Bugungi kunda eng ko‘p ishlatiladigan, lekin eng kam tushuniladigan iboralaridan biri - men depressiyadaman. Kechagina birga yaxshi vaqt o’tkazgan tanishing yozib qoladi: depressiyadaman. Instagramda uchtadan bittasi aytadi: depressiyadaman. Kimdandir hol-ahvol so’ragan bo’lasan, u ham aytadi: depressiyadaman. Sal shamol esib qo’ysa bo’ldi - depressiya.

Depressiya bu qadar yengil, “mood” darajasidagi narsa emas. U yurak siqilishi yoki kayfiyat yo’qligi, hattoki tushkunlik ham emas. U tananing va ongning barcha sistemalari go‘yoki ichkaridan buzilib, hayotdagi hamma narsa bir xil tovushga aylanib qoladigan holat.

Depressiyada asosan nimalar kuzatiladi ?

Oldin seni sevintirgan mashg‘ulotlaringa tupurib qo’yasan, men kabilar uchun hatto filmlar ham zavq bermay qo’yadi.

Atrofingdagi shunchaki mavjud odamlar tugul, yaqinlaring bilan ham so’zlashging kelmay qoladi.

Uyquga berilib ketasan. Ruhing hammasiga qo’l siltaydi.

Eng oddiy qarorlarni ham qabul qilishga qiynalasan. Badiinga urib ketgan taomdek, nimaniki yesang tomog’ingdan o’tmaydi.

Tushungandek bo’lyapsanmi ? Depressiyadaman deyish bilan depressiyada bo‘lish o‘rtasida butun boshli jarlik bor. Shunchaki “ruhiy siqilish”ni “depressiya”ga almashtirib qo‘yish - kulguli.

Qalashib ketgan ishlaring, yig’ilib qolgan qarzlaring, atrofingdagi insonlarning senga munosabati, yomon ish joy - xullas bosimli hayot tarzi ham depressiya emas jin ursin, stress bo’ladi. Ikki kun yaxshilab uxlasang, suyukliging bilan qizil vinodan simirib, biror romantik kinoni bosvorsang bo’lgani, stress ham kamayadi.

Yoki ayrim paytlar bo’ladi: kuning shunchaki yomon o’tadi, otang bo’ralatib so’kadi, jufting bilan urushib qolasan, kayfiyating yo’qoladi, yurak siqiladi - bu ham depressiya emas. Shunchaki tushkunlik. O’tkinchi holat.

Depressiya kundalik o‘zgaruvchanlikdan yiroq, chirkin zulkdek sendan ayrilmaydi. Unga motivatsiya bilan qarshi chiqolmaysan. Uni sevimli qo‘shiqlar bilan yo‘q qilib bo‘lmaydi. U og‘riq. Do’xtir talab qiladigan terapiya, ba’zida dori-darmon zarur bo’ladigan holat. Uni shunchaki “charchoq” yoki “qiziqish yo‘qligi” bilan almashtirib bo‘lmaydi. Depressiya haqidagi eng katta noto‘g‘ri tushuncha “odam kuchli bo‘lsa, o‘zi o‘tib ketadi” degan gap.

Manchester by the seani ko’rvor, oz-moz tushuncha bo’ladi va nozik qalbchanga og’ir botgan ikki kunlikni - depressiya deb valdirashni bas qil.

@vasilbro

Dolzarb

Istasangiz Karl aytadi, deb o’qing )

Kitob axborotni yetkazishdagi vosita xolos, oddiy forma. Axborot qog‘ozda, elektron holatda, audio yoki vizual ko’rinishda bo’lishi mumkin. Bu jihatlar zamonga qarab o‘zgaradi. Istalgan shaklda qabul qilish mumkin.

Ko’p ham shovqin ko’tarmanglar.

Telegram akkauntini o'chirilgan hisob (deleted accaunt) qilishdan oldin kanaldan chiqib ketadiganlarga alohida hurmatim bor. Obunachilarga bir ko'z tashlab chiqdim kanal online qabristonga aylanibdi. Hamma yerda murdalar.

Yaxshi fikrlar odatda tun yarimida keladi. Baxtga qarshi, u paytda uxlayotgan bo’laman.

Erta turish umrni uzaytirar, lekin kech uxlash undan zavqlanishni osonlashtiradi.

Xullas hamma Sevgi, O’lim va Robotlarni ko’rib kelsin. Ehtimol hafta ohiriga suhbatcha uyushtirarmiz.

Podkastni endi ko’rdim, yomon emas, lekin bundan yaxshiroq bo’lishi mumkin edi. Sababi dunyo juda katta, vaqt esa cheklangan, ehtimol Nodir bro lutf aylab, yana biror soniga chaqirsalar to’ldirib ketarmiz. Dastlabki tajriba chakki bo’lmadi )

Bir o’yin tashkillasak: podkast izohlar bo’limida o’z fikringizni qoldiring (istalgan) ammo izohda Karl so’zi qatnashgan bo’lishi zarur. Muddat 29-mayga qadar. So’ng random orqali g’olibni aniqlaymiz.

Lannisterlar ta’biri bilan aytganda: Ota Karl doim qarzini to’laydi.

@vasilbro

The ugly stepsister (18+)

Zolushka hikoyasining qorong’u tomonlariga nazar, ko’z tashlashga arziydi. Barragina )

P.s: Bodi-horror ixlosmandlari uchun oqshomga yaxshi tanlov.

@vasilbro

Lyudovik Alleaume qalamiga mansub Betxovenning ramziy portreti.

Nega ramziy ? - chunki uning qulog’iga Euterpe shivirlamoqda. Betxoven esa ko’zlarini yumib olgan, jiddiy qiyofa bilan musaning har bir sasini yodda saqlab qolishga chiranmoqda.

Shu o’rinda qiziq bir fakt: Betxoven barcha davrlarning eng yaxshilari qatorida e’tirof etiladigan Moonlight sonatasini qadrlamagan.

@vasilbro

18+

Bu haqida oldin ham yozganman, bugun yana bir keng tarqalgani haqida

Ko'p guvohi bo'laman, ikki tanish tortishib qolsa, biri chortmisan (чёрт) deb baqirib qoladi. Chorting nimasi deb so'rasangiz, ishshayib, boshini qiyshaytiradi.

Чёрт qadim slovyan mifologiyasidagi insonlarga zarar yetkazuvchi, baxtsizlik olib keluvchi paganistik ruhlardan biri hisoblanadi. Xristianlik slovyan diyorlariga kirib kelgandan so'ng, chyort obrazi Iblisning ekvivalentiga aylangan. Qisqacha tarixi shu.

Leonid Gaydayning kult filmi "Brilliant qo'l" komediyasidagi o'sha mashhur ibora: Чёрт побери - bizdagi Jin ursinga to'g'ri keladi.

Sharob: Kecha va Bugun

Sharob O‘rta Yer dengizi dunyosi bilan Iso alayhissalom zamonidan ancha ilgari, 2,000 yil oldin ham uzviy bog‘liq bo‘lgan. Darhaqiqat, qadimiy matnlarning deyarli barchasida Pliniydan tortib Bibliyagacha sharob tilga olinadi. Masalan, Yangi Ahdda sharob yigirma martadan ortiq eslatiladi – Qonadagi (Iso a.s suvni birinchi bor sharobga aylantirgan kecha) to‘y voqeasidan tortib so‘nggi kechki ovqatgacha. Ibroniy Bibliyasida esa yana 200 marotaba sharob haqida so‘z yuritiladi. Biroq Iso a.s zamonidagi sharob hozir supermarketlardan topiladigan fransuz yoki italyan sharoblardan ancha farq qilgan. Zamonaviy kabernetlar, pinotlar va chardonnaylarning rimcha ajdodlari qanday ta’mga ega bo‘lganini bilishda hanuz ko‘p narsa noma’lumligicha qolmoqda.

Qadimgi sharoblar haqida yozilgan son-sanoqsiz matnlarga qaramay, sharob ishlab chiqarish texnikalari va uslublarining evolyutsiyasi bu qadimiy ichimlikning ta’mini sirli qilib qo‘ygan. Ba’zi tarixchilar bu sharoblarni bugungi zamonaviy sharoblarga nisbatan ancha past sifatli deb hisoblaydi. Biroq yaqinda Antiquity jurnalida chop etilgan yangi tadqiqot bunday fikr haqiqatdan yiroqligini ko‘rsatdi. Tadqiqotga ko‘ra, Rim davridagi sharoblar zamonaviylaridek murakkab va xilma-xil bo‘lgan. Qadimiy rimcha sharoblarning ta’mini aniqlash uchun tadqiqotchilar noodatiy manbaga murojaat qilishgan, gap, zamonaviy Gruziya sharoblari haqida ketmoqda.

Gruziya Rimdan taxminan 1,500 mil uzoqlikda joylashgan bo’lsada, sharob sanoati qadimiy Rim dunyosi bilan muhim o‘xshashliklarga ega, xususan, sharobni fermentatsiyalash va yetiltirishda loydan yasalgan idishlardan foydalanishda. Bugungi kunda sharob ko‘pincha yog‘och yoki metall bochkalarda tayyorlanadi, biroq rimliklar dolia yoki pifos deb ataladigan loy idishlardan foydalangan. Tadqiqotchilar fikriga ko‘ra, bu loy idishlar sharobga kuchli ta’m bergan, xuddi bugungi kungi eman bochkalarining sharobga vanilin ta’mini berishi kabi.

Oldin bu katta hajmdagi pifoslar oddiy, ommaviy ishlab chiqarilgan idishlar deb qaralgan bo‘lsa, yaqinda qadimiy Rim dolialari ustida o‘rganilgan tadqiqotlar shuni ko‘rsatdiki, bu idishlar nafaqat hajm va shakli, balki tarkibiy materiali jihatidan ham maxsus ishlab chiqilgani aniqlandi. Ba’zi minerallar aynan sharobga beradigan o‘ziga xos ta’mlari sababli boshqalarga nisbatan ko‘proq qadrlangan. Qadimiy an’analarni saqlab qolgan Gruziya sharob ishlab chiqaruvchilari ham idishlarini tayyorlashda maxsus minerallardan foydalanadilar, bu esa sharobga o‘ziga xos ta’m bag‘ishlaydi.

Rim va Gruziya sharobchiliklarining yana bir muhim jihati idishlarning hajmi va shaklidir. Ushbu uslub sharofati bilan fermentatsiya jarayonida idish ichida issiqlik aylanishlarini yaratadi, bu esa sharobni aralashtirib, haroratni barqarorlashtiradi. Har ikkisi ham idish ustini ikkilamchi material bilan qoplagan: odatda mum yoki smoladan foydalanishgan. Natijada loyning g‘ovaklik xususiyatlari chegaralangan va sharob ortiqcha oksidlanib sirka bo‘lib qolmagan. Nazoratli oksidlanish ta’minlanishi o’laroq yong‘oq, giyoh va mevali ta’mlar paydo bo’lgan. Idishlarni tuproqqa ko‘mib qo‘yish esa fermentatsiya haroratini barqarorlashtirgan, natijada sharobga yong‘oq va karamel ta’mlarini qo‘shgan. Xo‘sh, rimcha sharob qanday ta’mda bo‘lgan ? Tadqiqot yetakchi muallifi Dimitri Van Limbergen The Telegraph gazetasiga shunday deydi:

Ushbu texnikalar asosida oq uzumdan tayyorlangan qadimiy sharoblar oksidlangan, murakkab hidlarga ega bo‘lgan: qovurilgan non, quritilgan mevalar (masalan o‘rik), qovurilgan yong‘oqlar, yashil choy iforlari. Ta’mi esa juda quruq, bir oz achchiq bo’lgan.

@vasilbro

Misteriya yoqadi. Bu qichqirishdan cho'chish yoki sharpani ko'rgandagi dahshatga o'xshamaydi, o'z estetikasi bor. Nima desam ekan, ko'r-ko'rona qo'rqitmaydi, sendan sezish, anglashni talab qiladi. Aytaylik, mana bunday:

...devorda osig'liq soatning millari ortga harakatlanayotgandi, biroq hech kim buni payqamadi.

Gunohkorlar

Juda bir shovqin ko’taradigan darajada muhtasham emas-ku, biroq yomon ham chiqmagan. Rejissyor iloji boricha maxsus effektlardan qochib, tabiiylikka urg’u berganligi quvonarli, lekin butun kartina miqiyosida qaralsa, qarorning pand yeyishini ham kuzatamiz - ayniqsa final sahnalari.

Andoza sifatida “Shomdan tonggacha” filmi tanlangandek, strukturaviy o’xshashliklar ko’p, ehtimol adashayotgandirman. Bundan tashqari Robert Jonson shaxsiyatini ramziylashtirish bor, sekingina chertib o’tishgan - bu tomonlama yoqdi.

Eng manzur bo’lgani - vampirlar. Ular sohibjamol, juda qudratli qilib ko’rsatilmagan, aksincha el-qatori ifodalangan. Shunday ham bo’lishi kerak, o’liklar va tiriklar orasidagi o’rta tabiat maxluqlar elitizmga emas, tragediyaga yaqin turishi lozim. Ularga nisbatan havas tuyg’usini oshirish, fanatik romantizmdan boshqa narsa emas.

7/10 beraman. Ko’ringlar.

@vasilbro