📋 Superliga 24-tur uchrashuvlari bo‘yicha hakamlar faoliyati tahlil qilindi.

Bugun O‘zbekiston futbol hakamlari markazi tomonidan Superliganing 24-tur uchrashuvlari tahlili o‘tkazildi. Zoom platformasi orqali tashkil etilgan yig‘ilishda hakamlar ishtirok etdi.

Tahlilni Farhod Abdullayev, Valentin Kovalenko hamda Jahongir Saidov olib bordi.

Tahlil davomida tur uchrashuvlarida yuzaga kelgan bahsli vaziyatlar atroflicha ko‘rib chiqildi. Har bir epizod bo‘yicha hakamlarning qarorlari tahlil qilinib, vaziyatlarni to‘g‘ri baholash va qoidalar asosida qaror qabul qilish yuzasidan tushuntirishlar berildi.

Shuningdek, kelgusidagi uchrashuvlarda yuzaga kelishi mumkin bo‘lgan vaziyatlarda to‘g‘ri qaror qabul qilish, hakamlik amaliyotida izchil va yagona yondashuvni ta’minlash bo‘yicha tavsiyalar bildirildi.

⚽️ UzFHM | 🌟 Euroasia Insurance

📋 O‘zbekiston futbol hakamlari markazi rahbariyati klublar bilan muloqotlarni davom ettirmoqda.

O‘zbekiston futbol hakamlari markazi tomonidan Superliga klublari bilan yo‘lga qo‘yilgan ochiq muloqotlarning navbatdagisi “Xorazm” jamoasi ishtirokida tashkil etildi. Uchrashuvdan ko‘zlangan maqsad hakamlik faoliyati yuzasidan fikr almashish, mavjud masalalarni birgalikda muhokama qilish va o‘zaro hamkorlikni yanada rivojlantirishdan iborat.

Tashrif davomida Markaz rahbariyati Xorazm viloyatida faoliyat yuritayotgan hakamlar bilan ham uchrashdi. Muloqotda hududdagi hakamlik tizimining holati, mutaxassislar duch kelayotgan masalalar va ularning takliflari ko‘rib chiqildi. Shuningdek, hakamlarning kasbiy tayyorgarligini kuchaytirish va faoliyat samaradorligini oshirish yuzasidan fikrlar bildirildi.

“Xorazm” jamoasi bilan uchrashuvda klub rahbariyati, murabbiylar shtabi, futbolchilar, fan-klub vakillari hamda mas’ul xodimlar qatnashdi. Ochiq suhbat davomida musobaqalar jarayonida kuzatilgan bahsli holatlar, hakamlarning qarorlari yuzasidan bildirilgan mulohazalar va klub vakillarining takliflari atroflicha muhokama qilindi.

Muloqot yakunida tomonlar kelgusidagi uchrashuvlarda yuzaga kelishi mumkin bo‘lgan masalalarga e’tibor qaratib, hakamlar va klublar o‘rtasida samarali hamkorlikni yo‘lga qo‘yish, o‘zaro tushunishni mustahkamlash hamda futbol uchrashuvlarini tashkil etish va o‘tkazish jarayonlarini yanada takomillashtirish muhimligini ta’kidladilar.

⚽️ UzFHM | 🌟 Euroasia Insurance

📋 “Navbahor” – “Paxtakor” uchrashuvi bo‘yicha hakamlik masalalari muhokama qilindi.

“Paxtakor” futbol klubi tomonidan “Navbahor” va “Paxtakor” jamoalari o‘rtasidagi uchrashuv hakamligi yuzasidan O‘zbekiston futbol hakamlari markaziga e’tiroz kelib tushdi.

Shu munosabat bilan O‘zbekiston futbol hakamlari markazi rahbariyati, O'zPFL hamda “Paxtakor” klubi vakillari ishtirokida Zoom platformasi orqali uchrashuv davomida yuzaga kelgan vaziyatlar ko‘rib chiqildi va batafsil muhokama qilindi.

Tahlil jarayonida hakamlik instruktorlari tomonidan bosh hakamning bahsli vaziyatlar bo‘yicha qabul qilgan qarorlari yuzasidan tushuntirishlar berildi. Har bir epizod video lavhalar orqali tahlil qilinib, qarorlarning asoslari izohlandi.

Shuningdek, vaziyatlar FIFA tomonidan taqdim etilgan o‘quv-uslubiy materiallar bilan solishtirildi. FIFA tavsiyalari asosida tegishli tushuntirishlar berilib, o‘yin epizodlariga nisbatan qoidalarni bir xil talqin qilish va hakamlik qarorlarini to‘g‘ri baholash masalalariga alohida e’tibor qaratildi.

⚽️ UzFHM | 🌟 Euroasia Insurance