Seminar avvalida Namangan viloyati Yoshlar ishlari boshqarmasi boshlig‘i Oqiljon Xasanov yangi tayinlangan yoshlar yetakchilari bilan samimiy muloqot o‘tkazdi. Suhbat davomida mahallalarda yoshlar bilan ishlashning ustuvor yo‘nalishlari, yetakchilar zimmasidagi mas’uliyat va vazifalar, yoshlarning muammo hamda takliflarini o‘rganish, ularning tashabbuslarini qo‘llab-quvvatlash masalalariga alohida e’tibor qaratildi.

Shuningdek, yoshlar yetakchilari o‘z faoliyatini aniq maqsad va reja asosida tashkil etishi, har bir yosh bilan individual ishlashi, mahalladagi yoshlarning qiziqishlari, ehtiyojlari va salohiyatini chuqur o‘rganishi lozimligi qayd etildi. Bunda yoshlarning bandligini ta’minlash, ularni kasb-hunarga yo‘naltirish, tadbirkorlik tashabbuslarini qo‘llab-quvvatlash, bo‘sh vaqtini mazmunli tashkil etish hamda iqtidorli yoshlarni aniqlash muhim vazifalardan ekani ta’kidlandi.

O‘quv-seminar davomida ishtirokchilarga yoshlar yetakchilarining asosiy vazifalari, xizmat faoliyatini to‘g‘ri tashkil etish, ish rejalarini ishlab chiqish, amalga oshirilgan ishlar yuzasidan hisobotlarni tayyorlash va taqdim etish tartibi, davomatni yuritish hamda xizmat intizomiga rioya qilish bo‘yicha batafsil tushuntirishlar berildi.

Bundan tashqari, davlat xizmatchilarining odob-axloq qoidalari, xizmat madaniyati, muomala odobi, kasbiy etika va xizmat vazifalarini bajarishda mas’uliyatli bo‘lish masalalari ham muhokama qilindi. Yoshlar yetakchilarining tashqi ko‘rinishi, jamoatchilik bilan muloqot madaniyati, fuqarolar, ayniqsa, yoshlar bilan ishlashda xushmuomalalik va xolislikka rioya etishi muhimligi tushuntirildi.

Seminar doirasida yoshlar yetakchilarining media savodxonligini oshirish, ijtimoiy tarmoqlardan samarali foydalanish hamda mahallalarda amalga oshirilayotgan ishlarni keng jamoatchilikka to‘g‘ri va sifatli yetkazish masalalariga ham alohida e’tibor qaratildi.

Jumladan, ijtimoiy tarmoqlarda rasmiy sahifalarni yuritish, mazmunli postlar tayyorlash, foto va videomateriallarni sifatli yoritish, axborotlarni tezkor va ishonchli taqdim etish, shuningdek, internet makonida xizmat odobi va axborot xavfsizligi talablariga rioya qilish bo‘yicha tavsiyalar berildi. Yoshlar yetakchilari o‘z faoliyatini yoritishda shunchaki hisobot berish bilan cheklanib qolmasdan, amalga oshirilayotgan ishlarning mazmuni va yoshlar hayotidagi amaliy natijalarini ko‘rsatishi lozimligi qayd etildi.

Yoshlar ishlari boshqarmasi xodimlari tomonidan yangi tayinlangan yetakchilarga mahallalarda yoshlar bilan ishlash tizimini samarali yo‘lga qo‘yish, mavjud imkoniyatlardan unumli foydalanish, yoshlarning muammolarini o‘z vaqtida aniqlash va ularni hal etish bo‘yicha tegishli tashkilotlar bilan hamkorlikni yo‘lga qo‘yish yuzasidan amaliy tavsiyalar berildi.