#short

Nega biz “sevib” o’qiydigan turk adiblari faqat bir yoqlama fikrlarini bayon qilishadi va nega bu bizga yoqadi ?

Tarixdan ma’lumki, ham madaniy, ham so’zlashuv, ham ijtimoiy jihatdan Turkiya bizga yaqin. Zotan biz bir daraxt ildizlarimiz. Demak adabiy jihatdan ham o’xshashliklar, hissiy yaqinlik bo’lishi turgan gap. Xo’sh, Amina Shenliko’g’lu, Xolid Erto’g’rul va hokazo adiblarning adabiyotlarini keng miqiyosda jamiyatga singdirish, nega va kimga kerak ?

Turkiya chetdan qaraganda farovon, ahil bir davlat bo’lib ko’rinsada, aslida ancha yillardan beri turli qarashlar, oqimlar girdobida qolib ketgan. Oldinlari asosiy qatlamni tashkil qiluvchi musulmonlar soni kamayib bormoqda; yoshlar yevropalashmoqda, ateistlar ko’paymoqda va hokazo. Ammo, bu umumiy nisbatda olib qaraganda kam, baribir asosiy qatlamni dindorlar tashkil qilishadi. Biroq, yuzaga kelgan va kelayotgan holatdan biroz hayiqqan deymizmi, yoki befarq bo’lmagan adiblar o’zlarining qarashlari bilan yoshlarga ta’sir o’tkazishga urinishdi, urinib kelishmoqda. Bunday zimdan olib borilgan va borilayotgan siyosat o’z samarasini qaysidir ma’noda berdi.

Xo’sh, bu kitoblar nega bizga shunchalik yoqadi ? Asrlar guvohlik beradiki, xalqimizning ateistlar va boshqa din vakillariga nisbatan ochiqcha nafrat ko’zi bilan qarab kelishi bor gap. Albatta, barcha emas, ammo asosiy qatlamni shundaylar tashkil etadi (o’zim bu borada tolerantman). Konservativ ruhda rivojlanib kelgan jamiyatimiz esa o’zga din vakili yoki ateistni mag’lub bo’lishi, ohirida baribir Islomni yutib chiqishini kuzatish, o’qishdan zavqlanadi. Qo’shimchasiga umuman qiyin syujet va miyani siqadigan voqeliklardan yiroq, doim ohirida o’zlari kutgan yaxshilik, o’zlari kutgandek g’alaba qilishini kuzatishdan rohatlanishadi.

Gap bunday kitoblarni o’qimaslik yoki ularni yomon otliq qilish haqida emas. O’qish kerak, ammo ular asl adabiyot emas, muayyan muhit va sharoit taqazosidan kelib chiqib yozilgan yozilmalar, ekanligini unutmaslik kerak.

@vasilbro

#munosabat

Anchadan keyin endi Instagramga qaytgandim, lentani aylantirib o’tirsam shu video chiqib keldi. Gapni qisqasi, shu akamiz 20 ga yaqin spirtli ichimlikni hojatxonaga oqizib yubordi. Moral; ichishni tashlashga targ’ib qilish, hozir sotib olgan spirtli ichimlikni boshqa birov ichmasligini oldini olish (anavi ibratli hikoya bor edi-ku, boshqalar xizmatidan foydalanmasligi uchun foxishalarni uyida saqlagan odam haqida - shunga taqlid) va hokazo.

Spirtli ichimlik ichishga men ham qarshiman, ammo keling mantiqan sotuvchi bo’lib o’ylaymiz. Uning do’konidan qisqa muddatda 20 ta ichimlik olindi, bu esa million sumdan ziyod bo’ladi, adashmasam. Demak, yaxshi foyda oldi, endi biznesini yanada kengaytirdi. Bizni xalq haypga o’ch, yuqoridagi aka kabi 50 tasi chiqsa, bu xom cho’tni hisoblab olavering )

So’nggi paytlar shunga o’xshash mantiqsiz boykotlar juda ko’payib ketdi.

@vasilbro

Ko’pchilikda qotib qolgan fikr haqida

Hech o’ylab ko’rganmisiz, nega minglab zo’r asarlar bor-u, ularning tarjimasi o’zbekchada yo’q va bo’lmaydi ? Vaqt masalasi dersiz, ammo ishontirib aytamanki, bu yo to’rtinchi, yo beshinchi darajali masala. Buni tushunish uchun uzoqdan kelish kerak.

Kitob ishlab chiqarish, biznes ekanligini eslatib o’tish o’rinli, biznes bo’lganda ham intellektual biznes. Bunday bizneslar esa kontinentga qarab turlicha rivojlangan bo’ladi. Mutolaani yaxshi ko’radigan va ta’lim yaxshi rivojlangan davlatlarda bu biznes o’sadi. Shaxsiy fikrim – O’zbekiston bozorida bu turdagi biznes rivojlanishi uchun yetarli darajada “aqlli” iste’molchilar ko’p emas. Nashriyotlar istalgan kitoblarini bosmadan chiqara olmaydilar yoki tarjimonlar istagan asarini tarjima qila olmaydi. Mualliflik huquqi degan narsa bor. Deylik, bir kitobni tarjima qildirib, bosmadan chiqarish uchun chakana pul ketmaydi. Ajoyib, ko’zni qamashtiradigan kitoblarning mualliflik huquqi ham “ajoyib” bo’ladi. Nashriyot uni sotib oldi ham deb hisoblaylik, kitobning narxini 80 ming qilib qo’ysa, iste’molchi buncha qimmat deb olmaydi. Ammo, hatto shu 80 ming sum ham kitobning harajatini qoplamasligi mumkin (katta ehtimol qoplamaydi). Bizda bu narx qimmat, ammo chet elda bu o’rtacha kitobning narxi ham emas. Kitobning muallifiga yoki mualliflik huquqi tegishli bo’lgan kompaniyaga buni tushuntirish ancha qiyin. Tasavvur qiling;

Biz qiynalib qolgan davlatmiz. Odamlar 6-8 dollarga kitob sotib olishni qimmat, deb hisoblashadi. Siz aytayotgan har bir kitob sotuvidan 10 dollarlab ulush qayoqda deysiz, bro. Iltimos kelishtiring. Qabilidagi xatli murojat yoki muzokaralar bo’lib o’tadi. Ahvolni tushunib, rozi bo’ladiganlar kam.

Nashriyot biznesiga shaxsan o’zim juda qiziqqanman va yaqingacha ham ochish niyatida edim. Buning uchun barcha sharoitlarim bor. Hatto, qaysi kitoblarni tarjima qilishni ham o’ylab qo’ygandim. Nurali qistovim bilan Cancer wardni o’qib chiqib, taqriz ham yozgan (birinchi kitob shu bo'lishi kerak edi). Biroq, bu biznes istiqbolli bo’lib chiqmadi, niyatimdan qaytdim. Odamlar nashriyotlar rahmatga ishlamasligini bilishi, anglashi, chiqargan kitobini sota olmaslikdan aziyat chekishini his qilishi kerak. Ishonmasangiz, kitobni orqasidagi adadisiga qarang – uzog’i borsa 3000 nusxa chiqadi. 35 milliondan ko’p aholiga, 3000 adadi, jin ursin seni Karl.

Mualliflik huquqiga tupurib qo’yib, chiqaraversa ham bo’ladi. Ammo, “hidi” chiqib qolsa, juda katta jarimasi bor. Masalan Garri Potter, Uzuklar hukmdori, Hobbit kitoblarini rastalarda ko’rib, qolasiz. Hech qaysi birini mualliflik huquqi sotib olinmagan, shuning uchun rasvo muqova va rasvo sifat bilan chiqqan (e’tiborni tortmaslik uchun). Chunki narx kosmik darajada baland, u narxga bizda kitob sotib olishmaydi. Natijada bozorimiz arzon garov turkcha kitoblar va psixologik-motiv asarlarga to’lib ketdi. Aholida ham ularga talab katta, nashriyotlar ham foyda olish maqsadida noilojlikdan chiqarib yotishibdi, tarjimonlar ham qora qozonini tebratishi kerak, ilojsizlikdan tarjima qilishadi.

Shukurki, Dostoyevskiy, Tolstoy, Kafkalarning asarlarini chiqarib turishadi. Sababi oddiy, ularning o’limiga 70 yildan oshgan va kitoblar ijtimoiy mulkka aylanib ulgurgan, vorislar yo’q. Bemalol mualliflik huquqisiz chiqarilaveradi.

@vasilbro

​​Qora oyna(ko’zgu)

Kecha to’liq 5 mavsumni ko’rib chiqdim. Bemalol hammaga tavsiya beraman. O’ziga yarasha kamchiliklar, bo’rttirishlar bo’lsada, serial yaxshi chiqqani rost. Faqat, 2 mavsumdan boshlab, mualliflik huquqini Netflix sotib olganidan so’ng, LGBT qo’llab quvvatlangan ba’zi epizodlar bor. Umman Netflixni tanladingizmi, bunga tayyor turish kerak. Biroq, umumiy voqealar foni va moral oldida bu kamchilikka ko’z yumsa bo’ladi. Yana bir narsaa borki, 4 va 5 mavsumlar hiyol asosiy mantiqdan qochib, ko’proq dramatizm bilan boyitilgan. Xullas ko’ringlar (18+)

Menga yoqqan ba’zi jumlalar (qo’l bola tarjima);

Men odamlarni bilaman. Biz xo'rlashni yaxshi ko'ramiz. Biz kulishni bilmaymiz.

Eng yomoni ? Buning barchasi haqiqat va biz unda yashaymiz.

Odamlar endi qo’llaridagi dahmazadan boshlarini ko‘tarib ham qarashmaydi. Osmon binafsha tusga kirishi mumkin, ammo siz la’natilar buni bir oylab ham sezmaysiz.

Internetning davosi yo’q, siz undan hech qachon chiqib ketolmaysiz.

Shaxsiy reyting: 10/8.5

@vasilbro

​​#tarix #qiziq

Men bilmasdim, sizchi ?

13-asrdan boshlab butun Yevropa bo'ylab hayvonlarni turlari jinoiy javobgarliklarga tortish, ularga advokatlar tayinlash va jazoga, shu jumladan o'limga hukm qilish mumkin edi. Tarixchilar o'rta asrlardagi yevropaliklar nima uchun hayvonlarni sudlaganligi haqida turli tushuntirishlarni taklif qilishgan, umumiy va mantiqli tushuntirishlardan biri; cherkov qonun, tartib va adolat ustidan nazorat tuyg'usini jamoatchilikka yetkazish uchun qo'lidan kelganini qilmoqchi bo'lganligi bilan izohlanadi. Ma’lumingizkim, o’rta asrlarda cherkov, qonun va davlat boshqaruvining markazida bo’lgan.

1386 yilda Fransiyada cho'chqa ko'chada chaqaloqlarni yeyishga moyillik ko’rsatganidan keyin sudlangan va qatl etilgan. Bir asr o'tgach, ba'zi kalamushlar tuman ekinlarini qasddan yo'q qilganliklari uchun sudga tortildilar. 1474 yilda Shveytsariyada xo'roz tuxum qo'yganlikda ayblangan. O’sha kezlar, odamlar, xo'roz tuxumlaridan jodugarlar va sehrgarlar o'zlarining qora ishlari uchun foydalanishlariga ishonishgan. Xo'roz Iblis bilan ittifoqda bo'lganlikda ayblangan va olovga uloqtirilgan (balki kechlikka yevorishgan bo’lishi ham mumkin). Buni cherkov o’z hukmini yanada kengroq yoyish, ta’sir doirasi oshirish uchun turli usullardan foydalanganligi bilan izohlash mumkin. 1750 Fransiyaning Vanvre shahrida Jak Feron ismli shaxs Fransiya qonunchiligiga ko‘ra o‘lim bilan jazolanishi mumkin bo‘lgan “eshak” bilan jinsiy aloqa qilayotganda qo‘lga olingan. Qonunga ko’ra ikkalasi ham sudlangan va aybdor deb topilib, o'limga hukm qilingan.

Vanvre mahalliy aholisi eshakni o'limga hukm qilgan qonun adolatsiz deb topadi. Mahalliy ruhoniyning yordami bilan xalq eshakning yaxshi fe'l-atvoridan dalolat beruvchi petitsiyani imzolash orqali birlashishadi. Petitsiyada; u har doim o'zini yaxshi ko'rsatgan. Uyda ham, ko’chada ham o'zini yaxshi tutgan va hech qachon hech kimga muammo tug’dirmagan… deb yozilgandi. Ohir oqibat eshak oqlanadi. Jak Feron esa osib o’ldirilgan.

Bugungi kunda hayvonlarni “deyarli” hech qachon rasmiy jinoiy javobgarlikka tortish holatlari kuzatilmagan. “Deyarli hech qachon” 2004 yilda Katya ismli ayiq ikki kishini o‘ldirgani uchun 15 yillik qamoq jazosiga hukm qilingan edi. U 2019 yilda ozodlikka chiqqan.

@vasilbro

Kun iqtibosi

Yadro qurolidan foydalanishga olib kelishi mumkin bo'lgan yagona provokatsiya nima? Yadroviy qurol. Yadro qurolining ustuvor maqsadi nima? Yadroviy qurol. Yadro quroliga qarshi yagona o'rnatilgan mudofaa nima? Yadroviy qurol. Yadro qurolidan foydalanishni qanday oldini olish mumkin? Yadro qurolidan foydalanish bilan tahdid qilish. Biz yadro quroli tufayli yadroviy quroldan qutula olmaymiz”

©️Martin Emis

Yakshanba oqshomini maroqli o’tkazish doim ham amalga oshavermaydigan hodisa. Turli rejalar tuzasiz; mana bu filmni ko’raman yoki kitobni o’qiyman, bazan u kutganingizdek bo’lib chiqmaydi. Mushkulotingizni yengillashtiray - Tetris

Qo’rqmay chipslarni g’amlab olib, ichimlikdan simirib-simirib ko’rsa bo’ladigan film. Bolaligimizda sevib o’ynagan o’yinning yaratilish tarixi o’ylaganingizdan ancha qiziq. Syujet ancha-muncha muhim tarixiy insaydlarga boy. Hammaga tavsiya qilaman )

@vasilbro

#live

VASIL

Shu kunlarga ham yetib keldik, Karl. Ispanlar ishlashibdi. Filmni hali ko’rganim yo’q, lekin bosh qahramon shaxmatni yaxshi ko’rar ekan, demak, o’xshashliklar yo’q emas.

@vasilbro

#tarjima

Anton Chexov, "Odamning qisqacha anatomiyasi" hikoyasidan

Bosh. U hammada bor, lekin hamma ham unga muhtoj emas. Ba'zilarga o'ylash uchun, boshqalar fikriga ko'ra - shlyapa kiyish uchun kerak. Ikkinchi fikr unchalik xavfli emas... Ba'zida u miya suyuqligini o'z ichiga oladi.

Yuz. Qalbning ko'zgusi, lekin advokatlar uchun emas. Uning ko'plab sinonimlari bor: morda, aft, fiziologiya, turq, tasvir, bashara va boshqalar.

Peshona. Vazifalari: sajdaga bosh qo’yish uchun va so’raganlani ijobat bo’lmaganda devorga urish uchun.

Ko'zlar. Boshning mirshabi - ular kuzatadilar va eslab qolishadi. G'amli kunlarda yig'lash uchun.

Burun. Shamollash va hid uchun berilgan. Siyosatga aralashmaydi. Vaqti-vaqti bilan tamaki aktsizining ko'payishida ishtirok etadi, shu sababli foydali organlar qatoriga kiritish mumkin.

Til. Denonsatsiyalar qog'ozga yozila boshlaganligi sababli, u davlat bilan qoldi. Ayollar va ilonlarga yoqimli o'yin-kulgi organi bo'lib xizmat qiladi. Eng yaxshi til – pishgan tildir.

Yurak. Vatanparvarlik va boshqa ko'plab tuyg'ularning qozoni. Ayollarning yuragida o’z mehmonxonalari bor: qorinchalarni harbiylar, atrialarni tinch aholi, tepasini esa er egallaydi.

Bel. Axillesning tovoni kabi, modellar, tikuvchilarning nozik joyi. Yosh kuyovlar va korset sotuvchilari orasida ayollarning sevimli joyi.

Qorin. Organ tug'ma emas, balki ortirilgan. Sud maslahatchisi lavozimidan boshlab o'sishni boshlaydi.

Shu jumladan;

A.P. Chexov, "Nikoh to'g'risida e'lon"
Arkadiy Averchenko, “Ajoyib tarbiya”
Daniil Xarmis “Ego”

@vasilbro

Dune

Frank Gerbertning dunyosiga qiziqib qolganimga ancha bo’lgandi, nihoyat kitob motivlari asosida sur’atga olingan Dune (2021) filmini ko’rib chiqdim (menimcha eng ohirgilardan biri bo’lib). Film menda shunchalik yaxshi taassurot qoldirdiki, hatto 1984 yilda Devid Linch rejissyorligi ostida ekran yuzini ko’rgan dastabki filmni ham tomosha qildim. Qo’rqmasdan oilaviy ko’rsa bo’ladigan kinolar qatoriga kiritaman, har holda dastlabki qism shunday hisni uyg’otdi. Ijodkorlar ortiqcha ekshin sahnalarsiz, ko’plab g’ayri tabiiy mavjudotlarsiz ham yaxshi fantastik film ishlash mumkinligini isbotlab berishgan. Soundtracklarga esa gap so’z bo’lishi mumkin emas, lazzatli muhit. Quvonarlisi, Frank Gerbertning Dune asari mualliflik huquqini Asaxiy sotib olgan. Kitob 2024-yilda chop etilishi rejalashtirilgan. Ikkinchi qism premyerasi shu yilning noyabr oylarida bo’lib o’tishini hisobga olsak, 2024 yil boshida Asaxiy ham kitobni chiqarsa voqealar ketma-ketligi ajoyib bo’lardi. Kitobni ham, filmni ham barchaga tavsiya qilaman )

Don’t look up

Shu kunlarda zerikib yurgan bo’lsangiz, Don’t look up yaxshi tanlov. Filmda yerga yaqinlashib kelayotgan halokatli kameta fonida insoniyatning o’zini qanday tutishi kamera lentalariga muhrlangan (albatta kosa tegida nim kosa bor). Filmni ko’rish davomida, menda shunday his paydo bo’ldiki, insonlar kameta halokatidan qutilib qolishlarini emas, balki qirilib ketishlarini xohladim. Shunchaki ko’ring, yengil kulgu bilan qarshi oladigan voqealaringiz fonida, jamiyat tasviri gavdalanadi.

@vasilbro

Tarixiy solnomalar📜

“Odam Atoning yaratilishi” freskasiyasi – taxminlar, fikrlar, faktlar.

Ijtimoiy tarmoqlarda, xoh Instagram postlarda bo’lsin, xoh Telegram avatarlarida; ikki bir-biriga tegmay turgan qo’llarning barmoqlari aks etgan sur’atlarni ko’p uchratib qolamiz. Hozirda bu yetishilmagan sevgi yoki qandaydir hissiy masofaga ishora sifatida talqin qilinadi. Ammo, bu sur’atlarning tag zamirida yotuvchi ramziy ma’nodan ko’pchilik bexabar. Ushbu sur’at necha asrlardirki, san’at ihlosmandlari orasida o’zining muhokamaga boyligi va dolzarbligini yo’qotmay kelmoqda. Bugun shu haqida !

Uyg’onish davri Italya rassomchilik maktabi darg’alaridan, kimsan Leonardo da Vinchi bilan bir davrda yashagan va raqobat olib borgan - Mikelanjelo di Lodoviko di Leonardo di Buonarroti Simoni yoki shunchaki Mikelanjeloning “Odam Atoning yaratilishi” freskasi, o’z davri va to bugungi kunimizga qadar yaratilgan san’at asarlari orasida eng muhtashamlaridan va asrlar davomida turli xil maqsadlarda, turli xil nusxalarda inson ongida qayta va qaytda tirilganlardan biridir. Freska Papa Yuliy II buyutmasiga ko’ra Sikstin kapellasi shiftlariga chizilgan o’nlab freskalardan biridir (Papaning Vatikandagi rasmiy qarorgohi)

Mikelanjeloga ushbu freskani yaratishda Ibtido kitobi (1:27) da “Xudo insonni o’z sur’atida yaratdi” so’zlari ilhom bag’ishlagan deb talqin qilinadi. Mantiqan o’ylab qaralganda ham shunday; Xudo soqolli, qattiyatli, qarashlari o’tkir inson shaklida gavdalantirilgan. Umuman uyg’onish davri san’atida yunon mifologik xarakterlaridan eskiz olish ko’p uchraydi. Biroq, Mikelanjelo aynan Ibtido kitobidagi so’zlarga tayanib chizganligi haqida aniq dalillar yo’q, umumiy fikr mavjud xolos. Freskaning o’zi ko’plab ramzlarga ega va hali hanuz san’atshunoslar, tarixchilar tomonidan o’rganib kelinadi.

Inson miyasi

1990 yilda Indiana shtatining Anderson shahrida faoliyat olib boruvchi shifokor Frenk Meshberger Amerika Tibbiyot Assotsiatsiyasi jurnalida ko’rgan Xudoning siymosi orqasida tasvirlangan figuralar va shakllar inson miyasining anatomik jihatdan aniq tasviri bo'lib ko'rinayotganligi haqidagi fikrni ilgari suradi. Diqqat bilan tekshirilganda, rasmdagi chegaralar miyaning ichki va tashqi yuzalarida, miya sopi, frontal lob, bazilyar arteriya, gipofiz bezi va optik xiazmadagi miyaning asosiy sulkuslari bilan mos keladi. Bu jarayon, Xudo insonga barmog’ini tekkizish orqali idirok ato etganligini ifodasidir. Mikelanjeloning inson tanasini yorib ko’rib, o’rganganligini hisobga olsak, u o’z bilmlarini san’atiga sizdirmoqchi bo’lgan, degan o’rinli fikr yuzaga keladi.

Tug’ilish jarayoni

Ba’zilar Xudo ortidagi farishtalar fonidagi qizil matoni bachadon ekanligini iddao qilishgan. Xudo tasviri pastidagi yashil sharf – kesilgan kindik, deb talqin qilingan. Ammo, Ibrohimiy dinlarda Odam Atoning tug’ilmaganligi, balki yaratilganligini hisobga olsak, bu tahmin, o’z-o’zidan puchga chiqadi. Biroq, Mikelanjeloning cherkov an’analariga doim zid ish qilib kelganligi, bu borada doim mojarolar kelib chiqganligini inobatga oladigan bo’lsak, balki u yana bir-bor imkoniyatdan foydalanib qolgandir.

Ishonch

Agar yaxshilab e’tibor berilsa, Xudoning barmoqlari Odam Ato tomon imkon qadar cho’zilgan, Odam Atonong barmoqlari esa hiyol pastga tushgan. Xuddiki, u Xudo tomon intilmayotgandek. Bu esa Xudoga ishonish har kimning o’z shaxsiy ishi, bir barmoq cho’zish orqali unga yetishish yoki aksincha bo’lishi mumkinligini ifodalaydi. Bu borada yana bir tahmin ilgari suriladiki, agar inson oz bo'lsada Yaratganga instilsa va bu har qanday ko'rinishda bo'lmasin, Xudo unga yaqinlashadi. Ya'ni Odam Ato barmoqlarini ishonchsiz uzatayotgan bo'lsada, Xudo unga yaqin.

Maqola to’ldirib boriladi.

@vasilbro

#iqtibos

Mergan kitobidan

Qotillik, zo’ravonlik va vaxshiylik – bularning barchasi ezgulik nomi ila amalga oshiriladi. Qonga botgan ezgulik nomi ila.


@vasilbro

Men va “jo’shqin” oliy ta’lim

Ikarus haqidagi afsonadan ko’pchilik xabardor bo’lsa kerak. Lo’nda hikoya quyidagicha; Afsonaga ko’ra Dedal Krit orolidan qochish uchun o’zi va o’g’li Ikarusga qanotlar yasaydi. O’g’lini quyoshga yaqin uchmaslikdan, yo’qsa qanotlardagi mum erib halok bo’lishidan ogohlantiradi. Biroq, Ikarus buni unutadi va halok bo’ladi.

Kecha fizika darsidan oraliq nazorat topshirishimiz kerak edi. Men hech qachon shu varoq-varoq narsalarni, konspektlarni kimdir o’qishiga ishonmaganman (shunchaki qaraladi ummon-ummon narsa yozilgan bo’lsa, o’qimay baho qo’yib ketaverishadi, muhimi plan bajarilgan). Kichik eksperiment qilib ko’rdim, temperaturaning nimagadir ta’siri haqidagi savolga Ikarus haqidagi afsonani yozib chiqdim. Agar o’qituvchi uni rostan o’qisa, uzog’i borsa qayta topshirish, agar hammasi silliq o’tsa, demak men ko’plab afsonalar haqida yozib chiqaman.

P.s: Kanalning nomiga mos holat bo’ldi o’ziyam )

P.s.s: Uy sharoitida takrorlash tavsiya etilmaydi !

@vasilbro