Feelings unspoken are unforgettable🎈

Kimdir qizg'anadi seni kimdandir,
Kimdir tushlaringga kirolmay halak.
So'zingga mahtaldir nechalab taqdir,
Sen esa bariga parvoying palak.

Mosuvo emassan o'tli tuyg'udan,
Xayollaring bilan kirasan jangga.
Maktublar bitasan kechib uyqudan,
Qizg'anganlar qolib, qizg'anmagangga.

🥥Odil Hotamov

Hayotning har dami omonat
derlar,
Vaqtning yo'lagidan tutib ol meni.
Ertaga ko'zimni ochmasman balki ,
Bugun imkoning bor — sevib qol meni.

Hozir keraksan de, unut ertani,
Hatto nafasingda kuyga sol meni.
Kerakmas ertaga ash'or bitmog'ing,
Bugun imkoning bor — sevib qol meni.

Seni ko'rgim bor de, men yo'lga chiqay,
Sog'inchning yo'lida kutib tol meni.
Ertaga ko'changdan o'tmasman balki,
Bugun imkoning bor — sevib qol meni.

Berkinmachoq o'ynar taqdir biz bilan,
Bugun hushyorroq bo'l, sezib qol meni,
Yo'qsa, butun umr berkinib o'tgum,
Bugun imkoning bor — sevib qol meni.

©️Abduvoris Alijonov

Faqat tasodifan uchrashamiz biz,
Gul sotib olmaysiz menga ataylab.
Sog‘inchingiz to‘kkan kipriklarimni
Yuzimdan termaysiz, asta avaylab.

Faqat tasodifan uchrashamiz biz,
Bitta tabassumdan topamiz taskin.
Va har gal ko‘ngilni qult etib yutib,
Hamma o‘z yo‘liga ketadi sekin.

Faqat tasodifan uchrashamiz biz,
Bir siqib qo‘yamiz qo‘llarimizni.
Va ikki ko‘chada qoldiramiz iz,
Ming yil poylasak ham yo‘llarimizni.

Faqat tasodifan uchrashamiz biz,
Men salom beraman, olasiz alik.
Nigohlar telbadek termular, ammo
Tillar so‘zlashadi begonalardek.

Faqat tasodifan uchrashamiz biz,
Na sizda jur‘at bor, na menda yurak.
Balki shu alfozda o‘tadi umr,
Balki shundan baxtli yashasak kerak.

Faqat tasodifan uchrashamiz biz,
Ikkita g‘ururi egilmas nodon.
Shunisi yaxshidir, birga emasmiz,
Demak, ayrilmaymiz bizlar hech qachon

©️Malika Tavfiq

Sevgi kimgadir atab butun boshli kitob yozish emas, muhabbat haqidagi qo'shiqlarni eshitayotganingizda xayolingizga ilk daf'a kim kelishi🦋

biz bir-birimizga intilmadik,
1-1,
durrang bo‘ldi
hech kim g‘alaba qozonmadi
azizim.

***

birga bo‘lishimizni
endi tasavvur qila olmayapman —
inson
qancha orzu qilishi kerak
bunga yetib kelishi uchun?

***

senga aytgan hazillarimga
o‘zim kun bo‘yi
kulib yuraman.

***

“endi meni
tushingda ham ko‘rmaysan”
deganding,
unday bo‘lmadi…

***

seni
takror-takror ko'rib
nega endi
seni bir ko'rishda sevmadim
deb o'ylamoqdaman.

***

seni
qaytib ko'rmasligimni
bilsam ham
sen bilan oddiy xayrlashdim
o'shanda.

***

agar oson bo‘lsa
sen ijod qil.
menga qiyin,
sen bor dunyoni o‘ylash —
menga qiyin.

©️Ahmad Ali Dilmurod

Meni sevimli kitobingdagi qurigan guldek asra.❤️

Kimdir ko'zlariga quyilgancha yosh,
Birovni sog'insa she'r yozar ekan.

©️Jo'rabek Ramazon

baxtli bo'lishimizga
juda oz qolgandi.
biz buni
baxt haqidagi suhbatlarda
maqtanib yurdik.

©️Ahmad Ali Dilmurod

Deding: "Gunohingdan o'tdim azizim,
Tag'in o'z yo'lingdan ketaver shodon.
Endi faqatgina odamlar uchun
Do'st bo'lib qolamiz yoki qadrdon ".

So'ng o'sha noz bilan kokiling siltab
sarkashta epkinni etding baxtiyor.
Quchgim kelar edi, o'pgim kelardi,
Afsus, atrofimiz to'la do'st-u yor.

Dardlashgim kelardi, sayr etib bog'ni,
Aziz qo'llaringdan tutgim kelardi.
Aytgan so'zlaringni ko'zni chirt yumib
arzon sharob kabi yutgim kelardi.

Xullas, men juda ko'p qilardim orzu,
Har bir istagimning boshiga yetding.
Yig'laging keldi-yu... odamlar bor-ku,
Kulding-da ketding...

Ketding,
ko'z qiringda qoldim fig'onda,
Na yomg'ir yog'ardi, na turdi to'fon.
Oxir shivirladim: — "Sevmasman jondan,
biz faqat do'stlarmiz, ishon, Xudojon! ".

🥥Bek Ali

Kimsiz?
Ayting, kutganimmisiz
Yoki qismatimda adashgan kimsa?
Kimsiz, peshonamga bitilgan g‘ammi,
Va yo kiprigimga boylangan g‘ussa?
Alammisiz, ta’qib qilgan ming yildan beri,
Balki, sochlarimga tang‘ilgan baxt – siz?
Qachondir yo‘qotganim allaqaydadir,
Topinganim, eng so‘nggi ahd – siz?
Balki, oniy bir lahzada tug‘ilgan ertak,
Gunoh-u savobimga aylangan so‘z – siz.
Balki, bahorimdan qolgan xotira,
Hali hayotimga kelmagan kuz – siz.
Tobora yurakka singib borayotgan:
Anglanmas, o‘qilmas, buyuk sirim – siz.

©️Goʻzaloy Solih