#AXBOROT_MARKAZI

Kelajak muhandislari uchun kasbga yo‘naltiruvchi sessiyalar

Energetika va yuqori texnologiyalar kelajagi nafaqat ilmiy anjumanlarda, balki bugun kasb tanlovi oldida turgan o‘quvchilarning ongida ham shakllanadi. “O‘zatom” agentligining Atom texnologiyalari axborot markazi 328-sonli umumta’lim maktabining 10-sinf o‘quvchilari uchun kasbga yo‘naltiruvchi sessiyasini o‘tkazdi. Bunday uchrashuvlar odatiy ma’rifiy ekskursiyalardan ancha kattaroq bo‘lib, ularning asosiy maqsadi zamonaviy dunyoda yadroviy innovatsiyalarning o‘rni haqida xolis va obyektiv tushuncha shakllantirishdir.

Amaliyot shuni ko‘rsatadiki, yoshlarning atom sohasi haqidagi tasavvurlari ko‘pincha tor dunyoqarash bilan cheklanib qoladi. Tadbir davomida yuqori sinf o‘quvchilariga tinch yo‘lidagi atomning tibbiyot, sanoat va qishloq xo‘jaligini qamrab oluvchi keng ko‘lami namoyish etildi. Mamlakatning sanoat istiqbollariga, jumladan, Jizzax viloyatining Forish tumanida atom elektr stansiyasini qurish loyihasiga alohida e’tibor qaratildi. O‘quvchilar ushbu loyihaning tafsilotlarini amaldagi maket orqali o‘rgandilar.

Uchrashuvning eng muhim jihatlaridan biri ishtirokchilarning jonli fikr-mulohazalari bo‘ldi. Ularning ko‘pchiligi atom energetikasiga nisbatan avvalgi qarashlarini qayta ko‘rib chiqishdi.

“Bugungi ekskursiyadan so‘ng xayolimda butunlay yo‘qolgan uydirmalardan biri radiatsiya xavfsizligi bilan bog‘liq bo‘ldi. Bolaligimdan AES atrof-muhitga katta zarar yetkazadi, tuproq, havo va suv kuchli ifloslanadi, shu sababli stansiyalar yaqinida aholi yashaydigan hududlar bo‘lmasligi kerak, deb o‘ylardim. Bugun esa fikrim o‘zgardi: atmosferaga chiqaradigan zarari minimal va belgilangan me’yorlardan oshib ketmas ekan”, – deya taassurotlari bilan o‘rtoqlashdi Kirill Bezdeliga.

Jamoaviy bellashuvlardan iborat interaktiv format nafaqat auditoriyaning qiziqishini baholash, balki o‘quvchilarning murakkab texnologik jarayonlarni tahlil qilish qobiliyatini sinash imkonini ham berdi.

Mavzularning mazmunli va qiziqarli tarzda taqdim etilishi, shuningdek, ishlanmalar va texnologiyalarning namoyishi ishtirokchilarni kelajak kasbini tanlash haqida jiddiy o‘ylashga undadi.

“

Ekskursiya menda ajoyib taassurot qoldirdi, juda ko‘p yangi ma’lumotlarga ega bo‘ldik. Bizga tinch yo‘lidagi atomdan foydalanish yo‘nalishlari haqida gapirib berishdi va ular orasida, masalan, qishloq xo‘jaligi sohasini ko‘rish men uchun kutilmagan bo‘ldi. Mutaxassislar maketlar namoyishi orqali oddiy va tushunarli tilda tushuntirib berishdi. Men bu sohaga jiddiy qiziqib qoldim va kelajakda bu yerga xodim sifatida qaytib kelishga umid qilaman

”, – dedi

Said’alo Akramov

.

Uchrashuvning alohida qismi sohaga oid oliy ma’lumot olish imkoniyatlariga bag‘ishlandi. O‘quvchilarga “MMFI” MTYAU Toshkent filialining ta’lim dasturlari taqdim etilib, qabul jarayonlari, kirish imtihonlari shartlari hamda kelgusida ishga joylashish istiqbollari batafsil tushuntirildi.

Kadrlar tayyorlashning o‘ziga xos jihatlari va yoshlar uchun maxsus loyihalar haqida “MMFI” MTYAU Toshkent filialining xalqaro hamkorlik bo‘limi boshlig‘i Abror Karomov so‘zlab berdi:

“

Bugun biz o‘quvchilar uchun universitetimiz taqdimotini o‘tkazib, ta’lim yo‘nalishlari haqida ma’lumot berdik. Ushbu yo‘nalishlarni tamomlagan bitiruvchilar kelgusida yadro energetikasi sohasida faoliyat yuritishlari mumkin. Asosiy o‘quv jarayonidan tashqari, filialimiz har yili yozgi va kuzgi maktablarni tashkil etadi. Ularda ishtirok etish sohaning o‘ziga xos jihatlarini chuqurroq o‘rganish, turli tanlovlarda o‘z kuchini sinab ko‘rish va hatto universitetimizga kirishda qo‘shimcha ball olish imkonini beradi

”.

Yuqori sinf o‘quvchilari uchun ushbu sessiya aniq yo‘nalish vazifasini o‘tadi: yuqori texnologiyali sohalar uchun mutaxassislarni tayyorlash erta bosqichdan maqsadli tayyorgarlikni talab qiladi, tizimli kasbga yo‘naltirish esa kelajakdagi muhandislik yoki ilmiy faoliyat yo‘lini tanlashga yordam beradi.

Ekskursiyadan ko‘proq fotosuratlarni bu yerda tomosha qiling 📸

O‘zbekiston Londondagi Butunjahon yadro simpoziumida integratsiyalashgan AES modelini taqdim etdi
 
“O‘zatom” agentligi delegatsiyasining joriy yil 10–11-sentabr kunlari Londonga qilgan amaliy tashrifi yakunlariga ko‘ra, O‘zbekiston Respublikasi xalqaro yadro hamjamiyatiga atom energetikasini rivojlantirish bo‘yicha o‘z yondashuvini taqdim qildi.

Butunjahon yadro assotsiatsiyasining (WNA) 51-Butunjahon yadro simpoziumida “Yadro energetikasiga yangi yo‘llar” mavzusidagi sessiya doirasida dunyodagi birinchi integratsiyalashgan AES loyihasini amalga oshirish tajribasi e’lon qilindi. Mazkur loyiha katta quvvatli VVER-1000 energobloklari va kichik quvvatli RITM-200N reaktorlarini o‘zida mujassam etgan bo‘lib, O‘zbekiston Respublikasi Prezidentining mamlakat energetika xavfsizligini mustahkamlashga qaratilgan strategik islohotlari doirasida amalga oshirilmoqda.

Sessiya ishtirokchilari O‘zbekiston modeliga ijobiy baho berdilar hamda sohaning izchil institutsional qurilishi, uzoq muddatli rejalashtirish, me’yoriy va infratuzilmaviy bazani shakllantirish, xalqaro ekspertizani jalb etish jarayonlarini alohida qayd etdilar.

Ruanda Atom energiyasi kengashi raisi, Ruanda Prezidentining maslahatchisi Lassina Zerbo O‘zbekiston tajribasini rivojlanayotgan davlatlar uchun ibratli ekanini ta’kidlab, “O‘zatom” agentligining atom sohasidagi yagona muvofiqlashtiruvchi sifatidagi rolini alohida e’tirof etdi.  Shu tariqa, simpozium nafaqat milliy dastur taqdimoti uchun maydon bo‘libgina qolmay, balki O‘zbekiston yondashuvi professional hamjamiyat tomonidan tizimli va uzoq muddatli rivojlanishga yo‘naltirilgan deya baholanayotganining amaliy tasdig‘i ham bo‘ldi.
 
Bu sa’y-harakatlarning mantiqiy davomi sifatida asosiy xalqaro hamkorlar bilan umumiy munozara shaklida emas, balki hamkorlikning aniq yo‘nalishlari borasida ikki tomonlama uchrashuvlar o‘tkazildi. Simpozium doirasida xalqaro hamjamiyatning O‘zbekiston dasturiga bo‘lgan qiziqishi ikki tomonlama muzokaralarga aylanib ketdi.

Fransiyaning “Orano” kompaniyasi rahbariyati bilan yadro yoqilg‘isi siklidagi hamkorlik hamda ishlatilgan yadro yoqilg‘isi bilan muomala qilish yondashuvlari muhokama qilindi. Tomonlar maslahatlashuvlarni davom ettirishga va o‘zbekistonlik mutaxassislarning Fransiyadagi sohaviy obyektlarga tashrifini tashkil etishga kelishib oldilar.

WNA va Butunjahon yadro universiteti bosh direktori bilan o‘tkazilgan uchrashuvda umumiy e’tirofdan aniq amaliy hamkorlik mexanizmlariga o‘tish tamoyili davom ettirildi. O‘zbekistonning assotsiatsiyaga to‘laqonli a’zo bo‘lish istiqbollari, Markaziy Osiyodagi mintaqaviy hamkorlik va ta’lim dasturlari ko‘rib chiqildi. O‘zbekiston universitet tadbirlarini o‘tkazishga nomzod mamlakatlar qatoriga kiritildi.

Tashrifning texnologik yo‘nalishini AtkinsRéalis kompaniyasi bilan o‘tkazilgan muzokaralar to‘ldirdi: tomonlar CANDU reaktorlarining imkoniyatlarini o‘rganishga va ularni O‘zbekiston Respublikasida qo‘llashning maqsadga muvofiqligini baholashga kelishib oldilar.

Dastur Ruanda atom sohasi rahbariyati uchrashuvi bilan yakunlandi, unda tomonlar tajriba almashish va qo‘shma tanishtiruv tadbirlarini o‘tkazishdan o‘zaro manfaatdor ekanliklarini tasdiqladilar.

Simpoziumning ochiq qismi va uning doirasidagi muzokaralar yagona maqsadga xizmat qildi: O‘zbekiston nafaqat o‘zining atom energetikasi modelini taqdim etdi, balki xalqaro hamjamiyat e’tiborini yoqilg‘i sikli, WNAga a’zolik, ta’lim dasturlari hamda yangi hamkorlar bilan tajriba almashish kabi aniq amaliy yo‘nalishlarga qarata oldi.

Facebookdagi yangi sahifamizga obuna bo‘ling