◼️‌ခင်ဦးမြို့နယ် ပကဖ ကျဆုံးရဲဘော် မိသားစုများနဲ့ ရဲဘော်များကို ၁၈ ကြိမ်မြောက် ဂုဏ်ပြုထောက်ပံ့

၂၅ အောက်တိုဘာ ||| နွေဦးအသံ |||

စစ်ကိုင်းဒေသ၊ ခင်ဦးမြို့နယ်ရှိ ပြည်သူ့ကာကွယ်ရေးအဖွဲ့ဝင် ပကဖ ရဲဘော်တွေနဲ့ ကျဆုံး ပကဖ ရဲဘော်တွေရဲ့ မိသားစုဝင်တွေကို မြို့နယ် ပြည်သူ့ကာကွယ်ရေးအဖွဲ့က အောက်တိုဘာ ၂၅ ရက်မှာ ဂုဏ်ပြုချီးမြင့်တဲ့ ထောက်ပံ့ငွေတွေ အသီးသီး ပေးအပ်ခဲ့တယ်လို့ သိရပါတယ်။

သီတင်းကျွတ် လပြည့်အကြိုနေ့မှာ မြို့နယ် ပြည်သူ့ကာကွယ်ရေးအဖွဲ့ မှာ တာဝန်ထမ်းဆောင်ခဲ့တဲ့ ကျဆုံးရဲဘော်တွေရဲ့ မိသားစုဝင်တွေအပြင် လက်ရှိတာဝန်ထမ်းဆောင်နေဆဲ ရဲဘော်တွေကို ဂုဏ်ပြုချီးမြှင့်တဲ့ ထောက်ပံ့ငွေတွေ ၁၈ ကြိမ်မြောက် ပေးအပ်ခြင်းအခမ်းအနားပြုလုပ်ခဲ့ကြောင်း ခင်ဦးမြို့နယ် (ပကဖ) က ထုတ်ပြန်ထားတာပါ။

NUG အစိုးရ၊ ကာကွယ်ရေးဝန်ကြီးဌာန ကွပ်ကဲမှုအောက်ရှိ ခင်ဦးမြို့နယ် ပြည်သူ့ကာကွယ်ရေးအဖွဲ့ (ပကဖ) ဟာ အမှတ် ၂ ရွှေဘိုခရိုင်၊ အမှတ် ၃ တပ်ရင်းနဲ့ ပူးပေါင်းပြီး ပြီးခဲ့တဲ့ ဩဂုတ်လထဲမှာ မြို့နယ်အတွင်းရှိ ရေသေးသင့် ကျေးရွာတရွာကိုလည်း ငွေကျပ်သိန်း ၅၀ တန်ဖိုးရှိတဲ့ ဆန်အိတ်တွေ ထောက်ပံ့လှူဒါန်းပေးခဲ့တယ်လို့ သတင်းရရှိပါတယ်။

Photo | ခင်ဦး ပကဖ

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️‌‌မိုးမောက်မှာ တာပိန်မြစ်ကူးတံတားတွေကို စစ်တပ်က ၂ ရက်ဆက်တိုက် ဗုံးကြဲဖျက်ဆီး၊အရပ်သားပြည်သူ ၃ ဦးသေဆုံး

၂၅ အောက်တိုဘာ ||| နွေဦးအသံ |||

ကချင်ပြည်နယ်၊ မိုးမောက်မြို့နယ်ရှိ တာပိန် မြစ်ကူးတံတားတွေကို အကြမ်းဖက်စစ်တပ်က ၂ ရက်ဆက်တိုက် လေကြောင်းမှ ဗုံးကြဲတိုက်ခိုက်ဖျက်ဆီးခဲ့တာကြောင့် တံတား ၂ စင်း ပျက်စီးခဲ့တဲ့အပြင် အရပ်သားပြည်သူ ၃ ဦးသေဆုံးခဲ့တယ်လို့ သိရပါတယ်။

မြစ်ကြီးနား-ဗန်းမော် လမ်းမပေါ်ရှိ မြို့သစ် တာပိန်မြစ်ကူးတံတားကို စစ်ကောင်စီလေတပ်က အောက်တိုဘာ ၂၄ ရက်၊ မနက် ၁၀ နာရီခန့်မှာ ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အရပ်သားပြည်သူ ၂ ဦး၊ ဝန်ထမ်း ၁ ဦးတို့ သေဆုံးခဲ့ပြီး ၁ ဦးထိခိုက်ဒဏ်ရာရခဲ့တယ်လို့ KIO/KIA နဲ့ ဒေသတွင်းစစ်ရေးသတင်းရင်းမြစ်တွေက အသိပေးထားပါတယ်။

ဒါ့အပြင် စစ်ကောင်စီလေတပ်က အောက်တိုဘာ ၂၃ ရက်၊ မနက်ပိုင်းမှာလည်း အဆိုပါ တာပိန်မြစ်ကူးတံတားနဲ့ ကြိုးတံတားတစင်းတို့ကို Y-12 လေယာဉ်နဲ့ ဗုံးကြဲတိုက်ခိုက်ခဲ့တာကြောင့် ကြိုးတံတားအဟောင်းဟာ အလုံးစုံပျက်စီးသွားခဲ့ပြီး တံတားအသစ်ဟာလည်း ကြီးမားစွာထိခိုက်ပျက်စီးခဲ့တဲ့အတွက် ယာဉ်တွေဖြတ်သန်းသွားလာလို့ မရတော့ကြောင်း ဆိုပါတယ်။

အခုလို အများပြည်သူအသုံးပြုနေတဲ့ တံတားတွေကို စစ်တပ်က တိုက်ခိုက်ဖျက်ဆီးနေတာဟာ ဗန်းမော်မြို့ကို ဆက်လက်ထိန်းချုပ်ထားနိုင်ဖို့နဲ့ KIA PDF ပူးပေါင်းတပ်တွေရဲ့ ထောက်ပို့လမ်းကြောင်းတွေကို ဖြတ်တောက်နိုင်ဖို့ ရည်ရွယ်လုပ်ဆောင်နေတာဖြစ်တယ်လို့ KIO/KIA က သုံးသပ်ထားတာ တွေ့ရပါတယ်။

Photo | KIO/KIA ၊ လူမှုကွန်ယက်

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။