📋 Superliga hakamlari yozgi o‘quv-mashg‘ulot yig‘inida ishtirok etmoqda.

Superliga hakamlari ishtirokida navbatdagi yozgi o‘quv-mashg‘ulot yig‘ini davom etmoqda.

Yig‘in dasturiga muvofiq, hakamlar jismoniy tayyorgarlik darajasini aniqlash maqsadida belgilangan test sinovlarini topshirdi. Shuningdek, psixolog ishtirokida mashg‘ulotlar o‘tkazilib, uchrashuvlar davomida ruhiy barqarorlikni saqlash, bosim ostida to‘g‘ri qaror qabul qilish va stressni samarali boshqarish bo‘yicha tavsiyalar berildi.

Bundan tashqari, hakamlar nazariy hamda amaliy mashg‘ulotlarda ishtirok etib, o‘yin qoidalari, turli o‘yin vaziyatlarini tahlil qilish va hakamlik amaliyotiga oid muhim masalalar yuzasidan o‘z bilim va ko‘nikmalarini mustahkamlamoqda.

Yozgi o‘quv-mashg‘ulot yig‘ini 9-iyulga qadar davom etadi.

⚽️ UzFHM | 🌟 Euroasia Insurance

📋 Superliga davom ettirilishi oldidan klublar uchun maxsus seminarlar bo'lib o'tmoqda.

O‘zbekiston futbol hakamlari markazi tajribali instruktorlari tomonidan futbolchilar va murabbiylar shtabiga o‘yin qoidalariga kiritilgan so‘nggi o‘zgartirishlar, o‘yin tempini oshirishga qaratilgan yangiliklar hamda xalqaro musobaqalarda qo‘llanilayotgan zamonaviy hakamlik yondashuvlari yuzasidan batafsil tushuntirishlar berilmoqda.

Shuningdek, mazkur qoida va o‘zgartirishlarning kelgusida Superliga, Proliga, Birinchi liga hamda ayollar Oliy ligasi uchrashuvlarida ham amaliyotga tatbiq etilishi, ularni qo‘llash tartibi va mazmun-mohiyati ishtirokchilarga batafsil tushuntirilmoqda.

Xususan, "Qizilqum", "Paxtakor", “Xorazm” (U-21), “Buxoro” (U-21, U-19, qizlar) jamoalarida mazkur seminarlar o‘tkazildi. Belgilangan reja asosida barcha professional klublarda ham shunday mashg‘ulotlar tashkil etiladi.

Mazkur seminarlar o‘yin qoidalarining yagona talqinda qo‘llanilishini ta’minlash, futbol ishtirokchilarining qoidalarga oid bilimlarini mustahkamlash hamda Superliga, Proliga, Birinchi liga va Ayollar oliy ligasi uchrashuvlarini yuqori saviyada tashkil etishga xizmat qiladi.

⚽️ UzFHM | 🌟 Euroasia Insurance