Nogoh salqin keldi avgust so‘ngida,
Yomg‘ir yog‘ib o‘tdi bugun ertalab.
Ertalab —  sabrning ko‘zi o‘ngida –
Men sening ismingni aytdim erkalab.

Nogahon o‘zgarish etdimi ta’sir,
Yo salqin xotirang yetdi – bilmadim:
Ko‘nglimni ertalab etmadim tahrir —
Erkalab ismingni aytdim. Yig‘ladim.

Tushundim — taqdiring ishin yuritgan 
Beyurak royishlar haqlidir, haqli.
O‘yladim: - Albatta, meni unutgan! —
Albatta, baxtlidir! Albatta, baxtli!

Asli bu mung nechun? Taqdir hal bo‘lgan.
Umrdan necha kun qoldi? Bilmadim.
Sensiz o‘lmog‘imga qismatim ko‘ngan...       
Baribir yig‘ladim.

©️Usmon Azim

Uzoq-uzoqlardan termulaman jim,
Duolar qilaman umringiz tilab.
Har tun kuzataman sizni oromga,
Har tong uyg‘otaman suyib, erkalab!

Har kun qahvangizga qo‘shaman shakar,
Va o‘zim ichaman istamasam ham.
Bizni o‘rtamizda ikkita shahar,
Siz boshqa olamda, men boshqa olam!

Kun bo‘yi tiriklik, ro‘zg‘or, uy, tashvish,
Ammo xayolingiz hamisha hamroh.
Sizga imkoni yo‘q yonimga kelish,
Mening bormoqligim eng shirin gunoh!

Nega ko‘ylagingiz yoqalari kir,
Necha kun to‘kilmay yotibdi kuldon?
Ko‘ylagingiz yuvish kimgadir taqdir,
Kuldonni bo‘shatish kimgadir armon!

Har tun sog‘inchlarni yostiqqa to‘kib,
Tongda dunyosidan qilmayman gina.
O‘sha ho‘l yostiqning jiltini so‘tib
Yana jilt tikishdan toladi  igna!

Siz ishga jo‘naysiz,
Men ostonada,
Sizga o‘ptiraman o‘g‘lim, qizimni.
So‘ngra tushlarimda telbaxonada,
Yig‘layman devorga bosib yuzimni.

Ishdan qaytasiz-u, kutmaydi hech kim,
Sovigan ovqatga qaraysiz hissiz.
Bugun ulovingiz o‘rindig‘ida,
Qo‘lingizni quchib yig‘ladi bir  qiz!

©️Malika Tavfiq

Hozir ,"baxt" so‘zini eshitging yo‘qdir,
Shunchaki...
bir o‘zing yig‘lamoqchisan.
Tashqarida Ishqni
shivirlar yomg‘ir,
o‘z-o‘zingni she'rga chog‘lamoqchisan...
Qo‘lga qalam olding,
to‘lding g‘ussaga,
xonangga iymanib kiradi Afsus.
Kamiga dardlarin ortib jussangga
yuragingga kirib kelayotir Kuz.

©️Mirzohid Muzaffar

Yogʻar yuragimning yoʻllarida qor.
Muz bosar izlaring ovutadi jim.
Qara, sogʻinchlardan bezanib takror
Sen kelmas yoqlarga shoshilar koʻnglim.

Bir hovuch joniga sigʻmasmi bahor?
Begona yerlarga qoʻshilmas hoki.
Yoningdan oʻtar-u, bermay deb ozor
Faqat sen bilmaysan, sezmaysan yoki...

Yoki umiding-la muz qotgan onlar,
Koʻksingni timdalab qoʻymaydi qiynoq.
Yoki kechilganmiz allaqachonlar...
Yoki sevilganmiz hammadan koʻproq.

Koʻzimning sen suymas yoshi bekindi,
Diydamiz qotdimi?
Qotdimi ozroq?
Demagin oʻkindi,
Borim chekindi,
Kelishsiz yoʻllaring oppoqdir, oppoq.

Qara, yuragimning qoʻllarida qor.
Qahraton qaygʻumas, qaygʻumda sen bor.
Kel demas, ket demas, xayollar tinsa
Ishongin soʻzim bor!
Yoki soʻzing bor!

Hamon yuragimning yoʻllarida qor...

©️Umida Nafas

BAXT HAQIDA BALLADA

Men baxtni ko‘rganman. Ko‘rganman. Aniq.
O‘rdada nogahon kelgan ro‘baro‘.
Qish kuni. Paltoga olgan o‘ranib,
Besas bir hayratda qotganman:  – Voy-bo‘!..

Yo‘lkalar chetida baland chinorlar,
Qator tizilishgan. Beharakat. Jim.
Dong qotgan bekatlar, qorlar, shiorlar...
Ammo baxt ekanin bilmagan – hech kim.

Baxt juda chiroyli edi! Chiroyli!
Chiroyli! – sovuqda yuzin yashnashi.
Hatto qor poyida g‘irchillar edi,
Tanini ezsa ham o‘tkir poshnasi.

Yuzi tegrasida ro‘moli – tuman.
Bir uchi kiftiga tashlangan edi.
Lollikdan boshqa hol bo‘lgan edi man’ –
Uni ko‘rib bu ish boshlangan edi.

Men baxtni ko‘rganman. Ko‘rganman. Aniq.
Hatto ko‘zlarimiz uchrashgan bir zum.
O‘rtada bo‘lmagan salomu alik,
Faqat lablariga qo‘ngan tabassum.

Shu tarz o‘tib ketgan yonimdan. Tashxis:
Jonim chiqmaslikka u dam yaragan.
O‘grilib qarasam, ortimga ilkis,
Ishoning-ishonmang, baxt ham qaragan!

Shundan buyon menga bu dunyo bir pul! 
Nomard g‘alvalari berolmas ozor.
Yuragim erta-kech she’r bilan mashg‘ul –
Baxtni uchratganman! Nima g‘amim bor!

Yonib kirib kelsam (yurishim – sarbast!) –
Fasod davralarga – g‘iybat tinadi,
Axir, menga hech kim kelolmaydi bas –   
Baxtga duch kelganim barcha biladi.

Mardligim bilishar (do‘stu yov ogoh!):
Nechun “yur” deb baxtni qistamaganman,
Baxtni etmaganman ne uchun hamroh?..
Bebaxt bo‘lishini istamaganman.

💙Usmon Azim

Xanuz qalb shikasta, majol yo'q tanda,
O'zimni o'zingda topgim keladi.
Sen mening ko'zimni o'yayotganda,
Men sening ko'zingdan o'pgim keladi.

©️Behzod Fazliddin

Hozirga qadar, unga yozgan maktublarimdagi soʻzlarning soni sakkiz ming, toʻrt yuz oʻttiz bittaga yetgan. Uning oʻzidek goʻzal ismi boʻlsa, xatlarimda yetmish toʻqqiz bor, hayajon ila bitilgan. Sevgi maʼnosidagi soʻzlar oltmish ikki joyda yozilmish. Biroq, uni sevadigan mendagi yurak tanho va yagonaligicha qolmoqda, shubhasiz.

Aslida, hammasiga mana shu mittigina yurak aybdor.

©️Izzat Arslon

Sen ham bahorlarni axtarib yurma,
Behishtdan quvilgan nochor azizim.
Boshqa fasllarning borligi ro‘yo,
Bu dunyoda faqat kuz bor, azizim...

©️Shuhrat Orif

— Sezayapsizmi? Havoda qandaydir g'amginlik borday.
— Kuz axir.
— Endi nima qilish kerak?
— Palto olish kerak.
— Menda bor.
— Unda paltoning tugmalarini qadab qo'yadigan insonni topish kerak.

©️Rinat Valiulin

Kel, deding,
keltirdim
qoshingga kuzni,
tegrangda shamoldek aylandim mudom.
Bizning mehr to‘la suhbatimizni
tinglardi tabiat va yana Xudo.

Toki xazon to‘shar yo‘limizga kuz,
yellar supurarkan –
g‘amgin yillarni,
dimog‘ingga takror bo‘ylay deb hanuz
qo‘limda jon bermay turar gullarim.

O, o‘shal xiyobon,
intiq o‘rindiq...
hamon bizni kutar –
o‘ngmidi, tushmi?
Nahot, olislarda shodon ko‘rinib,
ko‘zingdan yosh kabi to‘kilib tushdim?!

Mudom sarg‘ayarkan bargu o‘t-o‘lan,
tegramda aylanar tig‘ qayrab o‘lim.
Ket, dedim –
ketqazdim,
lek o‘zing bilan
kuzni olib ketding nechun, sevgilim?..

🥥Muhammad Siddiq

To labga borguncha to‘kiladi may,
Qolgan tilagimni kimga beraman?
Yaxshi ko‘ringan-u, yaxshi ko‘rilmay
Qolgan yuragimni kimga beraman?

Baxtsiz nigohimdan baxtni axtarib,
O‘nglarim g‘aribdir...
Tushlarim g‘arib...
Kerak emas deya berdi qaytarib,
Olgan yuragimni kimga beraman?

Labimdan uchdilar dilimning zori,
Kiprigim toriga qo‘ndilar borib,
Ko‘ksimga bosh urib boshini yorib
Tolgan yuragimni kimga beraman?

Muhabbat so‘limdir...
Muhabbat so‘lim...
Xudo seni shundan qisgandir, gulim,
Qayg‘ular ming yilki yuvmagan qo‘lin
Solgan yuragimni kimga beraman?

Uzummas...
O‘zim mast ishqiy sharobdan,
Sarobsan...
Sarobman...
Kechdim sarobdan...
Qon emas, tomirda oqqan azobdan
Qongan yuragimni kimga beraman..

To labga borguncha to‘kiladi may,
Qolgan tilagimni kimga beraman?
Yaxshi ko‘ringan-u, yaxshi ko‘rilmay
Qolgan yuragimni kimga beraman?

©️Tangriberdi Murod

Koʻklarda koʻk kaptar qushdekmiz, jonim.
Qaygʻurma kel, koʻngil xushlaymiz jonim.
Mening tanishim yoʻq narigi dunyoda
Baribir, jannatga tushmaymiz, jonim...

©️Muhammad Yusuf

Ikkimiz o'rtandik
Sog'inchda, yulduz.
Armonda to'lg'ondik
Kuz keldimi? Kuz...

Olislardan mayin
Yondirma, ey, cho'g'.
Seni suygan sayin
Armonlarim ko'p.

Biroq g'am — behuda,
Ayriliq — bekor.
Kuzda — chin tuyg'ula
Diydor ko'rmoq bor.

Ammo bu visolning
Armoni ko'pdir —
Diydor bor va lekin
To'ymoqlik yo'qdir.

©️Usmon Azim

Men atayin ildam ketaman.
Sen ortimdan yetolasanmi?
Atayin kech qolaman baʼzan.
Toqat bilan kutolasanmi?

Goh oʻzimcha kulaman mamnun,
Goho gʻazab qilib ozgina.
Atay jahling chiqarmoq uchun
Yolgʻondakam qilaman gina.

Men atayin oʻlaman bir kun
Yigʻlaysanmi – sinamoq uchun..

©️Joʻrabek Ramazon

Kuzak xonamgacha bostirib keldi.
Tashqariga chiqdim.
Xazondan qochib.
Umrim tugayapti.
Kelgin.
Kel endi.
Yov yenggan shaharday yuragim ochiq.

Kuz bog‘lar boshiga ne ish solmadi,
Ana, daraxtlarning so‘ngaklari - cho‘p…
Senga aytadigan so‘zim qolmadi,
Senga aytadigan jimliklarim – ko‘p…

Usmon Azim©️

💙Seni qanchalik sevganimni sevmay qolgan onimda yaxshiroq tushuna boshlaysan.

💙Men seni shunday sevaman, bilmayman qachon, bilmayman qayerda, bilmayman qanday…
Men seni oddiy, chin yurakdan sevaman, faqat seni.

💙Hech qachon sevgidan aziyat chekayotgan insonni sevib qolmang, bu inson yarador, u sizdan bint o‘rnida foydalanadi.

©️Pablo Neruda