“Биз инсоният тарихининг мураккаб бир даврида учрашиб турибмиз. Инқирозлар бир минтақадан бошқаларига тарқалмоқда. Жиноятчиликнинг шакли ҳам ўзгарди: у чегараларни осон кесиб ўтмоқда, янги технологиялардан фойдаланмоқда ва унга қарши кураш учун яратилган тизимлардан-да кўра тезкорлик билан мослашувчанлигини намоён этмоқда.

Аммо бу ўзгаришларнинг ҳар бири ортида кўз юмиб бўлмайдиган оддий ҳақиқат — Инсон тақдири турибди. Бу — унинг асоратини ўз бошидан кечирган оила. Интернетда эксплуатацияга учраган бола. Дардини айтса, сукут сақлаганидан кўра оғирроқ оқибатларга дуч келишидан қўрқиб, узоқ вақт жим яшаган аёл. Ўзини ҳимоя қилиши лозим бўлганларга ишончини аста-секин йўқотган жамият.

Бугун биз мана шу масъулият билан ушбу залда турибмиз. Жиноятчиликнинг олдини олиш ва одил судлов тушунчалари инсонлардан йироқ, мавҳум иборалар бўлиб қолмаслиги керак. Улар ҳар бир инсон ҳаётига кириб бориши лозим. Акс ҳолда, ҳеч қандай маъноси қолмайди”.

"Бугун шунақа қарорлар қабул қилишимиз керакки, улар янги имкониятларни яратиб, кейинги авлодлар учун тинч, барқарор ва янада адолатли келажакни шакллантирсин!" – Саида Мирзиёева.