​​Inson ruhida ham qiyomatlar bor,
Og'ir sinovlar bor, sinoatlar bor.
Muhabbat sal chalg'ib turgan mahalda,
Sezilmasdan o'tgan xiyonatlar bor.

Mehr berolmasang, qiynoqqa ko'ndim,
Diydor berolmasang, firoqqa ko'ndim.
Sen meni boshqaga berma, iltimos
Boshqaning qo'lida kelmaydi o'lgim.
Ularda boshqacha itoatlar bor.

Menga o'xshamasin mehribonlaring,
O’rnimni bosmasin qadrdonlaring.
Chiqib ketamanku unda yodingdan,
Mensiz o'taverar ming bir oylaring,
Menda g'alat-g'alat shikoyatlar bor.

Men shirin sog'inchni Xudoga aytdim,
Sendan boshladim-da senda tugatdim.
Ko'nglini kul bosgan kimsalargamas,
Bog'dan yelib kelgan saboga aytdim,
Xudoga aytdim men, Xudoga aytdim,
Shu sabab duoda ijobatlar bor.

Inson ruhida ham qiyomatlar bor!!!

©️Rislig‘oy Hotamova

Menga so'zlamagin dunyolaridan
Bu yozlar eskidir, qishlar eskidir.
Bahor ham eskirib qolmasdan avval
Sen meni qidirgin, Sen meni qidir.

(Bahorga aylanib qolmoq istaram)

Xayoldan hayotga qaytar mash'um payt
Chuqurroq olaman daydi nafasni
Bahor kelish kerak; bahori yo’q tul
hayotda ishim yo’q, qaytmasdim.

(Taqdirim bahorga yozmoq istaram)

Meni tanishmasin, men tanimayman,
Dunyoning ko'zi ko'r, bu dunyo karaxt.
"Bahor bo'lmasaydi odamzod albat,
O'zi kashf etardi kashf etganday baxt"!

(Sening-la baxtimni bo'lmoq istaram)

Men Havvo bo'laman, Odamim, qara!
Sen bilan quvildim, Sen bilan qaytay.
O'zingni do'zaxga munosib tutsang
Men oliy gunohni qilaman atay.

(Senikidek savob, gunoh istaram)

Armonimiz nurdan, g’amimiz nurdan.
Xom sut emmaganmiz, biz Nur emganmiz.
Dunyoni tanishga urinma, jonim.
O’gay ketayapmiz, o’gay kelganmiz.

(Taqiq qo'y…
Taqiq yo'q…
Men esam gunoh istaram!)

©️Diyora Mahmudjonova

Future him:🦋

Ketyapman. O'ylanma!
Manzilim aniq.
Bu yo'lda umidsiz umidim o'ldi.
Zanjirband ruhimning yo'lini to'sgan —
Xotira kishanin sindirib bo'ldim.

Bilaman.
O'qiysan har yozgan satrim,
"Menga", - deb qo'yasan, o'yasan yurak...
Sira bildirmagan o'sha odating -
Hamon yostiq quchib yig'lasang kerak.

Ko'zlaring...
Kipriging...
Yuzingdagi yosh -
Har tomchi kuydirar yostiq bag'rini.
Tushungin foydasiz.
Berginda bardosh.
Endi, yumshatmaydi yoshing — bag'rimni.

Unutgin!
Unutay!
Nelar bo'lganin...
O'ylamog'ing — xato.
Eslamoq — xato.
Qiyin bo'lgani yo'q.
Chiqardim yoddan.
Ilk bor yo'ling to'sgan kunimni hatto...

Ketyapman. O'ylanma!
Manzilim aniq...

©️Nosiroʻgʻlu

Tun.
Yomg'ir.
Qorishiq ifor.
Uchqur xayol, qadamlar asta.
Borliqqa sochilib keladi ketging,
Yomg'ir bo'lsam kerak, aslida.

Sen yo‘qsan.
Hech kim yo‘q.
Nimalardir bor.
Nenidir tuyarsan yomg'ir ostida.
Men axir osmonda yashaganmanku,
Ne qilib yuribman zamin ustida.

Shayton.
Taqiq.
Va o'sha meva—
Afsus bor quvg'indi odam naslida.
Negadir ularga aloqam yo'qdek,
Yomg'ir bo‘lsam kerak, aslida.

©️ Najmiddin Ermatov

Sen menda umid paydo qilasan
Men kutishni o'rganaman
O'qishni o'rganaman
Yozishni o'rganaman

Sen menda umid paydo qilasan
Menga muammolar ko'rinmaydi keyin
G'amlar ko'rinmaydi keyin
Dog'lar ko'rinmaydi keyin

Sen menda umid paydo qilasan
Men oddiy narsani kutaman
Sayr qilishimizni o'ylayman
Gapirishingni o'ylayman
O'rindiqda jim o'tirishimizni o'ylayman

Sen menda umid paydo qilasan,
Ey Xudo
Meni nimam bor yana?

Sen menda
Umid paydo qilasan.

©️Ahmad Ali Dilmurod

Tegma...
Uyg'onib qoladi
Men zo'rg'a aldab uxlatgan
qorni och orzular.
Uyg'onsa, yeb qo'yar meni — ochlikdan
sillasi quriyotgan odamni.
Ochma u qafasni...
Mahbusa — ko'zi ko'r sevgi —
Ozodlikni sevar.
Adashib ketishi mumkin,
So'qirlar yo'l bilmas axir.
Yirtma u kafanni —
Qirq uch yoshli umid jasadi,
Qo'y, chirib tugasin o'z kafanida.
Yo'qsa, barchaga yuqishi mumkin,
Sachrab yolg'on kuygan og'u tanidan.
Artma, yuzimdan yomg'ir tomchilarini,
Yig'layversin meni yeb qo'ygan osmon.
Yig'layversin, toki, qorachig'imda
Botgan izlarini topolsin armon
Yig'layversin, osmon...

🥥Halima Ahmedova

• Sen shunday afsungarsan,
hatto meni yo'qotding...
Bilasanki, qayerda bo'lsam,
yolg'izlikning poytaxti shu yer.

• O, sen —
aqlim va yuragim orasidagi
eng go'zal chorasizligim,
mahorat-la to'qilgan ro'molchadeksan.
Meni tozalab yubor...
qirq yillik mog'orlarim to'kilib ketsin.

• Gʻamnok sheʻrlarimga eʻtibor berma,
ko'p kulaman va kulganimda,
aslo, yolg'on ekanini payqolmas birov.

• Hoy, yozuvimni o'qiyotgan ko'zlar,
sizning ham
suratiga termulib,
yuzidagi eng nozik injaliklarigacha
yodlab olgan kishingiz bo'lganmi hech?

• Uchish uchun qush bo'lish kerak emas,
kichik-kichik shodlikchalar bo'lsa, bas...
Inson
eng ko'p kimning yodida bo'lsa,
eng ko'p unga taalluqlidir,
eng uzun ishq ertagi
yarim qolganidir, aslida.
Hozir yana bir misra yozsam,
hammasi o'nglanib ketadigandek...

• yuzim boshqa tomonga qayrilgan bo'lsa-da,
yuragim sen tomonda har qachon...

• Sevgiga kelsak...
bir bor sevdim,
boshqa ishim tushmasin, omin.
Sekingina egilib qalamning qulog'iga g'o'drandim:
"Yana uning ismini yozgudek bo'lsang,
sindirib tashlayman seni, birodar!"

©️Jamol Surayo

Tun tugamas — chidab bo'lmaydi
Uyqu kelmas bordayin qasdi
Sog'inchdan-ku odam o'lmaydi
Lek o'lardek sog'indim rosti...

©️Muhammad Yusuf