📋 Ekspert hakamlar guruhi xulosasi.

Superliga 18-turidan o‘rin olgan “Paxtakor” – “Surxon” uchrashuvining 90+4-daqiqasida “Paxtakor” jamoasi tomonidan gol urildi. Mazkur vaziyat VAR hakami tomonidan ko‘rib chiqildi. Shundan so‘ng bosh hakam VAR hakamining ma’lumotiga asosan golni bekor qilish to‘g‘risida qaror qabul qildi.

Ekspert hakamlar guruhi xulosasiga ko‘ra, mazkur vaziyatda VAR hakami xatoga yo‘l qo‘ygan. Ya’ni, VAR hakami bosh hakamni vaziyatni monitor orqali qayta ko‘rib chiqishga chaqirmagan va shu bilan VAR protokoli talablarini buzgan.

Natijada bosh hakam vaziyatni shaxsan monitor orqali ko‘rib qaror chiqmasdan, VAR hakamining ma’lumotiga asosan golni bekor qilgan.

Ravshan Abduvohidov VAR protokoli talablarini buzgani inobatga olinib mavsum yakuniga qadar VAR hakamligidan chetlatildi.

⚽️ UzFHM | 🌟 Euroasia Insurance

📋 Hakamlar qo‘mitasi qarori.

Superliganing 18-turidan o‘rin olgan “Paxtakor” – “Surxon” uchrashuvida yuzaga kelgan bahsli vaziyatda VAR hakamlik jarayonida yo‘l qo‘yilgan xato yuzasidan Hakamlar qo‘mitasi tomonidan qaror qabul qilindi.

Hakamlar qo‘mitasi qaroriga asosan, mazkur uchrashuv VAR hakami Ravshan Abduvohidov Superliganing 2026-yilgi mavsumi yakuniga qadar bosh hakam va VAR hakami sifatida hakamlik qilishdan chetlatildi.

⚽️ UzFHM | 🌟 Euroasia Insurance

📹 “Paxtakor” — “Surxon” uchrashuvidagi bahsli vaziyat yuzasidan tahlil.

Superliganing 18-turidan o‘rin olgan “Paxtakor” – “Surxon” uchrashuvining 90+4-daqiqasida urilgan gol VAR hakami tomonidan ko‘rib chiqilib, chiziq chizilgandan so‘ng “Paxtakor”ning 17-raqamli futbolchisi to‘p uzatilgan vaqtda ofsayd holatida bo‘lgani hamda to‘p uchun faol kurash olib borgani haqida bosh hakamga ma’lumot berildi. Shundan so‘ng bosh hakam VAR hakamining ma’lumotiga asosan golni bekor qildi.

Ushbu vaziyatda ofsayd chiziqlari texnik jihatdan to‘g‘ri chizilgan bo‘lib, VAR hakami avvaliga darvoza ortidagi kameradan to‘pga zarba berilgan paytni qayd qildi va ofsayd kamerasi orqali himoyachi va hujumchiga ofsayd chiziqlarini chizdi. Qayd etib o‘tish lozimki, ofsayd chiziqlari “Hawk-Eye” kompaniyasi texniklari va VAR operatorlari tomonidan har bir uchrashuvdan oldin kalibrovka va kameralar sinxronizatsiyasi sozlangandan so‘ng amalga oshiriladi.

Shuningdek, ushbu vaziyatda bosh hakam ofsayd holatida bo‘lgan “Paxtakor” futbolchisining darvozabon to‘pga o‘ynagan vaziyatda unga xalaqit qilgan yoki qilmaganini aniqlashi lozim edi.

Darvozabon to‘pga o‘ynagan vaziyatda u va hujumchi o‘rtasida qisqa masofa bo‘lib, darvozabonda havodan kelayotgan to‘pga erkin egalik qilish imkoniyati bo‘lmagan. Darvozabon to‘pga teginishi bilanoq ofsaydda bo‘lgan “Paxtakor” hujumchisi unga tezkorlik bilan bosim o‘tkazgan va u bilan to‘p uchun kurashga kirishgan. Shu sababli VAR hakamining ofsayd bo‘yicha qarori to‘g‘ri bo‘lgan.

Biroq, mazkur vaziyatda VAR hakami emas, maydondagi bosh hakam qaror qabul qilishi lozim edi. VAR hakamining bosh hakamni vaziyatni monitor orqali qayta ko‘rib chiqishga chaqirmagani VAR protokoli talablarining buzilishiga olib keldi.

Ravshan Abduvohidov gol bilan bog‘liq vaziyat uchun emas, balki VAR protokoli talablarini buzib, bosh hakamni vaziyatni monitor orqali qayta ko‘rib chiqishga chaqirmagani sababli Superliganing 2026-yilgi mavsumi yakuniga qadar bosh hakam va VAR hakami sifatida hakamlik qilishdan chetlatildi.

⚽️ UzFHM | 🌟 Euroasia Insurance