Unutmoq matonat, unutmoq azob, 
Xotira umidlar jangida talash. 
Faqat bizga baxtdir, bizga iztirob, 
Bizga ichikkanga ichikib yashash....

©️Farida Afro'z

GRAFIKA

Koʻzing qaro sening, qoshlaring qaro,
Yuzlaring oq sening, kulishlaring oq.
Qoʻlingdagi taʼna toshlaring qaro,
Menga gʻamgin boqib turishlaring oq.

Unutishing — qaro, hijroning qaro,
Sogʻinching oppoqdir, xatlaring — oppoq.
Qarodir yurganing oʻch-mehr aro,
Menga tashlab ketgan dardlaring — oppoq.

Shommi, yo saharmi — vaqtimdir qaro,
Sen deb toʻkayotgan yoshlarim oppoq.
Sening ham, mening ham baxtimdir qaro,
Oʻttiz toʻrt yoshingda sochlaring oppoq.

Ishon, yurak oqdir, qarodir taqdir,
Oq-qora boʻyoqlar bizning bogʻlarda...
Men million boʻyoqni bilardim, axir,
Ikkimiz baxtiyor boʻlgan chogʻlarda.

©️Usmon Azim

Nimadir demoqchi bo‘lganday go‘yo,
Ortingga qayrilding. Va ketding nogoh.
Nedir xotirangga tushganmidi yo —
Yoki nimadandir bo‘ldingmi ogoh?
Keta-ketguningcha boqdi ko‘zlarim,
Qaynoq ko‘z yoshlarim oldi taftini.
O‘shanda aytilmay qolgan so‘zlaring —
Labingga og‘irlik qilmayaptimi?

©️Xosiyat Rustamova

Yuzing kim bilan kulsa, qalbing o'shanga tegishlidir...💜

Ayrilib boʻlgansan asli
hushingdan,
telbalik...
yashashda eng zoʻr maʼqul ish.
Alam qilar ekan har kech
tushingda,
seniki boʻlmagan insonni
koʻrish...

©️Erkin Hojimuhammad

Seni ko‘rmaganman bu holda oldin,
Ma’yus ko‘zlaringda nimadir qat-qat.
Senga qayerdanam duch kelib qoldim —
Nigohlaring xazon to‘kayotgan payt.
Olmoqchi bo‘lasan o‘zingni o‘nglab,
Qancha urinmagin — o‘zgarmaydi tus.
O‘zing ayt, shu holda qayerga qarab.
Muhabbat so‘zini qilay talaffuz?

©️Xosiyat Rustamova

Negadir o‘zingni sezasan notinch,
Biroz tobing yo‘qmi —
Yuzlaring berang.
Bilyapman, so‘zlaging kelmayapti hech.
Ammo, bo‘ladi-ku meni eshitsang.
Ko‘rdingmi ko‘nglimda zarracha g‘ubor.
Muhabbat ko‘zimda turibdi yoshday.
Faqat, Senga bitta iltimosim bor —
Yordam ber — So‘zimni nimadan boshlay?

🥥Xosiyat Rustamova

Hech kim bilan suhbatlashgim yoʻq. Ammo sen bilan uydagi pardalar haqida ham gaplashaveraman🦋)

©️Kafka

Xazonning rangida  yashnadi koʻklam,
Bilmadim bu fasl bahormi, kuzmi.
Hech boʻlmasa  olam  qulayotgan  dam
Sevgilim, biz yana uchrashamizmi?

Uchrashmoq?
Yoʻq, endi koʻrishmaymiz  biz,
Koʻrishsak-da,  zinhor soʻrashmaymiz  biz,
Asli bu dunyoga  yarashmaymiz  biz,
Sevgilim, biz yana uchrashamizmi?

Qay kuni ayrildik, qay kun  topishdik,
Qay kuni yigʻladik, qay kun  oʻpishdik.
Hayronman, biz  qaysi  osmondan  tushdik…
Sevgilim, biz yana uchrashamizmi? 

Ishq – Xudo, yodi-la kechar har onim,
Va uning poyida mening osmonim.
Xudosiz yashashning zavqi yoʻq, jonim…
Sevgilim, biz yana uchrashamizmi?

©️Jo'rabek Ramazon

Seni koʻp oʻyladim, oʻylab sogʻindim,
Yelib boraverdi umr  –  beshafqat.
Ming rangda tuslandi fasllar, ammo
Oʻzgarmadi dilda hislarim faqat.

Yillarin yetaklab vaqt oʻtdi shoshqin,
Yer-osmon oʻzgardi, oʻzgardi iqlim.
Doʻstlar ham oʻzgardi, doʻst emaslar ham,
Faqat oʻzgarmadi ishqim va ismim.

Ismim hamon oshiq,
qismat ekan ishq...
Oʻtar umr...
Yurakdan ishq arimaydi.
Bildim, bu eskirgan dunyo-yu dunda
Visolsiz muhabbat hech qarimaydi!

©️Dilmurod Do'st

Sen borsan.
Bir kunim jannat
Bir kun jahannam.
Bir lahzam farah,
Ming lahzam osiy.

Sen borsan.
Yelkang baland togʻ —
Zabt qilgim kelar butun umrga.
Koʻksingga bosh qoʻymoq
Goʻzal riyozat.
Lainning Xudoga sevgisi misol
Hech kimga bergim kelmaydi
Tuygʻularingni.
Quvgʻinga uchrayman shu uchun balki
bir kuni
nigohlaringdan.

Peshonam — otash, qismatim misol,
Peshonam — gʻadir-budur,
Tekislagim kelar lablaring bilan.
Koʻzimni yumaman, muhabbatingdek
Tilsimga aylanar koʻzlarim ichi.

Boʻgʻzimni qonatar har kecha,
"Kel" degan xanjar,
Yutaman, sengacha bormasin deya —
Qoʻrqaman, lahzada qoʻpguvchi qiyomatlardan.
Soʻng...
Titrayman har saboh
alamli koʻz yosh ichida -
Nega kelmading?

Sen borsan:
Har kun jahannam,
Har kunim jannat.
Meni sekin-sekin,
Lahzama-lahza
Maydalayotganin sezaman
Bu ogʻir qismat.
Yelkam yara boʻlgan,
Barmoqlarim ham.
Davosi oʻlim.
Sochlarimga osilgan
Gunoh la'natin
Yashirish uchun
Koʻzimni yumaman...
Koʻrmaysan sen ham...

Ammo baribir, sen borsan!
Qachondir ketsang,
Hech qachon kirmagan eshiging
ochiq qolar.
Ichkaridan uchib chiqqan qush
Bir kun tushlaringga kirishi uchun.

©️Feruza Xayrullayeva

Sen faqatgina eng sevgan insonim emassan. Sen eng sevgan makonim, eng sevgan vaqtim va men eng sevgan tuyg'usan.🤩