Harbiy xavfsizlik va mudofaa universitetining Harbiy aviatsiya instituti hamda Qashqadaryo viloyati “Kelajak” markazi o‘rtasida yoshlar bilan ishlash yo‘nalishidagi hamkorlikni yanada mustahkamlash maqsadida memorandum imzolandi.

Mazkur memorandum doirasida yoshlarning tarbiyasi va kelajagini ta’minlash, ularni kasb-hunarga yo‘naltirish, intellektual salohiyatini oshirish, ijodiy va ilmiy faoliyatini qo‘llab-quvvatlash hamda vatanparvarlik ruhida tarbiyalashga qaratilgan qator loyihalarni amalga oshirish belgilandi.

Tadbir doirasida yoshlar aviatsiya sohasi, amaliy mashg‘ulotlar, zamonaviy texnika va kasbiy faoliyatning o‘ziga xos jihatlari bilan yaqindan tanishdi.

Mazkur hamkorlik kelgusida yoshlarning bilim va ko‘nikmalarini rivojlantirish, ularning bo‘sh vaqtini mazmunli tashkil etish hamda kelajakda munosib kasb egallashiga ko‘maklashishga xizmat qiladi.

Tadbirda markaz tarbiyalanuvchilariga bayram sovg‘alari topshirilib, Institut boshlig‘ining tabrigi yetkazildi. Harbiy chiqishlar, vatanparvarlik kuy-qo‘shiqlari va badiiy dasturlar bolajonlarga ko‘tarinki kayfiyat ulashdi. Tadbir mehr-oqibat, insonparvarlik va shukronalik tuyg‘ularini mustahkamlashga xizmat qildi.