Agar ikkimiz ham kungaboqar bo'lganimizda edi, quyoshning o'rniga senga qaragan bo'lardim 🌻

- Baxtmi?
- baxt💕

"Borma!"—deyaptilar,
"Qayt!—deyaptilar,
Bu oʻt kuydiradi xonumoningni!
Unda yigʻlayotgan yo
Oʻlayotgan
Birov deb
Garovga
Qoʻyma joningni!"
"Qutqara olmaysan!
Sen ham!"—deyapti,
Men unga baribir borgim kelyapti!

"Ichma!—deyaptilar,
Bu jomdagi
Ming
Qarochiqlar aro sizigan zahar!
U—vijdonning suvi,
U—tavba suvi,
Gar ichsang,
Tun kelmay boshlanar sahar!"
Ular oʻzi kimlar?
Nelar deyapti?
Men uni baribir ichgim kelyapti!

Eslolmayman—
Koʻzing,
Qoshing
Rangini,
Osmon qogʻozida
Kezar sezimlar!
Umrida hech rasm chizib koʻrmagan
Barmogʻim titrasa,
Qarab
Nasimlar:
"Yerda
Hisdan
Boʻlak
Rang yoʻq!"
—deyapti,
Shundanmi,
Men seni
Chizgim kelyapti!

"Boqma!—deyaptilar,
—Bu,
Bilsang,
Chaqin,
Hushing olib qoʻyar,
Aqling oladi!
Axir, unga qarab
Xalloj ne boʻldi?
Nasimiy, Mashrabga kelgan balo bu!
Koʻzing yum!
Koʻzing yum!
Yumgil!"—deyapti,
Men seni baribir koʻrgim kelyapti.

Payqadim,
Dil tomon chiqib keldi oy,
Yulduzlar tuproqqa nur toʻshayotir!
Qanotin
Keeeng
Yozib yubordi Humoy,
Borsa kelmas yoʻldan qaytdi bahodir!
"Biz faqat ertakmas,
Tilsim!"
—deyapti,
Men faqat shu yoʻldan yurgim kelyapti!

Vujud qudugʻida qalqiyotgan oʻy—
Urchugʻin izlagan qizdir, ehtimol,
Jilmayar:
"Uyoqda
Dunyo bor ekan!
Bor ekan onamday mehribon ayol!
Har kimga axtari paydo!"—deyapti,
Men seni qidirib topgim kelyapti!

Yolgʻiz tan yerda-yu,
Kezib yurar ruh,
Yetti olam aro,
Yetti koʻk aro!
Nogohon toʻxtaydi
Koʻhna masjidday
Imorat oldida.
Koʻrinar qora—
Ichkarida
Kimdir duo qilyapti,
Faqat
Unga
Quloq solgim kelyapti!

Faqat
Unga
Quloq solgim kelyapti!

©️Gulmira Abdiraimova

Ertak tugayapti, ko‘z yoshi to‘kma,
Isyon toleyingdan baxtni to‘sarmish.
Dardingni hech qaysi quduqqa aytma,
Naylik orzusida qamish o‘sarmish.

Ertak tugayapti, murod - maqsadsiz,
Hayot bu - hammasi haqiqat, tushun.
Devlar bir yumalab shahzoda emas,
Shahzoda dev bo‘lib qolishi mumkin.

Ertak tugayapti, ko‘zlaringni och,
Tushingni suvlarga tashlagin yuvib.
Hayotda muhimi erishmoq emas,
Yo‘qota bilmoqlik, ayrilmoq kulib.

Ertak tugayapti...

🥥Dilora

Begona bir lablar, shivirlar isming,
Mening yuragimni yeydi xotira,
Sovuq xona ichra,
Sovugan yurak..
Qari qizday, sovuq,
Ezgin..
Bokira...

Pirpirab turibdi osmon fonusi,
Ko‘zimda cho‘milar ming bitta yulduz..
Nursiz derazaga isming yozaman..
Yuvilib ketadi..
Qo‘llarimda muz...

Ertaklar aytaman, yig‘loqi ishqqa..
U va Men..
Shu hissiz xonada mahbus...
Soyalar izimda undirgan shubha..
Sening yuragingda gullaydi..
Afsus..

Bedor daraxtlarga osilar ruhim,
Uyqusi keladi zulmat kechaning,
Va oshib tushadi hammasidan ham..
Begona yurakda......
Baxtli ekaning......

©️Muslima Komiljon qizi

Shivirlar o‘tmishga aylangan barglar,
Ingraydi borlig'i kesilgan hilol.
Ismingni o‘chirib yuborganman-u,
Ismsiz yig'lamoq yanayam malol.

Shaharda kezinar izg'irin dardlar,
Isinib olishni istaydi ko‘ngil.
Hammasi o‘tkinchi, bilasan, ammo
Baribir yomg'irga aylanadi dil.

Deraza ortida qoladi kuzak,
Deraza ortida yig‘laydi yomg'ir.
Sening nigohingni unutdim,  ammo,
Ayriliq baribir,  baribir og'ir.

©️Feruza Xayrullayeva

Inson esa xohlayveradi... Ha, u nimani istaydi?
- Sevgini, - dedim unga qarab.
- Yonayotgan kamin yonida, chiroq nurida, tungi shamolning uvillashi va to'kilgan barglarning shitirlashi ostidagi sevgi, ishonchli, hech qanday yo'qotish xavfi yo’q sevgi.

💙"Jannatdagi soyalar"

Hammasi tugadi, oramiz ochiq.
                     (A.Pushkin)

Menga g‘animatdek tuyular bu dard,
Balki muvaqqatdir chindan bu og‘riq...
Menga to‘qnash kelar baxtli chehralar,
Ularda barq urar baxtiyor sog‘liq!

O‘zgalar baxtiga qonib, ko‘nikib,
Yashay olarmikan endi vijdonim?
Baxtli chehralarning bari meniki,
Faqat Sen meniki emassan, jonim.

Shahring tuni porloq, tonglar qip-qizil,
Avtolar yer dardin sudrab guvlagan.
Tunda uzoqlardan boqsam, u manzil
Lojuvard osmondir – yerga qulagan.

Tog‘lar qurshovida qolgan u shahar –
Tog‘lar qurshovida qolgan armonim.
Oqshomlar meniki, meniki sahar,
Faqat Sen meniki emassan, jonim.

Daraxtlar guvohdir telbaliklarga,
Gullarga ko‘chadi shafaqlar rangi.
So‘qmoqlar chorlagan tepaliklarda
Maysalar jarangi, yellar ohangi...

Daraxtlar meniki, gullar meniki,
Shamollar shashtida – umri ravonim.
Shafaqlar meniki, gullar meniki,
Faqat Sen meniki emassan, jonim.

Balki go‘zalliging qarir, ro‘yirost,
Ho‘rsinib so‘ylarsan bir kun qizingga.
Tabiat shu mehr-u g‘ururingga mos,
Abadiy go‘zallik bersa-chi senga!

O‘rmonlarning rangi borar tiniqib,
Sahrolar – yoniq kuy, daryolar – qonim;
Bu boqiy go‘zallik bari meniki,
Faqat Sen meniki emassan jonim.

Osmon – qo‘l, yer – oyoq yetmas afsona,
Ne sirdir ularga daxldorliging?
Shu osmon ostida, shu yer ustida
Menga taskin berar Sening borliging!

Bu taskin meniki, bu g‘am meniki,
Cheksizdir, so‘ngsizdir she’riy imkonim:
Osmon ham meniki, yer ham meniki,
Faqat Sen meniki emassan, jonim...

©️Mirzo Kenjabek

Yolg‘ondir mening ham o‘rtanganlarim
Hech kimga – hech qachon topinmaganman.
Ishoning, yolg‘ondir, oh chekkanlarim –
Hech kimni sizchalik sog‘inmaganman...

🥥Zamira Egamberdiyeva

Gohida yig'lashga bahona topmay, 
Kitob varaqlayman, kitob titaman. 
Men sizga hech kimni o'xshata olmay 
Bir zumda hammadan bezib ketaman. 

Bahor ham holimdan xabar olmagach, 
Qishda ham, yozda ham gul bilan kutdim. 
Besabab yig'lashga botinolmagach, 
Bahona axtarib kitoblar titdim. 

Farhod ham olovda kuymagan ekan! 
Men hatto Majnundan kamchilik topdim. 
Hech biri menchalik suymagan ekan. 
Alamimdan yig'lab kitobni yopdim!..

©️Zamira Egamberdiyeva

Gar sevsang, dunyoga keldim deyaver,
Sevilsang, men tirik bo‘ldim, deyaver,
Hijrondan hech kishi o‘lmagan, lekin
Muhabbatsiz qolsang, o‘ldim deyaver...!

©️Mirzo Kenjabek

Xudoning eng baxtsiz koʻchalarida
Tentidim bir hovuch choʻgʻga ovunib.
Sanolmay yaproqlar shivirlarini
Yigʻladim shamolga aylana turib.

Nigohing tutmadim, yashayin desam,
Barmoqlar - umrimning hijron cholgʻusi.
Qoʻrqaman, seningsiz qolgan soʻzlarim
Yerga ham sensiz va mensiz borgusi...

Amallab yetsada har qish-bahorga
Har gulda unish bor, soʻngra soʻnish bor.
Tugʻilgan har odam qismatida ham
Kurashish, sevishish va jim boʻlish bor...

Dunyo — menday dalli,
Senday afsungar,
Qismat beshigida allalar tinsiz.
Tugʻilmoq eng katta baxtsizlik baʼzan,
Baʼzan baxtdan oʻzib chopgan suluv qiz.

Xudoning eng baxtsiz koʻchalarida
Yugursam, tomoqqa tiqilar yigʻim
Uygʻonib ketasan parvoz tovshidan
Anvoyi qushlarga qoʻshilsa ruhim.

Dunyo menday dalli, senday afsungar...

©️Feruza Xayrullayeva

KЕLASAN...

Qarshilab eshiging qulfi
Qo‘llaring taftidan eriydi behol...
Kirasan,
Pardaning shokila zulfi
Sochlaringni silab o‘tar, ehtimol...
(Qanday ma’sum, fusunkor lahza...).

Seni quchog‘iga oladi xonang.
Nogoh
Samolarga yetadi boshi.
Nafasing tekkan har narsa uyg‘onar.
Jonlanib ketadi hattoki toshi...
(Ne saodat sening borliging!)

Qaraysan,
Hammasi o‘sha-o‘sha, tinch,
bilmaysan, olamga o‘tlar qo‘yganim: Telefon —
aytolmas shu tilsiz elchi
Seni «Topib ber» deb o‘ksib, kuyganim...
(Bilmaysan, hech qachon bilmaysan..)

Nigohlaring o‘pib o‘tadi
Ilkis.
Quyoshday charaqlab ketadi ko‘zgu; Samo torlariday kuylab yuborar.
(mendan ko‘ra baxtiyorroq U!..)

Istasang...
Jannatni chizib beradi,
Qo‘lingda malakday yashaydi qalam
Oh, nega qo‘lingda o‘lib qolmaydi?!
(Xudoyim, qanchalar baxtlidir u ham!)

Gullarni erkalab qo‘yasan bir zum... Kimlarga ataysan bu pok gunohni? Umrimni shu guldek ekkim keladi,
Bilgim kelar o‘sha titroqni...
(Menga bersang edi u chog‘ni!..)

Kaftingda ayolga aylanar g‘uncha,
Shu qadar masrursan!
... shu qadar pastman...
Seniki shu dunyo kecha-ketguncha.
(Nega men seniki emasman?!)

©️Zebo Mirzo

Nima bo‘pti, eslamasangiz,
Nima bo‘pti, qarab qo‘ymasam?
Dilingizda tosharmidi his,
Siz deb kuysam,
yoki kuymasam?
Menga la’nat bo‘lgan bu ishqdan
Yonib ketsa hayotim beiz,
Butun umr sevib o‘tsam-u,
Bir lahza  ham sevolmasangiz...
Nima bo‘pti, men sizning emas,
Sevgingizning bo‘lsam tutquni?
Sevib o‘tsam,
Sevib o‘psam mast,
Xayolimda saqlab men uni?
Kipriklarim yumsam,
U hozir
Huzurimda bo‘ladi paydo:
Mana, titroq  qo‘llarim suzar
Uning toshqin sochlari aro!
Men sevgan U – judayam yorug‘!
Men sevgan U – mag‘rur va halol!
Suyanaman yelkalariga
Tongni quchgan atirgul misol!
U – mening mard,
tengsiz Qirolim,
Men u bilan Hur malikaman,
Baxt yaratib har nafasidan,
Osmonlarga yulduz ekaman!
...Yuragimni yengaman demang,
Yuragimda garchand faqat siz
Bilsangiz Men juda baxtliman!
Nima bo‘pti...
Bilolmasangiz!
Ko‘nglingizni bo‘laklab bering,
Qushchalarga yediring, mayli.
Siz sevgimga qilmangiz shafqat,
Baxtsiz o‘tgan baxti tufayli!
Qo‘l siltamang, kulmang, achinmang...
Achinaman men sizga ko‘proq.
Sevilgan-u, buyuk ishq bilan,
Sevilganin  bilmagan  biroq!..
                            
©️Zebo Mirzo

Yo'q.
Adashding,
Topa olmading,
Ranjimadim kelganingga kech.
Men yig'ladim.
Sen yupatmading,
Tamom bo‘ldi eng so'nggi ilinj.

©️Gulrux Xudoyorova