‼️Президент Қасым-Жомарт Тоқаев Жамбыл облысының әкімі Ербол Қарашөкеев пен Төтенше жағдайлар министрі Шыңғыс Әріновтің өңірдегі жер сілкінісінен кейінгі ахуал бойынша баяндамаларын тыңдады

➤ Мемлекет басшысы Премьер-министр Олжас Бектеновке әлеуметтік нысандар мен тұрғын үйлерді қалпына келтіру және жөндеу жұмыстарын жүргізу үшін қажетті көмек көрсетуді тапсырды.

➤ Үкімет облыстағы ахуалды бақылауға алды.

🇰🇿🇺🇿Қасым-Жомарт Тоқаев пен Шавкат Мирзиёев Алматы тау шаңғысы кластерімен танысты

🟦Қала әкімі Ерболат Досаев президенттерге Іле Алатауының асқаралы шыңдарын көрсетіп, Кіші Алматы шатқалындағы «Медеу» селден қорғау бөгетін салу тарихы жөнінде айтты. Сонымен қатар шетелдік және жергілікті альпинистер мен туристер арасында танымал бағыттар таныстырылды.

🟦Қасым-Жомарт Тоқаев пен Шавкат Мирзиёев қала әкімінің еліміздегі ең ірі «Шымбұлақ» тау шаңғысы курорты жөніндегі есебін тыңдады. Қазіргі кезде мұнда 5 аспалы жол жұмыс істеп тұр. Ал шаңғы тебуге арналған трассаның жалпы ұзындығы 25 шақырымды құрайды. Былтыр Шымбұлаққа 1,4 миллион адам келген.

🟦Мемлекеттер басшылары Алматының туристік әлеуетіне жоғары баға берді. Олардың пікірінше, әсем табиғат аясында орналасқан және дамыған инфрақұрылымы, сапалы жолы бар тау шаңғысы курорты – Орталық Азиядағы қысқы және жазғы демалысқа лайық ең тартымды орындардың бірі.

🟦Президенттерге Алматы тау кластерін одан әрі дамыту перспективасы туралы мәлімет берілді. Атап айтқанда, «Шымбұлақтың» қазіргі тау шаңғысы трассасын 56 шақырымға дейін ұзарту және жаңадан 65 шақырым инфрақұрылым салу жоспарланып отыр.

🇰🇿🇺🇿 Қазақстан мен Өзбекстан президенттері «Медеу» спорт кешеніне барды

🟦Қасым-Жомарт Тоқаев пен Шавкат Мирзиёев «Медеу» мұз айдынын аралап көріп, тау шатқалында орналасқан бірегей нысанның тарихынан сыр шертетін фотокөрмемен танысты.

🟦Мұз айдынының әлемдік спорт тарихындағы орны ерекше. Президенттерге 1972-1991 жылдары мұнда әйелдер мен ерлер арасында өткен жарыстарда барлық қашықтық бойынша 247 рет рекорд орнатылғаны жөнінде айтылды. «Медеу» әлі күнге Қазақстанның ең танымал туристік нысандарының санатына кіреді. 2024-2025 жылғы маусымда мұз айдынына 460 мың адам келген.

🟦Мемлекеттер басшыларына «Медеуді» орнықты туризм моделі бар әлемдік деңгейдегі орталыққа айналдыруды көздейтін жаңа даму жобасы таныстырылды.

🟦Қасым-Жомарт Тоқаев пен Шавкат Мирзиёев алматылық спортшы Евгений Кошкинмен әңгімелесті. Ол биыл Әлем кубогінің соңғы екі кезеңінде жеңімпаз атанып, Азия ойындарында жүлделі орыннан көрінген болатын. Жуырда өткен Қазақстан спартакиадасында спортшы айқын жеңіске жетіп, 100 метр қашықтықта бейресми әлем рекордын жаңартты (9,31 секунд).

🟦Бұдан кейін мемлекеттер басшылары мәнерлеп сырғанау шеберлерінің өнерін тамашалады.

🌐🌐🌐 Әлемдегi жаңалықтар:

🇺🇸 🇺🇦 Трамптың ақпараты бойынша, Зеленский АҚШ пен Украина арасындағы ресурстар тұралы келісімге қол қоймайды, хабарлайды Reuters.

🇺🇸 🔥АҚШ-тың Нью-Мексико штатында Республикалық партияның бөлімшесін өртеген, хабарлайды CBS News.

От Альбукерке қаласындағы ғимараттың кіреберісін зақымдаған. Жарақат алғандар жоқ. Сондай-ақ, бұзушылар аэрозольды бояумен жазу қалдырған, онда АҚШ-тың иммиграциялық және кедендік полициясы Ку-клукс-кланмен теңестірілген.

🇺🇸🇮🇷Трамп Иранға ядролық келісімден бас тартқаны үшін «көріңбеген бомбалаулармен» қорқытты.

👔 Дональд Трамп жексенбі күні АҚШ Конституциясына қайшы келетін үшінші президенттік мерзімге үміткерлік туралы айтқан сөзіне қатысты «қалжындамадым» деп мәлімдеді, бірақ бұл туралы әлі ойлану «ерте» деп қосты.

🇷🇺 S&P Global деректері бойынша, Ресей 586 кемеден тұратын тарихтағы ең үлкен танкерлік флотты басқарып отыр, бұл Иран мен Венесуэла флоттарынан бірге алып қарағанда бес есе көп.

Ресей танкерлері күніне шамамен 3,5 миллион баррель мұнай тасиды.

Ресей мұнайының негізгі сатып алушылары — Үндістан мен Қытай сияқты Азиялық гиганттар, олардың өсіп келе жатқан сұранысы батыс санкцияларының әсерін бәсеңдетеді.

🇺🇸 🇯🇵 🇨🇳 АҚШ қорғаныс министрі Пит Хегсет елдің Қарулы Күштері Үнді-Тынық мұхиттер аймағында Қытайға қарсы тұру үшін Жапонияда «соғыс» командалық базасын құратынын мәлімдеді.

Токиодағы сапары кезінде Хегсет Жапониямен одақтың маңыздылығын атап өтіп, Дональд Трамптың «Америка бірінші» саясатының аймақтағы одақтастарға әскери қолдауды әлсіретпейтінін айтты.

🇯🇵 🇰🇷 🇨🇳 Жапония, Оңтүстік Корея және Қытай Сеулдағы сауда министрлерінің кездесуінде «тығыз ынтымақтасуға» және «жоғары деңгейде» сауда келіссөздерін жүргізуге келісті.

Бірлескен мәлімдемеде министрлер үштік экономикалық ынтымақтастықтың «туындаған мәселелерді тиімді шешу үшін» қажеттілігін атап өтті, бұл Трамптың тарифтеріне сілтеу болуы мүмкін. Бұл соңғы бес жылдағы алғашқы осындай кездесу болды.

🇫🇮Финляндия президенті Александер Стубб 20 сәуірден бастап Украинада толық атысты тоқтату туралы бастама ұсынды.

Ол ұсынысты Флоридада Трамппен жеке кездесуінен кейін айтты, онда лидерлер гольф ойнап келіссөздер жүргізді.

🇮🇱 🇵🇸 Израиль премьер-министрі Биньямин Нетаньяху елдің ХАМАС-қа қарсы шабуылын жалғастыратынын мәлімдеді.

🇰🇿🇸🇮 Қасым-Жомарт Тоқаев пен Наташа Пирц-Мусар БАҚ өкілдері үшін брифинг өткізді

✔️Мемлекет басшысы өзінің шақыруын қабыл алып, Қазақстанға алғаш рет ресми сапармен келген Наташа Пирц-Мусарға ризашылығын білдірді. Президенттің айтуынша, Словения – Қазақстанның Еуропа Одағындағы маңызды серіктесі әрі екі елдің қарым-қатынасы достық және өзара сыйластық рухында нығайып келеді. Оның айқын дәлелі – былтыр Любляна қаласында Қазақстан Елшілігінің ашылуы.

– Мен мұны ықпалдастығымызды дамыту жолындағы маңызды қадам деп санаймын. Қазақстан екі ел арасындағы достықты одан әрі тереңдетуге мүдделі. Сондықтан бұл сапардың мән-маңызы айрықша. Біз бүгін құрметті Президент Пирц-Мусар ханыммен мазмұнды әрі жемісті келіссөз жүргіздік. Қазақ-словен ынтымақтастығының аясын кеңейту жолын талқыладық. Нақты уағдаластықтарға қол жеткіздік. Бірлескен мәлімдеме қабылдадық. Сондай-ақ бүгін бірқатар үкіметаралық және мекемеаралық келісім жасалды. Соның ішінде денсаулық сақтау, туризм, білім беру салаларына қатысты маңызды құжаттар бар. Бұл келісімдерді тиімді іске асыру арқылы екі елдің ынтымақтастығын жандандыра түсеміз деп сенемін, – деді Қасым-Жомарт Тоқаев.

✔️Президенттер екіжақты сауда-экономикалық және инвестициялық байланыстарды арттыруға келісті. Қазір қос мемлекет фармацевтика, жаңартылатын энергия, инженерия, телекоммуникация бағыттарында маңызды жобаларды жүзеге асырып жатыр. Мемлекет басшысы елімізде осы салаларда 20-ға жуық словен компаниясы табысты жұмыс істеп жатқанына тоқталып, экономикалық байланыстардың ауқымын одан әрі кеңейтудің маңызын атап өтті.

– Тау-кен, жасыл энергетика, атом өнеркәсібі, цифрландыру және инновация, денсаулық сақтау, туризм салаларында тың жобаларды жүзеге асыруға келістік. Қолда бар мүмкіндікті тиімді пайдалану үшін Үкіметаралық комиссияның жұмысын жандандырып, оның қызметін жаңа деңгейге көтеруге шақырдым. Екі ел бизнес өкілдерінің байланысын тереңдету – маңызды міндеттің бірі. Осыған орай, «Қазақстан – Словения» іскерлік кеңесін құру мәселесін талқыладық. Елімізге Словенияның ірі кәсіпкерлері де келді. Ертең олардың қатысуымен бизнес-форум өтеді. Бұл іс-шара осы бағыттағы жұмысты күшейтуге ықпал етеді деп ойлаймын, – деді Қазақстан Президенті.

🇰🇿🇸🇮Екі ел басшылары көлік-логистика саласындағы байланыс аясын кеңейту мәселесін талқылады

✔️Атап айтқанда, Транскаспий халықаралық көлік дәлізі жобасына Словенияның «Лука Копер» теңіз портын қатыстыру жөнінде ортақ пікірге келді. Өзара алыс-берістің көлемін арттыру үшін президенттер құзырлы органдарға нақты шаралар қабылдау туралы тапсырма берді. Сондай-ақ Қасым-Жомарт Тоқаев Қазақстанның су ресурстарын басқару ісінде словен тарапының озық тәжірибесін зерделеп, бірлесе жұмыс істеуге дайын екенін жеткізді.

✔️Бұдан бөлек, тараптар мәдени-гуманитарлық ықпалдастық жайында да пікір алмасты.

– Білім, ғылым және мәдениет салаларындағы қарым-қатынасты жандандыруға мол мүмкіндік бар. Жалпы Словенияның білім беру жүйесі дүние жүзінде озық жүйе ретінде мойындалған. Сондықтан біз екі ел университеттері арасында байланыс орнатуға мүдделіміз. Словенияның Йожеф Стефан институты Назарбаев университетімен байланыс орнатуға қызығушылық танытып отыр. Қазақстан Словенияның жоғары оқу орындарымен және зерттеу орталықтарымен ынтымақтастықты нығайтуға дайын, – деді Мемлекет басшысы.

✔️Тараптар халықаралық және аймақтық өзекті мәселелерді талқылап, ұстанымдарының ортақ екенін жеткізді.

– Қазіргі геосаяси жағдай өте күрделі. Президент Пирц-Мусар екеуіміз әлемдегі қақтығыстарды Біріккен Ұлттар Ұйымы Жарғысы мен халықаралық құқық қағидаттарына сай бейбіт жолмен шешу қажет екенін құптадық. Көпжақты құрылымдар аясындағы ықпалдастықты одан әрі күшейтуге мүдделі екенімізді растадық. Алматыда Орталық Азия мен Ауғанстан үшін Орнықты даму мақсаттары жөніндегі Біріккен Ұлттар Ұйымының аймақтық орталығын ашу туралы бастаманы қолдаған Словения тарапына ризашылығымды білдіремін. Жалпы бүгінгі келіссөздер жемісті болды деп күмәнсіз айтуға болады. Осы сапардың нәтижесінде қазақ-словен ықпалдастығы нығайып, жаңа деңгейге көтеріледі деп сенемін.

Олжас Бектенов Президенттің тапсырмаларын іске асыру шеңберінде геологиялық барлау мен жер қойнауын пайдалануды дамыту жөнінде кеңес өткізді

📌 Премьер-министр Олжас Бектенов Мемлекет басшысының «Әділетті Қазақстанның экономикалық бағдары» атты халыққа Жолдауында және биыл қаңтарда Үкіметтің кеңейтілген отырысында қойылған міндеттерді іске асыру шеңберінде геология мен жер қойнауын пайдалануды дамыту мәселелері жөнінде кеңес өткізді.

🔷 Кеңесте Өнеркәсіп және құрылыс министрлігінің геологиялық-геофизикалық зерделеу алаңын кеңейту, салаға инвестициялар тарту, жаңа перспективалы жобаларды іске асыру жөніндегі тәсілдері қаралды. Сондай-ақ «Самұрық-Қазына» ҰӘҚ АҚ және «Тау-Кен Самұрық» АҚ басшылығы да қатысты.

✔️ 2026 жылға қарай геологиялық-геофизикалық зерттеу алаңын 2,2 млн км2-ге дейін ұлғайту бойынша жүргізіліп жатқан жұмыстарға назар аударылды. Өнеркәсіп және құрылыс министрі Ерсайын Нағаспаев бүгінде жер қойнауын мемлекеттік геологиялық зерттеу 1:200 000 масштабта жүргізіліп жатқанын баяндады. Перспективалы жобаларда 1:25 000 масштабты енгізу жоспарлануда, бұл әлеуетті кен орындарын анықтауға, сондай-ақ саланың инвестициялық тартымдылығын арттыруға және егжей-тегжейлі картаға түсіруге мүмкіндік береді.

🔘 Үкімет отырысында (2024 жылғы 3 желтоқсанда) жер асты ұлттық байлықты зерттеуге, мемлекеттік компанияларды тартуға қатысты бұрын қойылған міндеттер шеңберінде ведомство «Тау-Кен Самұрық» ұлттық тау-кен компаниясымен өзара іс-қимылды күшейтті. Бірінші кезеңде министрлік перспективалы учаскелерді анықтай отырып, геологиялық барлау жүргізеді. Бұдан әрі ұлттық компания инвестиция алдындағы дайындықты (алдын ала барлау, технологияларды іріктеу, ТЭН әзірлеу) бастайды, содан кейін дербес немесе серіктестермен бірлесіп игеруге кіріседі. Осы процеске кірмеген учаскелер аукциондарға беріледі. Аталған тетік бойынша елімізде Қаратас (мыс), Жосабай (алтын), Солтүстік Қатпар, Жоғарғы Қайрақты (вольфрам) кен орындарында пилоттық жобалар іске асырылуда. Келесі жоба өткен жылы Қарағанды облысында ашылған және жартылай өткізгіштер мен қуатты магниттер өндірісінде пайдаланылатын жерде сирек кездесетін металдардың қомақты қорлары бар Күйректікөл кен орнын қарастырады. Жобаны іске асыру экономиканың аралас жоғары технологиялық салаларын дамытуға да ықпал етеді. 2024 жылы Қазақстанда барлығы 38 перспективалы ҚПҚ (қатты пайдалы қазбалар) алаңы анықталды.

Бұдан бөлек, геологиялық барлауға инвестициялар тарту мәселелері қаралды. Соңғы 6 жылда ҚПҚ барлауға жеке инвесторлар салымдарының көлемі үш есеге өсіп, 2024 жылы 100 млрд теңгені құрады. Сонымен қатар геологиялық барлауға мемлекеттік инвестициялар жеткіліксіз деңгейде.

🔵 Премьер-министр инвестицияларды тарту, тиісті инфрақұрылымды дамыту және жер қойнауын зерттеуде жаңа ғылыми тәсілдерді енгізу жөніндегі алдағы жұмыстарға баса назар аударды. Тиісті Министрлікке және «Самұрық-Қазына» ҰӘҚ-ға елдің минералды-шикізат базасын кешенді дамытуға бағытталған цикл құру жөніндегі бірлескен шараларды күшейту тапсырылды. Қаржы министрлігіне геологиялық барлауды мемлекеттік қаржыландыруды ұлғайту үшін қаражат іздеу жөнінде тапсырма берілді.