Prezidentning 2026-yil 19-oktabrdagi PQ–379-son qaroriga muvofiq, barcha ta’lim tashkilotlarining pedagoglari va o‘quvchilari (talabalari) bir o‘quv yilida kamida bir marta maqsadli psixologik diagnostikadan o‘tkaziladi.

Tizim ikki bosqichda joriy etiladi:
— 2026/2027 o‘quv yilidan maktabgacha va umumiy o‘rta ta’lim tashkilotlarida;
— 2027/2028 o‘quv yilidan o‘rta maxsus, kasbiy va oliy ta’lim tashkilotlarida.

Diagnostika maxsus elektron platformada o‘tkaziladi, shaxsga doir ma’lumotlar va natijalarning sir saqlanishi ta’minlanadi. Natijalarga ko‘ra ishtirokchilar “psixologik barqaror”, “psixologik qo‘llab-quvvatlashga muhtoj” va “faol psixologik qo‘llab-quvvatlash zarur” guruhlariga ajratiladi. Ikkinchi guruhga ta’lim tashkiloti psixologi, uchinchi guruhga hududiy mentor psixolog biriktiriladi.