Истанбулда Ўзбекистон фуқаролари 36 ёшли Дурдона Ҳакимова ва  32 ёшли Сайёра Эргашалиевани ўлдиришда айбланган икки нафар Ўзбекистон фуқаросига суд ҳукми чиқарилди.

Суд 31 ёшли Д.Т. ва 29 ёш Ғ.К.нинг ҳар бирига «қасддан ва ўта шафқатсизлик билан одам ўлдириш» айби бўйича икки мартадан оғирлаштирилган умрбод қамоқ жазоси тайинлади. Шунингдек, улар марҳумларнинг мол-мулкини ўғирлаганлик учун икки мартадан 7 йиллик қамоқ жазосига ҳам ҳукм қилинди.

Тергов материалларига кўра, Сайёра Эргашалиева 23 январ куни Истанбулдаги уйлардан бирига кирганидан сўнг бедарак йўқолган. Кузатув камералари орқали кейинчалик икки гумонланувчи ҳам шу манзилга киргани, эртаси куни эса уйдан бир неча бор қора пакетлар ва чемодан билан чиққанлари аниқланган.

Айблов хулосасида икки аёл пичоқ билан ўлдирилгани, жасадлари бўлакларга ажратилиб, Истанбулнинг турли туманларидаги чиқинди контейнерларига ташлангани қайд этилган.

Суд мажлисида Ғ.К. Сайёра Эргашалиевани ёлғиз ўзи ўлдирганини айтган. Д.Т. эса Дурдона Ҳакимовани ўлдирганини тан олиб, қилмишидан пушаймонлигини билдирган. Суд эса айблов томонининг талабини қаноатлантириб, ҳар иккисини икки нафар аёлнинг ўлими бўйича айбдор деб топди.

Ўзбекистон фуқароси бўлган Дурдона Ҳакимова ва  Сайёра Эргашалиеваларнинг ўлими тафсилотлари ҳақида аввалроқ хабар қилинган эди.