⚽️ Superliga 1-tur uchrashuvlari tahlil qilindi.

Superliga 1-turi doirasida o‘tkazilgan uchrashuvlar yuzasidan Valentin Kovalenko va Jahongir Saidovlar boshchiligida onlayn tahlil yig‘ilishi tashkil etildi. Zoom platformasi orqali o‘tgan yig‘ilishda hakamlar hamda hakamlar nazoratchilari ishtirok etdi.

Tahlil davomida hakamlarning maydondagi joylashuvi va to‘g‘ri pozitsiya tanlashi, yakka kurashlardagi qarorlar, jarima maydoni ichidagi murakkab epizodlar batafsil ko‘rib chiqildi. Ayrim uchrashuvlarda VAR epizodlarini ko‘rib chiqishga ortiqcha vaqt sarflangani qayd etilib, bu holat o‘yin dinamikasiga salbiy ta’sir ko‘rsatishi ta’kidlandi.

Tahlil jarayoni avvalida O‘zbekiston futbol assotsiatsiyasi birinchi vitse-prezidenti Ravshan Irmatov ham ishtirok etib qator muhim masalalar yuzasidan fikr bildirdi:

“Mavsum oralig‘ida olib borilayotgan tayyorgarlik ishlari yagona maqsadga qaratilgan — maydonda sifatli va barqaror hakamlikni ta’minlash. Zamonaviy futbolda texnologiyalar keng qo‘llanilmoqda, har bir epizod batafsil tahlil qilinadi. Shu bois xatolarga o‘rin yo‘q.

Bugun O‘zbekiston futboli tarixiy bosqich oldida turibdi. Oldimizda Jahon chempionati turibdi va biz bu musobaqada munosib ishtirok etishni maqsad qilganmiz. Buning uchun milliy chempionatimiz tempini oshirishimiz, tezkor va shiddatli futbolni shakllantirishimiz zarur. Ichki chempionatdagi sur’at va talab yuqori bo‘lmasa, xalqaro maydonda raqobat qilish oson bo‘lmaydi. Jahon chempionatida futbol butunlay boshqa tezlik va bosimda kechadi — biz bunga tayyor bo‘lishimiz kerak.

Hakam futbolning sifatini oshirishga xizmat qilishi, uning imijini himoya qilishi hamda o‘yin "Fair play" tamoyillari asosida o‘tishini ta’minlashi zarur. Eng muhim vazifalardan biri — futbolchilar salomatligini asrash. Buning uchun hakam vaziyatni chuqur his eta olishi, o‘yinni to‘g‘ri boshqarishi, futbolchilar bilan to‘g‘ri muloqot olib borishi va profilaktik choralarni o‘z vaqtida qo‘llashi lozim.

Ayrim uchrashuvlarda turli ayyorlik va simulyatsiya holatlariga urinishlar kuzatildi. Futbolni chuqur tushunadigan hakam bunday vaziyatlarni tezda anglay olishi, o‘yinchining maqsadini to‘g‘ri baholashi kerak. Birinchi turda penalti ishlashga qaratilgan urinishlar bo‘ldi, biroq hakamlar to‘g‘ri qaror qabul qildi. Muhimi, hakamlarimiz simulyatsiyalarga uchmayapti — bu ijobiy ko‘rsatkich.

Shu bilan birga, ayrim holatlarda o‘yin vaqtining ortiqcha cho‘zilishi kuzatildi. Har bir asossiz to‘xtalish uchrashuv dinamikasiga salbiy ta’sir ko‘rsatadi va o‘yinni avvalgi tempiga qaytarish uchun vaqt talab etiladi. O‘yin sur’ati va dinamikasini saqlash — ustuvor vazifalardan biri bo‘lishi kerak.

Hakamlar doimiy ravishda o‘z ustida ishlashi shart. Yuqori saviyadagi hakamlik — yuqori sifatli futbol garovidir. Agar hakam talab darajasida ishlasa, o‘yin sifati ham shunga mos bo‘ladi. Shuningdek, hakamda o‘ziga bo‘lgan ishonch va qat’iyat yetarli darajada bo‘lishi zarur”, — dedi Ravshan Irmatov.

Yig‘ilish yakunida hakamlik sifatini oshirish, yagona talqin va yondashuvni ta’minlash hamda uchrashuvlar tempini barqaror yuqori darajada ushlab turish bo‘yicha tegishli tavsiyalar berildi.

⚽️ t.me/uzfhm

⚽️Superliga-2026: 3-tur uchrashuvlari rasmiylari bilan tanishing.

Superliganing 3-tur o‘yinlarini boshqarib boruvchi hakamlar jamoalari va komissarlar tayinlandi.

🗓 Barcha o‘yinlar uchun tayinlovlar yuqoridagi grafikada ko‘rsatilgan.

⚽️ t.me/uzfhm

⚽️ Superliga 2-turi uchrashuvlari tahlil qilindi.

Superliga 2-turi doirasida o‘tkazilgan uchrashuvlar yuzasidan onlayn tahlil yig‘ilishi tashkil etildi. Yig‘ilish tajribali instruktorlar boshchiligida o‘tkazildi.

Zoom platformasi orqali tashkil etilgan yig‘ilishda Superliga o‘yinlarida faoliyat olib borgan hakamlar va hakamlar nazoratchilari ishtirok etdi.

Tahlil davomida hakamlarning maydondagi joylashuvi va to‘g‘ri pozitsiya tanlashi, yakka kurashlarda qabul qilingan qarorlar hamda jarima maydoni ichida yuzaga kelgan murakkab epizodlar batafsil ko‘rib chiqildi. Shuningdek, ayrim uchrashuvlarda VAR epizodlarini ko‘rib chiqish jarayoniga ortiqcha vaqt sarflangani qayd etilib, bu holat o‘yin dinamikasiga salbiy ta’sir ko‘rsatishi mumkinligi ta’kidlandi.

Tahlil jarayonida O‘zbekiston futbol assotsiatsiyasi birinchi vitse-prezidenti Ravshan Irmatov ham ishtirok etib, hakamlik sifatini yanada oshirish, qarorlar qabul qilishda aniqlik va tezkorlikni ta’minlash hamda o‘yin tempini yuqori darajada saqlash yuzasidan qator muhim fikr va tavsiyalar bildirdi.

Yig‘ilish yakunida hakamlik sifatini oshirish, yagona talqin va yondashuvni ta’minlash, shuningdek, uchrashuvlar tempini barqaror yuqori darajada ushlab turish bo‘yicha tegishli tavsiyalar berildi.

⚽️ t.me/uzfhm

Futzal Oliy ligasi 8-tur va 1-liga 3-tur uchrashuvlari tahlil qilindi.

Zoom platformasi orqali O‘zbekiston futzal Oliy ligasining 8-turi va 1-liganing 3-tur doirasida o‘tkazilgan uchrashuvlar yuzasidan navbatdagi tahlil yig‘ilishi tashkil etildi.

Unda tajribali instruktorlar ishtirok etib, o‘yinlarda qayd etilgan hakamlik qarorlari, bahsli vaziyatlar va uchrashuvlarning muhim epizodlari atroflicha ko‘rib chiqildi. Onlayn tarzda o‘tgan yig‘ilishda futzal hakamlari ham qatnashib, o‘yinlar davomida yuzaga kelgan holatlar bo‘yicha fikr-mulohazalar bildirildi.

Tahlil jarayonida hakamlik sifatini yanada oshirish, uchrashuvlarda yagona talqin va qarorlar qabul qilish masalalariga alohida e’tibor qaratildi.

⚽️ t.me/uzfhm

⚽️ Ayol hakamlar yangi mavsum oldidan o‘quv-mashg‘ulot yig‘inini boshladi.

Yangi futbol mavsumi oldidan ayol hakamlar uchun o‘quv-mashg‘ulot yig‘ini tashkil etildi. Mashg‘ulotlar Milliy futbol markazida bo‘lib o‘tmoqda.

Mazkur yig‘inda Ayollar Oliy ligasi hamda Birinchi liga uchrashuvlarida faoliyat yuritadigan bosh hakamlar va yordamchi hakamlar ishtirok etmoqda.

Dastur doirasida hakamlarning jismoniy tayyorgarligini oshirish, maydondagi qaror qabul qilish tezligini yaxshilash hamda yangi mavsumga puxta tayyorgarlik ko‘rish maqsadida turli nazariy va amaliy mashg‘ulotlar olib borilmoqda.

O‘quv-mashg‘ulot yig‘ini davomida hakamlarning jismoniy holati va tayyorgarlik darajasi maxsus testlar orqali baholanadi.

⚽️ t.me/uzfhm