Nega qoʻlqop kiymading, axir,
Axir nega bosh kiyiming yoʻq.
Yana meni rashkda kuydirib,
Yuzlaringdan oʻpadi sovuq..

©️Kumush Oʻsarova

Sevibsan, ishqingni pinhona tutib,
Chorlasam kelmay, lek yashabsan kutib.
Qismat shu ekanda deya men sodda,
Ketmoqchi bo'libman seni unutib.

Yo'limga intizor qarashlaringni,
Ismim aytib soching tarashlaringni.
Sevgi farishtasi yetkazdi menga,
Xudodan bir meni so'rashlaringni.

©️Sherbek Islomov

Yaxshiki xotirang bor,
Unda sen baxtli —
Mendan ayamaysan shirin so‘zingni.
Va haddim sig‘adi har kuni tongda
suratingga kulib salom bergani...

Ovozing axtarib qolgan shu kunlarimda
moychechak ifori yoqadi menga.
balki bu ifordan yaralgandir
sening ovozing!?

Toshkent avaylaydi hatto meni ham,
Bag‘ritosh deganlar biroz yolg‘onchi,
Axir asrayapti bag‘rida seni...

Har kech tushlarimda yig‘lasam,
moychechak ifori taralar.
Baribir uyg‘ongim keladi tongda
Sen mavjud Toshkentni ko‘rgani..

©️Feruza Xayrullayeva

Tilimni kuydirsa kechmishim rasmi
Va pargola etsa ko‘nglimni qasam,
Qancha avaylamay,
Ozor yetmasmi —
Joning og‘rimasmi sevsam, azizam?

Qoshingga bormasam
O‘zimdan asrab,
Qizg‘onib ketmasam soyangdan nari.
Behol gard yuqmasmi kipriging uzra,
Ko‘zlaringni o‘ylab chiqsam tunlari?

Kelarmi labingga tabassum taqib,
Bir zum bu qafasdan etguvchi xalos?
Senga baxt berguvchi —
Men kimman, axir?
Almisoqdan qolgan roviyman, xolos.

Mudom anduhlardan ortmas so‘zlugim,
Kuch ber g‘amlaringdan forig‘ etgani.
Bu yorug‘ olamga, qora ko‘zligim,
Netay kelgan bo‘lsam
Seni sevgani?

©️Muhammad Siddiq

asli sen borliqsan
yo butkul sarob.
qilasan o‘zingni mendan himoya
g‘ashliksan
mavhumsan
va sovuq oftob
eng mujmal hislarni etasan hadya


menchi? zimistonda najotsiz oqqush
ilinjim o‘zingsan
panoh kutaman
shirin xayollardan beorom, sarxush
tushlarimda titroq qo‘ling tutaman

senga talpinaman,
ko‘zlaring osmon
dudog‘ing eng nafis, bebaho aqiq

ammo nega hatto tushlarimda ham labingdan o‘pmoqni etasan taqiq?

©️O‘ktamoy

Na ochlik, na chanqoq, na uyqu, na hordiq... Hech biriga ehtiyojim yo‘q.. faqat shu –
Sensadim biroz...

©️MD

Mezon…ich-u tashimda yong’in,
Osmon shivirlaydi ruhimga.
Sen. Men. Nigoh. Jimlik va Yomg’ir,
O’rtada bo’lmagan muhim gap.

Ko’zlaring eslatar qahvani,
Sochlaring noyabr rangida.
Anglabsan sukunat zavqini
toblanib shamollar jangida.

Kuz kabi boqarsan – donishmand,
Kuz kabi yoqarsan ruhimga.
Sen bilan shunchaki tanishman,
O’rtada bo’lmagan muhim gap.

Mezon–ich-u tashimda yong’in….

©️MehrNoz

So'z yonar izhorning iskanjasida
Axir , aytarimiz kechikkan biroz.
Zotan , yuraklarning dardchil sasiga
Yolg'iz Yaratganning shohidligi rost.

Yoshli ko'zlarimga termulganing dam
Uyg'onmasmi edi dilingda hadik?!
Sen osmon , men tuproq bo'lgan kezda ham
Ishq sarhadlarida "biz" emasmidik ?!

Qani , nigohimdan uqqaning – ishq arz
Kiftimga mehringni yopgan kunlaring.
Ko'zyoshlarmi endi sevgiga evaz?!
Sog'inchmi badali tabassumlarning?!

Topganim sen eding dorulfanodan
Qalbimga og'riqlar botmoqda tag'in
Xazonga evrildim.Sen bor dunyoda
To'kilishga haqqim bormidi axir?!

©️Rayhona Davronova

Sogʻinch edi asli kunga tegishli
Oromin yoʻqotgan tunga tegishli
Sogʻinching arir deb uyquga ketsam
Lekin yetib keldi tushlarimga ham
Sening soginchingning totli qadami

©️Barchinoy Olimova

Keting,
Sizga ehtiyojim yo'q,
Sevib bo'ldim Sizsiz o'limni.
Yana ming yil yashasangiz ham,
Tushunmaysiz mening ko'nglimni.

Kutmang,
Sizga bermayman ortiq,
Umrimning bir lahzasini ham,
Yuragimni yulib tashlayman,
Azoblarga topaman chidam!

Hechqisi yo'q,
Yashab ketaman!
Sizdan yorug', sizdan balandroq.
Nasib ekan so'ngsiz o'limni
Tirik murda bilan ko'tarmoq.

Qoldirmoqqa urinmang, illo,
Boqmang ilhaq, intiq, g'amangiz.
Menga behad yolg'on tuyular,
Ishqqa o'xshab ketgan ta'mangiz.

Nima qilay,
Shunday Ayolman,
Tabiatan va yoki dilan:
Sevsam juda qattiq sevaman,
Ruhim, jismim, hayotim bilan!

Nomingizga qo'shilib o'sdim,
Har kun,
har tun mahrum va badar.
Men sizniki bo'lib yashadim,
Bilsangiz, to shu kunga qadar!

Ammo bildim.
Siz butkul boshqa!
Buloqdirsiz — sokin va beg'am.
Anglamaysiz, bir kuni aytmay,
Poyingizda suvsab o'lsam ham.

Yo'q, bu ishqni ko'tarolmaysiz,
Sizni ezar tahqir va taqiq.
Bu dunyoda eng go'zal sevgi,
Hamisha xor, mahkum, mustahiq!

Keting,
Sizga ehtiyojim yo'q!
Sevsam endi sevgum O'limni.
Yana ming yil yashasangiz ham
Tushunmaysiz, afsus, ko'nglimni...

©️Zebo Mirzo

Unutib boryapsan meni, sezyapman,
Chunki yuragimdan ketmayapti kuz.
Cheksiz xazonlikda cheksiz kezyapman,
O‘n sakkiz ming olam soriq – xazon tus.

Ey, sen! She’rlar yozgan mening bahrimda!
Ey, sen! Bahorlikni rad etgan – kechgan!
Ey, sen! Hayotini og‘ir tahrirda
Dunyoga ko‘rsatgan! Zaqqumlar ichgan!

Qaydan bog‘imizda ma’yus fasllar?
Qachon xazon yetdi? Olovlar o‘chdi?
Qachon ado bo‘ldi mungli asrlar –
Darddan xotiraga beta’sir ko‘chdim?

Oshiq yuragimga pinhon sir oshkor.
Ayon shirin so‘zning achchiq tashxisi,
Nechun yuragimda kuzak bemiqdor?
Unutib boryapsan meni, azizim…

©️Usmon Azim

Rejadan tashqari, tartibdan xoli
Serdaraxt, serqatnov yo‘lning bo‘yida
Sening ingichka va uzun qo‘llaring
Hech qanday hadiksiz bo‘ynimdan oldi.
Agar baxt shu bo‘lsa, juda bemavrid,
Agar ishq shu bo‘lsa, juda telbahol.
Xullas, ish kunlarining birida
Kunimning tartibin buzding bemalol.

Osmon esimda yo‘q, yer esimda yo‘q,
Muallaq havo bor… Sochning ifori
Va u naq ko‘ksimga qiladi qulluq
Bugungi rejadan tashqari dorib.
Gar diydor shu bo‘lsa, juda bema’ni,
Gar mehr shu bo‘lsa, juda ziyoda.
Nahot, ish kunlarining birida
Baxtli bo‘lish mumkin dunyoda?

Go‘zalim, qo‘ysang-chi, o‘z holimga qo‘y,
Bepayt turgan shamol – jinlarning bazmi.
Bepayt sharob ichib, nafaqat obro‘,
Mehnatimni yelga sovurdim, ozmi?
Men, axir, asabim torlari uzra
Paganini kabi tortib kamoncha.
Muhabbatdan kuygan odamlar uchun
Hayrat va ishtiboh ulashdim oncha.
Men, axir, harf to‘la klavishlarning
Betxoveni bo‘ldim, Motsarti bo‘ldim.
Men hamma bo‘loldim, faqat do‘stlarning
Ichidagi eng nomardi bo‘ldim.
Jonim, ish kunlarining birida,
Hech kimni bu holdan etmayin ogoh.
Sershovqin, serqatnov ko‘cha bo‘yida,
Nechun odamligim eslatasan, oh!

Men, axir, kitoblar to‘la xonamning
Buyuk dahosiman, yakka hokimi.
Kuldonimda saqlab kelayotgandim
Har bir tamakining aziz hokini
Hamda xudolarning qilmishin jamlab,
Yunon xalqi uchun to‘kardim ko‘zyosh.
Mening xayolim bor barcha o‘lchamda
Va sochi to‘kilib borayotgan bosh.
Shunday muhim chog‘da, shunday qizg‘in dam,
Sershovqin, serqatnov yo‘lning bo‘yida
Bu dunyoga odam bir bor kelishin
Eslatishga, nahot uyalmagaysan?

Choydan lazzat tuydim, yozsam quvondim,
Uy olsam sevindim, keyin semirdim.
Baxt desa, o‘zimni jinniga solib
Yurib, endi bir kam o‘ttizga kirdim.
Qarshingda serrayib o‘tinday turdim,
Quch dedim mahkamroq, zoriqqandayman.
Serqatnov ko‘chada sensiz qatnashdan
Bugun juda-juda toliqqandayman.
Sen mening tasvirim unutmagaysan,
Men ham nelarnidir eslayman goh-goh.
Afsus, afsus, uyda sen kutmagaysan,
Uyda kutganlarni sevolmayman, Voh!

©️Bek Ali

Koʻrishganda dimoqlarim osmon boʻldi,
Koʻzlarimni koʻp qizgʻondim qarashingdan.
Eh azizim, menday qaysar qizga axir
Dilni yorib izhor qilish yarashmasdi.

Soʻzlaringni kesaverdim,
Oʻzim olib,
Maktub yozsang, yelka qisib, qosh chimirib.
Aslidachi, senda boʻlmoq - azaliy baxt,
Faqat seni tinglasaydim…
Yillar oʻtib.

“Ha”larimning aksi edi minglab “yoʻq”lar
Tushunolmay qolasanay qalb ishini.
Lekin har kun suratingga aytardim man
Seni borlik qadar yaxshi koʻrishimni.

©️DI🤍

Negadir sen meni yo’qlamay qo’yding,
Es-hushing qaytadan qaytdi joyiga.
Ertalab, tush payti, oqshomda to’yding,
Qayroqlar sayramas qalbing soyida.

Negadir mensiz ham yashashing mumkin,
Ko’zing qarmog’ida tindi havasim.
Aslida ko’ksingni tebratgan to’lqin,
Fahming yetarmikin…
Rashk-u arazim.

Sen go’yo baxtlisan, topganday nurni,
Mug’ambir oshyonda yupanching borday...
Shunda ham yuzingda (ochay bir sirni)
Tilamchi ko’zlarim so’zlari borday.

Beshbattar bo’lmaydi… bundan ziyoda,
Hapqirib ketaman…
Sochlaring isi -
Dimoqqa urilar iffor, ziyoday,
Uyilib, yurakka taqalib, to’zib…

Sevgilim, sen meni yo’qlamay qo’yding…

💙Abduvali Qutbiddin