📋 O‘zbek futboliga munosib hissa qo‘shgan mutaxassis Baxtiyor Tagayev 60 yoshni qarshi oldi.

U futbolchilik faoliyatini 1983-yilda Xiva shahrining “Xiva” jamoasida boshlagan. Keyinchalik “Selmasheves” (Chirchiq), “Kosonsoy”, “Do‘stlik”, “Navbahor” hamda “Sergeli” kabi jamoalar safida to‘p surib, o‘zbek futbolida munosib iz qoldirgan.

Ayniqsa, "Navbahor" jamoasi safidagi faoliyati davomida katta yutuqlarga erishgan. Jumladan, 1995-yilda O‘zbekiston kubogi sohibi, 1996-yilda esa O‘zbekiston chempioni bo‘lgan.

2000-yilda hakamlik faoliyatini boshlagan Baxtiyor Tagayev 2011-yilgacha birinchi va oliy liga uchrashuvlarida faoliyat olib bordi. Shuningdek, 2006-2010-yillar davomida FIFA hakami yordamchisi (assistent) sifatida xalqaro maydonlarda ham yurtimiz sharafini munosib himoya qilgan.

Futzal yo‘nalishida ham samarali faoliyat olib borgan mutaxassis 2003-yilda Ardus jamoasi safida o‘ynagan, 2007-2013-yillarda esa ushbu jamoada murabbiy sifatida ishlagan. Uning boshchiligida “Ardus” 2010-2012-yillarda ketma-ket O‘zbekiston chempionligini qo‘lga kiritgan.

2014-2017-yillarda “Olmaliq” mini-futbol jamoasida murabbiylik qilib, 2015 va 2016-yillarda O‘zbekiston chempionligini qo‘lga kiritgan.

Hozirgi vaqtda u O‘zbekiston futbol assotsiatsiyasida hakamlar fitnes instruktori sifatida faoliyat yuritmoqda. Shuningdek, 2025-yildan boshlab O‘zFHMda futzal hakamlari bilan ishlash bo‘yicha mutaxassis va instruktor sifatida mehnat qilib kelmoqda.

Tadbir davomida uning o‘zbek futboli rivojiga qo‘shgan munosib hissasi alohida e’tirof etildi. Yubiley munosabati bilan unga esdalik sovg‘alari topshirildi.

⚽️ t.me/uzfhm

📋 Hakamlar akademiyasining 3-moduli Namangan viloyatida davom etmoqda.

Hakamlar akademiyasi tinglovchilari O‘FA tasarrufidagi futbol maktablarining 2009-yilda tug‘ilgan futbolchilar o‘rtasidagi O‘zbekiston chempionati uchrashuvlarida hakamlik qilib, amaliy tajriba va ko‘nikmalarini mustahkamlab borishmoqda.

Shuningdek, uchrashuvlardan so‘ng yo‘l qo‘yilgan xato va kamchiliklar mutaxassislar tomonidan aniq vaziyatlar asosida tahlil qilinmoqda. Turli holatlar video lavhalar orqali namoyish etilib, har bir epizod yuzasidan batafsil tushuntirish va tavsiyalar berilmoqda.

Muhokamalar davomida yosh hakamlarga kelgusida bunday xato va kamchiliklarga yo‘l qo‘ymaslik, qaror qabul qilishda yanada e’tiborli bo‘lish hamda hakamlik saviyasini muntazam oshirib borish zarurligi alohida ta’kidlanmoqda.

⚽️ t.me/uzfhm

📋 Oʻzbekistonlik hakamlar U-17 Osiyo kubogining navbatdagi bahsiga tayinlov oldi.

Xabaringiz bor, 5-22-may kunlari Saudiya Arabistonida U-17 Osiyo kubogi boʻlib oʻtadi. Ushbu musobaqaning ilk turidan oʻrin olgan Saudiya Arabistoni va Myanma jamoalari oʻrtasidagi bahsni Akobirxoʻja Shukurullayev boshchiligidagi hakamlar jamoasi muvaffaqiyatli boshqarib bordi.

Endi Shukurullayev jamoasi 2-turdan oʻrin olgan Birlashgan Arab Amirliklari va Yaman jamoalari oʻrtasidagi bahsni boshqarib boradi.

⚽️ Bosh hakam: Akobirxoʻja Shukurullayev
⚽️ Yordamchi hakamlar: Alisher Usmonov, Islom Azimov

⚽️ t.me/uzfhm

📋 Hakamlar akademiyasi 3-modul oʻquv jarayoni davom etmoqda.

Akademiya tinglovchilari 3-modul oʻquv jarayonida Namangan viloyati maydonlarida oʻtkazilayotgan OʻFA tasarrufidagi futbol maktablari U17 (2009) oʻrtasidagi Oʻzbekiston chempionati uchrashuvlarida hakamlik qilib, amaliy tajribalarini oshirmoqdalar.

Jumladan, Namangan tumanidagi Toshbuloq stadioni hamda Yangi Namangan tumanidagi Dinamo stadionida boʻlib oʻtgan 4-tur uchrashuvlaridan soʻng yosh hakamlarning faoliyati tahlil qilindi.
Tahlil jarayonida uchrashuvlarda yoʻl qoʻyilgan xato va kamchiliklar video lavhalar asosida muhokama etilib, hakamlik mahoratini yanada oshirish boʻyicha zarur koʻrsatmalar berildi.

Shuningdek, akademiya tarbiyalanuvchilariga Superliga hakamlari tomonidan amaliy koʻrsatmalar va tushuntirishlar berildi.
Jumladan, Temur Toʻxtasinov, Gʻayrat Joʻrayev, Anvar Marajabov, Maksim Nexochin, Ziyodulla Abdurahmonov va Xushnud Suyunboyevlar tomonidan yosh hakamlarga oʻyin qoidalarini toʻgʻri qoʻllash, maydondagi vaziyatlarni baholash hamda hakamlik madaniyati yuzasidan tavsiyalar berildi.

⚽️ t.me/uzfhm

📋 FIFAning jismoniy tayyorgarlik bo‘yicha murabbiylar uchun “Fitnes instruktorlari” o‘quv seminari yakunlandi.

Milliy futbol markazida FIFA instruktori Yuliya Tarasova boshchiligida tashkil etilgan seminar davomida murabbiylarga futbolchilarning jismoniy tayyorgarligini oshirishga qaratilgan zamonaviy nazariy va amaliy bilimlar taqdim etildi.

6 kun davom etgan o‘quv jarayonida ishtirokchilar fitnes yo‘nalishidagi yangi metodikalar, mashg‘ulotlarni rejalashtirish va futbolchilarning funksional holatini yaxshilash bo‘yicha zarur ko‘nikmalarga ega bo‘lishdi.

⚽️ t.me/uzfhm