#ajabtovur

Kim qaysi avlodga mansub?

Yoʻqotilgan avlod ​​— 1883-1900
Buyuk avlod ​​— 1901-1927
Sokin avlod ​​— 1928-1945
Bumerlar avlodi ​​— 1946-1964
X avlod ​​— 1965-1980
Milleniallar avlodi ​​— 1981-1996
Zed avlod (zumerlar) ​​— 1997-2012
Alfa avlod ​​— 2013-yildan buyogʻi

Otam bumer, onam X avlod, akalarim milleniallar, men zumerlar avlodiga mansubman. Siz-chi?

P.S: keyingi avlod katta ehtimol bilan Beta avlod deb atalsa kerak :)

@usmonosphere

MAVZUNA

Sizdan dunyo soʻraganim yoʻq,
men dunyodan sizni soʻradim.
Shoir boʻlib tugʻildim, axir,
axir, oshiq boʻlib toʻradim.

Qarshingizda bukmadim tizni,
qoʻl uzatmang siz ham, iltimos;
men shunchaki sevdim-u sizni,
sizdan sevgi soʻradim, xolos.

Otim tutib, mayli, toʻkmang yosh
va chorlamang ogʻushingizga...
Men ham qishda boʻlmasman quyosh,
shamol boʻlmam sovushingizga.

Hamdam boʻlmang, mayli, umrbod,
hasratimga sabab qilmayman,
sevsangiz bas meni, parizod,
boshqa narsa talab qilmayman.

Elantirmang endi bunchalik,
oqilasiz, donosiz, zakiy...
Nahot, qiyin boʻlsa shunchalik
bir odamni sevmoq shunchaki?!

Mansur Jumayev

@usmonosphere #nazm

#sanʼat #tavsiya

Davlat teatrlari va sanʼat saroylarining dekabr oyidagi repertuari ekan. Sanʼatsevar doʻstimiz Axrorxon yubordi.

Sizga ham ilindim, vaqtingizga qarab madaniy hordiqni rejalashtirsangiz boʻladi.

P.S: Ilhom, ArtHouse Hamsa, Shams-i-Qamar, Maʼvo kabi teatr-studiyalar repertuari ushbu roʻyxatdan joy olmagan :)

@usmonosphere

#yangi_kitob

Bugun “Pir nashr”dan sovgʻa keldi. Erkin Aʼzamning “Gonoluluga elchi” va Rizvon Oqlonning “Uzoq tuzoqlar” kitoblari ekan.

Bir necha kun avval Halima Ahmadning uylariga borgandim. Halima opa “Erkin aka zoʻr asar yozibdi, tili juda ravon, katta yurak bilan yozgan ekan, albatta oʻqib chiq shuni” deb rosa maqtagandi.

Orada 2-3 kun oʻtib oʻsha kitob oʻz oyogʻi bilan kelib tursa deng. Quvonadi-da odam. “Pir nashr” mutasaddilariga rahmat. Mutolaani “Gonoluluga elchi”dan boshlayman.

@usmonosphere

#ajabtovur

Aytishlaricha, bugun butunjahon achom-achom kuni emish... Bayramni yaxshi oʻtkazinglar, tepadagilar :)

Surat muallifi: Yuval Robichek

@usmonosphere

​#taqriz

Shahzodamiz katta boʻlmagani yaxshi...

Mikoil Adiguzelning “Katta shahzoda” asari chiqishi haqida eshitishim bilanoq, oʻqishni niyat qilgandim. Nomi oʻziga tortgan, Kichkina shahzodaning ulgʻayganiga qiziqdim.

Lekin Ekzyuperining shohasari va turk adibining shahzodasi oʻrtasida yer bilan osmoncha farq bor. Saviya jihatdan ham, syujet ravonligi va asar qurilishi jihatdan ham.

Birinchidan, “Katta shahzoda” menga butlul sunʼiy tuyuldi. Mening, va ehtimolki, koʻplab oʻquvchilarning tasavvuridagi Kichkina shahzoda vaqti kelib katta odamga aylanmasligi, aylanganda ham bu qadar biqiq inson boʻlmasligi kerak. Qisqasi, personaj ishonarsiz chiqqan, nazarimda.

Ikkinchidan, Katta shahzoda yana avvalgi yoʻl xaritasi boʻylab sayohatga otlanishini va eski qadrdonlari yoki ularning izdoshlarini uchratishini, ularga endi katta inson sifatida nazar solishini kutgandim. Afsuski, Katta shahzodaning sayohati notugal va yuzaki koʻrindi.

Uchinchidan, asardagi syujet chizigʻi ham juda oʻynoqi: kutubxona, tush, sayohat, taʼlim olish, kitob yozish va hokazo. Ammo baʼzi hikmatnamo jumalalar, tagiga chizsa boʻladigan satrlar bor. Ekzyuperinikichalik boʻlmasa-da, bor har qalay.

Qolaversa, kitobdagi illyustratsiyalar sunʼiy idrok yordamida tayyorlangan shekilli. Asar ruhiyatiga deyarli mos emas, xatolari koʻp: barmoqlar koʻpmi-yey, toshbaqaninh tanasi ayqash-uyqashmi-yey, cholning hassasi oʻzi tik turibdimi-yey. Shu oʻrinda umumiy fikr: suratlarda sunʼiy intellektdan foydalanish yaxshi, lekin shundayicha kitobga joylash yaramaydi. Professional rassomlar bilan ishlash maqsadga muvofiq.

Asar tarjimasi ham menga maʼqul kelgani yoʻq. Turkchadan tarjima qilingani shundoqqina bilinib turibdi. Yaʼni gaplar turkcha qolipda, baʼzi soʻzlar turkchadagisini shundoqqina oʻzbekcha alifboda yozib qoʻyganday tuyiladi. Masalan: “parvosizcha” ravishidan foydalanilgan. “Parvosiz” shundoq ham oʻsha maʼnoni beradi, “-cha” qoʻshish shart emas. Yoki “beparvo” deb ifodalash mumkin edi.

Gapning qisqasi, mening nazdimda “Katta shahzoda” unchalik ham oʻzini oqlamagan taqlid. Kitobning nomigina odamni jalb qiladi. Agar “Kichkina shahzoda”ning (ashaddiy) muxlisi boʻlsangiz, bu asarni oʻqishni tavsiya qilmayman. Kutganingizga yarasha narsa olmaysiz. Siz va biz uchun “Kichkina shahzoda” kichkinaligicha aziz.

@usmonosphere

​#iqtibos

Mikoil Adiguzelning “Katta shahzoda” asaridan iqtiboslar

• Ajab… Ulg‘ayishdan kim ham quvonardi odamzotdan boshqa? Harqalay, gullar daraxtdek baland bo‘lishni xohlashmasa kerak.

• Baxtga yetmoqchi bo‘lsang, horimoqqa tayyor tur.

• Bilganlaring eng katta dushmaningdir.

• Bitta yosh bolaga vaqt sarflash mingta katta odamni tanishdan yaxshiroqdir.

• Ba’zan eng yaxshi niyatlardan chuqur jarohatlar paydo bo‘ladi.

• Bolalarning sofligi har qanday donishmandlikdan ustun.

• Top-toza tomchi butun boshli ummondan a’lodir.

• Chin yurakdan yaxshi ko‘rgan odam qayerda bo‘lsa ham sevgilisi bilan birgadir.

• O‘ylamay gapirgan kishi gapining asiriga aylanadi.

• Nimaiki qidirsangiz, bir kun qalbingizda topasiz.

• Insonlar eng ko‘p o‘zlari bilan yuzma-yuz kelishdan qo‘rqadilar.

• Bitta daraxtni o‘rganish uchun to‘rt fasl, ya’ni bir yil sarfladingiz. Odamni tanish uchun esa bundya yillardan bir nechtasi kerak bo‘lishini hech qachon unutmang.

• O‘zingizni bilmay turib, o‘zgalarni bilishga urinmang.

• Yo‘llar ayro tushgan mahal yolg‘iz yurishni ham bilishingiz kerak.

• Ayriliq － ko‘z bilan sevganlarning dardidir.

• Ba’zan tushlarimiz hayotdagida ko‘ra ko‘proq saboq beradi.

• Muhimi, bolalikka qaytish emas, bolalar bilan birga vaqt o‘tkaza olishdir.

• Sen esa qup-quruq tuproqqa o‘xshaysan. Yuragingdagi gullarni sug‘orishing kerak bo‘lgan vaqtni boy beryapsan. Bunaqada so‘lib qoladi ular, e’tiborliroq bo‘l!

• To tirik ekansan, pushaymonlik foyda beradi.

• Zotan, barcha xotiralaring, boshdan o‘tkazganlaring － sensan, sening o‘zingsan!

• Bizni biz qilgan narsa qo‘lga kiritgan bisotimiz emas, hayot davomidagi hissiyotlarimizdir.

• Topdim deydiganlar yo‘qotganlardir.

@usmonosphere

#gurung

👉🏿 @munshaotbot

Savollaringiz, gaplaringiz, taklif va tanqidlaringiz boʻlsa, yozib qoldiring. Yoʻlda oʻqib boraman. Uyga kirvolib javob yozaman 🤝

@usmonosphere

#diqqat #oramizda_qolsin

Yaqinda Otabek Mahkamov bilan boʻladigan uchrashuvga ikkita taklifnoma bor. Taklifnoma egalari ayni oʻsha kuni bora olmasliklari sabab, sotishga qaror qilishibdi.

Mr. Otabekning muxlislari boʻlsa, @munshaotbot ga aloqaga chiqing, narxlarini bilib olasiz.

P.S: bunaqa taklifnoma soni juda cheklangan...

@usmonosphere

#ajabtovur

Odessadagi (Ukraina) bir hajviy jurnalda 1917-yil iyun sonida chop etilgan karikatura. Unda ozodlikka har kim har xil qarashi ifodalangan.

Amerikalik:
​​— Bizda erkinlik bor, endi toʻgʻri kelgan odam meni doʻpposlolmaydi.
Rus:
​​— Bizda erkinlik bor, endi toʻgʻri kelgan odamni bemalol doʻpposlashim mumkin.

@usmonosphere

“Анора” филми чиқаётгани ҳақида эшитган бизнинг “санъатсеварларимиз” ҳали ўзлари сюжетини аниқ билмайдиган филмига “ўзбекистонлик қизнинг фоҳишалиги ҳақида экан”, “қизларимиз шаънига тош отяпти”, “миллатимиз номини булғашяпти” деб аюҳаннос солишганди. Шу филм American Film Institute Awards томонидан йилнинг энг яхши филмларидан бири деб топилибди. Ундан аввалроқ 77-Канн кинофестивалида энг юқори мукофот ҳисобланган “Олтин палма новдаси”ниям қўлга киритганди.

Қизиғи, бу филм бош қаҳрамонининг ўзбек эканлиги ҳақида аниқ далиллар йўқ ва у қизларга Анора исми қўйилиши мумкин бўлган исталган бир миллатга мансуб бўлиши мумкин эди. Унданам аянчлиси, филм қайсидир миллатда кўпроқ “суюқоёқ” чиқиши ҳақида эмас, шунчаки жамиятнинг ҳар қандай қатламидаги одам ҳам бахтли бўлиши мумкинлиги ва бу йўлда оилавий, ижтимоий каби турли тўсиқларни енгиб ўтиш ҳақида бўлган. Бизнинг жамият эса ҳалиям буни қабул қилолмай ҳалак. Тўғрисиямда, четга ўқишга кетган ҳар қандай қизни “вой бу бузилиб кетади” деб хаёл қиладиган, лекин ўзи “Миллион”, “Браво”ларнинг Чилонзор мост, Шуҳрат, Қатортол деган арзон ҳазилларига ичаги увишиб куладиган одамлардан кўп нарсани кутиш керак эмас, шекилли.

@safarblog

#diqqat

Doʻstlar, sahifa yurishi uchun hamma narsa tayyor. Faqat obunachilar soni 100 taga yetishini kutyapman...

@soz_lab × @usmonosphere

Bismilloh deb boshladim...

👉🏿 @soz_lab

Necha yilki har doim ilk qor yoqqanida shu sheʼrimni eʼlon qilishni anʼanaga aylantirib oldim. Hoʻ-oʻ bir zamonlar yozilgan, hamon qadrdon sheʼrcham bu.

Marhamat, qor kayfiyati toʻkis boʻlsin:
👉🏿 https://youtu.be/G-692DIbDR0

@usmonosphere