◼️နိုင်ငံအနှံ့ ပစ များစွာသုံးပြီး လူလှိုင်းစစ်ဆင်ရေးနဲ့ ထိုးစစ်ဆင်နေတဲ့စစ်တပ် ဩဂုတ်လအတွင်း ၃၅၀ ဦးခန့်သေဆုံး

🔹ပြည်သူ ၁ သိန်း ၃ သောင်းကျော် အဓမ္မစစ်သားစုဆောင်းခဲ့ပြီး စစ်တပ်စစ်ကြောင်းတွေမှာ (ပစ) ၈၀ ရာခိုင်နှုန်းခန့်ပါဝင်နေ

၂၆ စက်တင်ဘာ ||| နွေဦးအသံ |||

နိုင်ငံအနှံ့အပြားမှာ အကြမ်းဖက်စစ်တပ်က လူလှိုင်းစစ်ဆင်ရေးတွေနဲ့ ထိုးစစ်ဆင်လျက်ရှိရာ စစ်ကြောင်းတွေမှာ စစ်မှုထမ်း(ပစ)အင်အား ၈၀ ရာခိုင်နှုန်းခန့် ပါဝင်နေပြီး ပြီးခဲ့တဲ့ ဩဂုတ်လ တလအတွင်း စစ်တပ်ဘက် ၃၄၄ ဦး သေဆုံးခဲ့တယ်လို့ သိရပါတယ်။

ပြီးခဲ့တဲ့ ဩဂုတ်လအတွင်း စစ်တပ်စခန်းတွေကို ၁၂ ကြိမ် တိုက်ခိုက်ခဲ့ရာ စခန်း ၄ ခု သိမ်းပိုက်ခဲ့ပြီး စစ်ကောင်စီတပ်ဖွဲ့ဝင် ၃၄၄ ဦးသေဆုံးခဲ့တဲ့အပြင် ဒဏ်ရာရသူ ၁၀၁ ဦးရှိခဲ့သလို အဲဒီအထိမှာ အရာရှိအဆင့် ၁၀ ဦးပါဝင်တယ်လို့ NUG အစိုးရ၊ ကာကွယ်‌ရေးဝန်ကြီးဌာနက စက်တင်ဘာ ၂၅ ရက်မှာ ထုတ်ပြန်ထားတာပါ။

ဒါ့အပြင် အကြမ်းဖက်စစ်တပ်ဟာ ပြီးခဲ့တဲ့ ၂၀၂၄ ခုနှစ် ဇူလိုင်လမှ ၂၀၂၆ ခုနှစ်၊ ဩဂုတ်လအတွင်း စစ်မှုထမ်း(ပစ) အပတ်စဉ် ၂၇ ခု ဖွင့်လှစ်ခဲ့ပြီး (ပစ)အင်အား ၁၃၅၀၈၀ ဦးခန့် အဓမ္မစစ်သားစုဆောင်းခဲ့တယ်လို့ ဖော်ပြထားပါတယ်။

လက်ရှိကာလမှာ စစ်တပ်က အဲဒီအင်အားတွေကို အသုံးပြုပြီး လူလှိုင်းစစ်ဆင်ရေးတွေနဲ့ နိုင်ငံအနှံ့ထိုးစစ်ဆင်တိုက်ခိုက်နေသလို စစ်တပ်စစ်ကြောင်းတွေမှာ စစ်မှုထမ်း(ပစ) အင်အား ပါဝင်မှုဟာ ၈၀ ရာခိုင်နှုန်းခန့်အထိ ရှိတယ်လို့ NUG အစိုးရ၊ ကာကွယ်ရေးဝန်ကြီးဌာနက အသိပေးထားတာ တွေ့ရပါတယ်။

Photo | ဩဂုတ်လအတွင်း အကြမ်းဖက်စစ်တပ်ကို တိုက်ခိုက်မှုများ(တော်လှန်ရေးအင်အားစုများ)

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️လက်ရုံးရည်နှလုံးရည်ပြည့်ဝပြီး ရဲဘော်ရဲဘက်ပီသစွာ ကြိုးပမ်းဆောင်ရွက်မှုကြောင့် လေးစားဂုဏ်ပြုခြင်းဟုဆို

၂၇ စက်တင်ဘာ ||| နွေဦးအသံ |||

တိုက်ပွဲမှာ ဒဏ်ရာရရဲဘော်တွေအပြင် ရဲဘော် တဦးရဲ့ အသက်ကို အန္တရာယ်ကြားမှ ကိုယ့်ရဲ့အသက်ကို ပဓာနမထားဘဲ ကယ်တင်ခဲ့တဲ့ ရဲဘော် ဇင်ကြီးကို PDF အထူးလှုပ်ရှားတပ်က ဂုဏ်ပြုငွေနဲ့ ရင်ထိုးတံဆိပ် ချီးမြှင့်လိုက်တယ်လို့ အဆိုပါတပ်ရဲ့ ထုတ်ပြန်ချက်အရ သိရပါတယ်။

ပြည်သူ့ကာကွယ်ရေးတပ်မတော်၊ ဧရာဝတီတိုင်းစစ်ဌာန၊ အထူးလှုပ်ရှားတပ်မှာ တာဝန်ထမ်းဆောင်နေတဲ့ ရဲဘော် ဇင်ကြီးဟာ တိုက်ပွဲအတွင်း ဒဏ်ရာရရဲဘော်တွေနဲ့ ကျဆုံးရဲဘော်ကို မိမိအသက်ကိုပဓာနမထားဘဲ ကယ်ဆယ်ရယူခဲ့တဲ့အပြင် ရဲဘော် တဦးရဲ့ အသက်ကိုလည်း အန္တရာယ်ကြားမှ ကယ်တင်မှုတွေ လုပ်ဆောင်ခဲ့တယ်လို့ အသိပေးထားပါတယ်။

ဒါကြောင့် လက်ရုံးရည်သာမက နှလုံးရည်ပါပြည့်ဝပြီး ရဲဘော်ရဲဘက်ပီသစွာ ကြိုးပမ်းဆောင်ရွက်ခဲ့တဲ့ ရဲဘော် ဇင်ကြီးကို လေးစာဂုဏ်ပြုတဲ့အနေနဲ့ ပြည်သူတွေကိုယ်စား ဂုဏ်ပြုငွေ ၅ သိန်းကျပ်နဲ့ ဂုဏ်ပြုအမှတ်တံဆိပ်ရင်ထိုး ချီးမြှင့်လိုက်ကြောင်း အဆိုပါတပ်က စက်တင်ဘာ ၂၆ ရက်၊ ညပိုင်းမှာ ထုတ်ပြန်ကြေညာထားတာပါ။

ကရင်ပြည်နယ်အတွင်း စစ်ရေးလှုပ်ရှားနေတဲ့ PDF အထူးလှုပ်ရှားတပ်မှ ရဲဘော်တွေအနေနဲ့ လေ့ကေ့ကော်၊ ဘလက်တိုရွာ၊ သေ့ဘော့ဘိုးကုန်း၊ ဥကရစ်ထကုန်း၊ အလယ်စခန်းရွာ၊ တောင်ကြာအင်းနဲ့ ကော့ကရိတ်မြို့ တို့အပြင် ဒီပဲယင်း၊ ယင်းမာပင်ခရိုင် စတဲ့ တိုက်ပွဲစဉ်တွေမှာ ကဏ္ဍအသီးသီးမှ ပါဝင်တိုက်ခိုက်ခဲ့ကြတယ်လို့ သတင်းရရှိပါတယ်။

Photo | အထူးလှုပ်ရှားတပ်က ရဲဘော် ဇင်ကြီးကို ဂုဏ်ပြုချီးမြှင့်စဉ်။

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️ဖာပွန်၊ ကမမောင်းမြို့မှာ စစ်တပ်ကို KNLA ပူးပေါင်းတပ် တိုက်ခိုက်မှု စကစ ၇ ဦးထက်မနည်းသေဆုံး

၂၇ စက်တင်ဘာ ||| နွေဦးအသံ |||

ကရင်ပြည်နယ်၊ ဖာပွန်ခရိုင်၊ ကမမောင်းမြို့မှာ အကြမ်းဖက်စစ်တပ်ကို KNLA ပူးပေါင်းတပ်တွေက တိုက်ခိုက်မှုတွေအတွင်း စစ်ကောင်စီတပ်ဖွဲ့ဝင် ၇ ဦးထက်မနည်း သေဆုံးပြီး လက်နက်ခဲယမ်းများလည်း သိမ်းဆည်းရရှိခဲ့တယ်လို့ သိရပါတယ်။

ကတိုင်တိ-ကမမောင်း လမ်းပိုင်း၊ ဘုရားကုန်းမှာ တပ်စွဲထားတဲ့ စစ်တပ်ကို စက်တင်ဘာ ၂၅ ရက်မှာ တိုက်ခိုက်ခဲ့ပြီး MA1 ၂ လက်၊ MA2 ၁ လက်၊ MA3 ၁ လက်နဲ့ K3 ၃ လက် တို့ကို သိမ်းဆည်းရရှိခဲ့တယ်လို့ KNU မူတြော်ခရိုင်က စက်တင်ဘာ ၂၇ ရက်မှာ ထုတ်ပြန်ထားတာပါ။

ဒါ့အပြင် စက်တင်ဘာ ၁၆ ရက်မှာလည်း ဖာပွန်ခရိုင်အတွင်း KNLA ပူးပေါင်းတပ်နဲ့ စစ်ကောင်စီတပ်တို့ တိုက်ပွဲဖြစ်ပွားခဲ့ပြီး MA1 ၂ လက်၊ MA3 ၁ လက်နဲ့ ခဲယမ်းများ သိမ်းဆည်းရရှိခဲ့တယ်လို့ ဖော်ပြထားပါတယ်။

ပြီးခဲ့တဲ့ စက်တင်ဘာ ၁၄ ရက်မှာလည်း ကတိုင်တိ-ကမမောင်းကြားမှာ အကြမ်းဖက်စစ်တပ်ကို တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂ ဦးသေဆုံးပြီး လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ သတင်းရရှိပါတယ်။

Photo | KNU

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️အမျိုးသားအောင်ပွဲနေ့ရက် လက်တကမ်းအလိုရောက်နေပေမယ့် ခက်ခဲကြမ်းတမ်းတဲ့ ကာလတခုရင်ဆိုင်ရလိမ့်မည်ဟု AA သတိပေး

၂၇ စက်တင်ဘာ ||| နွေဦးအသံ |||

ရခိုင်ပြည်သူတရပ်လုံး မျှော်လင့်တဲ့ အမျိုးသားအောင်ပွဲနေ့ရက်ဟာ လက်တကမ်းအလို ရောက်ရှိနေပြီး တော်လှန်ရေးရဲ့ သဘာဝအတိုင်း ခက်ခဲကြမ်းတမ်းတဲ့ကာလတခုကို မလွှဲမရှောင်သာရင်ဆိုင်ရဦးမယ်လို့ အာရက္ခတပ်တော် (AA) ဒုစစ်ဦးစီးချုပ် ဒေါက်တာ ညိုထွန်းအောင်က သတိပေးလိုက်ပါတယ်။

ရခိုင်အမျိုးသားအဖွဲ့ချုပ် (ULA) ပါတီက စက်တင်ဘာ ၂၇ ရက်မှာ ပထမဆုံး ထုတ်ဝေလိုက်တဲ့ စာစောင်၊ အယ်ဒီတာ့အာဘော်မှာ ဒေါက်တာ ညိုထွန်းအောင်က စစ်ရေးအခြေအနေတွေကို ရခိုင်ဘာသာနဲ့ အခုလို အသိပေးရေးသားထားတာပါ။

မိုးအကုန် ဆောင်းအကူးကာလမှာ အကြမ်းဖက်စစ်တပ် ထိုးစစ်ဆင်နေတဲ့ စစ်တွေ၊ ကျောက်ဖြူ၊ ရခိုင်-မကွေးအစပ်၊ ရခိုင်-ပဲခူးအစပ်၊ ရခိုင်-ဧရာဝတီအစပ် ဒေသတွေအပြင် ချင်း-ပလက်ဝ-ရခိုင်အစပ်နဲ့ ရခိုင်ကမ်းရိုးတန်း ဘက်တွေမှလည်း ထိုးစစ်ဆင်လာနိုင်ပြီး စစ်ရိပ်စစ်ငွေ့သန်းလာတာတွေကို တွေ့နေရတယ်လို့ ဆိုပါတယ်။

အဆိုပါ ဒေသတွေမှာ လက်ရှိအသုံးပြုနေတဲ့ စစ်အင်အားထက် ၂ ဆ မှ ၃ ဆအထိ တိုးပြီး ကြည်း၊ ရေ၊ လေ ထိုးစစ်ကြီးကို တပြိုင်နက်တည်းပြုလုပ်လာနိုင်တာကြောင့် တိုက်ပွဲတွေ ပိုမိုပြင်းထန်လာနိုင်ကြောင်း သတိပေးထားပါတယ်။

ဒါ့အပြင် တိုက်ပွဲတွေတိုက်ရင်း အာရက္ခတိုင်းပြည် တည်ဆောက်ရေးကိုပါ တပြိုင်တည်း ဆောင်ရွက်နေတာကြောင့် ရန်သူ့ထိုးစစ်တွေ ဘယ်လောက်ပဲ များများ၊ ခက်ခဲမှုကြားကနေ တည်တည်ငြိမ်ငြိမ်နဲ့ ရည်မှန်းချက်မပျောက်ဘဲ ဆက်လျှောက်ကြဖို့ AA ဒုစစ်ဦးစီးချုပ်က တိုက်တွန်းထားပါတယ်။

တမျိုးသားလုံးအိပ်မက်ဖြစ်တဲ့ ဖိနှိပ်မှုအောက်မှလုံးဝလွတ်မြောက်ရေး အာရက္ခပြည်သူ့တော်လှန်ရေးအစိုးရက ဦးဆောင်တိုက်ပွဲဝင်နေသလို Through the Strom မုန်တိုင်းကို ဖြတ်သန်းခြင်းဟာ အချိန်မ‌ရွေးရောက်လာနိုင်တဲ့အတွက် အမြဲကျော်ဖြတ်နိုင်ဖို့ ခွန်အား၊ ဉာဏ်ပညာ၊ စည်းလုံးမှုနဲ့ သတ္တိတို့ ရှိနေဖို့လိုကြောင်း သတိပေးထားတာ တွေ့ရပါတယ်။

Photo | AA (ပုံဟောင်း)

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။ လုပ်ပါ။

◼️ဆောမြို့နယ်ရှိ စစ်ဘေးရှောင်ရွာကို တိုက်ပွဲမဖြစ်ဘဲစစ်တပ်ဗုံးကြဲ၊ အမျိုးသမီး ၂ ဦး သေဆုံး

၂၈ စက်တင်ဘာ ||| နွေဦးအသံ |||

မကွေးဒေသ၊ ဆောမြို့နယ်မှာ စစ်ဘေးရှောင်တွေ လက်ခံကူညီပေးနေတဲ့ ကျေးရွာတွေကို အကြမ်းဖက် စစ်တပ်က စက်တင်ဘာ ၂၇ ရက်၊ ညနေ ၄ နာရီခန့်မှာ ဂျက်ဖိုက်တာနဲ့ ဗုံး ၃ လုံး ကြဲချ တိုက်ခိုက်ခဲ့တာကြောင့် အမျိုးသမီး ၂ ဦးသေဆုံးခဲ့တယ်လို့ သိရပါတယ်။

ဆောမြို့နယ်အရှေ့မြောက်ပိုင်းရှိ စစ်ဘေးရှောင်အများစုနေထိုင်တဲ့ ‌ကျေးရွာကို တိုက်ပွဲဖြစ်ပွားတာမရှိဘဲ ဗုံးကြဲတိုက်ခိုက်ခဲ့တာကြောင့် အမျိုးသမီး ၂ ဦး သေဆုံးခဲ့ပြီး ၁၀ နှစ်အရွယ် မိန်းကလေး တဦး အပါအဝင် အရပ်သား ပြည်သူ ၆ ဦး ထိခိုက်ဒဏ်ရာရတဲ့အပြင် လူနေအိမ် ၃ လုံးထက်မနည်း ပျက်စီးသွားခဲ့တယ်လို့ ဒေသ သတင်းမီဒီယာအချို့မှာ ဖော်ပြထားတာပါ။

ဗုံးတွေဟာ လူနေအိမ် ကျဲတဲ့ နေရာမှာ ကျရောက်ပေါက်ကွဲခဲ့တာကြောင့် ထိခိုက်ပျက်စီးမှု သက်သာခဲ့ပြီး ဗုံးကြဲခံရတဲ့ကျေးရွာအနီးရှိ အခြား ရွာတရွာကိုလည်း ဗုံး ၁ လုံး ထပ်မံ ကြဲချခဲ့ရာ ရွာအပြင်ဘက်နားမှာ ကျရောက်ပေါက်ကွဲခဲ့တယ်လို့ ဆိုပါတယ်။

စစ်အုပ်စုဟာ ဆောနဲ့ လောင်းရှည် မြို့နယ်အတွင်း အချက်အခြာကျတဲ့ နေရာတွေမှာ တပ်ဖြန့် အထိုင်ချထားပြီး ဆောမြို့နယ်မှာ စစ်အုပ်ချုပ်ရေးယန္တရား ပြန်လည်ပတ်နိုင်ဖို့ လေကြောင်းမှ နေ့စဉ်ရက်ဆက် ဗုံးကြဲဖိအားပေးနေတာ ဖြစ်နိုင်ကြောင်း သုံးသပ်ထားပါတယ်။

ဒါ့အပြင် အခုလိုတိုက်ခိုက်မှုတွေ ဆက်လက်ပြုလုပ်လာနိုင်တာကြောင့် ဒေသခံ ပြည်သူတွေအနေနဲ့ လေကြောင်းရန်နဲ့ မြေပြင်စစ်ကြောင်းရန်တွေကို အထူးဂရုစိုက်ကြဖို့ သတိပေးထားတာ တွေ့ရပါတယ်။

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️ဗန်းမော်မြို့ နမ့်ဖားမှာတပ်စွဲထားတဲ့ စစ်တပ်စခန်းကို KIA PDF ပူးပေါင်းတပ် တိုက်ခိုက်သိမ်းပိုက်

🔹အပေါ့စား သံချပ်ကာယာဉ် အချို့နဲ့ စစ်သုံးပစ္စည်းတွေ သိမ်းဆည်းရရှိဟုဆို

၂၈ စက်တင်ဘာ ||| နွေဦးအသံ |||

ကချင်ပြည်နယ်၊ ဗန်းမော်မြို့၊ နမ့်ဖားရှိ အကြမ်းဖက်စစ်တပ်စခန်းကို KIA PDF ပူးပေါင်းတပ်တွေက စက်တင်ဘာ ၂၆ ရက်မှာ တိုက်ခိုက်သိမ်းပိုက်လိုက်ပြီး သံချပ်ကာယာဉ်အချို့ကိုလည်း သိမ်းဆည်းရရှိခဲ့တယ်လို့ KIA နဲ့ ကချင်စစ်ရေးသတင်းရင်းမြစ်များထံမှ သိရပါတယ်။

ဗန်းမော်မြို့အနီး နမ့်ဖားကျေးရွာမှာ တပ်စွဲထားတဲ့ စစ်တပ်စခန်းကို ညနေပိုင်းမှာ KIA ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့တယ်လို့ KIO/KIA သတင်းနဲ့ ပြန်ကြားရေး LAIZA TV က စက်တင်ဘာ ၂၇ ရက်မှာ ထုတ်ပြန်ကြေညာထားပါတယ်။

စစ်တပ်စခန်းတိုက်ခိုက်သိမ်းပိုက်မှုအတွင်း စစ်တပ်ထံမှာ BA Series အပေါ့စား သံချပ်ကာတိုက်ခိုက်ရေးယာဥ်တွေနဲ့ စစ်သုံးဆက်စပ်ပစ္စည်းတွေကိုလည်း သိမ်းဆည်းရရှိခဲ့တယ်လို့ ဒေသစစ်ရေးသတင်းရင်းမြစ်အချို့က အသိပေးဖော်ပြထားပါတယ်။

အဆိုပါ စစ်တပ်စခန်းသိမ်းပိုက်မှုနဲ့ ပတ်သက်ပြီး နှစ်ဖက်သေဆုံးထိခိုက်မှု၊ စစ်လက်နက်ပစ္စည်း သိမ်းဆည်းရရှိမှု အခြေအနေတွေနဲ့ ပတ်သက်ပြီး သီးခြားအတည်ပြုနိုင်ခြင်း မရှိသေးသလို KIA ကလည်း ဖော်ပြထားတာ မတွေ့ရသေးပါဘူး။

ဗန်းမော်မြို့တွင်းမှာ စစ်တပ်က အခုရက်ပိုင်းအတွင်း စစ်ရေးလှုပ်ရှားမှုတွေ ပြုလုပ်နေသလို လေကြောင်းတိုက်ခိုက်တာ၊ လက်နက်ကြီးတွေနဲ့ ရမ်းသမ်းပစ်ခတ်တာတွေကိုလည်း နေ့စဉ်ရက်ဆက် ပြုလုပ်နေပြီး တိုက်ပွဲတွေပြင်းထန်ဖြစ်ပွားလျက်တယ်လို့ သတင်းရရှိပါတယ်။

Photo | လူမှုကွန်ယက်

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။