⚽️Hakamlar akademiyasining navbatdagi moduli yakunlandi

Oʻzbekiston futbol assotsiatsiyasi tasarrufidagi Hakamlar akademiyasi talabalari uchun navbatdagi modul mashgʻulotlari muvaffaqiyatli yakunlandi. Ushbu bosqich Namangan shahrida oʻtkazilib, yosh hakamlar nafaqat nazariy bilimlarni mustahkamladi, balki amaliy tajribani ham boyitdi.

Modul doirasida akademiya tarbiyalanuvchilari futbol maktablari oʻrtasidagi Oʻzbekiston U-17 chempionati uchrashuvlarida hakamlik qildi va oʻz tajribasini oshirdi. Oʻyinlar davomida hakamlik faoliyati Maʼmur Saidkasimov va Aleksandr Popov kabi tajribali mutaxassislar tomonidan kuzatib borildi.

Har kungi bahslardan soʻng instruktorlar va tajribali hakamlar ishtirokida oʻyinlarga bagʻishlangan hakamlik tahlili boʻyicha muhokama tashkil qilindi. Unda Maʼmur Saidkasimov, Aleksandr Popov, Gʻayrat Joʻrayev hamda Ibrohim Ismoilov oʻz taklif va tavsiyalarini bildirib, yosh hakamlarning kelgusi faoliyati uchun foydali tushunchalar berdi.

OʻFA va Hakamlar markazi tomonidan akademiya tinglovchilari uchun barcha sharoitlar yaratilgan boʻlib, ular mehmonxona va sifatli oziq-ovqat bilan toʻliq taʼminlandi.

Mazkur modul Hakamlar akademiyasi dasturining muhim bosqichlaridan biri boʻlib, yosh hakamlarning xalqaro standartlarga mos, yetuk mutaxassis sifatida shakllanishida katta oʻrin tutadi.

⚽️ t.me/uzfhm

🖥Markazlashgan VAR tizimi O‘zbekistonda ilk bor masofadan turib sinovdan o‘tkazildi

Milliy futbol markazida joylashgan VAR markazida ilk bor masofadan turib ishlash tizimi sinovdan o‘tkazildi. Unda VAR va AVAR hakamlari instrukturlar bilan birgalikda Toshkentdan turib, Surxandaryoda bo‘lib o‘tgan Superliga 22-turi doirasidagi “Surxon” — “Mash’al” uchrashuvi bosh hakamiga bevosita yordam ko‘rsatdi.

Bu tajriba orqali markazlashgan VAR tizimi real vaqt rejimida sinab ko‘rildi va o‘yindagi bahsli vaziyatlar Toshkentdagi markazdan turib boshqarildi. Mazkur sinov kelgusida O‘zbekiston futbolida zamonaviy texnologiyalarni yanada samarali qo‘llash yo‘lida muhim qadam bo‘ldi.

⚽️ t.me/uzfhm