Nega charchagan, qiziqishsiz, zehnsiz, quvvatsizmiz?

Eng katta "energiya-so'ruvchi"larimiz(ga qarshi turmaymiz):
- gunoh va ma'siyatlar: atrofimizda to'lib ketgan;
- alam va qo'rquv: ichimizdan kemirib turibdi;
- kibr va hasad: qalbimizni qoraytirib, harakatlarimizdan ixlosni ketkazyabdi;
- lag'v: o'zimizga tegishli bo'lmagan befoyda narsalarni pul sarflab bo'lsa ham sotib olamiz;
- har narsaning ortiqchasi: balansdan chiqqan yuklamalar va dam olishlar.

Bularning o'zi quvvatni so'rib, bizni lanj va dangasa qilishga yetyabdi.
Boshqa psixologik, jismoniy va qalbiy buzilishlarning asli ham shular.

Bular kamaysa, inson tuzala boshlaydi.
Quvvati o'ziga yo'naladi, tashqariga emas.
Keyingina solih ishlarga kuch va g'ayrati uyg'onadi, nasib qilsa.

© ULUL ALBAB yozdi

Telefonga qarolmadim, desam, qanday bunga erishish mumkin, bizga ham o'rgating, deb qolishdi. #youasked

Makro darajada tavsiya: o'zingizga telefondan ham qiziqarliroq hayot quring.
Mikro darajada bu qanday bajariladi?:

1. Maqsadlarimni aniq belgilab olishim muhim.
- Kamida bir kun oldin ertaga qaysi yirik ishlarni tugatib olishim kerakligini miyadan o'tkazib olaman.
- Erta kelganda, kunni telefondan boshlamaslikka harakat qilaman.
- Telefonda post qilish, ulashishdan avval o'zimdan so'rayman "hayotda ham shuni his qilyabsanmi/qilganmisan?". Bu real hayotimni onlayn hayotdan ustun qo'yishga yordam beradi.
- Hayotda o'zi nimaga erishmoqchiman, maqsad va vazifalarim yo'lida harakatlanyabmanmi - bularni tez-tez ko'rib chiqishim kundalik qarorlarni osonlashtiradi, maqsadimga xizmat qilmaydigan ishlardan oson voz kechishga yordam beradi.
- Balans uchun kunlarga shunchaki odat emas, balki mazmun olib keladigan tajribalarga ochiqman.

2. Kun davomida diqqatimni chalg'itib, irodamni sinaydigan ishlardan qochaman:
- Qoidalar tuzib, ularga rioya qilishga harakat qilaman. Masalan, 9-10gacha telegramga kirmaslik (kirsam ham dars uchun bo'ladi va undan tashqari narsaga qaramay chiqib ketaman), kechki payt 9-10dan keyin ham gadjetlarda ishlarni tamomlagan bo'lish.
- Telefonda ortiqcha bildirishnomalar o'chirilgan, ba'zan esa "parvoz" rejimida turadi.
- Kerak bo'lsa, bir nechta telefon tutish mumkin: ish va oila uchun alohida. Tajribada bildimki, kerakli masala/odam sizni o'zi topadi.
- Muhim ish vaqtida chalg'ituvchilarni ko'zga ko'rinmaydigan joyda qoldiraman (tanlov imkoniyatim kamayadi, irodam ortiqcha bosim ostida qolmaydi).

3. "Vaqt tuynuk"larimni mazmunli ish bilan to'ldirish.
- Ko'chada (navbatda, yo'l yo kutish) bo'lib qolgan vaqtlarda ham o'zimni noqulay his qilib telefon titmayman. Kamida fikrlarimni tahlil qilaman, kuzatuvlarimni yozib olaman.
- Boshqa payt telefon o‘rniga o‘qiydigan kitoblar, vazifalar tayyor turadi (qilish mumkin: xatmni davom ettirish, murojaa qilish, tafsir o'qish, dars yoki mutolaa kitob).
- Har zerikkanda qo'limga telefon olavermayman. O'rniga boshqa qilishim mumkin bo'lgan narsalar ro'yxati bor, shunga qarayman (bu ro'yxat boshqa vaqt esga kelganda yozib-yozib, shakllanib qolgan bo'ladi).
- Yana oila, yaqinlar, farzanddan xabar olish yoki boshqa muhim lekin kichik ishlarni qilib olish mumkin.

Aslida bu yangilik emas, avval postlarda ham shu va bundan ko'p tavsiyalarni berib kelganmiz. Alloh foydali qilsa, post qoladi (bunday uslubda yozish odat emasdi).

© ULUL ALBAB yozdi

Nafsning qullarini yetishtirayotgan zamonda yashayapmiz.

Kundan kunga soni ortayotgan yemakxonalar; turfa xilligi bilan qarorlarimizni sekinlashtirayotgan menyular; har qadamda nosog'lom ichimliklar reklamasi,..

Boshing og'ridimi - dori ich.
Ko'p yeb qo'ydingmi - dori ich.
Ko'ngling buzilyaptimi - gazli ich.
Charchadingmi - dam ol.
Uzoq ishladingmi - PS, CS o'yna.
Qiladigan ishing yo'qmi - uxla.
Siqildingmi - kino ko'r, ashula eshit.

Xohladingmi, qil. Xohlamadingmi, qilma.
Yoqdimi, kiy. Yoqmadimi, uloqtir.

Shu qadar maishiy bo'lib ketdikki, nafs xohishi bilan ruh ehtiyojini ajratolmayapmiz.
Har narsa qilib ko'ryapmiz, lekin baribir halovat topmayapmiz.
Chunki ruhning ehtiyojlari nafs istaklari bilan aslo qonmasligini tushunmayapmiz.
Uning ma'naviy ozuqasini berish, riyozat, tafakkur, tilovat, tadabbur bilan qonishini anglamayapmiz.

Aslida, zamonda ayb yo'q. Bu zamonni biz tarbiyaladik, endi u bizni "tarbiya"layabdi.

© ULUL ALBAB yozdi

Tushunamiz, yoshsan, qiziquvchansan.
Tushunamiz, ular mashhur, ular boy, ular "muvaffaqiyat"li.
Tushunamiz, ko'rganda hayajoningni tiyolmaysan.
Tushunamiz, ularga "havas"ing kuchli.

Biroq, qaniydi:
- shu havasingni solihlarga, sen yurgan shahar tuprog'ida yotgan shaxslar ilmiga yo'naltirsang;
- himmat va hayajoningni to'g'ri sabablar ustida jamlasang;
- shahvat (ishtaha) va hirs (intilishing)ni arziydigan maqsadda birlashtirsang;
- iymoning bilan Allohning aziz va mukarram bandasi ekaningni anglasang;
- odamlardan avliyo yasamay, haqiqiy shafoatchingga muhabbatni kuchaytirsang,..
dunyo va oxirating uchun ancha foydali bo'lardi. #qalbdan

Qandaydir janob maxluqlarga, chala kiyimda raqsga tushib o'ziga rom qiladiganlar va yana boshqa "aldamchi ko'zbo'yamachi" (arabchada, dajjol)lar hali ko'p bo'ladi, afsus.
Lekin sen qaysi tomonda bo'lasan? Bundan xursand kuladiganlardanmi yo ahvoliga achinib yig'laydiganlardanmi?!

© ULUL ALBAB yozdi

Vaqt bering

Isloh osonmas.
O'zgarish tez bo'lmaydi.
15/20/30/40 yil bir uslubda yashagansiz.
Endi bir-ikki narsani o'zgartirib o'n kunda natija kutmang.

Harakatdan to'xtamang, ammo o'zingizga vaqt ham bering.
Shuncha yillik turmush tarzi, odatlar, fikrlash tizimi bir tunda o'zgarib qolmaydi.
Bu bir necha bosqichli jarayon sizni toblashiga qo'yib bering.

#foyda
Harakat borasida shoshiling.
Natija borasida sabr qiling.

© ULUL ALBAB yozdi

Vaqti-vaqti bilan bularni tozalab turish #muhim:

Gadjetlar: telefon, kompyuter, planshet, televizor – ko‘z va ongni charchatadi.
📌 Haftada kamida yarim/bir kun faqat tabiiy yorug'likka qarang.

Axborot: yangiliklar, ijtimoiy tarmoqlar, scrolling, reklama – miyaga keraksiz yuk beradi.
📌 Yangilikka qiziqish vaqti o'zini tiyish, sabr qilish.

Taom: ortiqcha shirinlik, yog‘, kofein – tanani charchatadi, lanj qiladi.
📌 Ba'zan shirinlik/kofe/kechki ovqat kabilarni o'tkazib yuboring.

Odamlar: ortiqcha gap-so‘z, majlislar, g‘iybat, bahs, kulgu – qalbni charchatadi va qotiradi.
📌 Bir necha soatlarga bo'lsa ham, yolg'iz qoling.

Moddiyat: pul sarflash, sanash, ortiqcha hisob-kitob – qalbni dunyoga bog'laydi, baxil qiladi.
📌 Miyani bo'sh qo'ying, rizqingizga Alloh kafil.

O‘ylar: vasvasa, ortiqcha tashvish va xavotir, uzun orzular – iymonni zaiflashtiradi, besabr qiladi.
📌 Har safar xavotirlar chalg'itganda Allohni zikr qiling va Unga tavakkalni ongli mashq qiling.

© ULUL ALBAB yozdi

Keng qalblar mehrdan aziyatgacha qamrab oladi.
Chuqur qalblar ko'ma oladi sirlarni, dardlarni.
Qalbi isloh bo'lganning ishi yengil bo'ladi.
Qalbi to'g'rining tili to'g'ri bo'ladi.

#eynafs Istasang so'ra — so'raganga beriladi:
رَبِّ اشْرَحْ لِي صَدْرِي - Ey Robbim, mеning qalbimni kеng qil
وَيَسِّرْ لِي أَمْرِي - Mеning ishimni oson qil
وَاحْلُلْ عُقْدَةً مِنْ لِسَانِي - Tilimdagi tugunni yechgin
يَفْقَهُوا قَوْلِي - So‘zimni anglasinlar

© ULUL ALBAB yozdi

#ustoz_darsda #foyda

Qur'on bilan munosabatimiz qanday bo'lishi kerak?

Shayx:
- Telefon bilan munosabatimiz qanday bo'lsa, shunday.

© ULUL ALBAB yozdi

Qur'on tilovati uchun qulay va fazilatli vaqtlar #samaradorlik

1. Boshqa ishlar bilan to'qnashmaydigan:
- bomdoddan keyin quyosh chiqquncha;
- sahar vaqti bomdodgacha;
- tunda tahajjud vaqtida.
Bu vaqtlarda tashqi chalg'ituvchilar minimal bo'lgani uchun Quron o'qish uchun eng qulay fursat hisoblanadi. Foyda va barokati cheksiz.

2. Boshqa ishlar bilan bir qatorda:
- diqqat jamlangan paytda;
- namozlardan oldin va/yo keyin;
- dam olish vaqtlarida;
- biror daqiqa imkon tug'ilib qolishi bilan;
- uyqudan oldin.
Bu vaqtlarda (kutilmagan) chalg'ituvchilar ko'p bo'lgani uchun doim ham imkon yo iroda topilmasligi mumkin.

Aslida, Qur'onni istalgan vaqtda o'qish mumkin. Lekin bardavomlik uchun muayyan vaqt bo'lgani maqsadga muvofiq.
Vazifaning asosiy qismini (1)dagi vaqtlarda o'qib, qolganini kun davomida (2)ga taqsim qilish ham yaxshi foyda beradi, in sha Alloh.

© ULUL ALBAB yozdi

Ey odam bolasi, #eynafs. #tajriba

- dunyoda qanday kayf surishni xohlasang, sur, lekin oxirat g'amisiz maqsadsiz bo'lib yuraverasan.

- qancha g'uluvga ketishni istasang, ket, lekin namozsiz baribir o'zingni tugal his qilmaysan.

- qanday diploming, tijorating, moling bo'lsa, bo'lsin, lekin iymon/hidoyatsiz puch yong'oqdek bo'laverasan.

- kimni sevsang sev, kimdan nafratlansang, nafratlan, lekin Allohning muhabbatisiz saodat topmaysan.

- oilang qancha "ideal" bo'lsa, bo'lsin, lekin ilm-ma'rifatsiz shuncha nursiz, sakiynatsiz bo'lib qolaveradi.

Ey odam bolasi, qanday yashashni istasang, yasha, lekin baribir Allohsiz, kalomisiz, ibodat va itoatsiz o'zingni eng badbaxt insondek his qilaverasan.
Ertami-kech shu xulosaga kelasan.
Undan avval Robbingni tanib, unga qaytib ol.
Eng saodatli sen bo'lasan.

© ULUL ALBAB yozdi

Kimdan o'rganay? #foyda

Xatodan o'rgan.
Xato qilganlardan o'rgan.
Xato qilganini bilganlardan o'rgan.
Xatosini tan ololadiganlardan o'rgan.
Xatosi uchun kechirim so'roladiganlardan o'rgan.

Xatosi ularni kamtar qilganlardan o'rgan.
Xatosidan dars o'rganganlardan o'rgan.
Xatosidan keyin isloh bo'lganlardan o'rgan.
Xatosini Allohdan to'siq deb bilmay, Unga yaqinlashganlardan o'rgan.

Xatosidan yo'qotganlardan o'rgan.
Xatosini takrorlamaslik uchun yechim izlaganlardan o'rgan.
Xatosini sen takrorlamasligingni istagan xayrixohlardan o'rgan.

© ULUL ALBAB yozdi