Rejadan tashqari, tartibdan xoli
Serdaraxt, serqatnov yo‘lning bo‘yida
Sening ingichka va uzun qo‘llaring
Hech qanday hadiksiz bo‘ynimdan oldi.
Agar baxt shu bo‘lsa, juda bemavrid,
Agar ishq shu bo‘lsa, juda telbahol.
Xullas, ish kunlarining birida
Kunimning tartibin buzding bemalol.

Osmon esimda yo‘q, yer esimda yo‘q,
Muallaq havo bor… Sochning ifori
Va u naq ko‘ksimga qiladi qulluq
Bugungi rejadan tashqari dorib.
Gar diydor shu bo‘lsa, juda bema’ni,
Gar mehr shu bo‘lsa, juda ziyoda.
Nahot, ish kunlarining birida
Baxtli bo‘lish mumkin dunyoda?

Go‘zalim, qo‘ysang-chi, o‘z holimga qo‘y,
Bepayt turgan shamol – jinlarning bazmi.
Bepayt sharob ichib, nafaqat obro‘,
Mehnatimni yelga sovurdim, ozmi?
Men, axir, asabim torlari uzra
Paganini kabi tortib kamoncha.
Muhabbatdan kuygan odamlar uchun
Hayrat va ishtiboh ulashdim oncha.
Men, axir, harf to‘la klavishlarning
Betxoveni bo‘ldim, Motsarti bo‘ldim.
Men hamma bo‘loldim, faqat do‘stlarning
Ichidagi eng nomardi bo‘ldim.
Jonim, ish kunlarining birida,
Hech kimni bu holdan etmayin ogoh.
Sershovqin, serqatnov ko‘cha bo‘yida,
Nechun odamligim eslatasan, oh!

Men, axir, kitoblar to‘la xonamning
Buyuk dahosiman, yakka hokimi.
Kuldonimda saqlab kelayotgandim
Har bir tamakining aziz hokini
Hamda xudolarning qilmishin jamlab,
Yunon xalqi uchun to‘kardim ko‘zyosh.
Mening xayolim bor barcha o‘lchamda
Va sochi to‘kilib borayotgan bosh.
Shunday muhim chog‘da, shunday qizg‘in dam,
Sershovqin, serqatnov yo‘lning bo‘yida
Bu dunyoga odam bir bor kelishin
Eslatishga, nahot uyalmagaysan?

Choydan lazzat tuydim, yozsam quvondim,
Uy olsam sevindim, keyin semirdim.
Baxt desa, o‘zimni jinniga solib
Yurib, endi bir kam o‘ttizga kirdim.
Qarshingda serrayib o‘tinday turdim,
Quch dedim mahkamroq, zoriqqandayman.
Serqatnov ko‘chada sensiz qatnashdan
Bugun juda-juda toliqqandayman.
Sen mening tasvirim unutmagaysan,
Men ham nelarnidir eslayman goh-goh.
Afsus, afsus, uyda sen kutmagaysan,
Uyda kutganlarni sevolmayman, Voh!

©️Bek Ali

Koʻrishganda dimoqlarim osmon boʻldi,
Koʻzlarimni koʻp qizgʻondim qarashingdan.
Eh azizim, menday qaysar qizga axir
Dilni yorib izhor qilish yarashmasdi.

Soʻzlaringni kesaverdim,
Oʻzim olib,
Maktub yozsang, yelka qisib, qosh chimirib.
Aslidachi, senda boʻlmoq - azaliy baxt,
Faqat seni tinglasaydim…
Yillar oʻtib.

“Ha”larimning aksi edi minglab “yoʻq”lar
Tushunolmay qolasanay qalb ishini.
Lekin har kun suratingga aytardim man
Seni borlik qadar yaxshi koʻrishimni.

©️DI🤍

Negadir sen meni yo’qlamay qo’yding,
Es-hushing qaytadan qaytdi joyiga.
Ertalab, tush payti, oqshomda to’yding,
Qayroqlar sayramas qalbing soyida.

Negadir mensiz ham yashashing mumkin,
Ko’zing qarmog’ida tindi havasim.
Aslida ko’ksingni tebratgan to’lqin,
Fahming yetarmikin…
Rashk-u arazim.

Sen go’yo baxtlisan, topganday nurni,
Mug’ambir oshyonda yupanching borday...
Shunda ham yuzingda (ochay bir sirni)
Tilamchi ko’zlarim so’zlari borday.

Beshbattar bo’lmaydi… bundan ziyoda,
Hapqirib ketaman…
Sochlaring isi -
Dimoqqa urilar iffor, ziyoday,
Uyilib, yurakka taqalib, to’zib…

Sevgilim, sen meni yo’qlamay qo’yding…

💙Abduvali Qutbiddin

Atay kuzni kutdim ayriliqqacha,
Keldi-da kuzaki tuyg‘ular gali.
Senda ayb yo‘qdir, bor bo‘lsa, erkam,
Dalli bir shoirni sevib qolganing.

Qara, ayro tushib ketgan yo‘llarga
Xazonrez, yomg‘ir ham yog‘yapti ayni.
Men she’rlar yozaman, sen yig‘la, erkam,
Yomg‘irda yig‘lasang hech kim bilmaydi.

Faqat qarg‘amagin, gunohimdan o‘t,
Men kabi ichingni hislarga burka.
Axir bahorlarda sevishgandayin
Ayrilmoq go‘zaldir kuzda ham, erkam!

©️Aziz Nur

O‘zimning yo‘limga undamayapman,
Uqtirmayapmanku falsafamni ko‘p.
Meni tushunmaysan, indamayapman,
Seni tushunmasam, xafa bo‘lma, xo‘p?!
Sening ishing menga xatodir, xato,
Kulgingga sababchi men tushungan g‘am.
Yo‘llarimiz tersdir shu qadar, hatto
Kesishib qolmaydi ro‘yolarda ham.
Poyingga tillodan sochqi sochsalar,
Ishga tushmas hatto ko‘z qirim mening.
O‘ngimda uchragan sof mo‘jizalar
Hatto tushlaringga kirmaydi sening.
Butkul bo‘lak olam! Shunaqamiz biz,
Taassufki, dilda o‘zgacha niyat:
Sen mening baxtimni etolmassan his,
Sening baxting menga sanalar uyat.

©️Xayrulla Hamidov

Xo‘rsinasiz.
Mahkumsiz go‘yo —
Armon ishqning qiynoqlarida.
Mening aksim ko‘rdingizmi yo,
Qizingizning nigohlarida?..

Jim qolasiz.
Qalbingizda tosh —
Har kech botib uyqu bermaydi.
Yoningizda yotgan qalamqosh —
Ko‘nglingizni mendek bilmaydi…

Sag‘ir dilning ro‘molchasi xo‘l,
Ichingizga oqdimi yoshlar?
Ko‘ksingizni teshganida do‘l,
Sochildimi so‘nggi bardoshlar?

Uzr so‘rang, ko‘rsatganda bo‘y,
Uvol ishqning gunohlaridan,
Mening ismim qo‘yilgan, xushro‘y —
Qizingizning nigohlarida…

©️Lobar Aziz

Keldim
Yo‘q ekansiz
Eshigingiz berk
Poygakka to‘kildi nigohim...
Bir g‘uncha labidek mehrimni
bildirib qo‘yganim —
gunohim..

©️Nastarin Iforzoda

Ketmay tur... Men hozir chiqaman boqqa.
Senga aytar so'zga yuragim to‘ldi...
Umrim tugayotgan bu tig‘iz chog‘da
Xotiramda faqat sen qolsang bo'ldi.

Hech kimga nasibmas bu kuzda qolg'u.
Banddan uzilganman.Yaqinman yerga...
Alvido.Yig‘lama.Yashaysan mangu –
Seni solib qo‘ydim avaylab she‘rga !

©️Usmon Azim

Tag‘in yomg‘ir yog‘di siz yo‘q shaharda,
Sezdim maysalarning titroqlarini.
Va sizni o‘yladim kimni ko‘proq sevasiz –
Menimi yoki yomg‘irni?

Tag‘in yomg‘ir yog‘di siz yo‘q shaharda,
Har neki begona,
har kimsa tanish.
Nigohingiz qidiraman,
izlayman tovushingizni,
Yurak topsa deyman bir dam osoyish.

Tag‘in yomg‘ir yog‘di siz yo‘q shaharda,
Tomchilar labimda uchdi sirpanchiq.
Men sizdan uyaldim,
bu gunoh edi, axir,
Mashinalar termulib o‘tdi
ko‘zlarin har damdan kattaroq ochib.

Tag‘in yomg‘ir yog‘di siz yo‘q shaharda,
Sog‘inchim yodimga soldi tomchilar.
Yig‘ladim!
Kechiring,
kulaman degandim faqat,
aytilmagan sirlar yog‘di tomchilab.

Tomchilab, tomchilab yog‘di yomg‘irlar,
Tomchilab, tomchilab yog‘di bor sirim.
Tag‘in yomg‘ir yog‘di siz yo‘q shaharda,
Men sizdan yomg‘irpo‘sh kutdim, hech kimim!

Tag‘in yomg‘ir yog‘di siz yo‘q shaharda…

©️Parizoda Ro'ziboyeva

Barmoqlar qalamni quchar qaltirab,
Ko'ngil tug'a boshlar, yig'laydi tuyg'u.
Aqlim faryod qilar: "To'xta, ey, telba,
Sening xatlaringni o'qimaydi u".

Xonaga nur kirar oynadan sinib,
"Aqlingga quloq tut, aytgani rost-ku.
O'qigan bo'lsa gar javob yozardi,
Sening xatlaringni o'qimagan u".

Oynaga urilar oqshom shamoli,
Bilgan sirlarini olamga sochib.
"Men aniq bilaman, to'xta, ey ko'ngil,
U sening xatlaring ko'rmaydi ochib".

Dilga g'ashlik cho'kar, zaminga oqshom,
Kecha so'zlay boshlar dilga otib o'q.
"Xatlaring o'qimoq u yoqda tursin,
Hattoki u seni o'ylagani yo'q".

Oppoq qog'ozlarga to'kiladi qon,
Oppoq qog'ozlarda faryodlar lim-lim.
Eng so'nggi umidim to'kilmay turib,
"Ularning so'zlari yolg'on",— de, gulim.

Ko'ngil to'kilmoqda qog'ozga butkul,
Bu so'ngi zarrasi, qolmas boshqa payt.
Men senga sevishim aytaman endi,
Sen menga: "Xatingiz o'qiyman", — deb ayt.

©️Najmiddin Ermatov

Tun.
Yomg‘ir.
Qorishiq ifor.
Uchqur xayol, qadamlar asta.
Borliqqa sochilib keladi ketging,
Yomg‘ir bo‘lsam kerak, aslida.

Sen yo‘qsan.
Hech kim yo‘q.
Nimalardir bor.
Nenidir tuyarsan yomg‘ir ostida.
Men axir osmonda yashaganman-ku,
Ne qilib yuribman zamin ustida?..

Shayton.
Taqiq.
Va o‘sha meva.
Afsus bor quvg‘indi odam naslida.
Negadir ularga aloqam yo‘qdek,
Yomg‘ir bo‘lsam kerak, aslida.

©️Najmiddin Ermatov

Shaxsan o'zim arab tilini shu kishidan o'rganyapman.

Ustozam 2ta yangi guruh ochyapti: 0 dan Muallimi soniy, ya'ni harflarni bilmaydiganlar uchun bir oyda o'rgatadilar

va harf taniydiganlar uchun tajvid qoidalari bilan xatm guruhi.

0 dan Qur'on o'qishni o'rganmoqchi va xatm qilishda tajvid qoidalarini o'rganmoqchi qizlar,
@binnt_mansur ga murojaat qilasiz. 🌙

Shaxsiy tavsiyam, o'zim o'qiganim uchun tavsiya qilyapman❤

Narxlar siz o'ylaganchalik qimmat emas asosiysi❤