Odamlar har doim o‘zlari uchun mutlaqo mos bo‘lmaganlarni ko‘proq sevadilar. Bu, ayniqsa, ayollar uchun ko'proq to‘g‘ri keladi.

©️Yukio Misima

Namoz qazosini o'qisa bo'lar,
O'qib bo'lmas diydor qazolarini…

©️Matnazar Abdulhakim

Masalan, dengiz kerak baʼzan
Sevgingni aytish uchun
Koʻzlariga qarab.
Uning dolgʻalaridek
Gupirayotgan yuraging
Sasini bosib turishchun.
Toʻlqinlari keltirayotgan hovurdek
Huzurni koʻzlarida koʻrganingda
Taqqoslamoq-chun
(Qay biri goʻzalroq?!).

Dengiz kerak baʼzan
Sevishmoq uchun
Har neni unutib,
Kenglikka boqib.
Qirgʻoqda quyoshning botishin
Tomosha qilayotib
Iching ishqqa toʻla
Ekanin anglamoq uchun!

Dengiz kerak axir
Sevishmoq uchun!
Sohilga sening isming yozarkan
Toʻlqinlar yuvib ketishin bilib tursang-da
Boladek quvonib, yayrashing uchun.
Va hovuchga solib chigʻanoqlarni
Umrini, qalbini, ishqini qoʻshib,
Kaftingni toʻldirib bermoqlik uchun!

Dengiz kerak baʼzan
Sevishmoq uchun...

©️Feruza Xayrullayeva

Aytganday,
sen
necha kunlik tushsan?
Har xil xayolga borma.
Umrim necha kun? —
bilmoqchiman,
xolos.

©️Usmon Azim

Yo'q.
Adashding,
Topa olmading,
Ranjimadim kelganingga kech.
Men yig'ladim.
Sen yupatmading,
Tamom bo‘ldi eng so'nggi ilinj.

©️Gulrux Xudoyorova

Quvonasan
sen sevgan kalom
sendan boshqa kimgadir yoqsa,
yo sen sevib oʻqigan kitob
sendan boshqa kimnidir yoqsa,
sen yoqtirgan rang
sendan boshqa
kimgadir xush kelsa, qanday soz;
quvonasan
kimgadir yoqsa
sen yoqtirgan birorta libos,
sendan boshqa kimdir
sen sevgan
ohanglarga quloq tutsa jim,
quvonasan
sen sevgan yurtni
jon-jonidan sevsa kimda-kim,
boshqalar ham,
kuzmi, qish-qirov,
sevsin
sevgan xalqingni,
bor gap...
Faqat
chidolmaysan
sendan boshqa birov
koʻngil qoʻysa
sen suygan yorga.

©️Mansur Jumayev

Garchi ishi mo‘ldir – bu dunyo hushyor!
Yurakni boricha ochmoqlik qayda?
Birgina so‘zim bor, yolg‘iz so‘zim bor,
O‘sha eski so‘z-da...
Aytaymi qayta?

Cho‘chima. Men hozir ketaman.
Bu dam
Nechun boshni egding?
Uyalma yoshdan...
Qayrilib qarayman.
Qanday go‘zalsan!
Hatto ayriliq ham senga yarashgan.

©️Usmon Azim

Ba'zi ayollarning na do'sti, na oshiqlari bo'ldi. Ularning do'stlari tezda oshiqqa, oshiqlari esa tezda do'stga aylanishadi.

©️Anna Axmatova

oddiy suhbat qilsak, nima qiladi
men senga salom bersam
sen alik olsang
qornim ochgani haqida so‘rasang
nimadir yesak
nima ichishingni so‘rasam
sen o‘zingga yoqqan qahva turini aytsang
keyin sayr qilishimiz mumkin
qayernidir
shunchaki sayr
piyoda yurib
sen indamasliging mumkin endi
faqat sayr qilishimiz
indamay sayr qilishimiz mumkin
oddiy sayr qilishimiz
bizga oddiylikdan boshqa hamma narsa berildimi, deb qo‘rqaman
azizim…

©️Ahmad Ali Dilmurod

Yig'lama,
Nega yig'laysan?
Odamlar nima deb o'ylaydi, axir!
Ular o'ylaydiki,
"Ayrilishar ekan-da, sho'rliklar…"
Holbuki, bugun biz sen bilan
Uzoq muddatdan so'ng ko'rishdik.
Yig'lama.

©️Muhammad Solih

Barmoqlar qalamni quchar qaltirab,
Ko'ngil tug'a boshlar, yig'laydi tuyg'u.
Aqlim faryod qilar: "To'xta, ey, telba,
Sening xatlaringni o'qimaydi u".

Xonaga nur kirar oynadan sinib,
"Aqlingga quloq tut, aytgani rost-ku.
O'qigan bo'lsa gar javob yozardi,
Sening xatlaringni o'qimagan u".

Oynaga urilar oqshom shamoli,
Bilgan sirlarini olamga sochib.
"Men aniq bilaman, to'xta, ey ko'ngil,
U sening xatlaring ko'rmaydi ochib".

Dilga g'ashlik cho'kar, zaminga oqshom,
Kecha so'zlay boshlar dilga otib o'q.
"Xatlaring o'qimoq u yoqda tursin,
Hattoki u seni o'ylagani yo'q".

Oppoq qog'ozlarga to'kiladi qon,
Oppoq qog'ozlarda faryodlar lim-lim.
Eng so'nggi umidim to'kilmay turib,
"Ularning so'zlari yo'lg'on",- de, gulim.

Ko'ngil to'kilmoqda qog'ozga butkul,
Bu so'ngi zarrasi, qolmas boshqa payt.
Men senga sevishim aytaman endi,
Sen menga: "Xatingiz o'qiyman",- deb ayt.

©️Najmiddin Ermatov

Sensiz mast-alast aylandim dunyoni,
Sensiz tong kabi hushyor kezdim
o‘sha mast- alastlikning ichida.
Sensiz yashadim —
birovning dunyosida kun ko‘rayotganday,
Sensiz yolg‘iz kezdim odamlarning orasida,
Sensiz haqiqat qidirdim yuragimni yirtib!
Sensiz farzandli bo‘ldim
(oh, ularni jon dildan suydim sensiz!)
Sensiz to‘ylar qildim
(faqat sho‘x qo‘shiqlar aytildi, Maqomdan qo‘rqadi bular.
Ikkalamiz uchrashmog‘imiz mumkin-da biror nolada!..),
Sensiz kuldim (o‘zing kechir, jondan suyganim!),
Sensiz sochlarimga oq tushdi,
Sensiz yig‘ladim,
va she’rlar yozdim sensizlikday dahshatli – angladim:
Umrimning qolgani ham sensizlik...

Endi... sensiz yashagim kelmayapti,
Azizim.

©️Usmon Azim

Muztar nigohingdan ayriliq yogʻar,
Alvido – koʻnglimda sargʻaygan xatim.
Oʻsha bogʻ, oʻsha tun, oʻsha oʻrindiq,
Men faqat yuzingni eslay olmadim...

Kuz sochar xazonlar – nadomatlarin,
Bir hazin qoʻshiqqa raqs tushar har barg.
Oʻsha ishq, oʻsha dard, oʻsha qarashlar,
Xotiram uyini aylamoqda tark.

Sen sevma, sogʻinchlar lahzalik baxtdir,
Sen ketgin, yech dildan gʻam libosini.
Sen qaytma iltimos, soʻnggi iltimos –
Bajarma eng soʻnggi iltimosimni...

©️Rahmat Bobojon

Suyan deysan lek yodimga tushaverar,
Suyanganda qulab ketgan yelkalaring...

©️Durdona Bahodirova

Ko'ksimga qo'yilgan bu boshni endi
Gohida ko‘z qiyib, gohida qiymay
Va buning ustiga seni unutolmay
Yashash axir menga ko‘p qiyin.

«Bora-bora sevib ketarman
Men erimni, balki, keyinroq», -
Degan xayol bilan yashaysan,
Mendan ko‘ra senga qiyinroq.

©️Usmon Qo'chqor

«Ortiq sig‘dirmadi meni bu dargoh»
G. Otaboyeva

Yaxshi bo‘ldi sendan ayrildim,
Ketmog‘im chun topib berding yo‘l.
Bu dunyoda seni topdim deb,
Yo‘qotibman o‘zimni butkul.

Yaxshi bo‘ldi yechildi bugun,
Oyog‘imdan bu zanjir, bu g‘ul.
Ikki dunyo seni shohim deb,
Qul qilibman, o‘zimni butkul.

Yaxshi bo‘ldi yomon bo‘lsa ham,
Yuragimni ezsa ham darding.
Men aqlini topgan telbaday,
Poylaringdan boshim ko‘tardim.

Kechir, ozor berib mehrim-la,
Zeriktirdim, men sodda, men go‘l.
Bu dunyoda seni borsan deb,
Boshqalardan kechibman butkul.

Xudoyimning jazosi qutlug‘,
Sendan ketdim, ey qahrli gul.
Shukr, shukr seni yod etib,
Unutmabman Xudoni butkul.

Shuning chun ham omon bo‘l endi,
Men bariga silkib qo‘ydim, qo‘l.
Angladimki, seni yo‘qotsam,
Xudoyimni topaman butkul.

Endi xayr, endi alvido!
Bari ro‘yo, bari sarob, kul.
Dargohingga sig‘maganimday,
Yuragimga sig‘massan butkul.

Men mehrmand, telba go‘dakday,
Ko‘z yoshimga yomon toyrildim.
Yaxshi edi… seni topganim,
Yaxshi bo‘ldi… Sendan ayrildim...

©️Guljamol Askarova