Va balki
mazmunsiz endi izhorlar,
"Baxt" degan sahifam qolmadi sizda.
Istasam,
Tundan to kunduzga qadar
Yigʻlab chiqardim-u,
Arzimaysizda!

©️DI

Xotira, xotirga aylandi bari,
Qo‘ng‘iroq ovozing bermadi bir sas.
Baribir baxtlimiz, bir-birdan nari,
Illo, bir havodan olgaymiz nafas.

Faqat... Ko‘rgim kelar, borgan sari bir,
Yodingdami, osmonimiz oyli edi.
Shoirlik – ulug‘ dard, lekin baribir...
Qo‘llaring uzuksiz chiroyli edi...

©️Ahror Bayzo

Sevsam ham mukammal sevganman Sizni,
Unutsam, kam-ko‘stsiz unutdim g‘oyat.
Ming marta tuslanib qolipga tushdim,
Ming marta aldanib pishdim, nihoyat.

Bilaman, Sizni ham charchatdi oxir,
Ming o‘chib, tiklanib yurgan xotiram.
Shuncha tor asabim, injiq fe’limni,
Ming yil so‘roq qiling,
Roziman!

Shunda ham ko‘rsangiz qilasiz havas,
Kuzda ham bahorni qilib tasavvur.
Bugun hayotdagi muhim xulosam,
Baxtli deb o‘ylaysiz,
Xudoga shukur!

©️Kumush  O‘sarova

💙Qiziq, sen qildingmi bugun qo‘ng‘iroq,
Yoki men terdimmi raqamlaringni!?

💙Bir kun = uch kuz

💙Sen– tushlarim torlik qilgan baxt,
Ko'zlarimga sig'magan tasvir.

💙Men senga sevishim aytaman endi,
Sen menga xatingiz oʻqiyman, deb ayt.

P.s: ushbu kanal yo'nalishi asosan rasmlar va kinolarga bag'ishlangan, menimcha. Lekin ko'rib turganingizdek o'zimga moslab eng romantik postlarni, she'rlarni yig'ib keldim. Baribir har qanday san'at asari: xoh u rasm bo'lsin, xoh musiqa yoki umuman boshqa biri, baribir muhabbatdan ilhomlanadi.

O'tib ham ketmadi sog'inch xuruji,
G'amga boda tutdi so'zsiz dudog'im.
Sendan boshlanadi yo'lning bir uchi,
Qaytgim kelaverar charchagan chog'im.

Sen sukut saqlashni yaxshi ko'rasan,
Men esa yig'lashni! Bilmayman nega?!
Bir kun ado etgin, haqqim so'rasam,
Axir hammasiga o'zingsan ega!

O'zgaga egilish tushibdi boshga,
Ishq desam qon qusar yurak bechora.
Meni sevdirmasin o'zingdan boshqa,
Senda yakun topsin bori yo'q choram!

Men mudrab yotibman, pashshalar tirik,
Kimga umr kerak, kimgadir umid.
Ko'zim yoshi yuvgan kiprik — qil ko'prik,
Yurak og'ir kelar!
Titraydi bilib!

Ayo!
Hosil bo'lsa — bo'lsin-da murod,
Yo sochib yuborgin! Qayta tiriltir!
Sening isming aytib tirikman hayhot,
Meni sevging bilan avaylab o'ldir!

©️Nafisa Omon

G’oya

Seni sevdim,
Ko’zlari ma’yus sevgilim.
Garchi bilardim, ming yillarki
Yelkangdan tushmayotgan yuking,
Janglardan qolgan yoriqlaring,
Tan olinmagan erking,
O’nglanmagan orzularing,
Tinglanmagan so’zlaring bor.

Qo’lingdan tutdim, bilsam-da,
Panjaralar izi qolgan qo’rquvlaringda.
Sevaverdim seni,
Ko’zlari ma’yus sevgilim,
Balki yodingga tushar, deb
Ming yil avval sen qutqargan pari ekanim,
Alp ekaning qulga aylangan.
Kun ekaning tunda yo’qolgan.

Ko’zlari ma’yus sevgilim,
Seni sevaman
Va hamma sevsin deb
Ulashib chiqaman nigohlaringni.
Bo’yayman qonimga butun dunyoni - sen borsan unda.
To bir kuni
Seni sevguvchilar butun dunyoga
suratingni chizib chiqishar
Osmon kabi erking rangida!

©️Feruza Xayrullayeva

Madaniyatli bo'lolmaydiganim faqat bir narsa bor, u ham bo'lsa rashk.
Bir inson meniki bo'lsa, U faqat meningdir🤍

Kuzak xonamgacha bostirib keldi.
Tashqariga chiqdim.
Xazondan qochib.
Umrim tugayapti.
Kelgin.
Kel endi.
Yov yenggan shaharday yuragim ochiq.

Kuz bog‘lar boshiga ne ish solmadi,
Ana, daraxtlarning so‘ngaklari - cho‘p…
Senga aytadigan so‘zim qolmadi,
Senga aytadigan jimliklarim – ko‘p…

©️Usmon Azim

Osima,
Laylaklar elchi — u yerdan,
Huv ana mezonlar, xabar olaylik.
Pag‘a-pag‘a yolqin, tomchi-tomchi rang,
Yog‘ar bir o‘lka bor, boraqolaylik.

Ko‘ngil arosida faryod tilkasi,
Armonlar to‘sibdi tig‘ baxtimizni.
Qush yo‘q rabotlarda kimning ko‘lkasi,
Eshitdi mungragan suhbatimizni.

Sen yulduz parisi to‘fon burjida,
Men qora tuynukda uloqqan balki.
Ummonday og‘riqdan singan gurziday
Osmonday kenglikka sig‘maydi shaklim.

O‘qishni bilsang gar Taqdir kitobin,
Bilib ber, ishq bormi o‘lmasdan burun.
So‘rab ber, sevgining manzil turobin,
Joy bormi, yuzpora ikkimiz uchun.

Osima,
Laylaklar qaytdilar ortga,
Adirlar qatiga yashrindi bahor.
Tinmay yog‘ayapti, biz yo‘q o‘lkada,
Pag‘a-pag‘a yomg‘ir, tomchi-tomchi qor.

©️Abduvali Qutbiddin

- Bir kishi yigirmata gul sotib oldi:
o'n to'qqiztasi haqiqiy va bittasi soxta
- U aytdi: men seni oxirgi gul soʻliguncha sevaman❤️

Azizi boʻlganding bir erka qizning,
sevgini bilmagan,
baxtni bilmagan.
Egasini kutgan izhorlar haqqi,
Hamma "azizim"lar senga atalgan...

©️DI

Men sevgi nima bilmayman.
Eskicha fikrlovchi odamman.
Faqat seni bilaman.
Va isming tilga olinganda tilka-pora bo'ladigan qalbimni.

©️Attila Ilhan

Sen aziz boshingni ko‘ksimga qo‘yding,
Men mag‘rur boshimni oyoqlaringga.
Sen mening yuragim urishin tuyding,
Men to‘yib tikildim qaroqlaringga.

Sen yomg‘irli yo‘lda pinjimga kirding,
Men sening belingdan quchardim mahkam.
Bo‘sa olganimda kelardi kulging,
Qo‘shilib kulardim o‘shanda men ham.

Sen tunda sim qoqib sirlashar eding,
Men noma yozardim samimiy, dalli.
Muhabbat tilida tillashar edik,
Beg‘ubor so‘zlaring eslayman hali...

Biz aniq bilardik bir-birimizsiz
Uzoq yasholmasdik, firoq ko‘yida.
Biz uzoq joylarga yo‘qoldik izsiz,
Sen qirda, men esa daryo bo‘yida.
Endi sening hayot tajribang ko‘proq,
Mening hayotga ham hafsalam yo‘qroq.

©️Bek Ali

Axir qiziqmasmi, 
ish rejasimas, 
xayolan gʻalati qasrlar qursang, 
odamlar qaynagan katta shaharda
odamlarni sogʻinib yursang...

🥥Shavkat  Rahmon

Kuzni yashamadik sen bilan
Yaproqlar sochmadik boshimiz uzra
Kuzak yomg‘iriga qo‘shiq aytmadik.
Yolg‘izim.

Sayr qilolmadik biror marta ham
Bahorrang, osmonrang mashinamizda
Men sochlarim yoyib,
Sen hirgoyi qilib.

Va kirib kelmadik yelim xaltada,
Go‘sht,  sabzi,  yong‘oqlar ko‘tarib,
Shiftiga yulduzlar qo‘ndirib,
Devorga baxt rangi chizilgan
Kitobli,  qo‘shiqli uyimiz
qulfini ochgancha
tabassum bilan.

Xiyobon kezmadik biror marta ham,
Kuzgi quyoshning foydasi bor deb,
Ko‘zlari, sochlari seniki kabi
Bolakay bilan...

Va men arazlab,
qamalib olmadim kutubxonaga
Topgin deb atay.

Biz kuzni bilmadik, azizim,
Biz kuzni kutmadik, azizim.
Balki biroz go‘zal bo‘lardi
Yomg‘irlar ichida ketmoqlik.
Telefon ekraniga tomib
Surating kuydirsa tomchilar
Go‘zalroq bo‘lardi azizim,
Kuzga aylanganim qaytadan.
Sendan ayrilganim chindan ham...

🥥Feruza Xayrullayeva

mezon iplarida ko‘zlarim – dorboz.
"ma’yus nigohlaring qaydadir sening?"-
derazam ortida kuz solar uvvos.
"sen axir meniki eding-ku, mening!"

bas,
endi afsusdan ne foyda, ne naf,
fursat xotirani borar kemirib.
axir sen har jomin ishqsizlik atab
ruhimdan bor ishqni ichding simirib.

senga alam qilar
g‘amning to‘yida
xirom etmaganing,
dil so‘kmaganing.
o‘pkamni to‘ldirib xazin bo‘yingga
sen uchun bir tomchi yosh to‘kmaganim.

alam qilar
darding etmaganim farq,
ko‘ksimdan chechaklar hidi ufurib,
oltin bog‘laringni aylaganim tark,
oppoq etagim-la xazon supurib.

yetar,
endi so‘rma qalbimdan hisob,
parlanib, havoga uchgan ohlarim.
ayt,
qay xotir senga beradi azob,
qaynoq nafasim
yo
muz yonoqlarim?

… menga olislardan termuladi kuz:
“oh, ma’yus ko‘zlaring qaydadir sening?”
derazam ortida xo‘rsinar hanuz:
“bir vaqtlar meniki eding sen, mening…”

©️Shoxinur Umarova

Ishqiy qissalarning barchasi ro'yo,
Menimcha sevgi deb hech kim o'lmagan.
Lekin yaralgandan beri bu dunyo,
Seni sog'inishdek azob ko'rmagan.

Soxta maddoxlikning bari behuda,
Hamma ham g'amingni ko'rmaydi baham.
Qoshingni chimirib qaraganingda,
Yoqimli, manglaying chiziqlari ham.

Qanchalar qadrdon bu eski nigoh,
Ko'rdimmi, ko'ksimga mehr to'ladi.
Ismingni xotirdan chiqarish gunoh,
Hatto suratingni sevsa bo'ladi.

©️Jo'rabek Ramazon