⚽️Ekspert hakamlar guruhi tomonidan “Paxtakor” — “Neftchi” uchrashuvidagi bahsli vaziyatlar boʻyicha maʼlumot

Superliganing 21-turidan oʻrin olgan “Paxtakor” — “Neftchi” jamoalari oʻrtasidagi uchrashuvda bir nechta bahsli holatlar qayd etildi.

Oʻyinning 23-daqiqasida “Paxtakor” jamoasi futbolchisi toʻp uchun kurashmayotgan vaziyatda raqib oʻyinchisining yuziga ataylab, tirsagi bilan tajovuzkor tarzda zarba berdi. Bosh hakam ushbu holat bo'yicha VAR hakami yordamida toʻgʻri qaror chiqarib, qoida buzgan futbolchiga qizil kartochka koʻrsatgan holda maydondan chetlatdi.

Ikkinchi holat oʻyinning 45+10-daqiqasida sodir boʻldi. Unda “Neftchi” futbolchisi toʻpga egalik qilish uchun kurashayotgan, toʻpga oʻynayotgan, raqibi tomoniga qoʻlini qoʻyayotgan paytda “Paxtakor” futbolchisining yuziga tegib ketdi. Ushbu vaziyat uchun bosh hakam “Neftchi” futbolchisiga sariq kartochka koʻrsatmay notog'ri qaror qabul qildi.

Oʻyinning 45-daqiqasida “Paxtakor” futbolchisiga “Neftchi” himoyachisi tomonidan jarima maydonchasi ichida qoʻpollik ishlatildi. Bu vaziyatda “Neftchi” futbolchisi raqibi boshqa yoʻnalishda harakatlanayotganiga qaramay, oyogʻini koʻtarib, qoʻpol tarzda harakat qildi va “Paxtakor” futbolchisining yiqilishiga sabab boʻldi. Bosh hakam bu holatda toʻgʻri qaror chiqarib, “Neftchi” darvozasiga penalti belgiladi.

⚽️ t.me/uzfhm

⚽️Hakamlar akademiyasining navbatdagi moduli yakunlandi

Oʻzbekiston futbol assotsiatsiyasi tasarrufidagi Hakamlar akademiyasi talabalari uchun navbatdagi modul mashgʻulotlari muvaffaqiyatli yakunlandi. Ushbu bosqich Namangan shahrida oʻtkazilib, yosh hakamlar nafaqat nazariy bilimlarni mustahkamladi, balki amaliy tajribani ham boyitdi.

Modul doirasida akademiya tarbiyalanuvchilari futbol maktablari oʻrtasidagi Oʻzbekiston U-17 chempionati uchrashuvlarida hakamlik qildi va oʻz tajribasini oshirdi. Oʻyinlar davomida hakamlik faoliyati Maʼmur Saidkasimov va Aleksandr Popov kabi tajribali mutaxassislar tomonidan kuzatib borildi.

Har kungi bahslardan soʻng instruktorlar va tajribali hakamlar ishtirokida oʻyinlarga bagʻishlangan hakamlik tahlili boʻyicha muhokama tashkil qilindi. Unda Maʼmur Saidkasimov, Aleksandr Popov, Gʻayrat Joʻrayev hamda Ibrohim Ismoilov oʻz taklif va tavsiyalarini bildirib, yosh hakamlarning kelgusi faoliyati uchun foydali tushunchalar berdi.

OʻFA va Hakamlar markazi tomonidan akademiya tinglovchilari uchun barcha sharoitlar yaratilgan boʻlib, ular mehmonxona va sifatli oziq-ovqat bilan toʻliq taʼminlandi.

Mazkur modul Hakamlar akademiyasi dasturining muhim bosqichlaridan biri boʻlib, yosh hakamlarning xalqaro standartlarga mos, yetuk mutaxassis sifatida shakllanishida katta oʻrin tutadi.

⚽️ t.me/uzfhm