boshpanam bisyor.
Axir har tomoni huvullab yotgan
Qaqroq yuragingda menga nima bor?

Bitta gap tilimda...
Sukut aylagin
Osmonga bir zum sayr etdim-u qaytdim.
Nega ko‘zlaringda halqalandi yosh
Yolg‘onni qanchalar chiroyli aytdim?..

🥥Xurshid Abdurashid

Men ertadan yashay boshlayman,
Va sevmayman seni ertadan.
Senga bogʻliq xotiralarni
Oʻchiraman bitta-bittadan!

Erta kelsa, turib tong sahar,
Eng chiroyli koʻylagim kiyib.
Bogʻimdagi atirgullarni,
Yuzlaridan oʻpaman suyib!

Men ertadan, ertangi kundan,
Faqat kulib yashay boshlayman.
Yoding oʻchmas xayollarimni,
Miltiq olib qirib tashlayman!

Erta kelar, Xudo xohlasa,
Meni koʻrib hamma boʻlar lol.
— Tinchlikmi, – deb, imkoni boʻlsa,
Hech kim menga bermasin savol!

Erta kelsin, aytganim aytgan,
Dunyosiga kelgum qaytadan!
Hammasi oʻz oʻrnida qolar,
Lek sevmayman seni ertadan!

Bugun seni sevib turaman,
Yana bir kun chidash  ish emas!
Ertagacha bardoshim yetib,
Ertagacha yashay olsam bas!

©️Malika Tavfiq

Nimadir quyilib ketdi ko‘zimdan,
Yaxshiyam, Siz borsiz!
Jon yo‘q jonimda!
Qancha urinmayin sig‘dirolmadim –
Ko‘zyoshlar sig‘madi chamadonimga.

Bizning o‘rtamizdan shoshib o‘tar vaqt,
Tunlarga urilib ketadi yillar.
Aeroport. Ikkimiz yig‘layotgan payt.
Muhtasham Londonda yog‘ar yomg‘irlar…

Noyabr, qarama, ko‘zim bir oz nam,
Va yana navbatda turibman shoshib.
Atrofga qarayman havotir bilan –
Inglizcha so‘zlarni bag‘rimga bosib.

Xorijlik ayolning farzandlari sho‘x,
Bir qizi o‘zini otar men tomon.
Onaning qo‘lidan yulqinib chiqib,
Sumkamni o‘ynaydi qo‘ng‘irsoch o‘g‘lon.

Bir oz unutaman dunyoni, sizni,
Aqlimni o‘g‘irlar mana shu fursat.
Mudom tarafimni oladi mani,
Mudom men tarafda turadi qismat.

Kirdi-chiqdi bo‘lib qolganmi esim?
Xayol o‘zimdamas. Kim kular-yig‘lar?
Men chiqib ketaman dunyodan sekin –
Hattoki payqamay qolar yomg‘irlar.

©️Xosiyat Rustamova

Bir-biriga osmonning rasmini jo‘natish bu — sevgi tili ekan.
Siz ham hoziroq unga osmoningiz rasmini yuboring🌅

Men kutdim...
Oxirgi daqiqagacha,
Nima bo‘lganda ham yangi yil, axir.
Tabrik yo‘llashingga izn bermadi,
Bizni ikki yo‘lga yo‘llagan taqdir.

Men kutdim...
Umidga to‘lib vujudim,
Shodon chehralarga termulib hissiz.
Minglab chiroqlarin yoqib, ohista,
Yangi yil kelmoqda sensiz, sevgisiz.

Men esa kutishdan kecholmadim voz,
Xar kelgan xabardan yurak potirlab.
Bir og‘iz tabrikka arzitarsan deb,
Qo‘yarsan nomiga menga baxt tilab.

Bilardim, qachonlar yodingda yo‘qman,
Hatto raqamlarim bo‘lganlar unut.
Soat o‘n ikki bor urayapti bong,
Kut! Kut! Kut!

Sensiz kelgan bo‘lsa, kelsin, nachora,
Yo‘lingga to‘kilsa, to‘kilar ko‘zim.
Faqat sen baxtiyor bo‘lishga so‘z ber,
Yangi yil muborak bo‘lsin, azizim!


©️Malika Tavfiq

Gar tutsang
yelkangga bosh qoʻyib
Koʻzimga hislarni belayman

©️

​​Qoʻngʻiroq... Chinqirar ismingni aytib,
Eshikni ochaman... titrab bemador.
Sen uzoq kutganday ketasan qaytib,
Tashqarida esa yogʻayotir qor.
Qoʻllaringdan pastga tortar zinalar,
Kutmagan mezbonday turardim atay.
Yigʻlashga qoʻymaydi bizni ginalar, Men ado boʻlgandim... senga yigʻlamay.
Qarshingda... poyingga choʻkolmayman tiz,
Sogʻinchim boʻgʻzingda toshgani bilan.
Azizim, ketishing kerakligini
Hatto sezib turar oyoqlaring ham.
Ortingdan bormadim yoʻlaklar kabi,
Poyingga oʻzini tashlaganda qor.
Eshikka suyanib yigʻladim... Hali
Erta bahor kelar... keladi bahor...
Qoʻngʻiroq... Chinqirar ismingni aytib.

©️Xosiyat Rustamova

Uygʻonib ketaman bemahal,
Koʻzlaring tushadi yodimga,
Soʻzlaring tushadi yodimga,
Va nafrat kezadi darbadar.

Qotilim...
Johilim...
Koʻzlaring —
Allalar, allalar koʻzimni.
Oʻzingga buyursin oʻzlaring,
Sen menga qaytib ber oʻzimni!

Boʻgʻilib bugʻlanar derazam,
Uflayman, uh tortib uxlayman.
Uxlab ham bir seni oʻylayman,
Ming oʻlib tirildim...
Oʻlmayman!

Jon berib bormoqda kulgichim,
Voh, seni oʻylasam kul ichim,
Ista kir, ista yoʻq, ista qoch,
Ismingni bastalar — kuy ichim.

Men seni eslamas yodingman,
Uzoqqa haydagan yoningman,
Eng oniy lahzaga sovrilib
Sochilgan yuz boʻlak yo mingman...

Koʻzlaring, baribir koʻzlaring...

Dengizim, sohilga oqqanim,
Koʻzimas, koʻngliga boqqanim,
Jim qarab jim qadab koʻnglimga-
Muhabbat mixlarin qoqqanim.
Qalbimga ishqingdan oʻt qalab
Jonimni kuydiri-i-i-b yoqqanim.

Qaddim togʻ.
Qalbim toq.
Dil vulqon.
Oʻzimdan Oʻzingga ketyapman.
Nafratim egasi ey, Inson
Soʻzingdan Soʻzimga ketyapman

Oh, nega koʻzlaring oʻylasam...

©️Durdona Bobomurodova

Koʻrdingizmi, qayta koʻrishmoq
Azobining koʻzyoshi totligʻ.
Na tazarru, na-da urishmoq
Zavq bermaydi koʻngilga ortiq.

Koʻrdingizmi, parvozdan karaxt
Burgutlarning qismati shunday –
Qancha baland uchganin faqat
Qulayotgan vaqtda tushungay!

Koʻrdingizmi, Xudo mehribon,
Bizga berdi mayin ayriliq,
Sizdan sovib ketmadim hamon,
Isboti shu –
Soʻzlarim iliq…

Mendan oʻtdi. Iqrorman. Uzr.
Bilishimcha, yuragingiz gʻash.
Koʻrdingizmi, naqadar huzur
Kimnidir jim qizgʻonib yashash?

©️ Shahriyor Shavkat

"Ket — deysan (titraydi qo'llaring),
— Charchadim ko'nglingga qarashdan".
"Xo'p — deyman (ketishga yo'q imkon),
— Ketaman, ketaman, ketaman".

Baxt bizga bir qiyo boqmadi,
(Men axir baxtliman sen bilan).
Ketishdan boshqa yo'l qolmadi,
(Ketish bu — qaytishga ilk qadam).

Men sendan charchadim, inongin,
(Sensizlik — eng qo'rqinch tush, bilsang).
Biz keldik manzilning so'ngiga,
(Bir umr tirgakman yiqilsang).

Dilozor bo'ldik-da chunonan,
Bunchalar zo'r berdik kurashga.
Azizim, xo'sh, endi ne deysan,
Qavslar ichida yashashga?!

💙Ma'suma Obidjonova

Yo‘q, biz sevishmadik,
Dardlashdik, xolos…
Dardlashish – sevishish degani emas.
Axir o‘ylab ko‘rgin, azim Toshkanga
O‘qigani keldik, sevgani emas.

Men senga “sevaman” desam, bu – yolg‘on,
Sening ishonganing – eng og‘ir xato.
Chunki sof sevgiga bog‘langan inson,
Sevaman deyolmas yoriga aslo.

Sen menga ishonma,
Ko‘nglim – xiyobon…
Har kun yurib o‘tar undan qanchasi.
Har kecha tinmagan daydi shamolday
Kezar unda ishqning singan parchasi.

Ha, biz sevishmadik,
Ishq ko‘chasidan
Dardkash telbalardek yurib o‘tdik jim.
Taqdirimiz qanday xotima topar?
Aytib berolmaydi hech bir munajjim.

Dardimni yukladim dardingga qo‘shib,
Qalbingdan bosh olib, darbadar ketdim.
Yozgan xatlarimni burdalab tashla!
Senga arzimayman – tushunib yetdim…

©️Xurshid Abdurashid