Xonobod shahrida “Inson” ijtimoiy xizmatlar markazi tomonidan bolalarni qo‘llab-quvvatlashga qaratilgan yana bir erta aralashuv xizmati yo‘lga qo‘yildi.

Mazkur xizmat rivojlanishida ortda qolish kuzatilayotgan 3 yoshgacha bo‘lgan bolalarga o‘z vaqtida yordam ko‘rsatish, ularning rivojlanishini qo‘llab-quvvatlash hamda ota-onalarga zarur tavsiyalar berishga qaratilgan.

Ushbu xizmatning yo‘lga qo‘yilishida shahar hokimi ham ishtirok etdi. Tadbir davomida davlatimiz tomonidan bolalarga ko‘rsatilayotgan g‘amxo‘rlik, ayniqsa, alohida e’tibor va ko‘makka muhtoj bolalarning jamiyatga tezroq moslashishi, tengdoshlari qatorida ta’lim-tarbiya olishi va ijtimoiy hayotga faol qo‘shilishi uchun yaratilayotgan imkoniyatlar alohida ta’kidlandi.

Shahar hokimi o‘z so‘zida Prezidentimiz tomonidan bolalar manfaatlarini ta’minlash, ularning har tomonlama rivojlanishi va jamiyatga integratsiyalashuviga katta e’tibor qaratilayotganini qayd etdi.

E’tiborlisi, 3 yoshgacha bo‘lgan bolalar uchun ushbu xizmat bepul ko‘rsatiladi. Belgilangan yoshdan katta bolalar uchun esa xizmatlar qo‘shimcha to‘lov asosida taqdim etiladi.

Mazkur xizmat bolalarning rivojlanishidagi ehtiyojlarni erta aniqlash, ularga o‘z vaqtida yordam ko‘rsatish va oilalarni qo‘llab-quvvatlashda muhim ahamiyat kasb etadi.