Seni 1-aprelda ham aldamayman)🦋

Mensiz ham hayoting chiroyli edi,
Men bilan bo‘ldi u yana chiroyli.🫧
Va yana mensizsan, lekin baribir,
Kunlaring quyoshli, tunlaring oyli.

Men sensiz baxtlarning ismin unutdim,
Sensizlik...
toabad zulmatdir taqdir.
Ne uchun mensiz ham yashnayverasan,
Nega mensiz baxtsiz emassan axir?

Sensizlik... qalbimni ketmish pichoqlab,
O, sening kuylaring hamon avjida.
Men sensiz Xudodan ketdim uzoqlab,
Sen esa Xudoga yaqinsan juda.

🥥Guljamol Asqarova

Eslamaymiz bir-birimizni,
Na biror xat, na bir qo‘ng‘iroq.
Biz teskari magnitlar go‘yo,
Na yaqinmiz, lekin na yiroq.
So‘ng kelasiz.
O‘ychan qiyofa,
qaddingiz tik, nigohingiz o‘q.
Shu lahzada anglayman birdan,
Olamda siz!
Boshqa hech kim yo‘q.
Ko‘ylagimning naqshlariga,
Ko‘zlarimga termulasiz jim.
Deysiz: Yo‘lim tushdi shu tomon,
Sizni ham bir ko‘ray deb kirdim.
Ichidan chirt sinadi nogoh,
Tashrifingiz xush yoqqan ko‘ngil.
Lahzalik baxt sezar zirqiroq,
Ko‘zlariga tortilgandek mil…
So‘ng chekasiz, o‘rlaydi tutun.
Sizni o‘rar xalqali tuman.
Baxtimizni asriy tumanlik,
Qoplagandek g‘ashlik sezaman!
Ketasiz!
Qalb gulduroslari
Sizga yetmas, qaytarolmaydi.
Ammo…
Sog‘inch nuqsi o‘tirib qolgan
Ko‘zlaringiz aldayolmaydi!
Xayr demam, kuzatolmayman,
Yuragimda noma’lum hadik.
Izingizdan surilar parda…
Tik qaddingiz tortgandek egik.
Xayollarga beraman izn,
Ko‘ksim tobor tortaverar g‘ash.
Ko‘ylagimning naqshlaridek,
Nega bizning taqdirlar chalkash..?🧚‍♀
"Xayr" — og‘ir,
"Alvido" — azob,
Darpardani g‘ijimlayman jim.
Ishqimizning gulgun yuziga
Qay kun parda tortdik, azizim?
Kelgandingiz, demadim “Qoling…”,
Sizni emas, o‘zni aldadim.
Shu lahzada…
Tepada kimdir
ikkimizni yomon qarg‘adi!..

©️Go'zal Ro'ziyeva

Chang bosib ketasan xotirlarimda,
Kulgum-la poklayman tasavvur ichra.
Hurkak nigohlarim siylamoq uchun
To‘satdan uchra!

Atay o‘ylamayman istiholada,
Ammo, ko‘zlarimga chizilgan aksing.
Hirgoyi qilaman –
sovuq xonada
Qahva iforining bug‘lanar raqsi.

Meni rom etmaydi kunlarning bo‘yi
Deraza ortida chizilgan surat.
Boshimni yelkangga joylagan ko‘yi
olamda bir tasvir jonlanib yurar.

Seskanib to‘kilar shaffof manzara,
Hayoni yer tizgan kiprigim chimdir.
Go‘yo,
Eski filmlarning tasmalaridek
O‘yimni kuzati-ib o‘tirar kimdir.

Kimdirni uyg‘otgan sog‘inch muhtasham,
Kelar-u
diydorga aylaydi kamand.
Va aytib chiqaman ertalabgacha
Ko‘zingda ko‘zimni ko‘rsatganga hamd!

©️Nozima Habibullayeva

Uyimni sog'indim, ya'ni seni🔅

💗 is:

Hushimga kirib kel,
tushlarimdan tush,
Qo‘ynimdagi mumtoz
dardni parchala!
(Tinglagin, o, nohaq sayradi haqqush,
Mast bo‘lib, sollandi qara, archalar.)

Bir ranglar istadim,
tuydilar yoqut,
Qog‘ozga rasmingni
so‘z bilan chizsam...
O‘zingni ilhom deb o‘ylaysan yoxud
She’rimdan o‘zini izlagan qizsan.

Kosamni sabrga
to‘ldirma lim-lim,
Quloq sol
berkinib solgan dodimga.
Seni rom etmagan qaqshagan ko‘nglim,
Sen maftun bo‘lgansan iste’dodimga.

Sen — men ham tushuna
olmagan tovush,
Sen — bir shoir
anglab yetmagan tilsim...
Ro‘yoga qaytaqol, tushlarda qovush,
Sendan farzand emas,
she’rlar tug‘ilsin!

©️Humoyun Fattoh

⏺️seni sevib qolganimni
kulib aytib berdim
odamlarga –
kulmasam
siqilyapti deb o'ylashardi.

⏺️xotirada faqat
yaxshi narsalar qoladi, deyishadi,
men nega
sen bilan o'tgan
baxtsiz kunlarni ham eslayman?

⏺️biz rosa urushib
keyin bir-birimizga
suyanib qoldik.

⏺️sen mendan avval
yoki mendan keyin
tug'ilib, o'tib ketsang bo'lardi-ku to'g'rimi?
yoki bo'lmasmidi, bilmasam...

⏺️Nega senga erisholmadi,
​degan savol tushib qolsa,
ularga uzundan uzun
tarjimayi holimni ko'rsat:
men kim?
Bog'chada "uxla!" deyishsa,
indamay, uxlagan bandaman!

©️Ahmad Ali Dilmurod

sen –
qayerdadir
erkinroqsan.
qayerdadir,
mahkum
qayerdadir
sening
«chetga chiqish huquqing
cheklangan».
men esa
hamma yerda
sensizman.

©️Ahmad Ali

Qaniydi, suvning eng tubida yashaydigan
suv ustiga ham chiqmaydigan —
jonzot bo'lsang
men-chi, yerga ham tushmaydigan
biror qush bo'lsam...
aniq, uchrashardik!
yoki sen, biror kun suv ustiga chiqarding
yoki men, ovqat qidirib,
suv tubiga tushardim,
xullas,
aniq uchrashardik...
bizga, inson ekanimiz
biroz qimmatga tushgan, azizim...


💙Ahmad Ali Dilmurod