📋 Milliy futbol markazida bo'lib o'tgan ayol hakamlar uchun tashkil etilgan FIFA seminaridan videolavha.

⚽️ UzFHM | 🌟 Euroasia Insurance

🤝 Ilk bor OFKning Elit hakamlar seminari O‘zbekistonda bo‘lib o‘tadi.

3–7-avgust kunlari Milliy futbol markazida OFKning Elit hakamlar seminari (G‘arb mintaqasi) bo’lib o’tadi. Mazkur nufuzli seminar Osiyo futbol konfederatsiyasining elit toifadagi hakamlari uchun o‘tkaziladigan eng muhim o‘quv tadbirlaridan biri hisoblanadi.

Seminarda OFK Hakamlar departamenti vakillari, Osiyoning 92 nafar elit toifadagi hakami, OFKning tajribali instruktorlari hamda hakamlar tayyorlash yo‘nalishidagi yetakchi mutaxassislar ishtirok etadi.

Besh kun davom etadigan seminar doirasida zamonaviy hakamlik talablari, o‘yin vaziyatlarini tahlil qilish, qarorlar qabul qilish sifati, maydondagi boshqaruv, jismoniy tayyorgarlik va VAR tizimiga oid eng so‘nggi yo‘riqnomalar bo‘yicha nazariy hamda amaliy mashg‘ulotlar tashkil etiladi.

Shuningdek, O‘zbekiston vakillari — tajribali instruktori Valentin Kovalenko va FIFA hakami Ilgiz Tantashev mazkur seminarning Sharq mintaqasi uchun Yaponiyada tashkil etiladigan bosqichida ham faoliyat olib boradi.

⚽️ UzFHM | 🌟 Euroasia Insurance

📋 Superliganing 14-tur uchrashuvlari tahlili davomida ko‘rib chiqilgan vaziyatlar.

“Bunyodkor” — “Paxtakor” uchrashuvining 87-daqiqasida “Bunyodkor” himoyachisi raqib hujumchisiga nisbatan qoida buzib, hujumni to‘xtatdi.

Hujumchi to‘pni tezlikda kelayotgan ikkinchi himoyachi tomonga yo‘naltirdi va himoyachiga to‘p uchun kurashish imkoniyatini yaratdi. Shu sababli ushbu vaziyat yaqqol gol urish imkoniyati emas, balki istiqbolli hujumni to‘xtatish sifatida baholandi. Hakamlar jamoasining futbolchini sariq kartochka bilan ogohlantirish qarori to‘g‘ri bo‘ldi.

OKMK — “Mash’al” uchrashuvining 65-daqiqasida “Mash’al” himoyachisi to‘pni yo‘qotganidan so‘ng raqib hujumchisini ushlab qolib, hujumni to‘xtatdi. Hujumchi oldida katta bo‘sh hudud mavjud edi hamda himoyachilar uning ortida qolganligi sababli ushbu vaziyat yaqqol gol urish imkoniyatidan mahrum qilish sifatida baholandi. Hakamlar jamoasining futbolchini maydondan chetlatish qarori to‘g‘ri bo‘ldi.

“Andijon” — “Buxoro” uchrashuvining 62-daqiqasida jarima maydoni ichida to‘p “Andijon” jamoasi himoyachisining qo‘liga tegdi. Himoyachining qo‘li tabiiy holatda bo‘lgan va qo‘lning to‘p tomon harakati kuzatilmagan. Shu sababli hakamlar jamoasining o‘yinni davom ettirish qarori to‘g‘ri bo‘ldi.

“Lokomotiv” — “So‘g‘diyona” uchrashuvining 56-daqiqasida “So‘g‘diyona” himoyachisi o‘z jarima maydoni ichida to‘p uchun kurashda kech qoldi va raqib hujumchisining oyog‘iga zarba berib, uni to‘xtatdi. Hakamlar jamoasi ushbu vaziyatda to‘g‘ri ravishda penalti belgiladi.

“Lokomotiv” — “So‘g‘diyona” uchrashuvining 62-daqiqasida “So‘g‘diyona” himoyachisi o‘z jarima maydoni ichida to‘pni qo‘li bilan to‘xtatdi. Himoyachining qo‘li to‘p yo‘nalishi tomon harakat qilgani aniq kuzatildi. Hakamlar jamoasi ushbu vaziyatda to‘g‘ri penalti belgiladi.

“Nasaf” — “Qizilqum” uchrashuvining 19-daqiqasida to‘p uchun kurashdan so‘ng “Qizilqum” himoyachisi “Nasaf” futbolchisini yelkasi bilan turtib o‘tdi. Ushbu vaziyatga qadar mazkur ikki futbolchi o‘rtasida ziddiyat yuzaga kelgani sababli yordamchi hakam bu harakatni zarba sifatida baholab, bosh hakamga “Qizilqum” futbolchisiga tajovuzkor xatti-harakati uchun qizil kartochka ko‘rsatishni tavsiya qildi. Biroq VAR aralashuvidan so‘ng bosh hakam qizil kartochkani bekor qildi va ushbu qaror to‘g‘ri bo‘ldi.

“Nasaf” — “Qizilqum” uchrashuvining 42-daqiqasida “Qizilqum” himoyachisi jarima maydoni ichida to‘pni qo‘li bilan o‘ynadi. Himoyachining qo‘li notabiiy holatda bo‘lib, to‘p yo‘nalishi tomon harakat qilgani kuzatildi. VAR aralashuvidan so‘ng hakamlar jamoasi penalti belgiladi va to‘g‘ri qaror qabul qildi.

“Neftchi” — “Navbahor” uchrashuvining 9-daqiqasida “Neftchi” futbolchisi to‘p uchun kurash davomida oyog‘ini baland ko‘tarib, to‘pga o‘ynadi va qo‘shimcha harakatlarsiz oyog‘ini tushirdi. To‘p uchun harakat qilgan “Navbahor” futbolchisi boshi bilan o‘ynamoqchi bo‘ldi, biroq kech qolib, raqib futbolchisi bilan to‘qnashdi. Ushbu vaziyatda “Neftchi” futbolchisi qo‘shimcha harakat qilmagani va ortiqcha kuch ishlatmagani sababli sportchiga xos bo‘lmagan harakati uchun to‘g‘ri ravishda sariq kartochka bilan ogohlantirildi.

“Dinamo” — “Qo‘qon-1912” uchrashuvining 25-daqiqasida “Qo‘qon-1912” himoyachisi o‘z jarima maydoni ichida to‘pni qo‘li bilan o‘ynadi. Futbolchining qo‘li notabiiy holatda bo‘lib, to‘p tomon harakat qilgani hamda tana kengligini notabiiy ravishda kengaytirgani kuzatildi. VAR aralashuvidan so‘ng ushbu vaziyatda to‘g‘ri penalti belgilandi.

⚽️ UzFHM | 🌟 Euroasia Insurance

📋 Bugun O‘zbekiston futbol hakamlari markazi instruktori va hakamlar inspektori Olim Abduvasilov o‘zining 50 yoshini qarshi oldi.

Olim Abduvasilov ko‘p yillar davomida O‘zbekiston chempionatida (Oliy liga) yordamchi hakam sifatida samarali faoliyat olib borib, mamlakat futbolida hakamlik tizimining rivojiga munosib hissa qo‘shgan.

Hakamlik faoliyatini yakunlagach, u hakamlar inspektori va instruktor sifatida o‘z faoliyatini davom ettirib, bugungi kunda yosh hakamlarni tayyorlash, ularning nazariy va amaliy bilimlarini oshirish hamda malakasini yuksaltirish yo‘lida samarali mehnat qilmoqda.

O‘zbekiston futbol hakamlari markazi jamoasi Olim Abduvasilovni samimiy tabriklab, mamlakatimiz futboli ravnaqi yo‘lidagi mas'uliyatli faoliyatida ulkan muvaffaqiyatlar tilaydi.

⚽️ UzFHM | 🌟 Euroasia Insurance

📋 🏟 Hakamlar akademiyasi tinglovchilari uchun tashkil etilgan o‘quv kursining 5-moduli davom etmoqda.

Mashg‘ulotlar tajribali instruktorlar rahbarligida olib borilmoqda. Tinglovchilar zamonaviy futbol qoidalari bo‘yicha nazariy bilimlarini mustahkamlash, o‘yin vaziyatlarini tahlil qilish hamda hakamlik faoliyatiga oid amaliy ko‘nikmalarini rivojlantirmoqda.

⚽️ UzFHM | 🌟 Euroasia Insurance