🌱 Sea Breaze: rasmiy xulosa bor, ochiq qolgan savollar ham

Loyiha bo‘yicha e’lon qilingan ma’lumotlar tahlili ekologik xavfsizlik va jamoatchilik ishtirokiga oid bir qator muhim savollarni yuzaga chiqarmoqda. Huquqshunos Dilfuza Kuralova ularni bir nechtasini sanab o‘tdi.

⚠️ Asosiy muammolar:

1. Jamoatchilik ishtiroki noaniq. Fuqarolar qanday taklif va e’tirozlar bildirgani, ular yakuniy qarorga qanday ta’sir qilgani ochiqlanmagan.

2. Muqobil variantlar ko‘rsatilmagan. Loyihani boshqa hududda amalga oshirish, ko‘lamini qisqartirish yoki undan voz kechish imkoniyatlari tahlili noma’lum.

3. Ekologik xavflar aniq baholanmagan. Suv, tuproq, yashil hududlar va bio xilma-xillikka ta’sir bo‘yicha ko‘rsatkichlar hamda uzoq muddatli oqibatlar haqida yetarli ma’lumot yo‘q.

4. Mustaqil monitoring natijalari yo‘q. Jamoatchilik kengashi tashrif davomida qonunbuzarlik aniqlamagan. Ammo bu ekologik zarar mavjud emasligini anglatmaydi. Mustaqil tekshiruvlar o‘tkazilgani ham noma’lum.

5. Shikoyat qilish tartibi tushuntirilmagan. Fuqarolar ekologik xulosaga qanday e’tiroz bildirishi va qaror ustidan shikoyat qilishi mumkinligi ko‘rsatilmagan.

🧐 Nima qilish kerak?

➡️ Hujjatlarni ochiqlash: Atrof-muhitga ta’sirni baholash (AMTB) materiallari, ekspertiza xulosalari, jamoatchilik e’tirozlari va ularga berilgan javoblarni e’lon qilish.
➡️ Jamoatchilikni jalb etish: Muhokamalarni qaror qabul qilinishidan oldin o‘tkazish va takliflar qanday inobatga olinganini ko‘rsatish.
➡️ Muqobillarni solishtirish: Loyihaning turli variantlari va ularning ekologik oqibatlarini taqqoslab tahlil qilish.
➡️ Mustaqil monitoring: Suv, havo, tuproq va bioxilma-xillik bo‘yicha o‘lchovlarni o‘tkazib, natijalarni muntazam e’lon qilish.
➡️ Shikoyat mexanizmini yaratish: Fuqarolarga e’tiroz bildirish, qarorlardan shikoyat qilish va mustaqil ekspertlarni jalb etish tartibini tushuntirish.

Telegram Instagram

🌳 Buxoroda daraxt ekish aksiyasiga qo‘shiling!

Hozirda ko‘chatlar xaridi uchun mablag‘ yig‘moqdamiz. Qachon va qayerda daraxt ekishimiz mablag‘ yig‘ilgach e’lon qilinadi. Yangiliklarni o‘tkazib yubormaslik uchun kanalimizga obuna bo‘lishni unutmang!

Ko‘chatlar uchun hissa qo‘shmoqchi bo‘lsangiz:
https://taps.uz/urikguli

——

🌳 Join our tree-planting campaign in Bukhara!

We’re currently raising funds to purchase seedlings. The planting date and location will be announced once we’ve raised enough funds. Don’t forget to subscribe to our channel so you don’t miss any updates!

To contribute towards the seedlings:
https://taps.uz/urikguli

⛰ Xitoy kompaniyalari Bostonliq tog‘laridan resurs qazib olmoqda

Toshkent viloyatining Bostonliq tumani tog‘larida Xitoy kompaniyalari tabiiy resurslarni qazib olmoqda. Ular hududni ijaraga olganini aytib, begonalarning kirishiga ruxsat bermayapti.

⚠️Eng xavotirli tomoni, gap milliy bog‘ hududidagi yerlar haqida ketmoqda.

“Muhofaza etiladigan tabiiy hududlar to‘g‘risida”gi qonunga ko‘ra, milliy bog‘ yerlari tabiatni muhofaza qilish uchun mo‘ljallangan. Ularning maqsadiga zid har qanday faoliyat taqiqlanadi.
Qo‘riqlanadigan hududlarda yer, suv, yer osti boyliklari, o‘simlik va hayvonot dunyosi xo‘jalik faoliyatidan to‘liq chiqariladi.

Mamlakatimizdagi eng yirik Ugom-Chotqol davlat milliy tabiat bog‘i to‘g‘risidagi nizomda ham foydali qazilmalarni qazib olish, tuproq qatlamini buzish va tog‘ jinslarini ochib tashlash taqiqlangan.
Hatto geologik o‘rganish ishlarini ham faqat bog‘ rahbariyatining ruxsati bilan amalga oshirish mumkin. Sanoat miqyosida qazib olishga esa umuman ruxsat berilmaydi.

❓Savol shuki, agar qonunda bunday ishlar taqiqlangan bo‘lsa, tog‘larda qazib olish ishlari qanday olib borilmoqda? Buni kim nazorat qilyapti?

Telegram Instagram

🌳 Google Finlandiyada 400 mingga yaqin daraxtni noqonuniy kesib tashladi

Google kompaniyasi Finlandiyada ma’lumotlar markazlari qurish uchun qariyb 400 mingta daraxtni noqonuniy kesib tashladi. Kompaniyaga ikkita qurilish maydonchasida ishlarni vaqtincha to‘xtatish buyurilgan.

🌲 Muhos shaharchasida 250 mingta, Otanmäkida esa yana 150 mingta daraxt kesilgan. Hatto yerning ustki tuproq qatlami ham olib tashlangan.

💧 Mahalliy aholi qurilish hududidan oqayotgan jigarrang suv yaqin atrofdagi soyga quyilayotganini aytmoqda. O‘rmon yo‘q qilingach, yovvoyi hayvonlar ham yashash joyini tark etgan. Ayrim bo‘rilar hatto qishloqqa yaqinlashgan.

📌 Muammo nimada?

Google qurilishni boshlashdan oldin zarur ekologik baholash ishlarini yakunlamagan. Shu sababli Finlandiya nazorat organi kompaniyadan ikki hududdagi ishlarni to‘xtatishni talab qilgan.

Kompaniya o‘rmonlarni kesgani uchun uzr so‘radi va Muhosda 130 gektar maydonga daraxt ekishini bildirdi. Ammo ekologlar bu yetkazilgan zararni qoplash uchun kamlik qilishini aytmoqda.

💰 Google Finlandiyada qiymati 13 milliard yevroga teng sun’iy intellekt infratuzilmasini qurmoqchi. Hukumat investitsiyalar va yangi ish o‘rinlarini qo‘llab-quvvatlayapti. Shunga qaramay, Finlandiyada ma’lumotlar markazlari faoliyatini qat’iyroq tartibga solish va ekologik zarar uchun mahalliy aholiga kompensatsiya to‘lashni talab qiluvchi petitsiyaga 93 mingdan ortiq kishi imzo chekdi.

Telegram Instagram