Bayraming muborak bo’lsin, megajin🥂

@vasilbro

​​#binnarsa

Ayonki, go’shtlarni qovurib-dimlab, olivyeni tayyorlab bo’lib, zerikib o’tiribsan. Sen uchun yozdim - o’qi.

Mistik filmalarda qorong’u xujralardagi kamin usti yoki kitoblar orasidagi kalla suyaklariga ko’zing tushgan. Bu element haroratni oshirib, ko’proq vahima uyg’otadi va o’z navbatida bugungi kun odami ongiga yovuzlik ramzi sifatida muhrlanadi. Aslida ulardan inson tafakkuri, hayotning mohiyati va o‘tkinchiligini anglash uchun qadimdan foydalanib kelingan. Ko‘plab mashhur shaxslar va faylasuflar kalla suyaklarini o‘z uylarida yoki ish joylarida saqlashgan, bu ularning hayot, o‘lim va bilim haqidagi chuqur mushohadalarining estetik ramzi hisoblangan. Misol uchun Dekart kalla suyaklarini inson aqli va tana o‘rtasidagi ramz sifatida qabul qilgan. Yoki Lord Byronni olaylik: u kalla suyagini sharob idishiga aylantirgan. Shoir uchun bu hayotdan zavq olish va o‘limni qabul qilishning o’ziga xos usuli edi.

Bosh chanoqlarning ramziy qiyofaga kirib borishida memento mori falsafasi va vanitas san’at janrining ham o’rni katta.

Memento Mori: O‘tkinchilikka ilohiy qarash

Qadimgi davrlardan beri kalla suyaklari memento mori (o‘limni esla) falsafasining ramzi bo‘lib keladi. Bu tushuncha Uyg‘onish davrida o‘z cho‘qqisiga chiqib, insonni hayotning har bir lahzasini qadrlashga undagan.

Rassomlar kalla suyagini so‘nayotgan sham, qum soatlari, yoki qurib borayotgan gullar bilan uyg‘unlashtirgan holda vaqtning tez o‘tishini tasvirlashga urinishgan. Kutubxonadagi kalla suyak esa bilimning cheksizligini, ammo hayotning qisqaligini bir vaqtda eslatib turgan.

Vanitas: Estetik ko’tarilish

Vanitas – bu hayotning go‘zalligi va moddiy boyliklarning o‘tkinchiligini aks ettiruvchi san’at turi. Kalla suyaklari bu janrning markazida bo’lib, inson hayotining ziddiyatlarini aks ettiradi. Yevropa san’atida kalla suyaklari musiqiy asboblar, mevalar yoki kitoblar bilan uyg‘unlashtirilib, abadiyatga intilish va moddiy dunyoning o‘tkinchiligini yodga solib turgan.

2024 yil uchun so’nggi post. Ha, kalla suyagimni maqtangim keldi )

@vasilbro

Hello 2025

@vasilbro

Yangi yil tosti

Mana, yana bir yil boshlandi. Biroq, haqiqat shuki — faqat raqamlar o‘zgardi, xolos. Ichimizdagi bo‘shliq va iflos izlar o‘z joyida. Yana xato qilamiz, yanada ko‘proq hafsalamiz pir bo‘ladi va eski muammolarimiz o‘z holicha qoladi. Umid qilamanki, bu yil ham o‘tgan yil kabi ko‘p narsa va’da qiladi, ammo hech narsani bermaydi. Hayot shu demakdir.

Kelinglar, yil davomidagi yolg‘onlar, yo‘qotilgan orzular va o‘zimizni ovutish uchun qilgan yasama kulgular uchun ko‘taramiz.

Chin-chin🥂

Kaiji. Birinchi mavsum (2007)

Dastlab bir muncha qiziqmasdan, e’tiborsiz ko’rishni boshladim, ammo barchasi chappasiga aylanib ketdi. Kun tunga aylandi. Anime dunyosi rostan boshqacha. Internetdagi turli iddaolar: yosh bolalar, ko’ngli bo’shlar, “nozik” tabiatlilar uchun kabilarning bari asossiz. Dunyo shunchalar kengki, undagi g’oyalar, o’rtaga tashlanadigan mavzular xilma-xilligidan boshing aylanadi – doim o’zingga yangi nimadir olasan. Bu ham axborot – ya’ni nimadir o’rganishing uchun faqat kitob o’qishing kerak emas, axborot o’z holicha absalyut qolaveradi, shunchaki uni tashuvchi vosita o’zgaradi xolos. Bu haqida yozganman ham. Kaijiga qaytaylik, endi.

Intriga, psixologik manipulyatsiya, intellektual muhit xohlayapsanmi – unda tavsiya qilaman. Bir qiziq fakt ham bor, animeni ko’rayotganimda Kalmar o’yini bilan o’xshash joylari ko’pligi e’tiborimni tortidi. G’oyaviy o’xshashlik, atmosfera, qahramonlar... Keyin bilsam, Hvan Don Hyok ijodiy krizis payti, Kaiji mangasini o’qiganligini va undan ilhomlanganligini tan olgan ekan. To’g’ri, birga-bir ko’chirmagan, ammo yo’nalish, motivlar, o’yinning tashkillanishi ayni bir chiziqda. Farqi, animeda nima bo'lishini oldindan aytish qiyin, mantiq o'z joyida.

Grafikaga ko’p urg’u beraman. Animeni boshlaganimda qiziqishim pasayganligining sababi ham shu edi: personajlar qandaydir nootabiiy, to’rtburchak, uchburchak shaklli aniq qolipga solingan yuzlar. Olam ichiga kiraverganim sari, bu bir ramziy ma’no ekanligini angladim. Moddiyat mavzusi birinchi pardaga o’tganligi vajidan, qahramonlar ham aniq geometrik shaklda, qalin chiziqlar orqali tasvirlangan. Hammasi o’lchovli, hisob kitobli, sening hislaringa tupurgan dunyo. Ijodkorlar bu tomondan personajlar va ularni o’rab turgan muhitni uyg’unlashtirishga harakat qilishgan. Demoqchimanki, grafik jihatdan maqtana olmasligi, umum hikoyaga ta’sir qilmaydi, qo’rqmay bosavering.

9/10 baholayman. Ayniqsa, so'nggi qismlardagi: Kaiji va Yukio o’rtasidagi Imperator qarta o’yini juda muhtasham. O'zim ham o'ynab ko'rdim.

@vasilbro

Imperator qartasi (Kaiji)

Ikki kishi uchun mo’ljallangan strategik o’yin.

Qartalar soni - 10 ta

Imperator va to’rtta oddiy xalq – umumiy 5 qarta

Qul va to’rtta oddiy xalq – umumiy 5 qarta

Qoidalar:

O’yin 4 bo’lim o’ynaladi. Har bir bo’lim 3 raunddan iborat. O’yinchilar bir bo’lim imperator tomon, bir bo’lim qul tomon bo’lib o’ynashadi. Shu tariqa 2 marta o’rin almashiniladi.

Qartalar to’qnashuvi:

Imperator va oddiy xalq – imperator g’alaba qiladi

Oddiy xalq va oddiy xalq – durrang

Oddiy xalq va Qul – oddiy xalq g’alaba qiladi

Imperator va Qul – qul g’alaba qiladi. Chunki uning yo’qotadigan narsasi yo’q va yengish uchun barcha imkoniyatni ishga soladi.

Bo’limlar:

1-raundani doim imperator boshlaydi. 2-round qul. 3-round yana imperator. Raund biror tomonning qo’li baland kelmaguncha davom etadi. Birinchi raund uchun misol:

Dastlab imperator o’z qartasini tanlab stolga qo’yadi, ikkinchi bo’lib qul. So’ngra qartalar ochiladi. Imperator tomon oddiy xalq qartasidan foydalandi deylik, qul tomon esa qul qartasidan. Bunda imperator tomonning qo'li baland keladi - shu tariqa birinchi raund nihoyasiga yetadi. Qartalarni bir vaqtda tanlab, bir vaqtda ochsa ham bo’ladi, ammo bu o’yinning jozibasiga biroz ta’sir qiladi.

O’yin senga nima beradi ?

Bu omadga emas, aniq tahlilga asoslangan o’yin. Siz raqibning qaysi qartani yurishini oldindan tahmin qilishingiz kerak. Har bir kichik detal: tirjayish, ko’zlar, qo’l harakatli, manipulyatsiyon gaplar ahamiyatlidir. To’g’ri shunchaki o’ynab qo’yish ham mumkin, biroq jiddiy kirishilsa anchayin zavqli.

Istalgan odam o’ynasa bo’ladi, maxsus qartalar bo’lishi shart emas:

Sonlardan oddiy xalq. Qirol qartadan imperator, jokerdan qul sifatida foydalansangiz bo’ladi.

P.s: jiddiy yozdimmi, demak yaxshi o’yin. Endi Alice in Borderland seriali 2 mavsum 4-epizod Chishiya ishtirokidagi Valet of hearts o’yinini real hayotga moslashtirmoqchiman.

@vasibro

So’rovnoma

Aksar insonlar o’z fikrlarini absolyut deb hisoblashadi. Shu vajdan qolganlarni o’zlariga bo’ysindirishga, ularni hamfikr qilishga harakat qilishadi. Endi savol.

Agar butun dunyo faqat sizga o’xshagan insonlardan tashkil topgan bo’lsa: mulohazalaridan tortib, kiyinishigacha.

Siz bu dunyoda yashagan bo’larmidingiz ?

Bu jamiyat farovon bo’larmidi ?

Joker

Komiks voqealari Batman va Jokerning azaliy kurashi ustiga qurilmagan, aksincha Jokerning shaxsiyatini birinchi pardaga olib chiqadi. Uning hukmronlikka intilish sabablari, psixalogik beqarorligini ochiqlaydi. Nyuans bo’lib qolmasin, Todd Fillipsning antagonisti bilan bog’liqlik yeri yo’q, faqatgina shaxsiyatdagi beqarorligi qisman yaqin. Xullas, qorong’u va tumanli Gotemning ixlosmandlariga tavsiya qilaman.

Bir qiziq epizod ham bor. Xarli Kvinn Jokerga ko’z oynak sovg’a qiladigan sahna. Unga GEY (gay) so’zi tushurilgan edi. Joker buni mamnuniyat bilan qabul qiladi !

Endi tarixga yuzlanamiz. Ilgarilari gey so’zidan shunchaki insonning ruhiy holatini, ayni kayfiyatini izohlash uchun foydalanishgan. Xursand, baxtli, quvnoq degan ijobiy ma’nolarni anglatgan. Ammo, XX asrning oltmishinchi yillaridan boshlab turli ijtimoiy va madaniy o’zgarishlar natijasida bugungi jinsiy orientatsiyani, ya’ni erkaklarning o‘z jinsiga bo‘lgan romantik qiziqishini ifodalovchi atamaga evriladi.

@vasilbro